Read 2 Samuel 6 side by side with translations · The Final Bible
1 ⲇⲁⲩⲉⲓⲇ ⲟⲛ ⲁϥⲥⲱⲟⲩϩ ⲉϩⲟⲩⲛ ⲛϩⲉⲣϣⲓⲣⲉ ⲛⲓⲙ ⲉⲧϩⲛⲡⲓⲥⲣⲁⲏⲗ ⲉⲩⲛⲁⲣⲥⲁϣϥ ⲛⲧⲃⲁ ⲙⲙⲏⲏϣⲉ
2 ⲁⲩⲱ ⲁϥⲧⲱⲟⲩⲛ ⲛϭⲓⲇⲁⲩⲉⲓⲇ ⲁϥⲃⲱⲕ ⲙⲛⲡⲗⲁⲟⲥ ⲧⲏⲣϥ ⲉⲧⲛⲙⲙⲁϥ ⲉⲃⲟⲗ ϩⲛⲛⲁⲣⲭⲱⲛ ⲧⲏⲣⲟⲩ ⲛⲧⲉϩⲓⲏ ⲛⲃⲱⲕ ⲉϩⲣⲁⲓ ⲉⲉⲓⲛⲉ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲛⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲛⲧⲁⲩⲧⲁⲩⲉⲣⲓⲛϥ ⲙⲡϫⲟⲉⲓⲥ ⲛⲛⲉϭⲟⲙ ⲉϫⲱⲥ ⲉϥϩⲙⲟⲟⲥ ϩⲓϫⲛⲛⲉⲭⲁⲓⲣⲟⲩⲃⲓⲛ ϩⲓϫⲱⲥ
3 ⲁⲩⲱ ⲁϥⲧⲁⲗⲟ ⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲉϫⲛⲟⲩⲁϭⲟⲗⲧⲉ ⲛⲃⲣⲣⲉ ⲁⲩⲡⲟⲟⲛⲉⲥ ⲉⲃⲟⲗ ϩⲙⲡⲏⲓ ⲛⲁⲙⲓⲛⲁⲇⲁⲃ ⲡⲉⲧϩⲛⲡⲃⲟⲩⲛⲟⲥ ⲁⲩⲱ ⲱⲥⲁ ⲙⲛⲛⲉϥⲥⲛⲏⲩ ⲛϣⲏⲣⲉ ⲛⲁⲙⲓⲛⲁⲇⲁⲃ ⲁⲩϫⲱⲣⲙ ⲛⲧⲁϭⲟⲗⲧⲉ
4 ⲙⲛⲧⲕⲓⲃⲱⲧⲟⲥ ⲛⲉϥⲥⲛⲏⲩ ⲇⲉ ⲛⲉⲩⲙⲟⲟϣⲉ ϩⲓϩⲏ ⲛⲧⲕⲓⲃⲱⲧⲟⲥ
5 ⲁⲩⲱ ⲇⲁⲩⲉⲓⲇ ⲙⲛⲛⲉϣⲏⲣⲉ ⲙⲡⲓⲥⲣⲁⲏⲗ ⲛⲉⲩⲥⲱⲃⲉ ϩⲓⲧϩⲏ ⲙⲡϫⲟⲉⲓⲥ ϩⲛϩⲉⲛⲟⲣⲅⲁⲛⲟⲛ ⲉⲩⲧⲏϣ ϩⲛⲟⲩϭⲟⲙ ⲁⲩⲱ ϩⲉⲛⲱⲇⲏ ⲁⲩⲱ ϩⲛⲕⲓⲛⲩⲣⲁ ⲙⲛϩⲛⲃⲟⲓⲛⲉ ⲁⲩⲱ ϩⲛϩⲉⲛⲕⲟⲩⲕⲙ ⲙⲛϩⲉⲛⲕⲩⲙⲃⲁⲗⲟⲛ ⲙⲛϩⲉⲛⲥⲏⲃⲉ ⲛϫⲱ
