Wisdom 8 — Coptic (Sahidic)

1 ⲥϫⲱⲧⲉ ⲇⲉ ϫⲓⲛⲕⲣⲟ ⲉⲕⲣⲟ ϩⲛⲟⲩⲙⲛⲧϫⲱⲱⲣⲉ ⲁⲩⲱ ⲥⲧⲱϣ ⲙⲡⲧⲏⲣϥ ϩⲛⲟⲩⲙⲛⲧⲭⲣⲏⲥⲧⲟⲥ

2 ⲧⲁⲓ ⲇⲉ ⲛⲧⲁⲓⲟⲩⲁϣⲥ ⲁⲩⲱ ⲁⲓϩⲟⲧϩⲧ ⲛⲥⲱⲥ ϫⲓⲛⲛⲧⲁⲙⲛⲧⲕⲟⲩⲓ ⲁⲓϣⲓⲛⲉ ⲛⲥⲁϫⲓⲧⲥ ⲛⲁⲓ ⲛⲧϩⲉ ⲛⲟⲩϣⲉⲗⲉⲉⲧ ⲉⲁⲓⲙⲉⲣⲉⲡⲉⲥⲥⲁ

3 ⲥϯⲉⲟⲟⲩ ⲛⲧⲙⲛⲧⲉⲩⲅⲉⲛⲏⲥ ⲉⲩⲛⲧⲁⲥ ⲙⲙⲁⲩ ⲛⲟⲩⲙⲛⲧϣⲃⲏⲣ ϣⲁⲡⲛⲟⲩⲧⲉ ϫⲉⲡϫⲟⲉⲓⲥ ϩⲱⲱϥ ⲙⲡⲧⲏⲣϥ ⲁϥⲙⲉⲣⲓⲧⲥ

4 ⲧⲣⲉϥϫⲓϣⲟϫⲛⲉ ⲅⲁⲣ ⲧⲉ ⲛⲧⲉⲥⲃⲱ ⲙⲡⲛⲟⲩⲧⲉ ⲁⲩⲱ ⲧⲣⲉϥⲧⲱϣ ⲧⲉ ⲛⲛⲉϥϩⲃⲏⲩⲉ

5 ⲉϣϫⲉ ⲟⲩⲥⲱⲟⲩϩ ⲉϩⲟⲩⲛ ⲛⲧⲟⲩⲕⲧⲏⲙⲁ ⲉⲛⲁⲛⲟⲩϥ ⲡⲉ ⲧⲙⲛⲧⲣⲙⲙⲁⲟ ϩⲙⲡⲁϩⲉ ⲟⲩ ⲡⲉⲧⲟ ⲛⲣⲙⲙⲁⲟ ⲉⲧⲥⲟⲫⲓⲁ ⲧⲁⲓ ⲉⲧⲣϩⲱⲃ ⲉⲛⲕⲁ ⲛⲓⲙ

6 ⲉϣϫⲉ ⲉⲣⲉⲟⲩⲁ ⲛⲁⲣϩⲱⲃ ⲉⲩⲙⲛⲧⲣⲙⲛϩⲏⲧ ⲟⲩ ϩⲛⲛⲉⲧϣⲟⲟⲡ ⲡⲉⲧⲟ ⲛⲧⲉⲭⲛⲓⲧⲏⲥ ⲉϩⲟⲩⲟ ⲉⲣⲟⲥ

7 ⲉϣϫⲉ ⲟⲩⲛ ⲟⲩⲁ ⲙⲉⲓ ⲛⲧⲇⲓⲕⲁⲓⲟⲥⲩⲛⲏ ⲛⲉⲥϩⲓⲥⲉ ϩⲉⲛⲁⲣⲉⲧⲏ ⲛⲉ ϣⲁⲥⲧⲥⲁⲃⲟⲟⲩ ⲅⲁⲣ ⲉⲧⲙⲛⲧⲣⲙⲛϩⲏⲧ ⲁⲩⲱ ⲧⲙⲛⲧⲥⲁⲃⲉ ⲙⲛⲧⲇⲓⲕⲁⲓⲟⲥⲩⲛⲏ ⲙⲛⲧϭⲟⲙ ⲛⲁⲓ ⲉⲧⲉⲙⲛⲡⲉⲧⲥⲟⲧⲡ ⲉⲣⲟⲟⲩ ϩⲙⲡⲱⲛϩ ⲛⲛⲣⲱⲙⲉ

