Read 2 Samuel 5 side by side with translations · The Final Bible
1 ⲁⲩⲉⲓ ⲇⲉ ⲛϭⲓⲛⲉⲫⲩⲗⲏ ⲧⲏⲣⲟⲩ ⲙⲡⲓⲥⲣⲁⲏⲗ ⲉⲣⲁⲧϥ ⲛⲇⲁⲩⲉⲓⲇ ⲉⲭⲉⲃⲣⲱⲛ ⲉⲩϫⲱ ⲙⲙⲟⲥ ϫⲉⲉⲓⲥϩⲏⲏⲧⲉ ⲁⲛⲟⲛ ϩⲉⲛⲉⲃⲟⲗ ϩⲛⲛⲉⲕⲕⲉⲉⲥ ⲙⲛⲛⲉⲕⲥⲁⲣⲝ
2 ⲁⲩⲱ ⲥⲁⲃ ⲙⲛϣⲟⲙⲛⲧ ⲙⲡϩⲟⲟⲩ ⲛϩⲟⲟⲩ ⲉⲣⲉⲥⲁⲟⲩⲗ ⲟ ⲛⲣⲣⲟ ⲉϩⲣⲁⲓ ⲉϫⲱⲛ ⲛⲧⲟⲕ ⲛⲉⲕϫⲓⲙⲟⲉⲓⲧ ϩⲏⲧϥ ⲙⲡⲓⲥⲣⲁⲏⲗ ⲉϩⲟⲩⲛ ⲉⲃⲟⲗ ⲁⲩⲱ ⲡϫⲟⲉⲓⲥ ⲁϥϫⲟⲟⲥ ⲛⲁⲕ ϫⲉⲛⲧⲟⲕ ⲡⲉⲧⲛⲁⲙⲟⲟⲛⲉ ⲙⲡⲁⲗⲁⲟⲥ ⲡⲓⲥⲣⲁⲏⲗ ⲁⲩⲱ ⲛⲧⲟⲕ ⲡⲉⲧⲛⲁⲣⲁⲣⲭⲱⲛ ⲉϫⲙⲡⲓⲥⲣⲁⲏⲗ
3 ⲁⲩⲱ ⲁⲩⲉⲓ ⲛϭⲓⲛⲉⲡⲣⲉⲥⲃⲩⲧⲉⲣⲟⲥ ⲧⲏⲣⲟⲩ ⲙⲡⲓⲥⲣⲁⲏⲗ ⲉⲣⲁⲧϥ ⲙⲡⲣⲣⲟ ⲉⲭⲉⲃⲣⲱⲛ ⲁⲡⲣⲣⲟ ⲇⲉ ⲥⲙⲓⲛⲉ ⲛⲙⲙⲁⲩ ⲛⲟⲩⲇⲓⲁⲑⲏⲕⲏ ϩⲛⲭⲉⲃⲣⲱⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲁⲩⲧⲱϩⲥ ⲛⲇⲁⲩⲉⲓⲇ ⲛⲣⲣⲟ ⲉϫⲙⲡⲓⲥⲣⲁⲏⲗ ⲧⲏⲣϥ
4 ⲉⲩϣⲏⲣⲉ ϣⲏⲙ ⲡⲉ ⲇⲁⲩⲉⲓⲇ ⲉϥϩⲛⲙⲁⲁⲃⲉ ⲛⲣⲟⲙⲡⲉ ϩⲙⲡⲧⲣⲉϥⲣⲣⲣⲟ
5 ⲉⲁϥⲣⲥⲁϣϥⲉ ⲛⲣⲟⲙⲡⲉ ⲙⲛⲥⲟⲟⲩ ⲛⲉⲃⲟⲧ ⲉϥⲟ ⲛⲣⲣⲟ ϩⲛⲭⲉⲃⲣⲱⲛ ⲉϫⲛⲓⲟⲩⲇⲁ ⲁⲩⲱ ⲙⲁⲁⲃ ϣⲟⲙⲧⲉ ⲛⲣⲟⲙⲡⲉ ⲉⲁϥⲁⲁⲩ ⲉϥⲟ ⲛⲣⲣⲟ ⲉϫⲙⲡⲓⲥⲣⲁⲏⲗ ⲧⲏⲣϥ ⲙⲛⲓⲟⲩⲇⲁ ϩⲛⲧϩⲓⲉⲣⲟⲩⲥⲁⲗⲏⲙ
