Wisdom 9 — Coptic (Sahidic)

1 ϫⲉⲡⲛⲟⲩⲧⲉ ⲛⲛⲁⲉⲓⲟⲧⲉ ⲡϫⲟⲉⲓⲥ ⲙⲡⲛⲉⲩⲙⲁ ⲡⲉⲛⲧⲁϥⲧⲁⲙⲓⲉⲡⲧⲏⲣϥ ϩⲙⲡⲉϥϣⲁϫⲉ

2 ⲁⲕⲥⲛⲧⲡⲣⲱⲙⲉ ϩⲛⲧⲉⲕⲥⲟⲫⲓⲁ ϫⲉⲕⲁⲥ ⲉϥⲉⲣϫⲟⲉⲓⲥ ⲉⲛⲉⲕⲥⲱⲛⲧ ⲉⲛⲧⲁⲕⲧⲁⲙⲓⲟⲟⲩ

3 ⲛϥⲣϩⲙⲙⲉ ⲙⲡⲕⲟⲥⲙⲟⲥ ϩⲛⲟⲩⲧⲃⲃⲟ ⲙⲛⲟⲩⲇⲓⲕⲁⲓⲟⲥⲩⲛⲏ ⲛϥⲕⲣⲓⲛⲉ ⲛⲟⲩϩⲁⲡ ϩⲙⲡⲥⲟⲟⲩⲧⲛ ⲛⲧⲉϥⲯⲩⲭⲏ

4 ⲙⲁ ⲛⲁⲓ ⲛⲧⲥⲟⲫⲓⲁ ⲧⲁⲓ ⲉⲧⲁϩⲉⲣⲁⲧⲥ ⲉⲛⲉⲕⲑⲣⲟⲛⲟⲥ ⲛⲅⲧⲙⲧⲥⲧⲟⲓ ⲉⲃⲟⲗ ϩⲛⲛⲉⲕϩⲙϩⲁⲗ

5 ϫⲉⲁⲛϭ ⲡⲉⲕϩⲙϩⲁⲗ ⲁⲩⲱ ⲡϣⲏⲣⲉ ⲛⲧⲉⲕϩⲙϩⲁⲗ ⲁⲛⲅ ⲟⲩⲣⲱⲙⲉ ⲛⲁⲥⲑⲉⲛⲏⲥ ⲛⲕⲟⲩⲓ ⲛⲁϩⲉ ⲉⲓϣⲁⲁⲧ ⲙⲙⲛⲧⲣⲙⲛⲧϩⲏⲧ ϩⲛⲟⲩϩⲁⲡ ⲙⲛⲟⲩⲛⲟⲙⲟⲥ

6 ⲕⲁⲛ ⲟⲩⲧⲉⲗⲉⲓⲟⲥ ⲡⲉ ⲟⲩⲁ ϩⲛⲛϣⲏⲣⲉ ⲛⲛⲣⲱⲙⲉ ⲉⲙⲛⲧⲁϥ ⲙⲙⲁⲩ ⲛⲧⲉⲕⲥⲟⲫⲓⲁ ⲉⲩⲛⲁⲟⲡϥ ⲉⲩⲗⲁⲁⲩ

7 ⲛⲧⲟⲕ ⲁⲕⲥⲟⲧⲡⲧ ⲉⲩⲣⲣⲟ ⲙⲡⲉⲕⲗⲁⲟⲥ ⲁⲩⲱ ⲟⲩⲣⲉϥϯϩⲁⲡ ⲛⲛⲉⲕϣⲏⲣⲉ ⲙⲛⲛⲉⲕϣⲉⲉⲣⲉ

8 ⲁⲕϫⲟⲟⲥ ⲉⲕⲱⲧ ⲛⲁⲕ ⲛⲟⲩⲣⲡⲉ ϩⲙⲡⲉⲕⲧⲟⲟⲩ ⲉⲧⲟⲩⲁⲁⲃ ⲁⲩⲱ ⲟⲩⲑⲩⲥⲓⲁⲥⲧⲏⲣⲓⲟⲛ ϩⲛⲧⲡⲟⲗⲓⲥ ⲙⲡⲉⲕⲙⲁ ⲛϣⲱⲡⲉ ⲡⲉⲓⲛⲉ ⲛⲧⲉⲕⲥⲕⲏⲛⲏ ⲉⲧⲟⲩⲁⲁⲃ ⲉⲛⲧⲁⲕⲥⲃⲧⲱⲧϥ ϫⲓⲛⲛⲥⲟⲣⲡ

9 ⲁⲩⲱ ⲉⲣⲉⲧⲥⲟⲫⲓⲁ ⲛⲙⲙⲁⲕ ⲧⲉⲧⲥⲟⲟⲩⲛ ⲛⲛⲉⲕϩⲃⲏⲩⲉ ⲁⲩⲱ ⲛⲉⲥⲁϩⲉⲣⲁⲧⲥ ⲡⲉ ⲛⲧⲉⲣⲉⲕⲧⲁⲙⲓⲉⲡⲕⲟⲥⲙⲟⲥ ⲉⲥⲥⲟⲟⲩⲛ ϫⲉⲟⲩⲡⲉⲧⲣⲁⲛⲁⲕ ⲙⲡⲉⲕⲙⲧⲟ ⲉⲃⲟⲗ ⲁⲩⲱ ⲟⲩ ⲡⲉⲧⲥⲟⲩⲧⲱⲛ ϩⲛⲛⲉⲕⲉⲛⲧⲟⲗⲏ

