Wisdom 12 — Coptic (Sahidic)

1 ⲡⲉⲡⲛⲉⲩⲙⲁ ⲅⲁⲣ ⲛⲁⲧⲧⲁⲕⲟ ⲛϩⲏⲧⲟⲩ ⲧⲏⲣⲟⲩ

2 ⲉⲧⲃⲉⲡⲁⲓ ⲛⲉⲧⲛⲁϩⲉ ⲉⲩϫⲡⲓⲟ ⲙⲙⲟⲟⲩ ϣⲏⲙϣⲏⲙ ⲁⲩⲱ ϩⲛⲛⲉⲧⲟⲩⲣⲛⲟⲃⲉ ⲛϩⲏⲧⲟⲩ ⲉⲕϯⲥⲃⲱ ⲛⲁⲩ ⲉⲧⲣⲉⲩⲣⲡⲙⲉⲉⲩⲉ ϫⲉⲕⲁⲥ ⲉⲩⲉⲗⲟ ϩⲛⲧⲕⲁⲕⲓⲁ ⲛⲥⲉⲡⲓⲥⲧⲉⲩⲉ ⲉⲣⲟⲕ ⲡϫⲟⲉⲓⲥ

3 ⲕⲁⲓ ⲅⲁⲣ ⲛϣⲟⲣⲡ ⲉⲧⲟⲩⲏϩ ϩⲙⲡⲉⲕⲕⲁϩ ⲉⲧⲟⲩⲁⲁⲃ ⲁⲕⲙⲉⲥⲧⲱⲟⲩ

4 ⲉⲧⲃⲉⲛⲃⲟⲧⲉ ⲉⲧⲟⲩⲉⲓⲣⲉ ⲙⲙⲟⲟⲩ ϩⲛϩⲃⲏⲩⲉ ⲙⲙⲛⲧⲣⲉϥⲣⲡⲁϩⲣⲉ ⲙⲛϩⲉⲛϣⲙϣⲉ ⲉⲩϫⲁϩⲙ

5 ⲉⲩϩⲱⲧⲃ ⲛⲛⲉⲩϣⲏⲣⲉ ϩⲛⲟⲩⲙⲛⲧⲟⲩⲁϩⲓⲏⲧ ⲉⲩⲟⲩⲱⲙ ⲛⲛⲉⲥⲡⲗⲁⲅⲭⲛⲟⲛ ⲛⲥⲁⲣⲝ ϩⲓⲥⲛⲟϥ ⲛⲣⲱⲙⲉ ⲉⲩⲟ ⲛⲧⲙⲏⲧⲉ ⲛⲛⲉⲧⲟⲩϣⲙϣⲉ ⲛⲁⲩ

6 ϩⲉⲛⲉⲓⲟⲧⲉ ⲉⲙⲡⲟⲩⲛⲁ ϩⲁⲛⲉⲯⲩⲭⲏ ⲛⲛⲉⲩϣⲏⲣⲉ ⲡⲁⲓ ⲁⲕⲟⲩⲱϣ ⲉⲧⲁⲕⲟⲟⲩ ϩⲓⲧⲛⲛϭⲓϫ ⲛⲛⲉⲛⲉⲓⲟⲧⲉ

7 ϫⲉⲕⲁⲥ ⲉϥⲉⲙⲡϣⲁ ⲉⲧⲣⲉⲛϣⲏⲣⲉ ⲙⲡⲛⲟⲩⲧⲉ ⲟⲩⲱϩ ⲛϩⲏⲧϥ ⲛϭⲓⲡⲕⲁϩ ⲉⲧⲧⲁⲉⲓⲏⲩ ⲛⲧⲟⲟⲧⲕ ⲉϩⲟⲩⲟ ⲉⲕⲁϩ ⲛⲓⲙ