6 ⲁⲩⲱ ⲡⲣⲣⲟ ⲇⲁⲩⲉⲓⲇ ⲁϥⲃⲱⲕ ⲙⲛⲛⲣⲱⲙⲉ ⲉⲧⲛⲙⲙⲁϥ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ ⲉⲣⲁⲧϥ ⲙⲡⲓⲉⲃⲟⲩⲥⲁⲓⲟⲥ ⲡⲉⲧⲟⲩⲏϩ ϩⲙⲡⲕⲁϩ ⲁⲩⲱ ⲁⲩϫⲟⲟⲥ ⲉϩⲟⲩⲛ ϩⲛⲇⲁⲩⲉⲓⲇ ϫⲉⲛⲛⲉⲕⲉϣⲉⲓ ⲉϩⲟⲩⲛ ⲉⲡⲉⲓⲙⲁ ⲉⲃⲟⲗ ϫⲉⲁⲟⲩⲁ ϩⲉ ⲉⲃⲟⲗ ⲛϭⲓⲛⲃⲗⲗⲉⲩ ⲁⲩⲱ ⲛϭⲁⲗⲉⲉⲩ ⲉⲩϫⲱ ⲙⲙⲟⲥ ϫⲉⲛⲛⲉϣⲇⲁⲇ ⲉⲓ ⲉϩⲟⲩⲛ ⲉⲡⲉⲓⲙⲁ
7 ⲁⲩⲱ ⲁⲇⲁⲩⲉⲓⲇ ϫⲓ ⲙⲡⲕⲱⲧⲉ ⲧⲏⲣϥ ⲛⲥⲓⲱⲛ ⲧⲁⲓ ⲧⲉ ⲧⲡⲟⲗⲓⲥ ⲛⲇⲁⲩⲉⲓⲇ
8 ⲁⲩⲱ ⲡⲉϫⲉⲇⲁⲩⲉⲓⲇ ⲙⲡⲉϩⲟⲟⲩ ⲉⲧⲙⲙⲁⲩ ϫⲉⲟⲩⲟⲛ ⲛⲓⲙ ⲉⲧⲛⲁⲣⲱϩⲧ ⲛⲟⲩⲓⲉⲃⲟⲩⲥⲁⲓⲟⲥ ⲙⲁⲣⲉϥϫⲣⲟ ⲉⲣⲟϥ ϩⲙⲙⲁⲅⲁⲇ ⲁⲩⲱ ⲛⲕⲉϭⲁⲗⲉⲉⲩ ⲙⲛⲛⲉⲃⲗⲗⲉⲉⲩ ⲙⲛⲛⲉⲧⲙⲟⲥⲧⲉ ⲛⲧⲉⲯⲩⲭⲏ ⲛⲇⲁⲩⲉⲓⲇ ⲉⲧⲃⲉⲡⲁⲓ ⲥⲉⲛⲁϫⲟⲟⲥ ϫⲉⲛⲉⲃⲗⲗⲉⲉⲩ ⲙⲛⲛⲉϭⲁⲗⲉⲉⲩ ⲛⲛⲉⲩⲉⲓ ⲉϩⲟⲩⲛ ⲉⲡⲏⲓ ⲙⲡϫⲟⲉⲓⲥ
9 ⲁⲩⲱ ⲇⲁⲩⲉⲓⲇ ⲁϥϩⲙⲟⲟⲥ ϩⲛⲧⲡⲉⲣⲓⲟⲭⲏ ⲁϥⲙⲟⲩⲧⲉ ⲉⲣⲟⲥ ϫⲉⲧⲡⲟⲗⲓⲥ ⲛⲇⲁⲩⲉⲓⲇ ⲁⲩⲱ ⲁϥⲕⲟⲧⲥ ⲛⲟⲩⲡⲟⲗⲓⲥ ⲉⲥⲕⲱⲧⲉ ϫⲓⲛϫⲱϥ ⲙⲡⲕⲁϩ ⲉⲧⲙⲙⲁⲩ ⲙⲛⲡⲉϥⲕⲉⲏⲓ
