Read 2 Samuel 7 side by side with translations · The Final Bible
1 ⲁⲥϣⲱⲡⲉ ⲇⲉ ⲛⲧⲉⲣⲉⲡⲣⲣⲟ ϩⲙⲟⲟⲥ ϩⲙⲡⲉϥⲏⲓ ⲁⲡϫⲟⲉⲓⲥ ϯⲙⲧⲟⲛ ⲛⲁϥ ⲉⲡⲧⲏⲣϥ ⲉⲃⲟⲗ ϩⲛⲛⲉϥϫⲁϫⲉ ⲧⲏⲣⲟⲩ ⲉⲧϩⲙⲡⲉϥⲕⲱⲧⲉ
2 ⲁⲩⲱ ⲡⲉϫⲁϥ ⲛϭⲓⲡⲣⲣⲟ ⲉϩⲟⲩⲛ ϩⲛⲁⲑⲁⲛ ⲡⲉⲡⲣⲟⲫⲏⲧⲏⲥ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲟⲩⲏϩ ϩⲛⲟⲩⲏⲓ ⲛⲕⲉⲇⲣⲓⲛⲟⲛ ⲧⲕⲓⲃⲱⲧⲟⲥ ⲇⲉ ⲙⲡⲛⲟⲩⲧⲉ ⲟⲩⲏϩ ϩⲛⲧⲙⲏⲏⲧⲉ ⲛⲧⲉⲥⲕⲏⲛⲏ
3 ⲡⲉϫⲉⲛⲁⲑⲁⲛ ⲉϩⲟⲩⲛ ϩⲙⲡⲣⲣⲟ ϫⲉϩⲱⲃ ⲛⲓⲙ ⲉⲧϩⲙⲡⲉⲕϩⲏⲧ ⲃⲱⲕ ⲁⲣⲓⲥⲟⲩ ϫⲉⲡϫⲟⲉⲓⲥ ⲛⲙⲙⲁⲕ
4 ⲁⲥϣⲱⲡⲉ ⲇⲉ ϩⲛⲧⲉⲟⲩϣⲏ ⲉⲧⲙⲙⲁⲩ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲛⲁⲑⲁⲛ ⲉϥϫⲱ ⲙⲙⲟⲥ ⲛⲁϥ
5 ϫⲉⲃⲱⲕ ⲛⲅϫⲟⲟⲥ ⲙⲡⲁϩⲙϩⲁⲗ ⲇⲁⲩⲉⲓⲇ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲛⲧⲟⲕ ⲁⲛ ⲉⲧⲛⲁⲕⲱⲧ ⲛⲁⲓ ⲙⲡⲁⲏⲓ ⲉⲧⲣⲁⲟⲩⲱϩ ⲛϩⲏⲧϥ
6 ϫⲉⲙⲡⲓⲟⲩⲱϩ ϩⲛⲏⲓ ⲛϫⲓⲛ ⲉⲡⲉϩⲟⲟⲩ ⲛⲧⲁⲓⲉⲓⲛⲉ ⲛⲛⲉϣⲏⲣⲉ ⲙⲡⲓⲥⲣⲁⲏⲗ ⲉⲃⲟⲗ ϩⲛⲕⲏⲙⲉ ϣⲁⲉϩⲣⲁⲓ ⲉⲡϩⲟⲟⲩ ⲛϩⲟⲟⲩ ⲁⲩⲱ ⲛⲉⲓⲙⲟⲟϣⲉ ϩⲛϩⲉⲛⲙⲁ ⲉⲩϩⲟⲃⲥ ⲁⲩⲱ ϩⲛⲛⲉⲥⲕⲏⲛⲏ
