Wisdom 7 — Coptic (Sahidic)

1 ⲁⲛⲅⲟⲩⲣⲱⲙⲉ ⲡⲉ ϩⲱⲱⲧ ⲛⲧϩⲉ ⲛⲟⲩⲟⲛ ⲛⲓⲙ ⲟⲩϫⲡⲟ ⲉⲃⲟⲗ ϩⲛⲡⲣⲙⲛⲕⲁϩ ⲉⲛⲧⲁⲩⲡⲗⲁⲥⲥⲉ ⲙⲙⲟϥ ⲛϣⲟⲣⲡ ⲉⲁⲩⲙⲟⲛⲅⲧ ⲛⲥⲁⲣⲝ ⲛϩⲏⲧⲥ ⲛⲧⲁⲙⲁⲁⲩ

2 ⲁⲓⲧⲱⲕ ϩⲛⲟⲩⲥⲛⲟϥ ⲙⲙⲏⲧ ⲛⲉⲃⲟⲧ ⲉⲃⲟⲗ ϩⲛⲟⲩⲥⲡⲉⲣⲙⲁ ⲛⲣⲱⲙⲉ ⲉⲁⲥⲉⲓ ⲉϩⲟⲩⲛ ⲉⲣⲟϥ ϩⲙⲡⲉⲛⲕⲟⲧⲕ ϩⲛⲟⲩϩⲏⲇⲟⲛⲏ

3 ⲛⲧⲉⲣⲓϣⲱⲡⲉ ⲇⲉ ⲁⲓϩⲱⲛ ⲉⲃⲟⲗ ⲉⲡⲁⲏⲣ ⲁⲓϩⲉ ⲉϩⲣⲁⲓ ⲉϫⲙⲡⲉⲓⲕⲁϩ ⲟⲩⲱⲧ ⲁⲓϯ ⲛⲧϣⲟⲣⲡ ⲛⲥⲙⲏ ⲉⲓⲣⲓⲙⲉ ⲛⲧϩⲉ ⲛⲟⲩⲟⲛ ⲛⲓⲙ

4 ⲁⲩⲥⲁⲛⲟⲩϣⲧ ϩⲛϩⲛⲧⲟⲉⲓⲥ ⲙⲛϩⲉⲛⲣⲟⲟⲩϣ

5 ⲙⲛⲗⲁⲁⲩ ⲅⲁⲣ ⲛⲣⲣⲟ ⲉⲩⲛⲧϥ ⲕⲉϩⲟⲩⲉⲓⲧⲉ ⲛϫⲡⲟ

6 ⲟⲩϭⲓⲛⲉⲓ ⲛⲟⲩⲱⲧ ⲧⲉ ⲛⲟⲩⲟⲛ ⲛⲓⲙ ⲉϩⲟⲩⲛ ⲉⲡⲕⲟⲥⲙⲟⲥ ⲁⲩⲱ ⲟⲩϭⲓⲛⲃⲱⲕ ⲉⲃⲟⲗ

7 ⲉⲧⲃⲉⲡⲁⲓ ⲁⲓϣⲗⲏⲗ ⲁⲩϯ ⲛⲁⲓ ⲛⲟⲩⲙⲛⲧⲣⲙⲛϩⲏⲧ ⲁⲓⲉⲡⲓⲕⲁⲗⲉⲓ ⲁϥⲉⲓ ⲛⲁⲓ ⲛϭⲓⲟⲩⲡⲛⲉⲩⲙⲁ ⲛⲥⲟⲫⲓⲁ

8 ⲁⲓⲥⲟⲧⲡⲥ ⲉⲛⲉϭⲣⲏⲡⲉ ⲙⲛⲛⲉⲑⲣⲟⲛⲟⲥ ⲙⲡⲓⲛⲧⲙⲛⲧⲣⲙⲙⲁⲟ ⲛⲙⲙⲁⲥ ⲛⲧϩⲉ ⲛⲟⲩⲗⲁⲁⲩ

9 ⲟⲩⲇⲉ ⲡⲱⲛⲉ ⲙⲙⲉ ⲙⲡⲓⲧⲛⲧⲱⲛϥ ⲉⲣⲟⲥ ϫⲉⲡⲛⲟⲩⲃ ⲧⲏⲣϥ ⲛⲛⲁϩⲣⲁⲥ ⲉϥⲟ ⲛⲧϩⲉ ⲛⲟⲩϣⲏⲙ ⲛϣⲱ ⲁⲩⲱ ⲉⲣⲉⲡϩⲁⲧ ⲙⲡⲉⲥⲙⲧⲟ ⲉⲃⲟⲗ ⲛⲧϩⲉ ⲛⲟⲩⲟⲙⲉ

