Read 2 Samuel 6 side by side with translations · The Final Bible
1 ܘܟܢܫ ܬܘܒ ܕܘܝܕ ܠܟܠܗܘܢ ܓܕܘܕ̈ܐ ܕܐܝܣܪܐܝܠ ܬܠܬܝܢ ܐ̈ܠܦܝܢ
2 ܘܩܡ ܐܙܠ ܕܘܝܕ ܘܟܠܗ ܥܡܐ ܕܥܡܗ ܡܢ ܓܒܪ̈ܐ ܕܝܗܘܕܐ ܘܐܙܠ ܠܓܒܥ ܠܡܣܩܘ ܡܢ ܬܡܢ ܠܐܪܘܢܗ ܕܐܠܗܐ ܕܐܬܩܪܝ ܬܡܢ ܫܡܗ ܕܡܪܝܐ ܨܒܐܘܬ ܝܬ̇ܒ ܥܠ ܟܪ̈ܘܒܐ
3 ܘܣܡܘܗܝ ܠܐܪܘܢܗ ܕܐܠܗܐ ܥܠ ܥܓܠܬܐ ܚܕܬܐ ܘܫܩܠܘܗܝ ܡܢ ܒܝܬ ܐܒܝܢܕܒ ܕܒܓܒܥܬܐ ܘܥܐܙܐ ܘܐܚܝܐ ܒ̈ܢܝ ܐܒܝܢܕܒ ܡܕܒܪܝܢ ܠܥܓܠܬܐ ܒܐܚܪܝܬܐ
4 ܘܫܩܠܘܗܝ ܡܢ ܒܝܬ ܐܒܝܢܕܒ ܕܒܓܒܥ ܠܐܪܘܢܗ ܕܐܠܗܐ ܘܐܚܝܐ ܐܙ̇ܠ ܩܕܡ ܐܪܘܢܐ
5 ܘܕܘܝܕ ܘܟܠܗ ܒܝܬ ܐܝܣܪܝܠ ܡܫܬܥܝܢ ܩܕܡ ܡܪܝܐ ܒܩܝܣ̈ܐ ܕܐܪܙܐ ܘܕܒܪܘܬܐ ܘܒܟܢܪ̈ܐ ܘܒܩܬܪ̈ܐ ܘܒ̈ܦܠܓܐ ܘܒܪ̈ܒܝܥܐ ܘܒܨ̈ܨܠܐ
6 ܘܐܬܘ ܥܕܡܐ ܠܐܕܪ̈ܐ ܬܩ̈ܢܐ ܘܐܘܫܛ ܥܐܙܐ ܐܝܕܗ ܥܠ ܐܪܘܢܗ ܕܡܪܝܐ ܘܐܚܕ ܒܗ ܡܛܘܠ ܕܐܫܬܡܛܘ ܠܗܘܢ ܬܘܪ̈ܐ
7 ܘܐܬܚܡܬ ܪܘܓܙܗ ܕܡܪܝܐ ܒܥܐܙܐ ܘܡܚܝܗܝ ܬܡܢ ܡܪܝܐ ܥܠ ܕܐܘܫܛ ܐܝܕܗ ܘܡܝܬ ܬܡܢ ܠܘܬ ܐܪܘܢܗ ܕܐܠܗܐ
8 ܘܐܬܒܐܫ ܠܕܘܝܕ ܥܠ ܕܬܪܥ ܡܪܝܐ ܬܘܪܥܬܐ ܒܥܐܙܐ ܘܩܪܐ ܠܐܬܪܐ ܗ̇ܘ ܬܘܪܥܬܐ ܕܥܐܙܐ ܥܕܡܐ ܠܝܘܡܢܐ
9 ܘܕܚܠ ܕܘܝܕ ܒܝܘܡܐ ܗ̇ܘ ܡܢ ܩܕܡ ܡܪܝܐ ܘܐܡܪ ܐܝܟܢܐ ܐܥܠ ܠܘܬܝ ܐܪܘܢܗ ܕܡܪܝܐ
10 ܘܠܐ ܨܒܐ ܕܘܝܕ ܠܡܥܠܘ ܠܘܬܗ ܠܐܪܘܢܗ ܕܐܠܗܐ ܠܩܪܝܬܗ ܕܕܘܝܕ ܘܐܣܛܝܗ ܕܘܝܕ ܠܒܝܬ ܥܘܒܪ ܐܕܘܡ ܓܬܝܐ
11 ܘܝܬܒ ܐܪܘܢܗ ܕܡܪܝܐ ܒܝܬ ܥܘܒܪ ܐܕܘܡ ܓܬܝܐ ܬܠܬܐ ܝܪ̈ܚܝܢ ܘܒܪܟ ܡܪܝܐ ܠܥܘܒܪ ܐܕܘܡ ܓܬܝܐ ܘܠܟܠܗ ܒܝܬܗ
12 ܘܚܘܝܘ ܠܡܠܟܐ ܕܘܝܕ ܘܐܡܪܘ ܠܗ ܕܒܪܟ ܡܪܝܐ ܠܥܘܒܪ ܐܕܘܡ ܘܠܟܠ ܡܕܡ ܕܐܝܬ ܠܗ ܡܛܠ ܐܪܘܢܗ ܕܡܪܝܐ ܘܐܙܠ ܕܘܝܕ ܘܐܣܩ ܠܐܪܘܢܗ ܕܡܪܝܐ ܡܢ ܒܝܬ ܥܘܒܪ ܐܕܘܡ ܠܩܪܝܬܗ ܕܕܘܝܕ ܒܚܕܘܬܐ