7 ⲁⲩⲱ ϩⲛⲛⲉϩⲃⲏⲩⲉ ϩⲛⲛⲙⲁ ⲧⲏⲣⲟⲩ ⲛⲧⲁⲓⲉⲓ ⲛϩⲏⲧⲟⲩ ⲙⲛⲡⲓⲥⲣⲁⲏⲗ ⲧⲏⲣϥ ⲉϣⲱⲡⲉ ϩⲛⲟⲩϣⲁϫⲉ ⲁⲓϣⲁϫⲉ ⲙⲛⲟⲩⲫⲩⲗⲏ ⲛⲟⲩⲱⲧ ⲛⲧⲉⲛⲉⲫⲩⲗⲏ ⲙⲡⲓⲥⲣⲁⲏⲗ ⲡⲙⲁ ⲏ ⲙⲡⲉⲛⲧⲁⲓϩⲱⲛ ⲉⲧⲟⲟⲧϥ ⲉⲙⲟⲟⲛⲉ ⲙⲡⲁⲗⲁⲟⲥ ⲉⲓϫⲱ ⲙⲙⲟⲥ ϫⲉⲉⲧⲃⲉⲟⲩ ⲙⲡⲉⲧⲛⲕⲱⲧ ⲛⲁⲓ ⲛⲟⲩⲏⲓ ⲛⲕⲉⲇⲣⲓⲛⲟⲛ
8 ⲧⲉⲛⲟⲩ ϭⲉ ⲛⲁⲓ ⲛⲉⲧⲉⲧⲛⲛⲁϫⲟⲟⲩ ⲙⲡⲁϩⲙϩⲁⲗ ⲇⲁⲩⲉⲓⲇ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ϫⲱ ⲙⲙⲟⲟⲩ ϫⲉⲁⲓϫⲓⲧⲕ ⲉⲃⲟⲗ ϩⲛⲧϣⲁⲓⲣⲉ ⲛⲛⲉⲥⲟⲟⲩ ⲉⲧⲣⲉⲕϣⲱⲡⲉ ⲛⲁⲣⲭⲱⲛ ⲉϫⲙⲡⲁⲗⲁⲟⲥ ⲡⲓⲥⲣⲁⲏⲗ
9 ⲁⲩⲱ ⲛⲉⲓⲛⲙⲙⲁⲕ ϩⲛⲛⲙⲁ ⲧⲏⲣⲟⲩ ⲉϣⲁⲕⲃⲱⲕ ⲉⲣⲟⲟⲩ ⲁⲩⲱ ⲁⲓⲃⲱⲧⲉ ⲉⲃⲟⲗ ⲛⲛⲉⲕϫⲁϫⲉ ⲧⲏⲣⲟⲩ ϩⲁⲧⲉⲕϩⲏ ⲁⲩⲱ ⲁⲓⲕⲁⲁⲕ ⲉⲕⲟ ⲛⲛⲟϭ ⲛⲥⲟⲉⲓⲧ ⲕⲁⲧⲁⲡⲣⲁⲛ ⲛⲛⲉⲛⲟϭ ⲉⲧϩⲓϫⲙⲡⲕⲁϩ
10 ⲁⲩⲱ ϯⲛⲁⲥⲙⲓⲛⲉ ⲛⲟⲩⲙⲁ ⲙⲡⲁⲗⲁⲟⲥ ⲡⲓⲥⲣⲁⲏⲗ ⲛⲧⲁⲧⲱϭⲉ ⲙⲙⲟϥ ⲛϥⲟⲩⲱϩ ⲙⲁⲩⲁⲁϥ ⲛϥⲧⲙϥⲓⲣⲟⲟⲩϣ ϭⲉ ⲛϫⲓⲛ ⲉⲡⲉⲓⲛⲁⲩ ⲛⲧⲉⲧⲙϣⲏⲣⲉ ⲛⲁⲇⲓⲕⲓⲁ ⲟⲩⲱϩ ⲉⲧⲟⲟⲧϥ ⲛϫⲓⲛ ⲉⲡⲉⲓⲛⲁⲩ ⲉⲑⲙⲕⲟϥ ⲕⲁⲧⲁⲧϩⲉ ⲛⲉϩⲟⲩⲉⲓⲧⲉ