8 ⲁⲗⲗⲁ ⲛⲉⲓⲕⲟⲟⲩⲉ ⲟⲛ ϩⲱⲥ ⲣⲱⲙⲉ ⲁⲕϯⲥⲟ ⲉⲣⲟⲟⲩ ⲁⲕⲧⲛⲛⲟⲟⲩ ⲛⲁⲩ ⲛϩⲉⲛⲁⲙⲏⲙ ⲡⲣⲟⲇⲣⲟⲙⲟⲥ ϩⲁⲧϩⲏ ⲙⲡⲉⲕⲥⲧⲣⲁⲧⲉⲩⲙⲁ ϫⲉⲕⲁⲥ ⲉⲩⲉⲙⲟⲟⲩⲧⲟⲩ ϣⲏⲙϣⲏⲙ

9 ⲉⲕⲟ ⲛⲁⲧϭⲟⲙ ⲁⲛ ⲉϯ ⲛⲛⲁⲥⲉⲃⲏⲥ ⲉϩⲣⲁⲓ ⲉⲛϭⲓϫ ⲛⲛⲇⲓⲕⲁⲓⲟⲥ ϩⲛⲡⲡⲟⲗⲉⲙⲟⲥ ⲏ ⲛϩⲛⲑⲏⲣⲓⲟⲛ ⲉⲩⲛⲁϣⲧ ⲏ ϩⲛⲟⲩϣⲁϫⲉ ⲛⲟⲩⲱⲧ ⲉⲟⲩⲟϣϥⲟⲩ ϩⲛⲟⲩϣⲥⲛⲉ

10 ⲉⲕⲕⲣⲓⲛⲉ ⲇⲉ ⲙⲙⲟⲟⲩ ϣⲏⲙϣⲏⲙ ⲉⲕϯ ⲙⲁ ⲛⲁⲩ ⲙⲙⲉⲧⲁⲛⲟⲓⲁ ⲉⲕⲥⲟⲟⲩⲛ ϫⲉⲟⲩⲡⲟⲛⲏⲣⲟⲛ ⲡⲉ ⲡⲉⲩϫⲡⲟ ⲁⲩⲱ ⲁⲧⲉⲩⲕⲁⲕⲓⲁ ϫⲉⲛⲟⲩⲛⲉ ⲉⲃⲟⲗ ϫⲉⲙⲡⲉⲩϩⲏⲧ ⲛⲁϣⲓⲃⲉ ⲁⲛ ⲉⲛⲉϩ

11 ⲟⲩⲥⲡⲉⲣⲙⲁ ⲅⲁⲣ ⲡⲉ ⲉϥⲥϩⲟⲩⲟⲣⲧ ϫⲓⲛⲛϣⲟⲣⲡ ⲟⲩⲇⲉ ⲛⲛⲉⲕⲥⲛⲁⲧ ⲁⲛ ϩⲏⲧϥ ⲛⲟⲩⲁ ⲉⲕϩⲟⲣϣ ⲛϩⲏⲧ ⲉϩⲣⲁⲓ ⲉϫⲱⲟⲩ ⲉⲩⲣⲛⲟⲃⲉ

12 ⲛⲓⲙ ⲅⲁⲣ ⲡⲉⲧⲛⲁϫⲟⲟⲥ ⲛⲁⲕ ϫⲉⲟⲩ ⲡⲉⲛⲧⲁⲕⲁⲁϥ ⲏ ⲛⲓⲙ ⲡⲉⲧⲛⲁⲁϩⲉⲣⲁⲧϥ ⲟⲩⲃⲉⲡⲉⲕϩⲁⲡ ⲏ ⲛⲓⲙ ⲡⲉⲧⲛⲁⲉⲅⲕⲁⲗⲉⲓ ⲛⲁⲕ ⲉⲧⲃⲉⲡⲧⲁⲕⲟ ⲛⲛϩⲉⲑⲛⲟⲥ ⲉⲛⲧⲟⲕ ⲁⲕⲧⲁⲙⲓⲟⲟⲩ ⲏ ⲛⲓⲙ ⲡⲉⲧⲛⲁϫⲓϩⲁⲡ ⲛⲙⲙⲁⲕ ⲉⲕϫⲓ ⲙⲡⲉⲕⲃⲁ ⲛϩⲛⲣⲱⲙⲉ ⲛⲣⲉϥϫⲓⲛϭⲟⲛⲥ