8 ⲉϣⲱⲡⲉ ⲇⲉ ⲉⲣⲉⲟⲩⲁ ⲟⲩⲉϣⲉⲓⲙⲉ ⲉϩⲁϩ ⲉⲥⲟⲟⲩⲛ ⲛⲛⲉⲛⲧⲁⲩⲟⲩⲉⲓⲛⲉ ⲁⲩⲱ ⲉⲧⲟⲛⲧⲛ ⲛⲛⲉⲧⲛⲁϣⲱⲡⲉ ⲙⲛϩⲉⲛⲕⲟⲧⲥ ⲛϣⲁϫⲉ ⲙⲛϩⲉⲛⲃⲱⲗ ⲛⲧⲟⲛⲧⲛ ⲙⲙⲁⲉⲓⲛ ⲙⲛⲛⲉϣⲡⲏⲣⲉ ⲉⲥⲉⲓⲙⲉ ⲉⲣⲟⲟⲩ ⲁⲩⲱ ⲛⲧϩⲁⲏ ⲛⲛⲉⲟⲩⲟⲉⲓϣ ⲙⲛⲛⲥⲏⲩ

9 ⲁⲓⲕⲣⲓⲛⲉ ⲇⲉ ⲉϫⲡⲉⲧⲁⲓ ⲛⲁⲓ ϩⲙⲡⲁⲱⲛϩ ⲉⲓⲥⲟⲟⲩⲛ ϫⲉⲉⲥϫⲓϣⲟϫⲛⲉ ⲛⲁⲓ ⲉⲡⲁⲅⲁⲑⲟⲛ ⲁⲩⲱ ⲥⲛⲁⲥⲗⲥⲱⲗⲧ ⲉⲃⲟⲗ ϩⲛⲛⲁⲣⲟⲟⲩϣ ⲙⲛⲛⲁⲗⲩⲡⲏ

10 ϯⲛⲁϫⲓⲉⲟⲟⲩ ⲉⲧⲃⲏⲏⲧⲥ ϩⲛⲛⲓⲙⲏⲏϣⲉ ⲁⲩⲱ ⲧⲁⲉⲓⲟ ϩⲛⲧⲙⲛⲧϩⲗⲗⲟ ⲉⲁⲛⲅ ⲟⲩϣⲏⲣⲉ ϣⲏⲙ

11 ⲥⲉⲛⲁϩⲉ ⲇⲉ ⲉⲣⲟⲓ ⲉⲓⲧⲟⲣϩ ϩⲛⲟⲩϩⲁⲡ ⲛⲥⲉⲣϣⲡⲏⲣⲉ ⲙⲙⲟⲓ ⲛϭⲓⲛⲇⲩⲛⲁⲥⲧⲏⲥ

12 ⲉⲓϣⲁⲛⲕⲁⲣⲱⲓ ⲥⲉⲛⲁϭⲱϣⲧ ⲉⲃⲟⲗ ϩⲏⲧ ⲉⲓϣⲁⲛϣⲁϫⲉ ⲥⲉⲛⲁϯϩⲧⲏⲩ ⲉⲓϣⲁⲛⲱⲥⲕ ⲉⲓϣⲁϫ ⲥⲉⲛⲁϯⲧⲉⲩϭⲓϫ ⲉⲣⲛⲣⲣⲱⲟⲩ

13 ϯⲛⲁϫⲓ ⲛⲟⲩⲱⲛϩ ⲉⲧⲃⲏⲏⲧⲥ ⲛⲧⲁⲕⲱ ⲛⲟⲩⲣⲡⲙⲉⲉⲩⲉ ⲛϣⲁⲉⲛⲉϩ ⲛⲛⲉⲧⲛⲏⲩ ⲙⲛⲛⲥⲱⲓ

14 ϯⲛⲁⲧⲱϣ ⲛϩⲉⲛⲗⲁⲟⲥ ⲛⲧⲉϩⲉⲛϩⲉⲑⲛⲟⲥ ϩⲩⲡⲟⲧⲁⲥⲥⲉ ⲛⲁⲓ

15 ⲥⲉⲛⲁⲣϩⲟⲧⲉ ϩⲏⲧ ⲉⲩⲥⲱⲧⲙ ⲉⲣⲟⲓ ⲛϭⲓⲛⲓⲛⲟϭ ⲛⲧⲩⲣⲁⲛⲛⲟⲥ ϯⲛⲁⲟⲩⲱⲛϩ ⲉⲃⲟⲗ ⲛⲁⲅⲁⲑⲟⲥ ϩⲛⲛⲓⲙⲏⲏϣⲉ ⲁⲩⲱ ⲛϫⲱⲱⲣⲉ ϩⲛⲟⲩⲡⲟⲗⲉⲙⲟⲥ