11 ϫⲓⲛⲡⲉϩⲟⲟⲩ ⲛⲧⲁⲓⲕⲁⲕⲣⲓⲧⲏⲥ ⲉϫⲙⲡⲁⲗⲁⲟⲥ ⲡⲓⲥⲣⲁⲏⲗ ⲁⲩⲱ ϯⲛⲁϯⲙⲧⲟⲛ ⲛⲁⲕ ⲉⲃⲟⲗ ϩⲓⲧⲛⲛⲉⲕϫⲁϫⲉ ⲧⲏⲣⲟⲩ ϩⲁⲧⲉⲕϩⲏ ⲁⲩⲱ ⲡϫⲟⲉⲓⲥ ⲛⲁⲧⲁⲙⲟⲕ ϫⲉⲉⲛⲉⲕⲛⲁⲕⲱⲧ ⲛⲁϥ ⲛⲟⲩⲏⲓ
12 ⲁⲩⲱ ⲉⲣϣⲁⲛⲛⲉⲕϩⲟⲟⲩ ϫⲱⲕ ⲉⲃⲟⲗ ⲥⲉⲛⲁⲟⲩⲁϩⲕ ⲛⲁϩⲣⲛ ⲛⲉⲕⲉⲓⲟⲧⲉ ⲁⲩⲱ ϯⲛⲁⲧⲟⲩⲛⲉⲥⲡⲉⲕⲥⲡⲉⲣⲙⲁ ⲙⲛⲛⲥⲱⲕ ⲡⲁⲓ ⲉⲧⲛⲁⲉⲓ ⲉⲃⲟⲗ ⲛϩⲏⲧⲕ ⲛⲧⲁⲥⲟⲃⲧⲉ ⲛⲧⲉⲕⲙⲛⲧⲣⲣⲟ ⲛⲁϥ
13 ⲛⲧⲟϥ ⲡⲉⲧⲛⲁⲕⲱⲧ ⲛⲟⲩⲏⲓ ϩⲙⲡⲁⲣⲁⲛ ⲁⲩⲱ ϯⲛⲁⲧⲁϫⲣⲉⲡⲉϥⲑⲣⲟⲛⲟⲥ ⲛϣⲁ ⲉⲛⲉϩ
14 ⲁⲛⲟⲕ ϯⲛⲁϣⲱⲡⲉ ⲛⲁϥ ⲉⲩⲉⲓⲱⲧ ⲛⲧⲟϥ ϩⲱⲱϥ ϥⲛⲁϣⲱⲡⲉ ⲛⲁⲓ ⲉⲩϣⲏⲣⲉ ⲡⲁⲓ ⲇⲉ ⲉϥϣⲁⲛϫⲓⲛϭⲟⲛⲥ ϯⲛⲁϫⲡⲓⲟϥ ⲙⲡϭⲉⲣⲱⲃ ⲛϩⲉⲛⲣⲱⲙⲉ ⲁⲩⲱ ϩⲛⲧⲥⲏϥⲉ ⲛϩⲉⲛϣⲏⲣⲉ ⲛⲣⲱⲙⲉ
15 ⲡⲁⲛⲁ ⲇⲉ ⲛϯⲛⲁϥⲓⲧϥ ⲁⲛ ⲉⲃⲟⲗ ϩⲓϫⲱϥ ⲕⲁⲧⲁⲧϩⲉ ⲛⲧⲁⲓϥⲓⲧϥ ⲉⲃⲟⲗ ϩⲛⲥⲁⲟⲩⲗ ⲡⲁⲓ ⲛⲧⲁⲓⲡⲟⲟⲛⲟⲩ ⲉⲃⲟⲗ ϩⲓϩⲏ ⲙⲙⲟⲓ
16 ⲁⲩⲱ ⲡⲏⲓ ⲙⲡⲉⲕⲥⲡⲉⲣⲙⲁ ϥⲛⲁϣⲱⲡⲉ ⲉϥⲥⲙⲟⲛⲧ ⲁⲩⲱ ⲧⲉϥⲙⲛⲧⲣⲣⲟ ⲥⲛⲁϣⲱⲡⲉ ⲛϣⲁ ⲉⲛⲉϩ ⲙⲡⲁⲙⲧⲟ ⲉⲃⲟⲗ ⲡⲉϥⲑⲣⲟⲛⲟⲥ ϥⲛⲁϣⲱⲡⲉ ⲉϥⲧⲁϫⲣⲏⲩ ⲛϣⲁ ⲉⲛⲉϩ