13 ⲙⲙⲛⲕⲉⲛⲟⲩⲧⲉ ⲅⲁⲣ ⲛⲃⲗⲗⲁⲕ ⲉϥϥⲓⲣⲟⲟⲩϣ ϩⲁⲡⲧⲏⲣϥ ϫⲉⲕⲁⲥ ⲉⲕⲉⲧⲥⲁⲃⲟⲟⲩ ϫⲉⲛⲧⲁⲕⲕⲣⲓⲛⲉ ⲙⲙⲟⲟⲩ ⲁⲛ ⲁⲇⲓⲕⲱⲥ

14 ⲟⲩⲇⲉ ⲙⲛⲟⲩⲣⲣⲟ ⲏ ⲟⲩⲇⲉ ⲧⲩⲣⲁⲛⲛⲟⲥ ⲁϩⲉⲣⲁⲧϥ ⲉⲣⲟⲕ ϩⲁⲛⲉⲛⲧⲁⲕⲕⲟⲗⲁⲍⲉ ⲙⲙⲟⲟⲩ

15 ⲛⲧⲕ ⲟⲩⲇⲓⲕⲁⲓⲟⲥ ⲇⲉ ⲕⲣϩⲙⲙⲉ ⲙⲙⲟⲟⲩ ⲧⲏⲣⲟⲩ ⲇⲓⲕⲁⲓⲱⲥ ⲉⲕⲱⲡ ⲙⲡⲁⲓ ϫⲉⲟⲩϣⲙⲙⲟ ⲡⲉ ⲉⲧⲉⲕϭⲟⲙ ⲉⲕⲟⲗⲁⲍⲉ ⲛⲟⲩⲁ ⲉⲛϥⲙⲡϣⲁ ⲁⲛ ⲛⲧϭⲁⲓⲟϥ

16 ⲧⲉⲕϭⲟⲙ ⲅⲁⲣ ⲧⲉ ⲧⲉϩⲟⲩⲉⲓⲧⲉ ⲛⲧⲇⲓⲕⲁⲓⲟⲥⲩⲛⲏ ⲁⲩⲱ ⲧⲉⲕⲙⲛⲧϫⲟⲉⲓⲥ ⲉⲧϩⲓϫⲙⲡⲧⲏⲣϥ ⲉⲧⲣⲉⲕϯⲥⲟ ⲉⲣⲟⲟⲩ ⲧⲏⲣⲟⲩ

17 ⲕⲟⲩⲱⲛϩ ⲅⲁⲣ ⲉⲃⲟⲗ ⲛⲧⲉⲕϭⲟⲙ ⲉⲧⲉⲛⲥⲉⲛⲁϩⲧⲉ ⲉⲣⲟⲥ ⲁⲛ ϩⲣⲁⲓ ϩⲛⲧⲙⲛⲧⲧⲉⲗⲉⲓⲟⲥ ⲛⲧⲉⲕⲛⲟⲙⲧⲉ ⲉⲕⲧⲁⲙⲟ ⲙⲙⲟⲟⲩ ⲉⲡⲉⲕⲁⲙⲁϩⲧⲉ ϩⲛⲛⲉⲧⲥⲟⲟⲩⲛ ⲙⲙⲟⲕ

