Read Wisdom 12 side by side with translations · The Final Bible
1 ܡܛܠ ܕܪܘܚܟ ܛܒܬܐ ܫܪܝܐ ܒܟܠ
2 ܘܠܕܡܫܬܪܥܝܢ ܒܩܠܝܠ ܩܠܝܠ ܡܟܣ ܐܢܬ ܠܗܘܢ ܒܡܕܡ ܕܡܣܟܠܝܢ ܡܟܘܢ ܐܢܬ ܘܟܐܐ ܐܢܬ ܕܢܥܪܩܘܢ ܡܢ ܒܝ̈ܫܬܐ ܘܢܗܝܡܢܘܢ ܒܟ ܡܪܝܐ
3 ܡܛܠ ܕܐܦ ܠܗܢܘܢ ܩܕܡ̈ܝܐ ܕܥܡܪܝܢ ܗܘܘ ܒܐܪܥܐ ܩܕܝܫܬܐ
4 ܣܢܝܬ ܐܢܘܢ ܡܛܠ ܥܒ̈ܕܝܗܘܢ ܛܢ̈ܦܐ ܥܒ̈ܕܐ ܕܚܪ̈ܫܐ ܘܬܫܡ̈ܫܬܐ ܕܠܐ ܟܫܪ̈ܢ
5 ܡܩܛܠܝܢ ܗܘܘ ܒ̈ܢܝܗܘܢ ܕܠܐ ܚܘܣܢ ܐܟܠܝܢ ܗܘܘ ܒܣܪܐ ܪ̈ܚܡܐ ܕܒܢ̈ܝ ܐܢܫܐ ܒܓܘܗܘܢ ܥܒܕܝܢ ܕܡܘܬܐ ܕܐܒܕܢܐ ܥܒܕܘ ܒܡܨܥܬܐ ܪ̈ܐܙܐ ܕܠܐ ܒܢܡܘܣ
6 ܘܠܐ ܗܘܐ ܥܘܕܪܢܐ ܠܢ̈ܦܫܬܐ ܕܒܢ̈ܝ ܥܡܗܘܢ ܘܐܢܬ ܨܒܝܬ ܕܬܘܒܕ ܐܢܘܢ ܒܐܝܕܐ ܕܐ̈ܒܗܬܐ
7 ܕܢܣܒܘܢ ܥܒ̈ܕܘܗܝ ܕܐܠܗܐ ܥܘܡܪܐ ܢܝܚܐ ܐܪܥܐ ܕܝܗܒܬ ܒܐܝܩܪܐ ܘܒܫܘܒܚܐ
8 ܘܐܦ ܥܠ ܗܠܝܢ ܐܝܟ ܒܢ̈ܝ ܐܢܫܐ ܚܣܬ ܫܕܪܬ ܠܘܩܕܡ ܕܒܘܪ̈ܐ ܠܩܪܒܐ ܕܒܩܠܝܠ ܩܠܝܠ ܢܓܡܪܘܢ ܐܢܘܢ
9 ܐܠܐ ܠܐ ܗܘܐ ܡܛܠ ܕܩܫܝܢ ܗܘܘ ܪ̈ܫܝܥܐ ܡܢ ܙܕܝܩ̈ܐ ܕܢܚܪܒܘܢ ܐܢܘܢ ܐܘ ܒܚܝ̈ܘܬܐ ܒܝܫ̈ܬܐ ܐܘ ܒܩܛܠܐ ܕܡܡܠܠ ܦܘܡܐ ܢܫܬܚܩܘܢ
10 ܐܠܐ ܒܩܠܝܠ ܩܠܝܠ ܕܢܬ ܐܢܘܢ ܘܝܗܒܬ ܠܗܘܢ ܐܬܪܐ ܠܬܝܒܘܬܐ ܡܛܠ ܕܝܕܥ ܐܢܬ ܕܒܝܫ ܗܘ ܡܘܠܕܗܘܢ ܘܢܨܝܒܐ ܒܗܘܢ ܒܝܫܘܬܗܘܢ ܘܠܐ ܡܬܚ̈ܠܦܢ ܡܚܫ̈ܒܬܗܘܢ ܠܥܠܡ