6 ⲁⲩⲱ ⲁϥⲉⲓ ϣⲁⲛⲉϫⲛⲟⲟⲩ ⲛⲁⲇⲁⲩⲉⲓⲇ ⲱⲥⲁ ⲇⲉ ⲁϥⲥⲟⲩⲧⲛⲧⲟⲟⲧϥ ⲉⲃⲟⲗ ⲉⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲉⲁⲙⲁϩⲧⲉ ⲙⲙⲟⲥ ϫⲉⲁⲡⲙⲁⲥⲉ ⲡⲁϣⲥϥ ⲉⲃⲟⲗ ⲉⲕⲁⲧⲉⲭⲉ ⲙⲙⲟⲥ
7 ⲡϫⲟⲉⲓⲥ ⲇⲉ ⲁϥϭⲱⲛⲧ ⲉⲱⲍⲁ ⲁⲩⲱ ⲁⲡⲛⲟⲩⲧⲉ ⲡⲁⲧⲁⲥⲥⲉⲓ ⲙⲙⲟϥ ϩⲙⲡⲙⲁ ⲉⲧⲙⲙⲁⲩ ⲁϥⲙⲟⲩ ϩⲁⲧⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ ϩⲓⲧϩⲏ ⲙⲡⲛⲟⲩⲧⲉ
8 ⲇⲁⲩⲉⲓⲇ ⲇⲉ ⲁϥⲟⲩⲱⲗⲥ ⲛϩⲏⲧ ⲉⲧⲃⲉⲡϣⲁⲁⲣ ⲛⲧⲁⲡⲛⲟⲩⲧⲉ ⲁⲁϥ ⲛⲟⲍⲁ ϣⲁⲉϩⲣⲁⲓ ⲉⲡϩⲟⲟⲩ ⲛϩⲟⲟⲩ ⲁϥⲙⲟⲩⲧⲉ ⲉⲡⲙⲁ ⲉⲧⲙⲙⲁⲩ ϫⲉⲡϣⲱⲱⲧ ⲉⲃⲟⲗ ⲛⲟⲍⲁ
9 ⲇⲁⲩⲉⲓⲇ ⲇⲉ ⲁϥⲣϩⲟⲧⲉ ⲛϩⲏⲧϥ ⲙⲡϫⲟⲉⲓⲥ ϩⲙⲡⲉϩⲟⲟⲩ ⲉⲧⲙⲙⲁⲩ ⲉϥϫⲱ ⲙⲙⲟⲥ ϫⲉⲟⲩ ⲧⲉ ⲧϩⲉ ⲉⲧⲉⲣⲉⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲛⲁⲉⲓ ⲉϩⲟⲩⲛ ⲛⲁⲓ
10 ⲁⲩⲱ ⲙⲡⲉϥⲣϩⲛⲁϥ ⲛϭⲓⲇⲁⲩⲉⲓⲇ ⲉⲧⲣⲉⲧⲕⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ ⲣⲁⲕⲧⲥ ⲉϩⲟⲩⲛ ⲛⲁϥ ⲉⲧⲡⲟⲗⲓⲥ ⲛⲇⲁⲩⲉⲓⲇ ⲇⲁⲩⲉⲓⲇ ⲇⲉ ⲁϥⲕⲧⲟⲥ ⲉϩⲣⲁⲓ ⲉⲡⲏⲓ ⲛⲁⲃⲓⲇⲇⲁⲣⲁ ⲡⲕⲉⲑⲁⲓⲟⲥ