17 ⲕⲁⲧⲁⲛⲉⲓϣⲁϫⲉ ⲧⲏⲣⲟⲩ ⲁⲩⲱ ⲕⲁⲧⲁⲧⲉⲓϩⲟⲣⲁⲥⲓⲥ ⲧⲏⲣⲥ ⲧⲁⲓ ⲧⲉ ⲧϩⲉ ⲛⲧⲁϥϣⲁϫⲉ ⲛϭⲓⲛⲁⲑⲁⲛ ⲙⲛⲇⲁⲩⲉⲓⲇ
18 ⲡⲣⲣⲟ ⲇⲉ ⲇⲁⲩⲉⲓⲇ ⲁϥⲃⲱⲕ ⲉϩⲟⲩⲛ ⲁϥϩⲙⲟⲟⲥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲡⲉϫⲁϥ ϫⲉⲁⲛⲅ ⲛⲓⲙ ⲁⲛⲟⲕ ⲡϫⲟⲉⲓⲥ ⲡⲁϫⲟⲉⲓⲥ ⲁⲩⲱ ⲟⲩ ⲡⲉ ⲡⲁⲏⲓ ϫⲉⲁⲕⲙⲉⲣⲓⲧ ϣⲁⲉϩⲣⲁⲓ ⲉⲛⲉⲓϣⲓ
19 ⲁⲩⲱ ⲙⲡⲓⲑⲃⲃⲓⲟ ϩⲛⲗⲁⲁⲩ ⲙⲡⲉⲕⲙⲧⲟ ⲉⲃⲟⲗ ⲡⲁϫⲟⲉⲓⲥ ⲁⲩⲱ ⲁⲕϣⲁϫⲉ ⲉⲧⲃⲉⲡⲏⲓ ⲙⲡⲉⲕϩⲙϩⲁⲗ ⲉϩⲉⲛⲛⲟϭ ⲛⲟⲩⲟⲉⲓϣ ⲡⲁⲓ ⲇⲉ ⲡⲉ ⲡⲛⲟⲙⲟⲥ ⲙⲡⲣⲱⲙⲉ ⲡϫⲟⲉⲓⲥ ⲡⲁϫⲟⲉⲓⲥ
20 ⲁⲩⲱ ⲟⲩ ⲟⲛ ⲡⲉ ⲡϣⲁϫⲉ ⲉⲧⲉⲣⲉⲇⲁⲩⲉⲓⲇ ⲛⲁⲟⲩⲁϩⲙⲉϥ ⲛⲧⲟⲟⲧϥ ⲛⲁϩⲣⲟⲕ ⲧⲉⲛⲟⲩ ϭⲉ ⲛⲧⲟⲕ ⲕⲥⲟⲟⲩⲛ ⲙⲡⲉⲕϩⲙϩⲁⲗ ⲡϫⲟⲉⲓⲥ
21 ⲉⲧⲃⲉⲡⲉⲕϩⲙϩⲁⲗ ⲁⲕⲉⲓⲣⲉ ⲁⲩⲱ ⲉⲧⲃⲉⲡⲧⲱϣ ⲙⲡⲉⲕϩⲏⲧ ⲁⲕⲉⲓⲣⲉ ⲛⲧⲉⲓⲙⲛⲧⲛⲟϭ ⲧⲏⲣⲥ ⲉⲧⲣⲉⲕⲟⲩⲟⲛϩⲕ ⲉⲃⲟⲗ ⲙⲡⲉⲕϩⲙϩⲁⲗ
22 ⲉⲧⲣⲉⲕϫⲓⲉⲟⲟⲩ ⲡϫⲟⲉⲓⲥ ⲡⲁϫⲟⲉⲓⲥ ⲛⲧⲟⲕ ⲡⲉ ⲡⲛⲟⲩⲧⲉ ⲁⲩⲱ ⲛⲉⲕϣⲁϫⲉ ⲛⲁϣⲱⲡⲉ ⲙⲙⲉ ⲁⲩⲱ ⲙⲛϭⲉ ⲛⲟⲩⲧⲉ ⲛⲃⲗⲗⲁⲕ ⲕⲁⲧⲁⲛⲉⲛⲧⲁⲛⲥⲟⲧⲙⲟⲩ ⲧⲏⲣⲟⲩ ϩⲛⲛⲉⲛⲙⲁⲁϫⲉ