11 ܙܪܥܐ ܓܝܪ ܕܚ̈ܛܝܐ ܠܝܛ ܗܘ ܩܕܡ ܡܪܝܐ ܠܐ ܗܘܐ ܡܛܠ ܕܕܚܠܬ ܡܢ ܚ̈ܛܝܐ ܐܘܪܟܬ ܠܗܘܢ
12 ܡܢܘ ܓܝܪ ܡܫܟܚ ܕܢܐܡܪ ܠܟ ܡܢܐ ܥܒܕ ܐܢܬ ܐܘ ܡ̇ܢ ܩܐܡ ܠܘܩܒܠ ܕܝܢ̈ܝܟ ܐܘ ܡܢܘ ܩܒܠ ܥܠ ܒ̈ܢܝ ܥܡ̈ܡܐ ܟܕ ܡܘܒܕ ܐܢܬ ܠܗܘܢ ܐܘ ܡܢܘ ܢܩܘܡ ܩܕܡܝܟ ܬܒܘܥܐ ܥܠ ܐܢܫܐ ܪ̈ܫܝܥܐ
13 ܐܠܗ ܓܝܪ ܐܚܪܝܢ ܠܝܬ ܠܒܪ ܡܢܟ ܘܐܢܬ ܝܨܦ ܐܢܬ ܥܠ ܟܠ ܘܐܢܬ ܚܘܝܬ ܕܡܕܡ ܒܛܠܘܡܝܐ ܠܐ ܕܢܬ
14 ܘܠܐ ܡܠܟܐ ܘܐܦ ܠܐ ܡܕܒܪܢܐ ܡܫܟܚ ܠܡܩܡ ܩܕܡܝܟ ܒܡܐ ܕܚܝܒܬ ܙܕܝܩܐܝܬ
15 ܘܒܙܕܩܐ ܟܠ ܡܕܡ ܡܕܒܪ ܐܢܬ ܘܡܕܡ ܕܘܠܐ ܗܘܐ ܠܡܬܚܝܒܘ ܦܘܪܥܢܐ ܐܝܟ ܚܝܠܟ ܡܢ ܒܪ ܢܘܟܪ̈ܝܐ
16 ܡܛܠ ܕܚܝܠܟ ܪܝܫ ܟܐܢܘܬܐ ܗܘ ܘܐܢܬ ܫܠܝܛ ܐܢܬ ܥܠ ܟܠ ܘܚܐܣ ܐܢܬ ܥܠ ܟܠ
17 ܚܝ̈ܠܐ ܚܘܝܬ ܘܠܐ ܗܝܡܢܘ ܒܠܚܘܕ ܒܚܝܠܐ ܕܫܘܠܡܐ ܠܗܠܝܢ ܕܝܕܥ ܐܢܬ ܬܩܝܦܐܝܬ ܡܟܣ ܐܢܬ ܠܗܘܢ
18 ܘܐܢܬ ܡܪܝܐ ܫܠܝܛ ܥܠ ܚܝܠܐ ܘܒܛܝܠܐܝܬ ܕܐ̇ܢ ܐܢܬ ܘܒܟܠ ܚܘܣܢ ܡܕܒܪ ܐܢܬ ܠܢ ܐܢ ܬܨܒܐ ܓܝܪ ܥܬܝܪ ܗܘ ܚܝܠܐ
19 ܘܒܗܠܝܢ ܥܒ̈ܕܐ ܐܠܦܬ ܠܥܡܟ ܘܠܒ̈ܢܝܟ ܕܘܠܐ ܗܘ ܠܗ ܠܙܕܝܩܐ ܠܡܪܚܡ ܠܒܪ ܐܢܫܐ ܘܥܒܕܬ ܠܒ̈ܢܝܟ ܣܒܪܐ ܛܒܐ ܘܝܗܒ ܐܢܬ ܬܝܒܘܬܐ ܥܠ ܣܟ̈ܠܘܬܐ