11 ⲁⲩⲱ ⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲁⲥϭⲱ ⲙⲡⲙⲁ ⲉⲧⲙⲙⲁⲩ ϩⲙⲡⲏⲓ ⲛⲁⲃⲓⲇⲇⲁⲣⲁ ⲡⲅⲉⲑⲁⲓⲟⲥ ⲛϣⲟⲙⲛⲧ ⲛⲉⲃⲟⲧ ⲁⲩⲱ ⲡϫⲟⲉⲓⲥ ⲁϥⲥⲙⲟⲩ ⲉⲡⲏⲓ ⲧⲏⲣϥ ⲛⲁⲃⲓⲇⲇⲁⲣⲁ ⲙⲛⲛⲕⲁ ⲛⲓⲙ ⲉⲧϣⲟⲟⲡ ⲛⲁϥ ϩⲙⲡⲧⲣⲉⲥⲃⲱⲕ ⲉϩⲟⲩⲛ ⲛⲁϥ ⲛϭⲓⲧⲕⲓⲃⲱⲧⲟⲥ ⲙⲡϫⲟⲉⲓⲥ
12 ⲁⲩⲱ ⲁⲩϫⲓⲡⲟⲩⲱ ⲛⲇⲁⲩⲉⲓⲇ ⲉⲩϫⲱ ⲙⲙⲟⲥ ϫⲉⲁⲡϫⲟⲉⲓⲥ ⲥⲙⲟⲩ ⲉⲡⲏⲓ ⲛⲁⲃⲓⲇⲇⲁⲣⲁ ⲙⲛⲛⲕⲁ ⲛⲓⲙ ⲉⲧϣⲟⲟⲡ ⲛⲁϥ ⲉⲧⲃⲉⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲁϥⲃⲱⲕ ⲇⲉ ⲛϭⲓⲇⲁⲩⲉⲓⲇ ⲁϥⲉⲓⲛⲉ ⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲉⲃⲟⲗ ϩⲙⲡⲏⲓ ⲛⲁⲃⲓⲇⲇⲁⲣⲁ ⲉϩⲟⲩⲛ ⲉⲧⲡⲟⲗⲓⲥ ⲛⲇⲁⲩⲉⲓⲇ ϩⲛⲟⲩⲉⲓⲣⲏⲛⲏ ⲙⲛⲟⲩⲛⲟϭ ⲛⲉⲩⲫⲣⲟⲥⲩⲛⲏ
13 ⲁⲩⲱ ⲛⲉⲩϫⲱ ⲙⲛⲛⲉⲭⲱⲣⲟⲥ ⲛϭⲓⲛⲉⲧϥⲓ ϩⲁⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲉⲩⲛⲁⲣⲥⲁϣϥ ⲛⲭⲟⲣⲟⲥ ⲁⲩⲱ ⲛⲉⲣⲉⲟⲩϣⲡⲏⲣⲉ ϣⲟⲟⲡ ⲙⲡⲉⲩⲭⲟⲣⲟⲥ ⲉⲩϣⲱⲱⲧ ⲛϩⲉⲛⲙⲁⲥⲉ ⲙⲛϩⲉⲛϩⲓⲉⲓⲃ
14 ⲇⲁⲩⲉⲓⲇ ⲇⲉ ⲛⲉϥⲣⲧⲱⲣⲉ ϩⲛϩⲉⲛⲟⲣⲅⲁⲛⲟⲛ ⲉⲩⲧⲏϣ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲇⲁⲩⲉⲓⲇ ⲛⲉⲣⲉⲟⲩϩⲃⲥⲱ ϩⲓⲱⲱϥ ⲉⲥⲥⲟⲧⲡ
