Read Wisdom 6 side by side with translations · The Final Bible
1 ⲥⲱⲧⲙ ϭⲉ ⲛⲉⲣⲣⲱⲟⲩ ⲛⲧⲉⲧⲛⲛⲟⲉⲓ ϫⲓⲥⲃⲱ ⲛⲣⲉϥϯϩⲁⲡ ⲉⲁⲣⲛϫϥ ⲙⲡⲕⲁϩ
2 ϫⲓⲥⲙⲏ ⲛⲉⲧⲁⲙⲁϩⲧⲉ ⲉϫⲛⲛⲓⲙⲏⲏϣⲉ ⲛⲉⲧϣⲟⲩϣⲟⲩ ⲙⲙⲟⲟⲩ ⲉϫⲛⲛⲓⲁϣⲏ ⲛϩⲉⲑⲛⲟⲥ
3 ϫⲉⲛⲧⲁⲩϯⲡⲁⲙⲁϩⲧⲉ ⲛⲏⲧⲛ ⲉⲃⲟⲗ ϩⲓⲧⲙⲡϫⲟⲉⲓⲥ ⲁⲩⲱ ⲧϭⲟⲙ ⲉⲃⲟⲗ ϩⲓⲧⲙⲡⲉⲧϫⲟⲥⲉ
4 ⲡⲁⲓ ⲉⲧⲛⲁϣⲓⲛⲉ ⲛⲥⲁⲛⲉⲧⲛϩⲃⲏⲩⲉ ⲛϥϩⲟⲧϩⲧ ⲛⲥⲁⲛⲉⲧⲛϣⲟϫⲛⲉ
5 ϫⲉⲉⲧⲉⲧⲛⲟ ⲛϩⲩⲡⲏⲣⲉⲧⲏⲥ ⲛⲧⲉϥⲙⲛⲧⲣⲣⲟ ⲙⲡⲉⲧⲛⲕⲣⲓⲛⲉ ϩⲛⲟⲩⲥⲟⲟⲩⲧⲛ ⲟⲩⲇⲉ ⲙⲡⲉⲧⲛⲁⲣⲉϩ ⲉⲡⲉϥⲛⲟⲙⲟⲥ ⲟⲩⲇⲉ ⲙⲡⲉⲧⲛⲙⲟⲟϣⲉ ⲕⲁⲧⲁⲡϣⲟϫⲛⲉ ⲙⲡⲛⲟⲩⲧⲉ
6 ⲟⲩⲛ ⲟⲩϩⲟⲧⲉ ⲛⲏⲩ ⲉϩⲣⲁⲓ ⲉϫⲱⲧⲛ ϫⲉⲟⲩⲛⲟⲩⲕⲣⲓⲥⲓⲥ ⲉⲥϣⲱⲱⲧ ⲉⲃⲟⲗ ⲛⲁϣⲱⲡⲉ ⲛⲛⲛⲟϭ
7 ⲛⲕⲟⲩⲓ ⲅⲁⲣ ⲙⲡϣⲁ ⲛⲟⲩⲛⲁ ⲛϫⲱⲱⲣⲉ ⲇⲉ ⲛⲧⲟⲟⲩ ⲥⲉⲛⲁϩⲉⲧⲁⲍⲉ ⲙⲙⲟⲟⲩ ⲉⲙⲁⲧⲉ
8 ⲡϫⲟⲉⲓⲥ ⲅⲁⲣ ⲙⲡⲧⲏⲣϥ ⲛⲁϫⲓϩⲟ ⲁⲛ ⲟⲩⲇⲉ ⲛϥⲛⲁϣⲓⲡⲉ ⲁⲛ ϩⲏⲧⲟⲩ ⲛⲛⲛⲟϭ ϫⲉⲛⲕⲟⲩⲓ ⲙⲛⲛⲛⲟϭ ⲛⲧⲟϥ ⲁϥⲧⲁⲙⲓⲟⲟⲩ ⲁⲩⲱ ⲟⲛ ϥϥⲓⲣⲟⲟⲩϣ ϩⲁⲣⲟⲟⲩ ⲧⲏⲣⲟⲩ
9 ⲛⲉⲧϫⲟⲟⲣ ⲇⲉ ⲥⲉⲛⲁϩⲉⲧϩⲱⲧⲟⲩ ⲉⲙⲁⲧⲉ