13 ܘܗܘܐ ܕܟܕ ܗܠܟܘ ܫܩܝ̈ܠܝ ܐܪܘܢܗ ܕܡܪܝܐ ܫܬ ܦܣ̈ܥܢ ܕܒܚ ܕܘܝܕ ܬܘܪ̈ܐ ܡܦܛܡ̈ܐ
14 ܘܕܘܝܕ ܡܫܒܚ ܒܟܠ ܥܘܫܢܐ ܩܕܡ ܡܪܝܐ ܘܕܘܝܕ ܠܒܝܫ ܦܕܬܐ ܕܒܘܨܐ
15 ܘܕܘܝܕ ܘܟܠܗ ܐܝܣܪܝܠ ܡܣܩܝܢ ܠܐܪܘܢܗ ܕܡܪܝܐ ܒܝܘܒܒܐ ܘܒܩܠܐ ܕܫܝܦܘܪܐ
16 ܘܗܘܐ ܐܪܘܢܗ ܕܡܪܝܐ ܒܒܝܬܗ ܕܕܘܝܕ ܘܡܠܟܠ ܒܪܬ ܫܐܘܠ ܐܕܝܩܬ ܡܢ ܟܘܬܐ ܘܚܙܬ ܠܡܠܟܐ ܕܘܝܕ ܕܚ̇ܕܐ ܘܡܫܬܥܐ ܩܕܡ ܐܪܘܢܗ ܕܡܪܝܐ ܘܒܣܪܬ ܥܠܘܗܝ ܒܠܒܗ̇
17 ܘܐܝܬܝܘܗ̇ ܠܩܒܘܬܗ ܕܡܪܝܐ ܘܐܩܝܡܘܗ̇ ܒܓܘ ܡܫܟܢܐ ܕܢܩܫ ܠܗ̇ ܕܘܝܕ ܘܐܣܩ ܕܘܝܕ ܥ̈ܠܘܬܐ ܘܫ̈ܠܡܐ ܩܕܡ ܡܪܝܐ
18 ܘܟܕ ܫܠܡ ܕܘܝܕ ܠܡܣܩܘ ܥ̈ܠܘܬܐ ܘܫ̈ܠܡܐ ܠܡܪܝܐ ܒܪܟ ܠܥܡܐ ܒܫܡܗ ܕܡܪܝܐ ܚܝܠܬܢܐ
19 ܘܦܠܓ ܠܟܠܗ ܥܡܐ ܠܟܠܗ ܟܢܫܐ ܕܐܝܣܪܝܠ ܡܢ ܓܒܪܐ ܘܥܕܡܐ ܠܐܢܬܬܐ ܓܪܝܨܬܐ ܚܕܐ ܕܠܚܡܐ ܘܢܩܣܐ ܚܕ ܘܣܢܪܩܐ ܚܕ ܘܐܙܠܘ ܟܠܗ ܥܡܐ ܐܢܫ ܠܒܝܬܗ
20 ܘܗܦܟ ܕܘܝܕ ܠܡܐܙܠ ܠܒܝܬܗ ܘܢܦܩܬ ܡܠܟܠ ܒܪܬ ܫܐܘܠ ܠܐܘܪܥܗ ܕܕܘܝܕ ܘܐܡܪܬ ܡܐ ܝܩܝܪ ܝܘܡܢܐ ܡܠܟܐ ܕܐܝܣܪܝܠ ܕܐܬܓܠܝ ܝܘܡܢܐ ܠܥܝܢ ܐ̈ܡܗܬܐ ܕܥܒ̈ܕܘܗܝ ܡܬܓܠܝܘ ܐܬܓܠܝܬ ܐܝܟ ܚܕ ܡܢ ܣܪ̈ܝܩܐ
21 ܘܐܡܪ ܕܘܝܕ ܠܡܠܟܠ ܩܕܡ ܡܪܝܐ ܕܨܒܐ ܒܝ ܡܢ ܐܒܘܟܝ ܘܡܢ ܟܠܗ ܒܝܬܗ ܘܦܩܕܢܝ ܕܐܗܘܐ ܡܕܒܪܢܐ ܥܠ ܥܡܗ ܕܡܪܝܐ ܥܠ ܐܝܣܪܝܠ ܡܛܠ ܗ̇ܘ ܓܚܟܬ ܩܕܡ ܡܪܝܐ
22 ܘܒܨܝܪ ܗܘܝܬ ܬܘܒ ܡܢ ܗܕܐ ܘܗܘܝܬ ܫܦܠ ܒܥܝܢ̈ܝ ܢܦܫܝ ܕܥܡ ܐ̈ܡܗܬܐ ܕܐܡܪܬܝ ܥܡܗܝܢ ܐܬܝܩܪ
23 ܘܠܡܠܟܠ ܒܪܬ ܫܐܘܠ ܠܐ ܗܘܐ ܠܗ̇ ܝܠܕܐ ܥܕܡܐ ܠܝܘܡܐ ܕܡܝܬܬ
2 Samuel 5 · 2 Samuel 7 · Hebrew (Masoretic) · Greek (Septuagint / SBLGNT) · Latin (Vulgate) · Coptic (Sahidic)