Wisdom 11 — Coptic (Sahidic)

1 ⲁⲥⲥⲟⲟⲩⲧⲛⲛⲉⲩϩⲃⲏⲩⲉ ϩⲛⲧϭⲓϫ ⲙⲡⲉⲡⲣⲟⲫⲏⲧⲏⲥ ⲉⲧⲟⲩⲁⲁⲃ

2 ⲁⲩⲃⲱⲕ ϩⲛⲟⲩϫⲁⲓⲉ ⲉⲙⲉⲩⲟⲩⲱϩ ⲛϩⲏⲧϥ ⲁⲩⲡⲏⲥⲥⲉ ⲛⲛⲉⲩⲥⲕⲏⲛⲏ ϩⲛϩⲉⲛⲙⲁ ⲉⲙⲉⲩⲙⲟⲟϣⲉ ⲛϩⲏⲧⲟⲩ

3 ⲁⲩⲁϩⲉⲣⲁⲧⲟⲩ ⲟⲩⲃⲉ ⲛⲉⲧϯ ⲟⲩⲃⲏⲟⲩ ⲁⲩϫⲣⲟ ⲉⲛⲉⲩϫⲁϫⲉ

4 ⲁⲩⲉⲓⲃⲉ ⲁⲩⲱϣ ⲉϩⲣⲁⲓ ⲉⲣⲟⲕ ⲁⲕϯ ⲛⲁⲩ ⲛⲟⲩⲙⲟⲟⲩ ⲉⲃⲟⲗ ϩⲛⲟⲩⲡⲉⲧⲣⲁ ⲉⲥⲛⲁϣⲧ ⲟⲩⲧⲁⲗϭⲟ ⲙⲡⲉⲓⲃ ⲉⲃⲟⲗ ϩⲛⲟⲩⲱⲛⲉ ⲉϥⲛⲁϣⲧ

5 ϩⲛⲡⲉⲛⲧⲁⲩⲧⲁⲕⲉⲛⲉⲩϫⲁϫⲉ ⲅⲁⲣ ⲛϩⲏⲧⲟⲩ

6 ϩⲛⲛⲁⲓ ⲛⲧⲟⲟⲩ ⲛⲧⲁⲩϯ ⲙⲧⲟⲛ ⲛⲁⲩ ϩⲙⲡⲉⲩϩⲓⲥⲉ

7 ⲉⲡⲙⲁ ⲛⲟⲩⲡⲏⲅⲏ ⲙⲙⲟⲟⲩ ⲉϥⲥⲟⲧϥ ⲁⲩϣⲧⲣⲧⲱⲣⲟⲩ ϩⲛⲟⲩⲙⲟⲟⲩ ⲉϥⲧⲣⲉϣⲣⲱϣ

8 ⲉⲩϫⲡⲓⲟ ⲙⲡⲟⲩⲉϩⲥⲁϩⲛⲉ ⲛⲛⲉⲧⲙⲟⲩⲟⲩⲧ ⲛⲛϣⲏⲣⲉ ⲕⲟⲩⲓ ⲁⲕϯ ⲛⲁⲩ ⲛⲟⲩⲙⲟⲟⲩ ⲉϥⲟϣ ⲉⲙⲡⲟⲩⲙⲉⲉⲩⲉ ⲉⲣⲟϥ

9 ⲉⲁⲕⲧⲥⲁⲃⲟⲟⲩ ϩⲓⲧⲙⲡⲉⲓⲃⲉ ⲉⲧⲛⲙⲙⲁⲩ ⲛⲧϩⲉ ⲉⲛⲧⲁⲕⲑⲙⲕⲉⲛⲉⲩϫⲁϫⲉ

10 ⲛⲧⲉⲣⲟⲩϫⲟⲛⲧⲟⲩ ⲅⲁⲣ ⲕⲁⲓⲡⲉⲣ ⲉⲩϯⲥⲃⲱ ⲛⲁⲩ ϩⲛⲟⲩⲛⲁ ⲁⲩⲉⲓⲙⲉ ⲉⲧϩⲉ ⲉⲛⲧⲁⲛⲁⲥⲉⲃⲏⲥ ⲙⲕⲁϩ ⲉⲩⲕⲣⲓⲛⲉ ⲙⲙⲟⲟⲩ ϩⲛⲟⲩⲟⲣⲅⲏ