15 ⲇⲁⲩⲉⲓⲇ ⲇⲉ ⲙⲛⲡⲓⲥⲣⲁⲏⲗ ⲧⲏⲣϥ ⲁⲩϫⲓ ⲉϩⲣⲁⲓ ⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ ϩⲛⲟⲩⲗⲟⲩⲗⲁⲓ ⲁⲩⲱ ϩⲛⲟⲩϩⲣⲟⲟⲩ ⲛⲥⲁⲗⲡⲓⲅⲝ
16 ⲁⲥϣⲱⲡⲉ ⲇⲉ ⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲉⲥⲛⲏⲩ ⲉϩⲟⲩⲛ ⲉⲧⲡⲟⲗⲓⲥ ⲛⲇⲁⲩⲉⲓⲇ ⲙⲉⲗⲭⲱⲗ ⲇⲉ ⲧϣⲉⲉⲣⲉ ⲛⲥⲁⲟⲩⲗ ⲁⲥϭⲱϣⲧ ⲉⲃⲟⲗ ϩⲙⲡⲉⲥϣⲟⲩϣⲧ ⲁⲥⲛⲁⲩ ⲉⲡⲣⲣⲟ ⲇⲁⲩⲉⲓⲇ ⲉϥⲱⲣⲭⲉⲓ ⲁⲩⲱ ⲉϥⲣⲧⲱⲣⲉ ϩⲓⲧϩⲏ ⲙⲡϫⲟⲉⲓⲥ ⲁⲥⲕⲱⲙϣ ⲛⲥⲱϥ ϩⲙⲡⲉⲥϩⲏⲧ
17 ⲧⲕⲓⲃⲱⲧⲟⲥ ⲇⲉ ⲙⲡϫⲟⲉⲓⲥ ⲁⲩⲛⲧⲥ ⲁⲇⲁⲩⲉⲓⲇ ⲧⲁϩⲟⲥ ⲉⲣⲁⲧⲕ ϩⲙⲡⲉⲥⲙⲁ ϩⲛⲧⲙⲏⲧⲉ ⲛⲧⲉⲥⲕⲏⲛⲏ ⲧⲁⲓ ⲛⲧⲁⲇⲁⲩⲉⲓⲇ ⲡⲏⲝⲉ ⲙⲙⲟⲥ ⲛⲁⲥ ⲁⲩⲱ ⲇⲁⲩⲉⲓⲇ ⲁϥⲧⲁⲗⲟ ⲉϩⲣⲁⲓ ⲛϩⲉⲛϩⲟⲗⲟⲕⲁⲩⲧⲱⲙⲁ ϩⲓⲧϩⲏ ⲙⲡϫⲟⲉⲓⲥ ⲙⲛϩⲉⲛⲑⲩⲥⲓⲁ ⲛⲉⲓⲣⲏⲛⲓⲕⲟⲛ
18 ⲁϥⲥⲙⲟⲩ ⲉⲡⲗⲁⲟⲥ ϩⲙⲡⲣⲁⲛ ⲙⲡϫⲟⲉⲓⲥ ⲛⲛϭⲟⲙ
19 ⲁⲩⲱ ⲡⲗⲁⲟⲥ ⲧⲏⲣϥ ⲉⲙⲙⲁ ⲧⲏⲣⲟⲩ ⲙⲡⲓⲥⲣⲁⲏⲗ ϫⲓⲛⲇⲁⲛ ϣⲁⲃⲉⲣⲥⲁⲃⲉⲉ ϫⲓⲛⲟⲩϩⲟⲟⲩⲧ ϣⲁⲟⲩⲥϩⲓⲙⲉ ⲡⲟⲩⲁ ⲡⲟⲩⲁ ⲁⲇⲁⲩⲉⲓⲇ ⲥⲱⲣ ⲛⲁϥ ⲛⲟⲩⲕⲟⲗⲗⲩⲣⲓⲟⲛ ⲛⲟⲉⲓⲕ ⲙⲛⲟⲩⲉⲕⲣⲟϫ ⲙⲛⲟⲩⲟⲣⲃⲉ ⲛⲗⲁⲕⲛⲧ ⲡⲗⲁⲟⲥ ⲧⲏⲣϥ ⲡⲟⲩⲁ ⲡⲟⲩⲁ ⲙⲙⲟⲟⲩ ⲁϥⲃⲱⲕ ⲉϩⲣⲁⲓ ⲉⲡⲉϥⲏⲓ