23 ⲁⲩⲱ ⲛⲓⲙ ⲡⲉ ⲡⲕⲉϩⲉⲑⲛⲟⲥ ⲛⲧϩⲉ ⲙⲡⲉⲕⲗⲁⲟⲥ ⲡⲓⲥⲣⲁⲏⲗ ϩⲙⲡⲕⲁϩ ⲧⲏⲣϥ ⲛⲧϩⲉ ⲛⲧⲁⲡⲛⲟⲩⲧⲉ ⲥⲱⲕ ϩⲁϫⲱϥ ⲉⲧⲣⲉϥⲥⲱⲧⲉ ⲛⲁϥ ⲛⲟⲩⲗⲁⲟⲥ ⲉⲧⲣⲉⲕⲕⲱ ⲛⲁⲕ ⲛⲟⲩⲣⲁⲛ ⲁⲩⲱ ⲉⲧⲣⲉⲕⲉⲓⲣⲉ ⲛⲁⲕ ⲛⲟⲩⲙⲛⲧⲛⲟϭ ⲙⲛⲟⲩⲉⲟⲟⲩ ⲉⲧⲣⲉⲕⲛⲟⲩϫⲉ ⲉⲃⲟⲗ ϩⲓⲧϩⲏ ⲙⲡⲉⲕⲗⲁⲟⲥ ⲡⲁⲓ ⲛⲧⲁⲕⲥⲟⲧⲡϥ ⲛⲁⲕ ⲉⲃⲟⲗ ϩⲛⲕⲏⲙⲉ ⲛϩⲉⲛϩⲉⲑⲛⲟⲥ ⲙⲛϩⲉⲛⲙⲁ ⲛϣⲱⲡⲉ
24 ⲁⲩⲱ ⲁⲕⲥⲟⲃⲧⲉ ⲛⲁⲕ ⲙⲡⲉⲕⲗⲁⲟⲥ ⲡⲓⲥⲣⲁⲏⲗ ⲉⲩⲗⲁⲟⲥ ⲛϣⲁ ⲉⲛⲉϩ ⲁⲩⲱ ⲛⲧⲟⲕ ⲡϫⲟⲉⲓⲥ ⲁⲕϣⲱⲡⲉ ⲛⲁⲩ ⲛⲛⲟⲩⲧⲉ
25 ⲧⲉⲛⲟⲩ ϭⲉ ⲡϫⲟⲉⲓⲥ ⲡⲁⲛⲟⲩⲧⲉ ⲡϣⲁϫⲉ ⲛⲧⲁⲕϫⲟⲟϥ ⲉⲧⲃⲉⲡⲉⲕϩⲙϩⲁⲗ ⲁⲩⲱ ⲉⲧⲃⲉⲡⲉϥⲏⲓ ⲧⲁϫⲣⲟϥ ⲛϣⲁ ⲉⲛⲉϩ ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲡⲉⲛⲛⲟⲩⲧⲉ ⲉⲧⲣⲉⲡⲏⲓ ⲙⲡⲉⲕϩⲙϩⲁⲗ ⲇⲁⲩⲉⲓⲇ ϣⲱⲡⲉ ⲉϥⲧⲁϫⲣⲏⲩ ⲉϫⲙⲡⲓⲥⲣⲁⲏⲗ ⲙⲡⲉⲕⲙⲧⲟ ⲉⲃⲟⲗ ϫⲉⲛⲧⲟⲕ ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲛⲧⲟⲕ ⲡⲉ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲧⲉⲛⲟⲩ ϭⲉ ⲕⲁⲧⲁⲧϩⲉ ⲛⲧⲁⲕϣⲁϫⲉ ⲙⲡⲉⲕⲣⲁⲛ