11 ⲛⲁⲓ ⲙⲉⲛ ⲅⲁⲣ ⲁⲕⲇⲟⲕⲓⲙⲁⲍⲉ ⲙⲙⲟⲟⲩ ϩⲱⲥ ⲉⲓⲱⲧ ⲉⲕϯⲥⲃⲱ ⲛⲁⲩ ⲛⲏⲇⲉ ⲛⲧⲟⲟⲩ ⲛⲉⲕⲧϭⲁⲓⲟ ⲙⲙⲟⲟⲩ ⲛⲧϩⲉ ⲛⲟⲩⲣⲣⲟ ⲛⲣⲉϥϣⲱⲱⲧ ⲉⲃⲟⲗ ⲉⲕϩⲉⲧⲁⲍⲉ ⲙⲙⲟⲟⲩ

12 ⲉⲩϩⲁⲧⲏⲩ ⲇⲉ ⲁⲩⲱ ⲉⲩⲙⲡⲉⲩⲙⲧⲟ ⲉⲃⲟⲗ ⲁⲩⲧⲟⲉⲓⲧ

13 ⲁⲩⲗⲩⲡⲏ ⲅⲁⲣ ⲧⲁϩⲟⲟⲩ ⲉⲥⲕⲏⲃ ⲁⲩⲱ ⲟⲩⲁϣⲁϩⲟⲙ ⲙⲛⲟⲩⲙⲉⲉⲩⲉ ⲛϩⲏⲧ ⲉⲛⲧⲁⲩⲟⲩⲉⲓⲛⲉ

14 ⲛⲧⲉⲣⲟⲩⲥⲱⲧⲙ ⲅⲁⲣ ϫⲉⲁⲩⲣⲡⲉⲧⲛⲁⲛⲟⲩϥ ⲛⲁⲩ ϩⲓⲧⲛⲛⲉⲛⲧⲁⲩⲙⲟⲕϩⲟⲩ ⲛϩⲏⲧⲟⲩ ⲛⲧⲟⲟⲩ ⲁⲩⲥⲟⲩⲛⲡϫⲟⲉⲓⲥ

15 ⲡⲉⲛⲧⲁⲩⲛⲟϫϥ ⲅⲁⲣ ⲉⲃⲟⲗ ⲙⲡⲉⲟⲩⲟⲉⲓϣ ⲁⲩⲧⲥⲧⲟϥ ⲉⲃⲟⲗ ⲉⲩⲛⲟϭⲛⲉϭ ⲙⲙⲟϥ ϩⲛⲧϩⲁⲏ ⲛⲛⲉⲩϩⲃⲏⲩⲉ ⲁⲩⲣϣⲡⲏⲣⲉ ⲙⲙⲟϥ ⲛⲧⲁⲩⲉⲓⲃⲉ ⲛⲧⲟⲟⲩ ⲁⲛ ⲛⲧϩⲉ ⲛⲛⲇⲓⲕⲁⲓⲟⲥ

16 ⲉⲡⲙⲁ ⲛⲙⲙⲟⲕⲙⲉⲕ ⲛⲛⲁⲧϩⲏⲧ ⲙⲡⲉⲩϫⲓⲛϭⲟⲛⲥ ϩⲛⲛⲁⲓ ⲁⲩⲡⲗⲁⲛⲁ ⲁⲩϣⲙϣⲉ ⲛϩⲉⲛϫⲁⲧϥⲉ ⲙⲛϩⲉⲛⲑⲏⲣⲓⲟⲛ ⲉⲗⲁⲭⲓⲥⲧⲟⲛ ⲁⲕⲧⲛⲛⲟⲟⲩ ⲛⲁⲩ ⲛⲟⲩⲁϣⲏ ⲛⲍⲱⲟⲛ ⲛⲁⲗⲟⲅⲟⲛ ⲉⲩϫⲓⲕⲃⲁ