10 ⲁⲓⲙⲉⲣⲓⲧⲥ ⲉϩⲟⲩⲟ ⲉⲟⲩϫⲣⲟ ⲙⲛⲟⲩⲥⲁ ⲁⲓⲥⲟⲧⲡⲥ ⲉⲕⲁⲁⲥ ⲛⲁⲓ ⲉⲡⲙⲁ ⲙⲡⲟⲩⲟⲉⲓⲛ ϫⲉⲡⲉⲥⲟⲩⲟⲉⲓⲛ ⲛⲧⲟⲥ ⲙⲉϥⲛⲕⲟⲧⲕ

11 ⲁⲩⲉⲓ ⲇⲉ ⲛⲁⲓ ⲛⲙⲙⲁⲥ ⲛϭⲓⲛⲁⲅⲁⲑⲟⲛ ⲧⲏⲣⲟⲩ ϩⲓⲟⲩⲥⲟⲡ ⲁⲩⲱ ⲟⲩⲙⲛⲧⲣⲙⲙⲁⲟ ⲉⲛⲁϣⲱⲥ ϩⲛⲛⲉⲥϭⲓϫ

12 ⲁⲓⲣⲁϣⲉ ⲇⲉ ⲉϫⲱⲟⲩ ⲧⲏⲣⲟⲩ ϫⲉⲧⲥⲟⲫⲓⲁ ⲧⲉⲧϫⲓⲙⲟⲉⲓⲧ ϩⲏⲧⲟⲩ ⲛⲉⲓⲥⲟⲟⲩⲛ ⲇⲉ ⲁⲛ ⲡⲉ ϫⲉⲛⲧⲟⲥ ⲁⲥϫⲡⲟⲟⲩ ⲧⲏⲣⲟⲩ

13 ⲁⲓⲥⲃⲟ ⲁϫⲛⲕⲣⲟϥ ϯⲛⲁϯ ⲁϫⲛⲫⲑⲟⲛⲟⲥ ⲛϯⲛⲁϩⲱⲡ ⲁⲛ ⲛⲧⲉⲥⲙⲛⲧⲣⲙⲙⲁⲟ

14 ⲟⲩⲁϩⲟ ⲅⲁⲣ ⲛⲛⲣⲱⲙⲉ ⲡⲉ ⲉⲙⲉϥⲱϫⲛ ⲛⲉⲛⲧⲁⲩⲭⲣⲱ ⲙⲙⲟⲥ ⲁⲩⲣϣⲃⲏⲣ ⲉⲡⲛⲟⲩⲧⲉ ⲁⲩⲥⲩⲛϩⲓⲥⲧⲁ ⲙⲙⲟⲟⲩ ⲉⲧⲃⲉⲛⲇⲱⲣⲟⲛ ⲛⲧⲉⲥⲃⲱ

15 ⲉⲣⲉⲡⲛⲟⲩⲧⲉ ⲇⲉ ϯ ⲛⲁⲓ ⲉϫⲟⲟⲩ ⲕⲁⲧⲁⲧⲁⲅⲛⲱⲙⲏ ⲁⲩⲱ ⲉⲙⲉⲉⲩⲉ ⲕⲁⲧⲁⲡⲉⲙⲡϣⲁ ⲛⲛⲉⲧϥⲛⲁⲧⲁⲁⲩ ϫⲉⲛⲧⲟϥ ⲡⲉⲧϫⲓⲙⲟⲉⲓⲧ ϩⲏⲧⲥ ⲛⲧⲥⲟⲫⲓⲁ ⲁⲩⲱ ⲡⲉⲧϯⲥⲃⲱ ⲛⲛⲥⲟⲫⲟⲥ

16 ⲉⲛϣⲟⲟⲡ ⲅⲁⲣ ϩⲛⲧⲉϥϭⲓϫ ⲁⲛⲟⲛ ⲙⲛⲛⲉⲛⲕⲉϣⲁϫⲉ ⲁⲩⲱ ⲙⲛⲧⲣⲙⲛϩⲏⲧ ⲛⲓⲙ ⲙⲛⲧⲉⲥⲃⲱ ⲛⲛⲉϩⲃⲏⲩⲉ

17 ⲛⲧⲟϥ ⲅⲁⲣ ⲁϥϯ ⲛⲁⲓ ⲙⲡⲥⲟⲟⲩⲛ ⲙⲙⲉ ⲛⲛⲉⲧϣⲟⲟⲡ ⲉⲥⲟⲩⲛⲡⲧⲱϣ ⲙⲡⲕⲟⲥⲙⲟⲥ ⲙⲛⲧⲉⲛⲉⲣⲅⲉⲓⲁ ⲛⲛⲉⲥⲧⲟⲓⲭⲓⲟⲛ

