Read Wisdom 7 side by side with translations · The Final Bible
1 ܡܛܠ ܕܐܦ ܐܢܐ ܐܝܬܝ ܒܪ ܐܢܫܐ ܡܝܘܬܐ ܕܫܘܐ ܥܠ ܟܠ ܐܢܫ ܒܪܗ ܕܩܕܡܝܐ ܐܝܠܝܕ ܐܪܥܐ ܘܒܟܪܣܗ̇ ܕܐܡܝ ܐܬܓܒܠܬ ܒܣܪܐ
2 ܘܥܣܪ̈ܐ ܝܪ̈ܚܝܢ ܙܒܢܐ ܐܬܩܒܥܬ ܒܕܡܐ ܡܢ ܙܪܥܐ ܕܓܒܪܐ ܘܡܢ ܪܓܬܐ ܕܡܕܡܟܐ
3 ܘܟܕ ܐܬܝܠܕܬ ܒܙܥܬ ܐܐܪ ܕܓܘܐ ܘܐܝܟ ܟܠܢܫ ܥܠ ܐܪܥܐ ܢܦܠܬ ܘܩܠܐ ܩܕܡܝܐ ܐܝܟ ܟܠ ܐܢܫ ܫܪܝܬ ܠܡܒܟܐ
4 ܘܒܥܙܪ̈ܘܪܐ ܝܨܝܦܐܝܬ ܐܬܟܪܟܬ
5 ܠܐ ܓܝܪ ܡܡܬܘܡ ܗܘܬ ܬܘܠܕܬܐ ܐܚܪܬܐ ܠܡܠܟ ܐܘ ܠܫܠܝܛ
6 ܚܕ ܗܘ ܓܝܪ ܡܥܠܢܐ ܕܟܠ ܐܢܫ ܠܥܠܡܐ ܘܡܦܩܢܐ ܫܘܝܐܝܬ ܚܕ
7 ܡܛܠ ܗܢܐ ܨܠܝܬ ܘܐܬܝܗܒܬ ܠܝ ܪܘܚܐ ܕܚܟܡܬܐ ܘܩܪܝܬ ܘܐܬܬ ܠܝ ܪܘܚܐ ܕܐܝܕܥܬܐ
8 ܨܒܝܬ ܒܗ̇ ܝܬܝܪ ܡܢ ܫܒ̈ܛܐ ܘܟܘܪ̈ܣܘܬܐ ܘܠܐ ܦܚܡܬ ܥܘܬܪܐ ܠܩܘܒܠܗ̇
9 ܘܠܐ ܕܡܝܬܗ̇ ܠܟܐܦܐ ܝܩܝܪܬ ܕܡ̈ܝܐ ܡܛܠ ܕܟܠܗ ܕܗܒܐ ܩܕܡܝܗ̇ ܐܝܟ ܩܠܝܠ ܥܦܪܐ ܘܐܝܟ ܛܝܢܐ ܚܫܝܒ ܟܣܦܐ ܩܕܡܝܗ̇
10 ܪܚܡܬܗ̇ ܝܬܝܪ ܡܢ ܫܘܦܪܐ ܘܡܢ ܚܠܝܡܘܬܐ ܓܒܝܬܗ̇ ܝܬܝܪ ܡܢ ܢܘܗܪܐ ܡܛܠ ܕܠܐ ܕܡܟ ܢܘܗܪܗ̇ ܕܝܠܗ̇ ܕܚܟܡܬܐ
11 ܐܬ̈ܝ ܠܝ ܕܝܢ ܟܠܗܝܢ ܛܒ̈ܬܐ ܐܟܚܕܐ ܥܡܗ̇ ܘܥܘܬܪܐ ܕܠܐ ܡܬܡܢܐ ܒܐ̈ܝܕܝܗ̇
