Wisdom 13 — Coptic (Sahidic)

1 ϩⲛⲛⲉⲧϣⲟⲩⲉⲓⲧ ⲅⲁⲣ ⲛⲉ ⲣⲱⲙⲉ ⲛⲓⲙ ⲉⲧⲟ ⲛⲁⲧⲥⲟⲟⲩⲛ ⲙⲡⲛⲟⲩⲧⲉ ⲙⲡⲟⲩⲉϣⲥⲟⲩⲛⲡⲉⲧϣⲟⲟⲡ ⲅⲁⲣ ϩⲓⲧⲛⲛⲁⲅⲁⲑⲟⲛ ⲉⲧⲟⲩⲛⲁⲩ ⲉⲣⲟⲟⲩ ⲟⲩⲇⲉ ⲙⲡⲟⲩϯϩⲧⲏⲩ ⲉⲛⲉϩⲃⲏⲩⲉ ⲛⲥⲉⲥⲟⲩⲛ ⲡⲣⲉϥⲥⲱⲛⲧ

2 ⲁⲗⲗⲁ ⲛⲧⲁⲩⲙⲉⲉⲩⲉ ⲉⲩⲕⲱϩⲧ ⲏ ⲟⲩⲡⲛⲉⲩⲙⲁ ⲏ ⲙⲡⲁⲏⲣ ⲉⲧⲁⲥⲱⲟⲩ ⲏ ⲛⲥⲓⲟⲩ ⲉⲧⲕⲱⲧⲉ ⲏ ⲙⲡⲙⲟⲟⲩ ⲉⲧⲥⲱⲕ ⲏ ⲛⲉⲫⲱⲥⲧⲏⲣ ⲛⲧⲡⲉ ⲉⲧⲣⲟⲩⲟⲉⲓⲛ ⲉⲡⲕⲟⲥⲙⲟⲥ ϫⲉⲛⲁⲓ ⲡⲉ ⲡⲛⲟⲩⲧⲉ

3 ⲉϣϫⲉ ⲛⲧⲁⲩⲣϣⲡⲏⲣⲉ ⲙⲡⲉⲩⲥⲁ ⲁⲩⲙⲉⲉⲩⲉ ⲉⲣⲟⲟⲩ ϫⲉϩⲉⲛⲛⲟⲩⲧⲉ ⲛⲉ ⲙⲁⲣⲟⲩⲉⲓⲙⲉ ϫⲉⲡϫⲟⲉⲓⲥ ⲛⲛⲁⲓ ⲉⲉⲓⲉⲛⲉⲥⲱϥ ⲉⲣⲟⲟⲩ ⲛⲛⲁⲟⲩⲏⲣ ⲛϩⲟⲩⲟ ⲡⲁⲣⲭⲱⲛ ⲅⲁⲣ ⲙⲡⲧⲁⲙⲓⲟ ⲙⲡⲉⲩⲥⲁ ⲡⲉⲛⲧⲁϥⲥⲟⲛⲧⲟⲩ ⲧⲏⲣⲟⲩ

4 ⲉϣϫⲉ ⲛⲧⲁⲩⲡⲱϣⲥ ⲉϩⲣⲁⲓ ⲉϫⲛⲧⲉⲩϭⲟⲙ ⲙⲛⲧⲉⲩⲉⲛⲉⲣⲅⲉⲓⲁ ⲙⲁⲣⲟⲩⲛⲟⲉⲓ ϭⲉ ⲉⲃⲟⲗ ⲛϩⲏⲧⲟⲩ ϫⲉⲡⲉⲛⲧⲁϥⲥⲃⲧⲱⲧⲟⲩ ⲉⲉⲓⲉϥϭⲙϭⲟⲙ ⲉⲣⲟⲟⲩ ⲛⲟⲩⲏⲣ ⲛϩⲟⲩⲟ

5 ⲉⲩⲧⲟⲛⲧⲛ ⲅⲁⲣ ⲉⲡⲁⲛⲁⲓ ⲙⲛⲧⲛⲟϭ ⲙⲡⲣⲉϥⲥⲱⲛⲧ ⲉⲩⲛⲁⲩ ⲉⲃⲟⲗ ⲙⲙⲟⲟⲩ ⲉⲡⲣⲉϥⲣϩⲱⲃ ⲙⲡⲉⲩϫⲡⲟ

6 ⲁⲗⲗⲁ ⲛⲉⲓⲕⲟⲟⲩⲉ ⲟⲛ ⲟⲩⲛ ⲁⲣⲓⲕⲉ ⲉⲣⲟⲟⲩ ⲕⲁⲓ ⲅⲁⲣ ⲛⲧⲟⲟⲩ ϩⲱⲟⲩ ⲟⲛ ⲥⲉⲡⲗⲁⲛⲁ ⲉⲩϣⲓⲛⲉ ⲛⲥⲁⲡⲛⲟⲩⲧⲉ ⲉⲩⲟⲩⲉϣϩⲉ ⲉⲣⲟϥ

