Wisdom 10 — Coptic (Sahidic)

1 ⲧⲁⲓ ⲧⲉⲛⲧⲁⲥⲁⲣⲉϩ ⲉⲡⲉⲛⲁⲩⲡⲗⲁⲥⲥⲉ ⲙⲙⲟϥ ⲛϣⲟⲣⲡ ⲡⲉⲓⲱⲧ ⲙⲡⲕⲟⲥⲙⲟⲥ ⲡⲉⲛⲧⲁⲩⲥⲟⲛⲧϥ ⲙⲁⲩⲁⲁϥ ⲁⲥⲛⲁϩⲙⲉϥ ⲉⲃⲟⲗ ϩⲙⲡⲉϥⲛⲟⲃⲉ

2 ⲁⲥϯ ⲛⲁϥ ⲛⲟⲩϭⲟⲙ ⲉⲁⲙⲁϩⲧⲉ ⲉϫⲙⲡⲧⲏⲣϥ

3 ⲛⲧⲉⲣⲉϥⲥⲁϩⲱϥ ⲇⲉ ⲉⲃⲟⲗ ⲙⲙⲟⲥ ⲛϭⲓⲟⲩⲣⲉϥϫⲓⲛϭⲟⲛⲥ ϩⲛⲧⲉϥⲟⲣⲅⲏ ⲁϥϩⲱⲧⲃ ⲙⲡⲉϥⲥⲟⲛ ⲁϥⲧⲁⲕⲟ ϩⲙⲡⲉϥϭⲱⲛⲧ

4 ⲡⲁⲓ ⲉⲛⲧⲁⲡⲕⲁⲧⲁⲗⲩⲥⲙⲟⲥ ⲉⲙⲥⲡⲕⲁϩ ⲁⲩⲱ ⲟⲛ ⲁⲧⲥⲟⲫⲓⲁ ⲛⲉϩⲙⲡⲇⲓⲕⲁⲓⲟⲥ ⲁⲥⲣϩⲙⲙⲉ ⲙⲙⲟϥ ϩⲓϫⲛⲟⲩⲕⲟⲩⲓ ⲛϣⲉ

5 ⲧⲁⲓ ⲁⲥⲥⲟⲩⲛⲡⲇⲓⲕⲁⲓⲟⲥ ⲉⲃⲟⲗ ϩⲛⲧⲙⲏⲧⲉ ⲛⲧⲡⲟⲛⲏⲣⲓⲁ ⲛⲛϩⲉⲑⲛⲟⲥ ⲉⲁⲩϫⲱⲱⲣⲉ ⲉⲃⲟⲗ ϩⲓⲟⲩⲥⲟⲡ ⲁⲥϩⲁⲣⲉϩ ⲉⲣⲟϥ ⲛⲟⲩⲥⲱⲧⲡ ⲙⲡⲛⲟⲩⲧⲉ ⲁⲥⲣϩⲙⲙⲉ ⲙⲙⲟϥ ϩⲛⲟⲩⲙⲛⲧϣⲁⲛϩⲧⲏϥ ⲙⲡⲉϥϣⲏⲣⲉ

6 ⲧⲁⲓ ⲁⲥⲛⲉϩⲙⲡⲇⲓⲕⲁⲓⲟⲥ ⲉⲃⲟⲗ ϩⲛⲛⲁⲥⲉⲃⲏⲥ ⲉⲩⲛⲁⲧⲁⲕⲟ ⲁϥⲣⲃⲟⲗ ⲉⲡⲕⲱϩⲧ ⲉⲛⲧⲁϥⲉⲓ ⲉϫⲛϯⲟⲩ ⲙⲡⲟⲗⲓⲥ

7 ⲛⲁⲓ ⲉϥⲣⲙⲛⲧⲣⲉ ⲛⲧⲉⲩⲙⲟⲛⲏⲣⲓⲁ ⲛϭⲓⲡⲕⲁϩ ⲉⲧϣⲏϥ ⲉⲧϯⲕⲁⲣⲡⲟⲥ ⲙⲛϩⲉⲛϣⲏⲛ ⲉⲣⲉⲡⲉⲩⲕⲁⲣⲡⲟⲥ ϩⲓⲱⲟⲩ ⲉⲛϥϫⲏⲕ ⲉⲃⲟⲗ ⲁⲛ ⲁⲩⲱ ⲡⲙⲁⲉⲓⲛ ⲛⲧⲉⲯⲩⲭⲏ ⲛⲁⲧⲛⲁϩⲧⲉ ⲉⲥⲁϩⲉⲣⲁⲧⲥ ⲉⲥⲟ ⲛⲟⲩⲟⲉⲓⲧ ⲛϩⲙⲟⲩ