18 ⲧⲉϩⲟⲩⲉⲓⲧⲉ ⲙⲛⲧϩⲁⲏ ⲙⲛⲧⲙⲏⲧⲉ ⲛⲛⲥⲏⲟⲩ ⲛϣⲓⲃⲉ ⲛⲛⲁⲏⲣ ⲙⲛⲙⲙⲉⲧⲁⲃⲟⲗⲏ ⲛⲛⲉⲟⲩⲟⲉⲓϣ

19 ⲛⲕⲩⲕⲗⲟⲥ ⲛⲧⲉⲣⲟⲙⲡⲉ ⲙⲛⲛⲉⲥⲙⲓⲛⲉ ⲛⲛⲥⲓⲟⲩ

20 ⲛⲉⲫⲩⲥⲓⲥ ⲛⲛⲍⲱⲟⲛ ⲙⲛⲡϭⲱⲛⲧ ⲛⲛⲉⲑⲏⲣⲓⲟⲛ ⲡⲉⲛϣⲟⲧ ⲛⲛⲧⲏⲩ ⲙⲛⲙⲙⲟⲕⲙⲉⲕ ⲛⲛⲣⲱⲙⲉ ⲛϣⲓⲃⲉ ⲛⲛϣⲏⲛ ⲙⲛⲧϭⲟⲙ ⲛⲛⲉⲛⲧⲏϭ

21 ⲛⲉⲧϩⲏⲡ ⲙⲛⲛⲉⲧⲟⲩⲟⲛϩ ⲉⲃⲟⲗ ⲁⲓⲥⲟⲩⲱⲛⲟⲩ ⲧⲥⲟⲫⲓⲁ ⲅⲁⲣ ⲉⲛⲧⲁⲥⲧⲁⲙⲓⲟⲟⲩ ⲧⲏⲣⲟⲩ ⲁⲥⲧⲥⲁⲃⲟⲓ ⲉⲣⲟⲟⲩ

22 ⲟⲩⲛ ⲟⲩⲡⲛⲉⲩⲙⲁ ⲅⲁⲣ ⲛϩⲏⲧⲥ ⲉϥⲟⲩⲁⲁⲃ ⲛⲣⲉϥⲛⲟⲓ ⲛⲟⲩⲥⲙⲟⲧ ⲛⲟⲩⲱⲧ ⲛⲁⲧⲉⲥⲙⲟⲧ ⲉϥⲁⲥⲱⲟⲩ ⲛⲣⲉϥⲣϩⲱⲃ ⲉϥϭⲙϭⲟⲙ ⲉϥⲟ ⲛⲁⲧⲧⲱⲗⲙ ⲛⲥⲁⲃⲉ ⲛⲁⲧⲛⲟⲃⲉ ⲙⲙⲁⲓⲁⲅⲁⲑⲟⲛ ⲉϥⲧⲟⲣϩ ⲉⲙⲉⲩϣⲁⲙⲁϩⲧⲉ ⲙⲙⲟϥ ⲛⲣⲉϥⲣⲡⲉⲧⲛⲁⲛⲟⲩϥ

23 ⲙⲙⲁⲓⲣⲱⲙⲉ ⲉϥⲧⲁϫⲣⲏⲩ ⲉϥⲟⲣϫ ⲉϥⲟ ⲛⲁⲧⲣⲟⲟⲩϣ ⲉϥϭⲙϭⲟⲙ ⲉϩⲱⲃ ⲛⲓⲙ ⲉϥϭⲱϣⲧ ⲉϫⲙⲡⲧⲏⲣϥ ⲉϥϫⲱⲧⲉ ϩⲓⲧⲛⲛⲉⲡⲛⲉⲩⲙⲁ ⲧⲏⲣⲟⲩ ⲉⲧⲟⲩⲁⲁⲃ ⲛⲣⲉϥⲛⲟⲓ ⲉⲧϣⲟⲟⲙⲉ