10 ⲇⲁⲩⲉⲓⲇ ⲇⲉ ⲁϥⲙⲟⲟϣⲉ ⲉⲧⲡⲉ ⲙⲙⲏⲛⲉ ⲉϥⲛⲏⲩ ⲛⲁⲓⲁⲓ ⲁⲩⲱ ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲛⲉϥⲛⲙⲙⲁϥ ⲡⲉ
11 ⲭⲓⲣⲁⲙ ⲇⲉ ⲡⲣⲣⲟ ⲛⲧⲩⲣⲟⲥ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲣⲁⲧϥ ⲛⲇⲁⲩⲉⲓⲇ ⲙⲛϩⲉⲛⲕⲉϣⲉ ⲛⲕⲉⲇⲣⲟⲥ ⲁⲩⲱ ϩⲉⲛⲣⲉϥⲉⲣⲉⲓⲟⲡⲉ ⲉⲛϣⲉ ⲁⲩⲱ ϩⲉⲛⲣⲉϥⲣⲉⲓⲟⲡⲉ ⲉⲛⲉⲱⲛⲉ ⲛⲛⲉϫⲏ ⲁⲩⲕⲱⲧ ⲛⲟⲩⲏⲓ ⲛⲇⲁⲩⲉⲓⲇ
12 ⲁⲩⲱ ⲇⲁⲩⲉⲓⲇ ⲁϥⲉⲓⲙⲉ ϫⲉⲁⲡϫⲟⲉⲓⲥ ⲥⲃⲧⲱⲧϥ ⲛⲣⲣⲟ ⲉϫⲙⲡⲓⲥⲣⲁⲏⲗ ⲁⲩⲱ ⲧⲉϥⲙⲛⲧⲣⲣⲟ ⲁⲥϫⲓⲥⲉ ⲉⲧⲃⲉⲡⲉϥⲗⲁⲟⲥ ⲡⲓⲥⲣⲁⲏⲗ
13 ⲇⲁⲩⲉⲓⲇ ⲇⲉ ⲁϥϫⲓ ⲛⲁϥ ⲛϩⲉⲛⲕⲉϩⲓⲟⲙⲉ ⲙⲛϩⲉⲛⲡⲁⲗⲗⲁⲕⲏ ⲉⲃⲟⲗ ϩⲛⲧϩⲓⲉⲣⲟⲩⲥⲁⲗⲏⲙ ⲙⲛⲛⲥⲁⲉⲧⲣⲉϥⲉⲓ ⲉⲃⲟⲗ ϩⲛⲭⲉⲃⲣⲱⲛ ⲁⲩⲱ ⲁⲩϣⲱⲡⲉ ⲟⲛ ⲛⲇⲁⲩⲉⲓⲇ ⲛϭⲓϩⲉⲛϣⲏⲣⲉ ⲙⲛϩⲉⲛϣⲉⲉⲣⲉ
14 ⲁⲩⲱ ⲛⲁⲓ ⲛⲉ ⲛⲣⲁⲛ ⲛⲧⲁⲩϫⲡⲟⲟⲩ ⲛⲁϥ ϩⲛⲧϩⲓⲉⲣⲟⲩⲥⲁⲗⲏⲙ ⲥⲁⲙⲙⲟⲩⲥ ⲙⲛⲥⲱⲃⲁⲃ ⲁⲩⲱ ⲛⲁⲑⲁⲛ ⲙⲛⲥⲟⲗⲟⲙⲱⲛ
15 ⲉⲗⲓⲁⲃ ⲁⲩⲱ ⲉⲗⲓⲥⲟⲩⲥ ⲛⲁⲫⲉⲕ ⲙⲛⲓⲁⲫⲉⲓⲉ
16 ⲉⲗⲓⲥⲁⲙⲁ ⲁⲩⲱ ⲉⲡⲓⲇⲁⲉ ⲥⲁⲙⲁⲉ ⲁⲩⲱ ⲉⲗⲓⲫⲁⲇ ⲓⲉⲥⲥⲓⲃⲁⲑ ⲙⲛⲛⲁⲑⲁⲑ ⲉⲗⲓⲙⲁⲁⲛ ⲁⲩⲱ ⲓⲉⲃⲁⲁⲣⲑ ⲉⲏⲥⲟⲩⲥ ⲁⲩⲱ ⲉⲗⲫⲁⲗⲁⲇ ⲛⲁⲕⲉⲇ ⲙⲛⲛⲁⲫⲉⲇ ⲓⲁⲛⲁ ⲙⲛⲑⲁⲗⲁⲓⲁ ⲥⲁⲙⲉⲥ ⲙⲛⲃⲁⲗⲓⲃⲁⲑ ⲙⲛⲉⲗⲓⲫⲁⲗⲁⲑ