12 ܘܐܬܒܣܡܬ ܒܗܠܝܢ ܟܠܗܝܢ ܕܚܟܡܬܐ ܡܕܒܪܐ ܠܗܝܢ ܘܠܐ ܝܕܥ ܗܘܝܬ ܕܩܕܡܝܐ ܗܝ ܡܢ ܟܠ
13 ܕܠܐ ܢܟܠܐ ܝܠܦܬ ܘܕܠܐ ܚܣܡܐ ܝܗܒ ܐܢܐ ܘܠܐ ܐܟܣܐ ܡܢܟܘܢ ܥܘܬܪܗ̇
14 ܡܛܠ ܕܐܘܨܪܐ ܗܝ ܠܒܢ̈ܝ ܐܢܫܐ ܕܠܐ ܓܡܪ ܗ̇ܢܘܢ ܕܩܢܐܘܗ̇ ܥܒܕܘ ܪܚܡܘܬܐ ܠܘܬ ܐܠܗܐ ܡܛܠ ܕܒܡܪܕܘܬܐ ܕܡܓܢ ܩܡܘ
15 ܠܝ ܕܝܢ ܢܬܠ ܐܠܗܐ ܕܐܡܪ ܒܡܠ̣ܟܐ ܐܦ ܐܬܚܫܒ ܫܘܝܐܝܬ ܥܠ ܐܝܠܝܢ ܕܡܬ̈ܡܠܠܢ ܡܛܠ ܕܗܘܝܘ ܡܕܒܪܢܗ̇ ܕܚܟܡܬܐ ܘܠܚ̈ܟܝܡܐ ܗܘ ܡܬܪܨ
16 ܘܒܐܝܕܗ ܐܝܬܝܢ ܚܢܢ ܘܡ̈ܠܝܢ ܟܠ ܚܟܡܬܐ ܘܝܕܥܬܐ ܘܥܒ̈ܕܐ
17 ܗܘܝܘ ܓܝܪ ܝܗܒ ܠܝ ܐܝܕܥܬܐ ܕܠܐ ܕܓܠܘܬܐ ܠܡܕܥ ܐܝܟܢܐ ܩܡ ܥܠܡܐ ܘܥܒܕܗܝܢ ܕܡܘܙ̈ܠܬܐ
18 ܫܘܪܝܐ ܘܫܘܠܡܐ ܘܡܨܥܬܗܘܢ ܕܙܒ̈ܢܐ ܫ̈ܘܚܠܦܐ ܕܨܒ̈ܘܬܐ ܘܕܐܝܟܢܐ ܥܒܪܝܢ ܙܒ̈ܢܐ
19 ܪܗܛܗܝܢ ܕܫܢ̈ܝܐ ܘܩܒܥܗܘܢ ܕܟ̈ܘܟܒܐ
20 ܟܝܢܐ ܕܒܥܝܪܐ ܘܚܡܬܐ ܕܚܝ̈ܘܬܐ ܥܘܙܗܝܢ ܕܪ̈ܘܚܐ ܘܡܚܫ̈ܒܬܗܘܢ ܕܒܢ̈ܝ ܐܢܫܐ ܓܢܣ̈ܐ ܕܢܨ̈ܒܬܐ ܘܚܝܠܗܘܢ ܕܥܩܪ̈ܐ
21 ܟܠ ܡܕܡ ܕܟܣܐ ܘܟܠܡܕܡ ܕܓܠܐ ܝܕܥܬ
22 ܡܛܠ ܕܗܝ ܕܒܟܠ ܡܕܡ ܐܘܡܢܝܐ ܐܠܦܬܢܝ ܚܟܡܬܐ ܐܝܬ ܒܗ̇ ܓܝܪ ܪܘܚܐ ܕܐܝܕܥܬܐ ܩܕܝܫܬܐ ܐܝܚܝܕܝܬܐ ܩܛܝܢܬܐ ܣܓܝܐܬ ܡܢ̈ܘܢ ܫܦܝܪ ܡܬܬܙܝܥܐ ܢܨܝܚܬ ܩܠܐ ܕܠܐ ܛܘܠܫܐ ܚܟܝܡܐ ܘܫܪܝܪܐ ܘܠܐ ܡܬܪܟܢܐ ܪܚܡܐ ܛܒܬ̈ܐ ܘܚܟܝܡܐ ܘܠܐ ܡܬܢܟܠܐ ܡܘܬܪܢܝܐ