10 ⲉⲛϣⲁϫⲉ ϭⲉ ⲛⲉⲙⲏⲧⲛ ⲛⲧⲩⲣⲁⲛⲛⲟⲥ ϫⲉⲕⲁⲥ ⲉⲧⲉⲧⲛⲉⲥⲃⲟ ⲉⲧⲥⲟⲫⲓⲁ ⲛⲧⲉⲧⲛⲧⲙϩⲉ ⲉⲃⲟⲗ
11 ⲛⲉⲛⲧⲁⲩϩⲁⲣⲉϩ ⲅⲁⲣ ⲉⲙⲙⲛⲧⲙⲉ ϩⲛⲟⲩⲟⲩⲟⲡ ⲥⲉⲛⲁⲧⲙⲁⲓⲟⲟⲩ ⲁⲩⲱ ⲛⲉⲛⲧⲁⲩⲥⲃⲟ ⲉⲣⲟⲟⲩ ⲥⲉⲛⲁϩⲉ ⲉⲩⲁⲡⲟⲗⲟⲅⲓⲁ
12 ⲟⲩⲉϣⲛⲁϣⲁϫⲉ ϭⲉ ⲛⲧⲉⲧⲛⲙⲉⲣⲓⲧⲟⲩ ⲧⲁⲣⲉⲧⲛϫⲓⲧⲉⲥⲃⲱ
13 ⲟⲩⲟⲉⲓⲛ ⲧⲉ ⲧⲥⲟⲫⲓⲁ ⲉⲙⲉⲥϩⲱϭⲃ ⲁⲩⲱ ϣⲁⲩⲛⲁⲩ ⲉⲣⲟⲥ ⲁϫⲛⲙⲕⲁϩ ⲛϭⲓⲛⲉⲧⲙⲉ ⲙⲙⲟⲥ ϣⲁⲩϩⲉ ⲉⲣⲟⲥ ⲛϭⲓⲛⲉⲧϣⲓⲛⲉ ⲛⲥⲱⲥ
14 ϣⲁⲥⲣϣⲟⲣⲡ ⲉⲟⲩⲱⲛϩ ⲛⲛⲉⲧⲉⲡⲓⲑⲩⲙⲉⲓ ⲉⲣⲟⲥ
15 ⲡⲉⲧⲛⲁϣⲟⲣⲡϥ ⲉⲣⲟⲥ ⲛϥⲛⲁϩⲓⲥⲉ ⲁⲛ ϥⲛⲁϩⲉ ⲅⲁⲣ ⲉⲣⲟⲥ ⲉⲥⲁϩⲉⲣⲁⲧⲥ ϩⲓⲣⲛ ⲛⲉϥⲣⲟ
16 ⲡⲣⲡⲙⲉⲉⲩⲉ ⲅⲁⲣ ⲉⲣⲟⲥ ⲟⲩⲙⲛⲧⲣⲙⲛϩⲏⲧ ⲧⲉ ⲉⲥϫⲏⲕ ⲉⲃⲟⲗ ⲁⲩⲱ ⲡⲉⲛⲧⲁϥⲣⲟⲩϣⲏ ⲛⲣⲟⲉⲓⲥ ⲉⲧⲃⲏⲧⲥ ⲛⲁⲣⲁⲧⲣⲟⲟⲩϣ ϩⲛⲟⲩϭⲉⲡⲏ
17 ϫⲉⲛⲧⲟⲥ ϣⲁⲥⲙⲟⲟϣⲉ ⲉⲥϣⲓⲛⲉ ⲛⲥⲁⲛⲉⲧⲙⲡϣⲁ ⲙⲙⲟⲥ ⲛⲥⲟⲩⲱⲛϩ ⲉⲣⲟⲟⲩ ϩⲓⲛⲉϩⲓⲟⲟⲩⲉ ⲉⲥⲛⲟⲧⲙ ⲛⲥⲧⲱⲙⲛⲧ ⲉⲣⲟⲟⲩ ϩⲛϣⲟϫⲛⲉ ⲛⲓⲙ
18 ⲧⲉⲥϩⲟⲩⲉⲓⲧⲉ ⲅⲁⲣ ⲧⲉ ⲧⲉⲡⲓⲑⲩⲙⲓⲁ ⲛⲧⲉⲥⲃⲱ ⲙⲙⲉ