18 ⲛⲧⲟⲕ ⲡϫⲟⲉⲓⲥ ⲛⲛϭⲟⲙ ⲉⲕⲕⲣⲓⲛⲉ ⲛⲟⲩϩⲁⲕ ⲁⲩⲱ ⲉⲕⲣϩⲙⲙⲉ ⲙⲙⲟⲛ ϩⲛⲟⲩⲛⲟϭ ⲛϯⲥⲟ ⲧⲉⲩⲛⲟⲩ ⲉⲧⲉϩⲛⲁⲕ ⲟⲩⲛϭⲟⲙ ⲙⲙⲟⲕ ⲉⲣⲡⲉⲧⲉⲕⲟⲩⲁϣϥ

19 ⲁⲕⲧⲥⲁⲃⲟ ⲙⲡⲉⲕⲗⲁⲟⲥ ⲉⲃⲟⲗ ϩⲓⲧⲛⲛⲉⲓϩⲃⲏⲩⲉ ϫⲉϣϣⲉ ⲉⲡⲇⲓⲕⲁⲓⲟⲥ ⲉⲣⲙⲁⲉⲓⲣⲱⲙⲉ ⲁⲩⲱ ⲁⲕϯⲧⲱⲕ ⲛϩⲏⲧ ⲛⲛⲉⲕϣⲏⲣⲉ ϫⲉⲁⲕϯⲙⲉⲧⲁⲛⲟⲓⲁ ⲛⲛⲉⲛⲧⲁⲩⲣⲛⲟⲃⲉ

20 ⲉϣϫⲉ ⲛϫⲓϫⲉⲉⲩⲉ ⲅⲁⲣ ⲛⲛⲉⲕϣⲏⲣⲉ ⲛⲁⲓ ⲉⲧⲙⲡϣⲁ ⲙⲡⲙⲟⲩ ⲛⲧⲁⲕⲧⲓⲙⲱⲣⲉⲓ ⲙⲙⲟⲟⲩ ϩⲛⲟⲩϯⲥⲟ ⲙⲛⲟⲩⲙⲛⲧϩⲁⲣϣϩⲏⲧ ⲉⲛⲁϣⲱⲥ ⲉⲕϯⲙⲁ ⲛⲁⲩ ϩⲓⲟⲩⲟⲉⲓϣ ⲉⲧⲣⲉⲩⲗⲟ ϩⲛⲧⲉⲩⲕⲁⲕⲓⲁ

21 ⲉⲉⲓⲉ ϩⲛⲟⲩⲏⲣ ⲙⲙⲛⲧϩⲁⲣϣϩⲏⲧ ⲉⲕⲕⲣⲓⲛⲉ ⲛⲛⲉⲕϣⲏⲣⲉ ⲛⲁⲓ ⲉⲛⲧⲁⲕⲥⲙⲓⲛⲉ ⲙⲛⲛⲉⲩⲉⲓⲟⲧⲉ ⲛϩⲉⲛⲁⲛⲁⲩϣ ⲙⲛϩⲉⲛⲇⲓⲁⲑⲏⲕⲏ ⲙⲛϩⲉⲛⲉⲣⲏⲧ ⲉⲛⲁⲛⲟⲩⲟⲩ

22 ⲉⲕϯⲥⲃⲱ ϭⲉ ⲛⲁⲛ ⲉⲕⲙⲁⲥⲧⲓⲅⲟⲩ ⲛⲛⲉⲛϫⲁϫⲉ ⲛⲟⲩⲧⲃⲁ ⲛⲕⲱⲃ ϫⲉⲕⲁⲥ ⲉⲛⲉⲣⲡⲙⲉⲉⲩⲉ ⲛⲧⲉⲕⲙⲛⲧⲁⲅⲁⲑⲟⲥ ⲉⲛϯϩⲁⲡ ⲉⲕⲕⲣⲓⲛⲉ ⲇⲉ ⲙⲙⲟⲛ ⲧⲛⲛⲁϭⲱϣⲧ ⲉⲃⲟⲗ ϩⲏⲧϥ ⲛⲟⲩⲛⲁ