10 ⲙⲁⲧⲛⲛⲟⲟⲩⲥ ⲉⲃⲟⲗ ϩⲛⲛⲉⲕⲡⲏⲩⲉ ⲉⲧⲟⲩⲁⲁⲃ ⲁⲩⲱ ⲉⲃⲟⲗ ϩⲙⲡⲉⲑⲣⲟⲛⲟⲥ ⲙⲡⲉⲕⲉⲟⲟⲩ ϫⲉⲕⲁⲥ ⲉⲥⲉϣⲡϩⲓⲥⲉ ⲛⲙⲙⲁⲓ ⲉⲥϩⲁⲧⲏⲓ ⲛⲧⲁⲉⲓⲙⲉ ϫⲉⲟⲩ ⲡⲉⲧϣⲏⲡ ⲛⲛⲁϩⲣⲁⲕ

11 ⲥⲥⲟⲟⲩⲛ ⲅⲁⲣ ⲛⲧⲟⲥ ⲛϩⲱⲃ ⲛⲓⲙ ⲁⲩⲱ ⲥⲛⲟⲉⲓ ⲙⲙⲟⲟⲩ ⲁⲩⲱ ⲥⲛⲁϫⲓⲙⲟⲉⲓⲧ ϩⲏⲧ ϩⲛⲛⲁϩⲃⲏⲩⲉ ϩⲛⲟⲩⲙⲛⲧⲣⲙⲛⲧϩⲏⲧ ⲛⲥϩⲁⲣⲉϩ ⲉⲣⲟⲓ ϩⲙⲡⲉⲥⲉⲟⲟⲩ

12 ⲛⲧⲉⲛⲁϩⲃⲏⲩⲉ ϣⲱⲡⲉ ⲉⲩϣⲏⲡ ⲁⲩⲱ ϯⲛⲁⲕⲣⲓⲛⲉ ⲙⲡⲉⲕⲗⲁⲟⲥ ϩⲛⲟⲩⲇⲓⲕⲁⲓⲟⲥⲩⲛⲏ ⲛⲧⲁϣⲱⲡⲉ ⲉⲓⲙⲡϣⲁ ⲛⲛⲉⲑⲣⲟⲛⲟⲥ ⲙⲡⲁⲉⲓⲱⲧ

13 ⲛⲓⲙ ⲅⲁⲣ ⲛⲣⲱⲙⲉ ⲡⲉⲧⲛⲁⲥⲟⲩⲛⲡϣⲟϫⲛⲉ ⲙⲡⲛⲟⲩⲧⲉ ⲏ ⲛⲓⲙ ⲡⲉⲧⲛⲁⲉⲓⲙⲉ ϫⲉⲟⲩ ⲡⲉⲧⲉⲣⲉⲡϫⲟⲉⲓⲥ ⲟⲩⲁϣϥ

14 ⲙⲙⲟⲕⲙⲉⲕ ⲅⲁⲣ ⲛⲛⲣⲱⲙⲉ ϭⲟⲟⲃ ⲁⲩⲱ ⲥⲉⲗⲟⲟϥⲉ ⲛϭⲓⲛⲉⲩⲙⲉⲉⲩⲉ

15 ⲡⲥⲱⲙⲁ ⲅⲁⲣ ⲡⲣⲉϥⲧⲁⲕⲟ ϣⲁϥϩⲣⲟϣ ⲉϫⲛⲧⲉⲯⲩⲭⲏ ⲁⲩⲱ ⲡⲙⲁ ⲛϣⲱⲡⲉ ⲛⲧⲉⲡⲕⲁϩ ϣⲁϥⲣⲕⲁⲕⲉ ⲉⲡϩⲏⲧ ⲛϥⲁⲓⲣⲟⲟⲩϣ

16 ⲙⲟⲅⲓⲥ ⲉⲛⲧⲟⲛⲧⲛ ⲛⲛⲉⲧϩⲓϫⲙⲡⲕⲁϩ ⲉⲛϭⲓⲛⲉ ⲛⲉⲧϩⲁⲛⲉⲛϭⲓϫ ϩⲛⲟⲩϩⲓⲥⲉ ⲛⲉⲧϩⲛⲙⲡⲏⲩⲉ ⲇⲉ ⲛⲓⲙ ⲡⲉⲛⲧⲁϥϩⲉⲧϩⲱⲧⲟⲩ

17 ⲏ ⲛⲓⲙ ⲡⲉⲛⲧⲁϥⲉⲓⲙⲉ ⲉⲡⲉⲕϣⲟϫⲛⲉ ⲛⲥⲁⲃⲏⲗ ϫⲉⲛⲧⲟⲕ ⲁⲕϯ ⲛⲧⲥⲟⲫⲓⲁ ⲁⲕⲧⲛⲛⲟⲟⲩ ⲙⲡⲉⲕⲡⲛⲉⲩⲙⲁ ⲉⲧⲟⲩⲁⲁⲃ ⲉⲃⲟⲗ ϩⲙⲡϫⲓⲥⲉ

18 ⲧⲁⲓ ⲧⲉ ⲧϩⲉ ⲛⲧⲁⲩⲥⲟⲟⲩⲧⲛ ⲛϭⲓⲛⲉϩⲓⲟⲟⲩⲉ ⲛⲛⲉⲧϩⲓϫⲙ ⲡⲕⲁϩ ⲁⲛⲣⲱⲙⲉ ⲥⲃⲟ ⲉⲛⲉⲧⲣⲁⲛⲁⲕ ⲁⲩⲱ ⲁⲩⲟⲩϫⲁⲓ ϩⲛⲧⲥⲟⲫⲓⲁ