17 ⲁⲩⲥⲱⲧⲙ ⲇⲉ ⲛϭⲓⲛⲁⲗⲗⲟⲫⲩⲗⲟⲥ ϫⲉⲁⲩⲧⲱϩⲥ ⲛⲇⲁⲩⲉⲓⲇ ⲉⲧⲣⲉϥⲣⲣⲣⲟ ⲉϫⲙⲡⲓⲥⲣⲁⲏⲗ ⲁⲩⲱ ⲁⲩⲉⲓ ⲉϩⲣⲁⲓ ⲛϭⲓⲛⲁⲗⲗⲟⲫⲩⲗⲟⲥ ⲧⲏⲣⲟⲩ ⲉⲧⲣⲉⲩⲕⲱⲧⲉ ⲛⲥⲁⲇⲁⲩⲉⲓⲇ ⲇⲁⲩⲉⲓⲇ ⲇⲉ ⲁϥⲥⲱⲧⲙ ⲁϥⲉⲓ ⲉϩⲣⲁⲓ ⲉⲧⲡⲉⲣⲓⲟⲭⲏ
18 ⲛⲁⲗⲗⲟⲫⲩⲗⲟⲥ ϩⲱⲟⲩ ⲁⲩⲉⲓ ⲁⲩⲧⲁⲁⲩ ⲉϩⲣⲁⲓ ⲉⲡⲉⲓⲁ ⲛⲛⲉϩⲣⲁⲫⲁⲉⲓⲛ
19 ⲇⲁⲩⲉⲓⲇ ⲇⲉ ⲁϥϫⲛⲉⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉⲉⲛⲉⲕⲟⲩⲱϣ ⲉⲧⲣⲁⲃⲱⲕ ⲉⲣⲱⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲉⲛⲉⲕⲛⲁⲧⲁⲁⲩ ⲉϩⲣⲁⲓ ⲉⲧⲟⲟⲧⲡⲉϫⲉⲡϫⲟⲉⲓⲥ ⲛⲁϥ ϫⲉⲃⲱⲕ ⲉϩⲣⲁⲓ ⲉⲣⲟⲟⲩ ϫⲉϩⲛⲟⲩϯ ϯⲛⲁϯ ⲛⲛⲁⲗⲗⲟⲫⲩⲗⲟⲥ ⲉϩⲣⲁⲓ ⲉⲛⲉⲕϭⲓϫ
20 ⲁⲩⲱ ⲇⲁⲩⲉⲓⲇ ⲁϥⲉⲓ ⲉⲃⲟⲗ ⲙⲡⲉⲧⲡⲉ ⲛⲛⲉⲧⲏⲛⲏ ⲁϥϭⲟϫϭⲉϫ ⲛⲛⲁⲗⲗⲟⲫⲩⲗⲟⲥ ⲙⲡⲙⲁ ⲉⲧⲙⲙⲁⲩ ⲡⲉϫⲉⲇⲁⲩⲉⲓⲇ ϫⲉⲁⲡϫⲟⲉⲓⲥ ϭⲟϫϭⲉϫ ⲛⲛⲁⲗⲗⲟⲫⲩⲗⲟⲥ ⲙⲡⲁⲙⲧⲟ ⲉⲃⲟⲗ ⲛⲧϩⲉ ⲛϩⲉⲛⲙⲟⲟⲩ ⲉϣⲁⲩϣⲁⲁⲧⲟⲩ ⲉⲧⲃⲉⲡⲁⲓ ⲁⲩⲙⲟⲩⲧⲉ ⲉⲡⲣⲁⲛ ⲙⲡⲙⲁ ⲉⲧⲙⲙⲁⲩ ϫⲉⲡⲉⲧⲡⲏ ⲛⲛⲉⲧⲏⲛⲏ
21 ⲁⲩⲱ ⲁⲩⲕⲱ ⲙⲡⲙⲁ ⲉⲧⲙⲙⲁⲩ ⲛⲛⲉⲩⲛⲟⲩⲧⲉ ⲁⲩϫⲓⲧⲟⲩ ⲇⲉ ⲛϭⲓⲇⲁⲩⲉⲓⲇ ⲙⲛⲛⲣⲱⲙⲉ ⲉⲧⲛⲙⲙⲁϥ