24 ⲧⲥⲟⲫⲓⲁ ⲅⲁⲣ ⲕⲓⲙ ⲉϩⲟⲩⲟ ⲉⲛⲉⲧⲕⲓⲙ ⲧⲏⲣⲟⲩ ⲥϫⲱⲧⲉ ⲁⲩⲱ ⲥⲛⲏⲩ ⲉⲃⲟⲗ ϩⲓⲧⲙⲡⲧⲏⲣϥ ⲉⲧⲃⲉⲡⲉⲥⲧⲃⲃⲟ

25 ⲉⲥⲛⲏⲩ ⲅⲁⲣ ⲉⲃⲟⲗ ϩⲓⲧⲛⲧϭⲟⲙ ⲙⲡⲛⲟⲩⲧⲉ ⲁⲩⲱ ⲉⲃⲟⲗ ϩⲙⲡⲉⲟⲟⲩ ⲉⲧⲟⲩⲁⲁⲃ ⲛⲧⲉⲡⲡⲁⲛⲧⲟⲕⲣⲁⲧⲱⲣ ⲉⲧⲃⲉⲡⲁⲓ ⲙⲉⲣⲉⲗⲁⲁⲩ ⲉϥϫⲁϩⲙⲧⲱⲙⲛⲧ ⲉⲣⲟⲥ

26 ⲟⲩⲉⲓⲛⲉ ⲅⲁⲣ ⲧⲉ ⲛⲧⲉⲡⲟⲩⲟⲉⲓⲛ ⲛϣⲁⲉⲛⲉϩ ⲁⲩⲱ ⲟⲩⲉⲓⲁⲗ ⲉⲥⲟⲩⲁⲁⲃ ⲛⲧⲉⲧⲉⲛⲉⲣⲅⲉⲓⲁ ⲙⲡⲛⲟⲩⲧⲉ ⲁⲩⲱ ⲧϩⲓⲕⲱⲛ ⲛⲧⲉϥⲙⲛⲧⲁⲅⲁⲑⲟⲥ

27 ⲉⲟⲩⲉⲓ ⲇⲉ ⲧⲉ ⲉⲥϭⲙϭⲟⲙ ⲉϩⲱⲃ ⲛⲓⲙ ⲁⲩⲱ ⲉⲥϭⲉⲉⲧ ϩⲁⲣⲓ ϩⲁⲣⲟⲥ ⲉⲥⲉⲓⲣⲉ ⲙⲡⲧⲏⲣϥ ⲙⲃⲣⲣⲉ ⲁⲩⲱ ⲕⲁⲧⲁⲅⲉⲛⲉⲁ ⲥⲃⲏⲕ ⲉϩⲟⲩⲛ ⲉⲛⲉⲯⲩⲭⲏ ⲛⲛⲉⲧⲟⲩⲁⲁⲃ ⲥⲉⲓⲣⲉ ⲙⲙⲟⲟⲩ ⲛϣⲃⲏⲣ ⲉⲡⲛⲟⲩⲧⲉ ⲁⲩⲱ ⲙⲡⲣⲟⲫⲏⲧⲏⲥ

28 ⲙⲡⲛⲟⲩⲧⲉ ⲅⲁⲣ ⲙⲉ ⲛⲗⲁⲁⲩ ⲁⲛ ⲉⲓⲙⲏⲧⲓ ⲡⲉⲧⲟⲩⲏϩ ϩⲛⲧⲥⲟⲫⲓⲁ

29 ⲧⲁⲓ ⲅⲁⲣ ⲛⲉⲥⲱⲥ ⲉϩⲟⲩⲟ ⲉⲡⲣⲏ ⲁⲩⲱ ⲉϩⲟⲩⲟ ⲉⲡⲉⲥⲙⲓⲛⲉ ⲛⲛⲥⲓⲟⲩ ⲧⲏⲣⲟⲩ ⲉⲩϣⲁⲛⲧⲛⲧⲱⲛⲥ ⲉⲡⲟⲩⲟⲉⲓⲛ ⲥⲛⲁⲣϣⲟⲣⲡ ⲉⲣⲟϥ

30 ⲡⲁⲓ ⲙⲉⲛ ⲅⲁⲣ ϣⲁⲣⲉⲧⲉⲩϣⲏ ⲉⲓ ⲉⲡⲉϥⲙⲁ ⲧⲥⲟⲫⲓⲁ ⲇⲉ ⲙⲉⲣⲉⲧⲕⲁⲕⲓⲁ ϭⲙϭⲟⲙ ⲉⲣⲟⲥ