19 ⲡⲣⲟⲟⲩϣ ⲇⲉ ⲛⲧⲉⲥⲃⲱ ⲡⲉ ⲧⲁⲅⲁⲡⲏ ⲧⲁⲅⲁⲡⲏ ⲇⲉ ⲡⲉ ⲡϩⲁⲣⲉϩ ⲉⲡⲉⲥⲛⲟⲙⲟⲥ ⲛϯϩⲧⲏⲕ ⲇⲉ ⲉⲡⲛⲟⲙⲟⲥ ⲡⲉ ⲡⲧⲁϫⲣⲟ ⲛⲧⲙⲛⲧⲁⲧⲧⲁⲕⲟ
20 ⲧⲙⲛⲧⲁⲧⲧⲁⲕⲟ ⲇⲉ ϣⲁⲥⲧⲣⲉⲩϩⲱⲛ ⲉϩⲟⲩⲛ ⲉⲡⲛⲟⲩⲧⲉ
21 ⲧⲉⲡⲓⲑⲩⲙⲓⲁ ϭⲉ ⲛⲧⲥⲟⲫⲓⲁ ⲛⲁϫⲓⲧⲟⲩ ⲉϩⲟⲩⲛ ⲉⲡⲱⲛϩ ⲉϩⲟⲩⲛ ⲉⲧⲙⲛⲧⲣⲣⲟ
22 ⲉϣϫⲉ ⲧⲉⲧⲛⲙⲉ ϭⲉ ⲛⲛⲉⲑⲣⲟⲛⲟⲥ ⲙⲛⲛⲉϭⲣⲏⲡⲉ ⲛⲧⲩⲣⲁⲛⲛⲟⲥ ⲛⲛⲗⲁⲟⲥ
23 ⲙⲁⲧⲁⲓⲉⲧⲥⲟⲫⲓⲁ ϫⲉⲉⲧⲉⲧⲛⲉⲣⲣⲣⲟ ϣⲁⲉⲛⲉϩ
24 ⲟⲩ ⲇⲉ ⲡⲉ ⲧⲥⲟⲫⲓⲁ ⲁⲩⲱ ⲛⲧⲁⲥϣⲱⲡⲉ ⲛⲁϣ ⲛϩⲉ ϯⲛⲁϫⲟⲟⲥ ⲁⲩⲱ ⲛϯⲛⲁϩⲱⲡ ⲁⲛ ⲉⲣⲱⲧⲛ ⲙⲡⲉⲓⲙⲩⲥⲧⲏⲣⲓⲟⲛ ⲁⲗⲗⲁ ϯⲛⲁϩⲉⲧϩⲱⲧⲥ ϫⲓⲛⲧⲉϩⲟⲩⲉⲓⲧⲉ ⲙⲡⲉⲥⲧⲁⲙⲓⲟ ⲛⲧⲁⲟⲩⲱⲛϩ ⲉⲃⲟⲗ ⲙⲡⲉⲥⲥⲟⲟⲩⲛ ⲛ ϯⲛⲁⲣⲡⲃⲟⲗ ⲁⲛ ⲛⲧⲙⲉ
25 ⲟⲩⲇⲉ ⲛⲛⲁⲃⲱⲕ ⲙⲛⲡⲉⲕⲣⲟϥ ...ϩⲟⲟⲩ ϫⲉⲙⲡⲁⲓ ⲕⲟⲓⲛⲱⲛⲓ ⲁⲛ ⲙⲛⲧⲥⲟⲫⲓⲁ
26 ⲟⲩⲟⲩϫⲁⲓ ⲙⲡⲕⲟⲥⲙⲟⲥ ⲡⲉ ⲡⲁϣⲏ ⲛⲛⲥⲟⲫⲟⲥ ⲁⲩⲱ ⲟⲩⲣⲣⲟ ⲛⲥⲁⲃⲉ ⲡⲉ ⲡⲉⲥⲙⲓⲛⲉ ⲙⲡⲙⲏⲏϣⲉ
27 ϫⲓⲥⲃⲱ ϭⲉ ⲉⲛⲁϣⲁϫⲉ ⲧⲁⲣⲉⲧⲛϯϩⲏⲟⲩ
Wisdom 5 · Wisdom 7 · Greek (Septuagint / SBLGNT) · Aramaic (Peshitta) · Latin (Vulgate)