26 ⲉϥⲉϫⲓⲥⲉ ⲛϣⲁ ⲉⲛⲉϩ
27 ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲡⲛⲟⲩⲧⲉ ⲡⲓⲥⲣⲁⲏⲗ ⲁⲩⲱ ⲡⲏⲓ ⲙⲡⲉⲕϩⲙϩⲁⲗ ⲇⲁⲩⲉⲓⲇ ⲉϥⲉϣⲱⲡⲉ ⲉϥⲁϩⲉⲣⲁⲧϥ ⲙⲡⲉⲕⲙⲧⲟ ⲉⲃⲟⲗ ϫⲉⲛⲧⲟⲕ ⲡⲉ ⲡϫⲟⲉⲓⲥ ⲛⲛϭⲟⲙ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲁⲕϭⲱⲗⲡ ⲉⲃⲟⲗ ⲉⲡⲙⲁⲁϫⲉ ⲙⲡⲉⲕϩⲙϩⲁⲗ ⲉⲕϫⲱ ⲙⲙⲟⲥ ϫⲉϯⲛⲁⲕⲱⲧ ⲛⲁⲕ ⲛⲟⲩⲏⲓ ⲉⲧⲃⲉⲡⲉⲕϩⲙϩⲁⲗ ⲁϥϩⲉ ⲉⲡⲉϥϩⲏⲧ ⲉϥϣⲗⲏⲗ ⲉϩⲣⲁⲓ ⲉⲣⲟⲕ ϩⲙⲡⲉⲓϣⲗⲏⲗ
28 ⲧⲉⲛⲟⲩ ϭⲉ ⲡϫⲟⲉⲓⲥ ⲡⲁⲛⲟⲩⲧⲉ ⲛⲧⲟⲕ ⲡⲉ ⲡⲛⲟⲩⲧⲉ ⲁⲩⲱ ⲛⲉⲕϣⲁϫⲉ ⲛⲁϣⲱⲡⲉ ⲙⲙⲉ ⲁⲩⲱ ⲁⲕϣⲁϫⲉ ⲉⲧⲃⲉⲡⲉⲕϩⲙϩⲁⲗ ⲉⲉⲓⲛⲉ ⲛⲧⲉⲓⲙⲛⲧⲁⲅⲁⲑⲟⲥ ⲧⲏⲣⲥ ⲉϫⲱϥ
29 ⲧⲉⲛⲟⲩ ϭⲉ ϩⲓⲧⲟⲟⲧⲕ ⲉⲥⲙⲟⲩ ⲉⲡⲏⲓ ⲙⲡⲉⲕϩⲙϩⲁⲗ ⲉⲧⲣⲉϥϣⲱⲡⲉ ⲛϣⲁ ⲉⲛⲉϩ ⲙⲡⲉⲕⲙⲧⲟ ⲉⲃⲟⲗ ϫⲉⲛⲧⲟⲕ ⲡϫⲟⲉⲓⲥ ⲡⲁϫⲟⲉⲓⲥ ⲁⲕϣⲁϫⲉ ⲁⲩⲱ ⲉⲃⲟⲗ ϩⲙⲡⲉⲕⲥⲙⲟⲩ ⲡⲏⲓ ⲙⲡⲉⲕϩⲙϩⲁⲗ ⲛⲁϫⲓⲥⲙⲟⲩ ⲛϣⲁ ⲉⲛⲉϩ
2 Samuel 6 · 2 Samuel 8 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)