23 ܪܚܡܐ ܒܢ̈ܝ ܐܢܫܐ ܬܩܝܦܐ ܫܪܝܪܐ ܘܕܠܐ ܨܦܬܐ ܗܝ ܚܝܠܬܢܝܐ ܘܟܠ ܡܨܝܐ ܘܠܟܠ ܗܝ ܣܥܪܐ ܣܟܘܠܬܢܝܐ ܕܟܝܐ ܘܠܟܠ ܪ̈ܘܚܐ ܐܚܝܕܐ ܩܛܝܢܐ ܗܝ ܘܢܗܝܪܐ
24 ܒܟܠ ܗ̈ܘܦܟܝܢ ܡܬܗܦܟܐ ܚܟܡܬܐ ܘܡܬܕܒܪܐ ܗܕܐ ܗܝ ܕܠܥܠ ܐܚܝܕܐ ܡܛܠ ܕܟܝܘܬܗ̇
25 ܗܒܠܐ ܗܝ ܕܚܝܠܗ ܕܐܠܗܐ ܘܩܝܡܐ ܒܬܫܒܘܚܬܗ ܕܐܠܗܐ ܐܚܝܕ ܟܠ ܕܠܐ ܫܘܩܪܐ ܗܝ ܡܛܠ ܗܢܐ ܡܕܡ ܕܡܣܝܒ ܒܓܘܗ̇ ܠܐ ܢܦܠ
26 ܙܝܘܐ ܗܝ ܕܢܘܗܪܐ ܚܟܡܬܐ ܘܠܐ ܡܬܚܒܠܐ ܡܚܙܝܬܐ ܗܝ ܕܫܘܒܚܐ ܠܟܠܗܘܢ ܥܒ̈ܕܘܗܝ ܕܐܠܗܐ ܘܨܘܪܬܐ ܗܝ ܕܛܝܒܘܬܗ
27 ܚܕܐ ܗܝ ܘܡܨܝܐ ܠܟܠ ܘܡܩܘܝܐ ܘܟܠ ܒܗ̇ ܡܬܚܕܬ ܘܒܟܠ ܕܪ ܡܫܝܢܐ ܢܦܫ̈ܬܗܘܢ ܕܚܣ̈ܝܐ ܪ̈ܚܡܘܗܝ ܕܐܠܗܐ ܘܢܒ̈ܝܐ ܗܝ ܡܬܩܢܐ
28 ܠܐ ܓܝܪ ܪܚܡ ܐܠܗܐ ܐܠܐ ܠܐܝܠܝܢ ܕܥܡܪܐ ܒܗܘܢ ܗܝ ܚܟܡܬܐ
29 ܐܝܬܝܗ̇ ܓܝܪ ܗܕܐ ܝܐܝܐ ܡܢ ܫܡܫܐ ܘܝܬܝܪ ܡܢ ܟܘܠܗ ܩܒܥܗܘܢ ܕܟܘ̈ܟܒܐ ܕܢܬ ܥܡ ܢܗܝܪܐ ܘܐܫܬܟܚܬ ܕܩܕܡܝܐ ܗܝ ܡܢܗ
30 ܘܡܢ ܒܬܪܗ̇ ܗܘܐ ܠܠܝܐ ܥܠ ܚܟܡܬܐ ܓܝܪ ܠܐ ܡܡܠܟܐ ܥܠܝܗ̇ ܒܝܫܬܐ
Wisdom 6 · Wisdom 8 · Greek (Septuagint / SBLGNT) · Latin (Vulgate) · Coptic (Sahidic)