Psalms of Solomon 13 — Aramaic (Peshitta)

1 ܝ̣̇ܡܝ̣ܢܗ ܕܡܪܝܐ ܟܣܝܬܢ ܝ̣̇ܡܝ̣ܢܗ ܕܡܪܝܐ ܚܣ̣ܬ̇ ܥܠܝܢ

2 ܘܕܪܥܗ ܕܡܪܝܐ ܦ̣ܪܩܢ ܡ̣ܢ ܪܘܡܚܐ ܕܡܗܠܟܐ ܘܡ̣ܢ ܟܦܢܐ ܘܡ̣̇ܘܬܢܐ ܕܚܛ̈ܝܐ

3 ܐܪܗ̣ܛ ܥܠܝܗܘܢ̇ ܚܝ̈ܘܬܐ ܒܝ̣̈ܫܬܐ ܘܒܫܢ̈ܝܗܝܢ ܡܢ̈ܬܦܢ ܗ̣̈ܘܝ ܒܣ̣ܪܗܘܢ̇ ܘܒܪ̈ܚܘܬܐ ܡܩܨܨܢ ܗ̣̈ܘܝ ܓܪ̈ܡܝܗܘܢ̇ ܠܢ ܕܝܢ ܡ̣ܢ ܗܠܝܢ ܟ̇ܠܗܝܢ ܦܪܩܢ ܡܪܝܐ

4 ܐܬܬܙܝܥ ܕܝܢ ܪܫܝ̣ܥܐ ܡܛܠ ܫܘܪ̈ܥܬܗ ܕܕܠܡܐ ܢܬܬ̣ܒܪ ܥܡ ܥܘ̇ܠܐ

5 ܡܛܠ ܕܒܝ̣ܫܐ ܗ̇ܝ ܡܦܘܠܬܗ ܕܥܘ̇ܠܐ ܠܙܕܝܩܐ ܕܝܢ ܚܕܐ ܡ̣ܢ ܗܠܝܢ ܠܐ ܬܬܩܪܒ

6 ܡܛܠ ܕܠܐ ܦ̇ܚܡܐ ܡܪܕܘܬܐ ܕܙܕܝ̈ܩܐ ܕܕܠܐ ܒܝ̣ܕܥܬܐ ܠܣܚܦܐ ܕܥ̈ܘ̇ܠܐ

7 ܕܒܝܕܥܬܐ ܡ̣ܬܪܕܐ ܓܝܪ ܙܕܝܩܐ ܐܝܟ ܕܠܐ ܢ̣ܚܕܐ ܠܗ ܥܘ̇ܠܐ

8 ܡܛܠ ܕܢܐܪܬܝܘܗܝ ܓܝܪ ܙ̣̇ܕܝܩܐ ܐܝܟ ܕܠܒܪܗ ܪܚܝ̣ܡܐ ܘܡܪܕܘܬܗ ܐܝܟ ܕܒܘ̣ܟܪܐ

9 ܡܛܠ ܕܢܚܘ̣ܣ ܙܕܝܩܐ ܥܠ ܚܣ̈ܘܗܝ ܘܫܘܪ̈ܥܬܗܘܢ̇ ܢܥ̣ܛܐ ܒܡ̣̇ܪܕܘܬܐ ܚܝ̈ܝܗܘܢ ܓܝܪ ܕܙܕܝ̈ܩܐ ܠܥ̇ܠܡ ܐܢܘܢ̇

10 ܚ̈ܛܝܐ ܕܝܢ ܢܬܬܪܝ̣ܡܘܢ ܠܐܒܕܢܐ ܘܠܐ ܢܫ̣ܬܟܚ ܬܘ̣ܒ ܕܘܟܪܢܗܘܢ̇

11 ܥܠ ܚܣ̈ܝܐ ܕܝܢ ܢܗ̣ܘܘܢ ܪ̈ܚܡ̣ܘܗܝ ܕܡܪܝܐ ܥܠ ܟ̇ܠܗܘܢ̇ ܕ̇ܚ̈ܠܘܗܝ ܢܪܚܦ