20 ⲁϥⲕⲧⲟϥ ⲇⲉ ⲛϭⲓⲇⲁⲩⲉⲓⲇ ⲁϥⲥⲙⲟⲩ ⲉⲡⲉϥⲏⲓ ⲁⲩⲱ ⲁⲥⲉⲓ ⲉⲃⲟⲗ ⲛϭⲓⲙⲉⲗⲭⲱⲗ ⲧϣⲉⲉⲣⲉ ⲛⲥⲁⲟⲩⲗ ⲉⲁⲡⲁⲛⲧⲁ ⲉⲇⲁⲩⲉⲓⲇ ⲁⲩⲱ ⲉⲥⲙⲟⲩ ⲉⲣⲟϥ ⲉⲥϫⲱ ⲙⲙⲟⲥ ϫⲉⲛⲧⲁϥϫⲓⲉⲟⲟⲩ ϩⲛⲟⲩⲙⲡϩⲟⲟⲩ ⲛϭⲓⲡⲣⲣⲟ ⲙⲡⲓⲥⲣⲁⲏⲗ ⲉⲁϥⲟⲩⲱⲛϩ ⲉⲃⲟⲗ ⲙⲡϩⲟⲟⲩ ⲛϩⲟⲟⲩ ⲛⲁϩⲣⲁⲩ ⲛⲛⲉϩⲙϩⲁⲗ ⲛⲥϩⲓⲙⲉ ⲛⲧⲉⲛⲉϥϩⲙϩⲁⲗ ⲕⲁⲧⲁⲧϩⲉ ⲉϣⲁϥϭⲱⲗⲡ ⲉⲃⲟⲗ ϩⲛⲟⲩϭⲱⲗⲡ ⲉⲃⲟⲗ ⲛϭⲓⲟⲩⲁ ⲛⲛⲉⲧⲟⲣⲭⲉⲓ
21 ⲁⲩⲱ ⲡⲉϫⲉⲇⲁⲩⲉⲓⲇ ⲙⲙⲉⲗⲭⲱⲗ ϫⲉϯⲛⲁⲟⲣⲭⲉⲓ ⲁⲛⲟⲕ ϩⲓⲧϩⲏ ⲙⲡϫⲟⲉⲓⲥ ϥⲥⲙⲁⲙⲁⲁⲧ ⲛϭⲓⲡϫⲟⲉⲓⲥ ⲡⲁⲓ ⲛⲧⲁϥⲥⲟⲡⲧ ⲁⲛⲟⲕ ⲉϩⲟⲩⲉ ⲉⲡⲟⲩⲉⲓⲱⲧ ⲁⲩⲱ ⲉϩⲓⲟⲩⲉ ⲉⲡⲟⲩⲏⲓ ⲧⲏⲣϥ ⲉⲧⲣⲉϥⲕⲁⲑⲓⲥⲧⲁ ⲙⲙⲟⲓ ⲛⲁⲣⲭⲱⲛ ⲉϫⲙⲡⲉϥⲗⲁⲟⲥ ⲡⲓⲥⲣⲁⲏⲗ ⲁⲩⲱ ϯⲛⲁⲥⲱⲃⲉ ⲛⲧⲁⲟⲣⲭⲉⲓ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ
22 ⲁⲩⲱ ϯⲛⲁⲟⲩⲱⲛϩ ⲉⲃⲟⲗ ⲟⲛ ⲛⲧⲉⲓϩⲉ ⲛⲧⲁϣⲱⲡⲉ ⲛⲧϩⲉ ⲛⲟⲩϭⲱⲃ ⲛⲁϩⲣⲉ ⲁⲩⲱ ⲛⲕⲉϩⲙϩⲁⲗ ⲛⲥϩⲓⲙⲉ ⲛⲁⲓ ⲛⲧⲁⲣϫⲟⲟⲥ ⲉⲧⲃⲏⲏⲧⲟⲩ ϫⲉⲁⲓϫⲓⲉⲟⲟⲩ ⲛⲁϩⲣⲟⲟⲩ
23 ⲁⲩⲱ ⲙⲉⲗⲭⲱⲗ ⲧϣⲉⲉⲣⲉ ⲛⲥⲁⲟⲩⲗ ⲙⲡⲉϣⲏⲣⲉ ϣⲱⲡⲉ ⲛⲁⲥ ϣⲁⲡⲉϩⲟⲟⲩ ⲙⲡⲉⲥⲙⲟⲩ
2 Samuel 5 · 2 Samuel 7 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)