7 ⲉⲩϣⲟⲟⲡ ⲅⲁⲣ ϩⲛⲛⲉϥϩⲃⲏⲩⲉ ⲁⲩⲱ ⲉⲩϩⲟⲧϩⲧ ⲥⲉⲡⲉⲓⲑⲉ ⲅⲁⲣ ⲉϫⲛⲛⲉⲧⲟⲩⲛⲁⲩ ⲉⲣⲟⲟⲩ ϫⲉⲛⲉⲥⲱⲟⲩ

8 ⲛⲉⲓⲕⲟⲟⲩⲉ ⲟⲛ ⲛⲥⲉⲧⲙⲁⲓⲏⲩ ⲁⲛ

9 ⲉϣϫⲉ ⲁⲩⲉϣⲛⲟⲓ ⲟⲛ ⲛⲧⲉⲓϩⲉ ϩⲱⲥⲧⲉ ⲉⲧⲟⲛⲧⲛ ⲉⲛⲁⲡⲕⲟⲥⲙⲟⲥ ⲉⲉⲓⲉⲡϫⲟⲉⲓⲥ ⲛⲛⲁⲓ ⲉⲧⲃⲉⲟⲩ ⲛⲧⲟϥ ⲙⲡⲟⲩϩⲉ ⲉⲣⲟϥ ϩⲛⲟⲩϭⲉⲡⲏ

10 ϩⲉⲛⲉⲃⲓⲏⲛ ⲛⲉ ⲉⲣⲉⲧⲉⲩϩⲉⲗⲡⲓⲥ ϩⲓⲛⲉⲧⲙⲟⲟⲩⲧ ⲉⲩⲙⲟⲩⲧⲉ ⲉⲛⲉϩⲃⲏⲩⲉ ⲛⲛⲣⲱⲙⲉ ϫⲉϩⲉⲛⲛⲟⲩⲧⲉ ⲛⲉ ⲟⲩⲛⲟⲩⲃ ⲙⲛⲟⲩϩⲁⲧ ϩⲉⲛⲙⲉⲉⲩⲉ ⲛⲧⲉⲭⲛⲏ ⲙⲛϩⲉⲛϩⲣⲃ ⲛⲍⲱⲟⲛ ⲏ ⲟⲩⲱⲛⲉ ⲛⲁⲧϣⲁⲩ ⲛϩⲱⲃ ⲛⲁⲣⲭⲁⲓⲟⲥ

11 ⲟⲩϩⲉⲛϣⲉ ⲅⲁⲣ ⲛⲣⲉϥϫⲱⲱⲣⲉ ⲙⲙⲙⲁ ⲛϣⲏⲛ ⲁϥϣⲉⲧⲟⲩϣⲏⲛ ⲉⲛⲁⲛⲟⲩϥ ⲁϥⲕⲉⲕⲧⲉϥⲕⲟⲩⲕⲉ ⲧⲏⲣⲥ ϩⲛⲧⲉϥⲥⲃⲱ ⲁϥⲣϩⲉⲛⲧⲉⲭⲛⲏ ⲉⲣⲟϥ ⲉⲛⲉⲥⲱⲟⲩ ⲁϥⲧⲁⲙⲓⲟϥ ⲛϩⲉⲛⲥⲕⲉⲩⲟⲥ ⲛϣⲁⲩ ⲛⲧϩⲩⲡⲏⲣⲉⲥⲓⲁ ⲙⲡⲉϥⲱⲛϩ