20 ܕܐܦ ܠܒ̈ܥܠܕܒܒܝܗܘܢ ܕܥܒ̈ܕܝܟ ܚܝܒܬ ܐܢܘܢ ܠܡܘܬܐ ܘܨܥܪܬ ܐܢܘܢ ܒܟܠ ܦܘܪܥܢ ܘܒܥܘ ܕܢܬܝܗܒ ܠܗܘܢ ܙܒܢܐ ܠܬܚܢܢܬܐ ܕܢܥܪܩܘܢ ܡܢ ܒܝܫ̈ܬܐ
21 ܘܒܝܨܝܦܘܬܐ ܪܒܬܐ ܕܢܬ ܐܢܘܢ ܠܥܡܟ ܘܠܒ̈ܢܝܟ ܗܠܝܢ ܕܥܒܕܬ ܥܡ ܐ̈ܒܗܬܢ ܩܝ̈ܡܐ ܘܡܘܡ̈ܬܐ ܘܩܨ̈ܐ ܛܒ̈ܐ
22 ܘܠܢ ܥܒܕܬ ܕܝܢܐ ܕܢܓܕܬ ܠܣ̈ܢܐܝܢ ܒܪ̈ܒܘ ܢ̈ܓܕܝܢ ܕܟܕ ܢܗܘܐ ܕܝܢܝܢ ܚܢܢ ܗܘܝܢ ܡܬܕܟܪܝܢ ܚܢܢ ܛܘܒܟ ܘܟܕ ܢܗܘܐ ܡܬܕܝܢܝܢ ܚܢܢ ܢܗܘܐ ܡܣܟܝܢܢ ܠܪ̈ܚܡܝܟ
23 ܕܟܕ ܚܝܘ ܦܟܝ̈ܗܐ ܘܓܡܪܘ ܛܠܘܡܐܝܬ ܢܓܕܬ ܐܢܘܢ ܒܛܢܦܘܬܗܘܢ
24 ܡܛܠ ܕܒܐܘܪ̈ܚܬܐ ܕܛܥܝܘܬܗܘܢ ܥܪܩܘ ܘܛܥܘ ܕܬܟܝܠܝܢ ܗܘܘ ܥܠ ܚ̈ܝܘܬܐ ܘܥܠ ܨܥܪܐ ܕܒ̈ܥܠܕܒܒܝܗܘܢ ܕܐ̈ܠܗܐ ܐܢܘܢ ܦܘܪܥܢܘܬܐ ܕܛ̈ܠܝܐ ܒܦܟܝܗܘܬܐ ܕܕܓܠܘ
25 ܡܛܠ ܗܢܐ ܗܟܝܠ ܐܝܟ ܛ̈ܠܝܐ ܕܠܐ ܡܣܬܟܠܝܢ ܫܕܪܬ ܥܠܝܗܘܢ ܕܝܢܐ ܕܓܘܚܟܐ
26 ܘܐܝܠܝܢ ܕܠܐ ܡܣܬܟܠܝܢ ܡܢ ܕܝܢܐ ܕܓܘܚܟܐ ܢܛܥܡܘܢ ܕܝܢܗ ܕܐܠܗܐ ܒܩܘܫܬܐ
27 ܕܒܗܘ ܡܕܡ ܕܚܫܘ ܪܓܙܘ ܡܛܠ ܕܬܟܝܠܝܢ ܥܠܝܗܘܢ ܕܐ̈ܠܗܐ ܐܢܘܢ ܕܐܦ ܒܗܘܢ ܢܬܢܩܡܘܢ ܡܛܠ ܕܗܢܘܢ ܕܚܙܘ ܩܕܡܐܝܬ ܘܟܦܪܘ ܕܠܐ ܢܒܥܘܢ ܠܐܠܗܐ ܒܩܘܫܬܐ ܥܘܬܕܗ ܕܕܝܢܐ ܢܐܬܐ ܥܠܝܗܘܢ
Wisdom 11 · Wisdom 13 · Greek (Septuagint / SBLGNT) · Latin (Vulgate) · Coptic (Sahidic)