17 ϫⲉⲕⲁⲥ ⲉⲩⲉⲉⲓⲙⲉ ϫⲉⲛⲉⲧⲉⲣⲉⲟⲩⲁ ⲣⲛⲟⲃⲉ ⲛϩⲏⲧⲟⲩ ⲉⲩⲕⲟⲗⲁⲍⲉ ⲙⲙⲟϥ ϩⲣⲁⲓ ⲛϩⲏⲧⲟⲩ

18 ⲛⲉⲥⲁⲡⲟⲣⲉⲓ ⲅⲁⲣ ⲁⲛ ⲛϭⲓⲧⲉⲕϭⲓϫ ⲉⲧϭⲙϭⲟⲙ ⲧⲉⲛⲧⲁⲥⲟⲛⲧⲡⲕⲟⲥⲙⲟⲥ ⲉⲃⲟⲗ ϩⲛⲟⲩϩⲩⲗⲏ ⲛⲁⲧⲉⲥⲙⲟⲧ ⲉⲧⲣⲉⲕⲧⲛⲛⲟⲟⲩ ⲛⲁⲩ ⲛⲟⲩⲁϣⲏ ⲛⲁⲣⲁⲝ ⲏ ϩⲉⲛⲙⲟⲩⲓ ⲉⲩⲛⲁϣⲧ

19 ⲏ ϩⲉⲛⲕⲉⲑⲏⲣⲓⲟⲛ ⲛⲥⲱⲛⲧ ⲛⲃⲣⲣⲉ ⲉⲛⲥⲉⲥⲟⲟⲩⲛ ⲙⲙⲟⲟⲩ ⲁⲛ ⲉⲩⲙⲉϩ ⲛϭⲱⲛⲧ ⲏ ⲉⲩⲗϩⲏⲥ ϩⲛⲟⲩⲛⲓϥⲉ ⲛⲕⲱϩⲧ ⲏ ϩⲙⲡⲉⲩϩⲣⲟⲟⲩ ⲉⲩϣⲱϣ ⲛⲟⲩⲕⲁⲡⲛⲟⲥ ⲏ ⲉⲣⲉϩⲉⲛϯⲕ ⲉⲩⲛⲁϣⲧ ϥⲱϭⲉ ⲉⲃⲟⲗ ϩⲛⲛⲉⲩⲃⲁⲗ

20 ⲛⲁⲓ ⲉⲣⲉⲡⲉⲩⲥⲁϣ ⲁⲛ ⲙⲙⲁⲧⲉ ⲛⲁϭⲙϭⲟⲙ ⲉⲧⲁⲕⲟⲟⲩ ⲁⲗⲗⲁ ⲡⲉⲩⲕⲉϩⲟ ⲉϥϯϩⲟⲧⲉ ⲛⲁⲩ ⲉϥⲛⲁⲟϫⲛⲟⲩ

21 ⲉϫⲛⲛⲁⲓ ⲇⲉ ⲧⲏⲣⲟⲩ ⲛⲉⲩⲛϣϭⲟⲙ ⲛⲣⲁϩⲧⲟⲩ ⲉϩⲣⲁⲓ ϩⲛⲟⲩⲡⲛⲉⲩⲙⲁ ⲛⲟⲩⲱⲧ ⲁⲡϫⲓⲕⲃⲁ ⲡⲱⲧ ⲛⲥⲱⲟⲩ ⲁⲩⲱ ⲛⲥⲉϣⲁϣⲟⲩ ⲉⲃⲟⲗ ϩⲓⲧⲙⲡⲉⲡⲛⲉⲩⲙⲁ ⲛⲧⲉⲕϭⲟⲙ ⲁⲗⲗⲁ ⲁⲕⲧⲉϣϩⲱⲃ ⲛⲓⲙ ϩⲛⲟⲩⲣⲱϣⲉ ⲙⲛⲟⲩⲏⲡⲉ ⲙⲛⲟⲩϣⲓ