12 ⲛⲉⲛⲧⲁⲩⲥⲉⲉⲡⲉ ⲇⲉ ⲉⲧⲉϥⲉⲓⲟⲡⲉ ⲁϥⲥⲁϩⲧⲉ ⲙⲙⲟⲟⲩ ⲁϥⲥⲃⲧⲉ ⲧⲉϩⲣⲉ ⲁϥⲧⲥⲓⲟϥ

13 ⲡⲉⲧϩⲟⲟⲩ ⲇⲉ ⲛϩⲏⲧⲟⲩ ⲉⲧⲉⲛϥⲣϣⲁⲩ ⲁⲛ ⲉⲗⲁⲁⲩ ⲡϣⲉ ⲉⲧϭⲟⲟⲙⲉ ⲉⲧⲣⲏⲧ ⲉⲃⲟⲗ ⲛⲉⲓⲃ ⲁϥϫⲓⲧϥ ⲁϥⲙⲟⲛⲅϥ ϩⲙⲡⲣⲟⲟⲩϣ ⲛⲧⲉϥⲉⲓⲟⲡⲉ ⲁϥⲧⲁⲙⲓⲟϥ ϩⲓⲧⲛⲧⲙⲛⲧⲣⲙⲛϩⲏⲧ ⲛⲧⲉϥⲥⲃⲱ ⲁϥⲧⲛⲧⲱⲛϥ ⲉⲩϩⲓⲕⲱⲛ ⲛⲣⲱⲙⲉ

14 ⲏ ⲁϥⲧⲣⲉϥⲉⲓⲛⲉ ⲛⲟⲩⲧⲃⲛⲏ ⲛⲉⲗⲁⲭⲓⲥⲧⲟⲛ ⲁϥϫⲁϩϥ ⲙⲡⲏⲣϣ ⲁϥⲧⲣⲉⲡⲉϥⲁⲩⲁⲛ ⲧⲣⲟϣⲣⲉϣ ⲛⲉϫⲃⲓⲛ ⲧⲏⲣⲟⲩ ⲉⲧⲛϩⲏⲧϥ ⲁϥⲥⲟⲗϭⲟⲩ ⲛⲟⲙⲉ

15 ⲁϥⲧⲁⲙⲓⲉⲟⲩⲏⲓ ⲛⲁϥ ⲉϥⲙⲡϣⲁ ⲙⲙⲟϥ ⲁϥⲧⲁϩⲟϥ ⲉⲣⲁⲧϥ ⲉⲧⲟⲩⲛⲟⲩϫⲟ ⲁϥⲟⲣϫϥ ϩⲛⲟⲩⲃⲉⲛⲓⲡⲉ

16 ⲁϥϥⲓⲡⲉϥⲣⲟⲟⲩϣ ϫⲉⲕⲁⲥ ⲛⲛⲉϥϩⲉ ϥⲥⲟⲟⲩⲛ ϫⲉⲙⲛϣϭⲟⲙ ⲙⲙⲟϥ ⲉⲃⲟⲏⲑⲉⲓ ⲉⲣⲟϥ ⲟⲩϩⲓⲕⲱⲛ ⲅⲁⲣ ⲧⲉ ⲉⲥⲣⲭⲣⲉⲓⲁ ⲛϥⲓⲡⲉⲥⲣⲟⲟⲩϣ

17 ⲉϥϣⲗⲏⲗ ⲇⲉ ⲉⲧⲃⲉⲛⲕⲁ ϩⲓϣⲉⲗⲉⲉⲧ ϩⲓϣⲏⲣⲉ ⲛϥϣⲓⲡⲉ ⲁⲛ ⲉϥϣⲁϫⲉ ⲙⲛⲛⲉⲧⲙⲟⲟⲩⲧ ⲉⲧⲃⲉⲡⲉϥⲟⲩϫⲁⲓ ⲙⲉⲛ ⲛϥⲱϣ ⲉϩⲣⲁⲓ ⲉⲡⲁⲧϭⲟⲙ

18 ⲉⲧⲃⲉⲡⲉϥⲱⲛϩ ⲉϥⲥⲟⲡⲥ ⲙⲡⲉⲧⲙⲟⲟⲩⲧ ⲉⲧⲃⲉⲧⲉϥⲃⲟⲏⲑⲓⲁ ⲉϥⲧⲱⲃϩ ⲙⲡⲉⲧⲉⲛϥⲁⲓⲥⲑⲁⲛⲉ ⲁⲛ ⲙⲛⲡⲉⲧⲉⲛϥⲉϣⲁϩⲉⲣⲁⲧϥ ⲉⲧⲃⲉⲧⲉϥϩⲓⲏ ⲉⲧϥⲛⲁ ⲙⲙⲟⲥ

19 ⲉⲧⲃⲉⲟⲩϩⲏⲩ ⲇⲉ ⲙⲛϯⲟⲡⲉ ⲙⲡⲙⲁⲧⲉ ⲛⲛⲉϥϭⲓϫ ⲁϥⲁⲓⲧⲉⲓ ⲛⲟⲩϭⲟⲙ ⲉⲃⲟⲗ ϩⲓⲧⲙⲡⲉⲧⲟⲩⲟϣϥ ϩⲛⲛⲉϥϭⲓϫ