22 ⲁⲩⲟⲩⲱⲙ ⲉⲧⲟⲟⲧⲟⲩ ⲛϭⲓⲛⲁⲗⲗⲟⲫⲩⲗⲟⲥ ⲉⲉⲓ ⲉϩⲣⲁⲓ ⲁⲩⲱ ⲁⲩⲧⲁⲁⲩ ⲉⲉⲓ ⲉϩⲣⲁⲓ ⲉⲡⲓⲁ ⲛⲛⲉⲧⲓⲧⲁⲛⲟⲥ
23 ⲇⲁⲩⲉⲓⲇ ⲇⲉ ⲁϥϫⲛⲉⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉⲉⲛⲉⲕⲟⲩⲱϣ ⲉⲧⲣⲁⲃⲱⲕ ⲉⲣⲱⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲉⲛⲉⲕⲛⲁⲧⲁⲁⲩ ⲉϩⲣⲁⲓ ⲉⲧⲟⲟⲧⲡⲉϫⲉⲡϫⲟⲉⲓⲥ ⲛⲁϥ ϫⲉⲙⲡⲣⲃⲱⲕ ⲉϩⲣⲁⲓ ⲉⲙⲟⲟϣⲉ ⲉϩⲟⲩⲛ ⲉⲣⲟⲟⲩ ⲡⲟϣⲥⲕ ⲉⲃⲟⲗ ⲙⲙⲟⲟⲩ ⲁⲩⲱ ⲛⲅⲁϩⲉⲣⲁⲧⲕ ⲉⲣⲟⲟⲩ ⲙⲡⲉⲙⲧⲟ ⲉⲃⲟⲗ ⲙⲡⲉⲕⲗⲁⲩⲑⲙⲱⲛ
24 ⲁⲩⲱ ⲉⲕϣⲁⲛⲥⲱⲧⲙ ⲉⲡⲉϩⲣⲟⲟⲩ ⲙⲡⲕⲓⲙ ⲙⲡⲙⲁ ⲛϣⲏⲛ ⲛⲧⲉⲡⲉⲕⲗⲁⲩⲑⲙⲱⲛ ⲧⲟⲧⲉ ⲉⲕⲉⲃⲱⲕ ⲉⲣⲟⲟⲩ ϫⲉϩⲙⲡⲉϩⲟⲟⲩ ⲉⲧⲙⲙⲁⲩ ⲡϫⲟⲉⲓⲥ ⲛⲁⲉⲓ ⲉⲃⲟⲗ ϩⲓϩⲏ ⲙⲙⲟⲕ ⲛϥϭⲟϫϭⲉϫ ⲙⲡⲡⲟⲗⲉⲙⲟⲥ ⲛⲛⲁⲗⲗⲟⲫⲩⲗⲟⲥ
25 ⲁⲩⲱ ⲇⲁⲩⲉⲓⲇ ⲁϥⲉⲓⲣⲉ ⲕⲁⲧⲁⲧϩⲉ ⲛⲧⲁϥϩⲱⲛ ⲉⲧⲟⲟⲧϥ ⲁϥⲡⲁⲧⲁⲥⲥⲉⲓ ⲛⲛⲁⲗⲗⲟⲫⲩⲗⲟⲥ ϫⲓⲛⲅⲁⲃⲁⲱⲛ ϣⲁⲉϩⲣⲁⲓ ⲉⲡⲕⲁϩ ⲛⲅⲁⲥⲏⲣ
2 Samuel 4 · 2 Samuel 6 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)