22 ⲧⲛⲟϭ ⲅⲁⲣ ⲛϭⲟⲙ ϣⲟⲟⲡ ⲛⲁⲕ ⲛⲟⲩⲟⲉⲓϣ ⲛⲓⲙ ⲁⲩⲱ ⲛⲓⲙ ⲡⲉⲧⲛⲁϯ ⲟⲩⲃⲉ ⲡⲁⲙⲁϩⲧⲉ ⲙⲡⲉⲕϭⲃⲟⲓ

23 ϫⲉⲉⲣⲉⲡⲕⲟⲥⲙⲟⲥ ⲧⲏⲣϥ ⲟ ⲛⲧϩⲉ ⲙⲡⲣⲓⲕⲉ ⲛⲟⲩⲙⲁϣⲉ ⲙⲡⲉⲕⲙⲧⲟ ⲉⲃⲟⲗ ⲁⲩⲱ ⲛⲧϩⲉ ⲛⲟⲩⲧⲗϯⲗⲉ ⲛⲉⲓⲱⲧⲉ ⲉⲁⲥⲉⲓ ⲉϩⲣⲁⲓ ⲉϫⲙⲡⲕⲁϩ ⲙⲡⲛⲟⲩ ⲛϣⲱⲣⲡ

24 ⲉⲕⲛⲁ ⲇⲉ ⲙⲡⲧⲏⲣϥ ϫⲉⲟⲩⲛϭⲟⲙ ⲙⲙⲟⲕ ⲉϩⲱⲃ ⲛⲓⲙ ⲉⲕⲕⲱ ⲇⲉ ⲉⲃⲟⲗ ⲛⲛⲛⲟⲃⲉ ⲛⲛⲣⲱⲙⲉ ⲉⲩⲙⲉⲧⲁⲛⲟⲓⲁ

25 ⲕⲙⲉ ⲅⲁⲣ ⲛⲛⲉⲧϣⲟⲟⲡ ⲧⲏⲣⲟⲩ ⲁⲩⲱ ⲛⲅϥⲱⲧⲉ ⲁⲛ ⲛⲗⲁⲁⲩ ⲛⲛⲉⲛⲧⲁⲕⲧⲁⲙⲓⲟⲟⲩ ⲛⲛⲉⲕⲛⲁⲥⲛⲧ ⲛⲕⲁ ⲅⲁⲣ ⲁⲛ ⲉⲕⲙⲟⲥⲧⲉ ⲙⲙⲟϥ

26 ⲛⲁϣ ⲇⲉ ⲛϩⲉ ⲉⲣⲉⲟⲩϩⲱⲃ ⲛⲁⲙⲟⲩⲛ ⲉⲃⲟⲗ ⲉⲙⲡⲉⲕⲟⲩⲁϣϥ ⲏ ⲉϥⲛⲁϭⲱ ϣⲁⲡⲧⲏⲣϥ ⲛⲓⲙ ⲡⲉⲧⲉⲙⲡⲕϯⲣⲁⲛ ⲉⲣⲟϥ

27 ⲕϯⲥⲟ ⲇⲉ ⲉⲣⲟⲟⲩ ⲧⲏⲣⲟⲩ ϫⲉⲡⲉⲧⲉⲛⲱⲕ ⲛⲉ ⲡϫⲟⲉⲓⲥ ⲙⲙⲁⲉⲓⲯⲩⲭⲏ