23 ⲉⲧⲃⲉⲡⲁⲓ ⲟⲛ ⲛⲉⲛⲧⲁⲩϣⲱⲡⲉ ϩⲛⲟⲩϭⲓⲛⲱⲛϩ ⲛⲛⲁⲧϩⲏⲧ ⲙⲛⲟⲩϫⲓⲛϭⲟⲛⲥ ⲛⲧⲁⲕⲃⲁⲥⲁⲛⲓⲍⲉ ⲙⲙⲟⲟⲩ ϩⲓⲧⲛⲛⲉⲩⲃⲟⲧⲉ ⲙⲙⲓⲛⲙⲙⲟⲟⲩ

24 ⲕⲁⲓ ⲅⲁⲣ ⲁⲩⲥⲱⲣⲙ ⲙⲡⲟⲩⲉⲓ ⲉϩⲣⲁⲓ ϩⲛⲛⲉϩⲓⲟⲟⲩⲉ ⲛⲧⲉⲡⲗⲁⲛⲏ ⲉⲩⲙⲉⲉⲩⲉ ϫⲉϩⲉⲛⲛⲟⲩⲧⲉ ⲛⲉ ⲛⲁⲓ ⲉⲧⲥⲏϣ ⲛⲛⲍⲱⲟⲛ ⲛⲛⲕⲉϩⲉⲑⲛⲟⲥ ⲉⲁⲩⲣϩⲁⲗ ⲙⲙⲟⲟⲩ ⲛⲧϩⲉ ⲛϩⲉⲛϣⲏⲣⲉ ⲕⲟⲩⲓ ⲛⲛⲁⲧϩⲏⲧ

25 ⲉⲧⲃⲉⲡⲁⲓ ⲟⲛ ⲁⲕⲧⲛⲛⲟⲟⲩ ⲛⲁⲩ ⲛⲟⲩϩⲁⲡ ⲛⲥⲱⲃⲉ ⲛⲥⲱⲟⲩ ⲛⲧϩⲉ ⲛϩⲉⲛϣⲏⲣⲉ ϣⲏⲙ ⲛⲁⲧⲛⲟⲓ

26 ⲛⲧⲟⲟⲩ ⲇⲉ ⲙⲡⲟⲩϫⲓⲥⲃⲱ ϩⲓⲧⲛⲧⲉⲡⲓⲧⲓⲙⲓⲁ ⲙⲛⲥⲱⲃⲉ ⲛⲥⲱⲟⲩ ⲥⲉⲛⲁⲙⲡϣⲁ ⲛϫⲓⲡⲉⲓⲣⲁⲥⲙⲟⲥ ⲛⲧⲉⲕⲣⲓⲥⲓⲥ ⲙⲡⲛⲟⲩⲧⲉ

27 ϩⲛⲛⲉⲛⲧⲁⲩϭⲱⲛⲧ ⲅⲁⲣ ⲛϩⲏⲧⲟⲩ ⲉⲩⲑⲙⲕⲟ ⲙⲙⲟⲟⲩ ⲛⲧⲁⲩⲕⲟⲗⲁⲍⲉ ⲙⲙⲟⲟⲩ ϩⲛⲛⲉⲛⲧⲟⲩⲙⲉⲉⲩⲉ ⲉⲣⲟⲟⲩ ϫⲉϩⲛⲛⲟⲩⲧⲉ ⲛⲉ ⲧⲟⲧⲉ ⲁⲩⲥⲟⲩⲛⲡⲛⲟⲩⲧⲉ ⲙⲙⲉ ⲡⲉⲧⲉⲛⲉⲩⲁⲣⲛⲁ ⲙⲙⲟϥ ⲛϣⲟⲣⲡ ϫⲉⲛⲧⲛⲥⲟⲟⲩⲛ ⲙⲙⲟϥ ⲁⲛ ⲉⲧⲃⲉⲡⲁⲓ ⲁⲑⲁⲏ ⲙⲡⲧⲁⲕⲟ ⲉⲓ ⲉϩⲣⲁⲓ ⲉϫⲱⲟⲩ