16 ⲉⲓϣⲁⲛⲃⲱⲕ ⲉϩⲟⲩⲛ ⲉⲡⲁⲏⲓ ϯⲛⲁⲙⲧⲟⲛ ⲙⲙⲟⲓ ⲉϩⲣⲁⲓ ⲉϫⲱⲥ ⲙⲛⲧⲉⲧⲉⲥⲕⲟⲓⲛⲱⲛⲓⲁ ⲅⲁⲣ ⲥⲓϣⲉ ⲙⲙⲁⲩ ⲟⲩⲇⲉ ⲙⲕⲁϩ ⲛϩⲏⲧ ϩⲛⲧϭⲓⲛⲱⲛϩ ⲛⲙⲙⲁⲥ ⲁⲗⲗⲁ ⲟⲩⲣⲁϣⲉ ⲧⲉ ⲙⲛⲟⲩⲟⲩⲛⲟϭ

17 ⲛⲁⲓ ⲁⲓⲙⲉⲉⲩⲉ ⲉⲣⲟⲟⲩ ϩⲣⲁⲓ ⲛϩⲏⲧ ⲁⲓⲙⲉⲕⲙⲟⲩⲕⲧ ϩⲙⲡⲁϩⲏⲧ ϫⲉⲟⲩⲛⲟⲩⲱⲛϩ ϣⲟⲟⲡ ϩⲛⲧⲥⲩⲅⲅⲉⲛⲉⲓⲁ ⲛⲧⲥⲟⲫⲓⲁ

18 ⲁⲩⲱ ⲟⲩⲧⲉⲣⲯⲓⲥ ⲉⲛⲁⲛⲟⲩⲥ ϩⲛⲧⲉⲥⲙⲛⲧϣⲃⲏⲣ ⲁⲩⲱ ⲟⲩⲙⲛⲧⲣⲙⲙⲁⲟ ⲉⲙⲉⲥⲱϫⲛ ϩⲛⲛⲉϩⲃⲏⲩⲉ ⲛⲛϩⲓⲥⲉ ⲛⲛⲉⲥϭⲓϫ ⲁⲩⲱ ⲟⲩⲙⲛⲧⲣⲙⲛϩⲏⲧ ϩⲛⲧⲅⲩⲙⲛⲁⲥⲓⲁ ⲛⲛⲉⲥϩⲟⲙⲓⲗⲓⲁ ⲁⲩⲱ ⲟⲩⲉⲟⲟⲩ ϩⲛⲧⲕⲟⲓⲛⲱⲛⲓⲁ ⲛⲛⲉⲥϣⲁϫⲉ ⲛⲉ ⲉⲓⲙⲟⲟϣⲉ ⲉⲓϣⲓⲛⲉ ⲛⲥⲁϫⲡⲟⲥ ⲛⲁⲓ

19 ϫⲉⲁⲛⲅ ⲟⲩϣⲏⲣⲉ ϣⲏⲙ ⲛⲉⲩⲫⲩⲏⲥ ⲉⲩⲛⲧⲁⲓ ⲙⲙⲁⲩ ⲛⲟⲩⲯⲩⲭⲏ ⲉⲛⲁⲛⲟⲩⲥ

20 ⲁⲩⲱ ⲉⲁⲛⲅ ⲟⲩⲁⲅⲁⲑⲟⲥ ⲉⲓϣⲟⲟⲡ ϩⲛⲟⲩⲥⲱⲙⲁ ⲉϥⲟⲩⲁⲁⲃ

21 ⲁⲓⲉⲓⲙⲉ ⲇⲉ ϫⲉⲛϯⲛⲁϣⲧⲁϩⲟⲥ ⲁⲛ ⲛϭⲉⲥⲙⲟⲧ ⲉⲓⲙⲏⲧⲓ ⲛⲧⲉⲡⲛⲟⲩⲧⲉ ⲧⲁⲁⲥ ⲛⲁⲓ (ⲟⲩⲙⲛⲧⲣⲙⲛϩⲏⲧ ⲟⲛ ⲡⲉ ⲡⲁⲓ ⲉⲉⲓⲙⲉ ϫⲉⲡⲁⲛⲓⲙ ⲡⲉ ⲡⲉϩⲙⲟⲧ) ⲁⲓϣⲗⲏⲗ ⲉⲡϫⲟⲉⲓⲥ ⲁⲩⲱ ⲁⲓⲥⲉⲡⲥⲱⲡϥ ⲉⲃⲟⲗ ϩⲙⲡⲁϩⲏⲧ ⲧⲏⲣϥ