8 ⲛⲉⲛⲧⲁⲩⲣⲡⲃⲟⲗ ⲅⲁⲣ ⲛⲧⲥⲟⲫⲓⲁ ⲟⲩ ⲙⲟⲛⲟⲛ ⲁⲩϯⲟⲥⲉ ⲉⲉⲓⲙⲉ ⲉⲡⲥⲟⲟⲩⲛ ⲛⲛⲉⲧⲛⲁⲛⲟⲩⲟⲩ ⲁⲗⲗⲁ ⲁⲩⲕⲱ ⲛⲟⲩⲣⲡⲙⲉⲉⲩⲉ ⲛⲧⲉⲩⲙⲛⲧⲁⲧϩⲏⲧ ϩⲙⲡⲕⲟⲥⲙⲟⲥ ϫⲉⲕⲁⲥ ϩⲛⲛⲉⲛⲧⲁⲩⲣϣⲁⲛⲧⲉ ⲛϩⲏⲧⲟⲩ ⲛⲛⲉⲩⲉϣϩⲱⲡ

9 ⲧⲥⲟⲫⲓⲁ ⲇⲉ ϣⲁⲥⲛⲉϩⲙⲛⲉⲧϣⲙϣⲉ ⲛⲁⲥ ⲉⲃⲟⲗ ϩⲛⲛϩⲓⲥⲉ

10 ⲧⲁⲓ ⲉⲛⲧⲁⲥϫⲓⲙⲟⲉⲓⲧ ϩⲏⲧϥ ⲙⲡⲇⲓⲕⲁⲓⲟⲥ ϩⲛⲛⲉϩⲓⲟⲟⲩⲉ ⲉⲧⲥⲟⲩⲧⲱⲛ ⲉϥⲡⲏⲧ ϩⲏⲧⲥ ⲛⲧⲟⲣⲅⲏ ⲙⲡⲉϥⲥⲟⲛ ⲁⲥⲧⲥⲁⲃⲟϥ ⲉⲧⲙⲛⲧⲣⲣⲟ ⲙⲡⲛⲟⲩⲧⲉ ⲁⲥϯ ⲛⲁϥ ⲙⲡⲥⲟⲟⲩⲛ ⲛⲛⲉⲧⲟⲩⲁⲁⲃ ⲁⲥⲧⲁϣⲟϥ ϩⲛⲛⲉϥϩⲓⲥⲉ ⲁⲥⲁⲁϥ ⲛⲣⲙⲙⲁⲟ ϩⲛⲛⲉϥⲙⲕⲁϩ

11 ⲉⲃⲟⲗ ϩⲛⲡϫⲓⲛϫⲛⲁϩ ⲛⲛⲉⲧⲟⲩϫⲓ ⲙⲙⲟϥ ⲛϭⲟⲛⲥ ⲁⲥϥⲓ ⲛⲙⲙⲁϥ ⲁⲥⲁⲁϥ ⲛⲣⲙⲙⲁⲟ

12 ⲁⲥⲣϩⲙⲙⲉ ⲙⲙⲟϥ ⲉⲃⲟⲗ ϩⲓⲧⲛⲛⲉϥϫⲓϫⲉⲟⲩ ⲁⲥⲟⲣϫϥ ⲉⲃⲟⲗ ϩⲓⲧⲛⲛⲉⲧϭⲱⲣϭ ⲉⲣⲟϥ ⲁⲥϯ ⲛⲁϥ ⲛⲟⲩⲁⲅⲱⲛ ⲙⲙⲛⲧϫⲱⲱⲣ ϫⲉⲕⲁⲁⲥ ⲉϥⲉⲉⲓⲙⲉ ϫⲉⲧⲙⲛⲧⲛⲟⲩⲧⲉ ϫⲟⲟⲣ ⲉϩⲱⲃ ⲛⲓⲙ

13 ⲧⲁⲓ ⲉⲧⲉⲙⲡⲉⲥⲕⲱ ⲛⲥⲱⲥ ⲙⲡⲇⲓⲕⲁⲓⲟⲥ ⲉⲛⲧⲁⲩⲧⲁⲁϥ ⲉⲃⲟⲗ ⲁⲗⲗⲁ ⲁⲥⲧⲟⲩϫⲟϥ ⲉⲡⲛⲟⲃⲉ

14 ⲁⲥⲃⲱⲕ ⲛⲙⲙⲁϥ ⲉⲡⲉⲥⲏⲧⲉ ⲉⲡϣⲏⲕ ⲁⲩⲱ ⲙⲡⲥⲃⲟϣϥ ϩⲛⲙⲙⲣⲣⲉ ϣⲁⲛⲧⲥⲉⲓⲛⲉ ⲛⲁϥ ⲛⲟⲩϭⲣⲏⲡⲉ ⲙⲙⲛⲧⲣⲣⲟ ⲙⲛⲟⲩⲉⲝⲟⲩⲥⲓⲁ ⲉϫⲛⲛⲉⲧϫⲓ ⲙⲙⲟϥ ⲛϭⲟⲛⲥ ⲁⲥⲟⲩⲱⲛϩ ⲛⲛⲉⲧϩⲓⲗⲁ ⲉⲣⲟϥ ϫⲉⲉⲩϫⲓϭⲟⲗ ⲁⲥϯ ⲛⲁϥ ⲛⲟⲩⲉⲟⲟⲩ ⲛϣⲁⲉⲛⲉϩ

15 ⲧⲁⲓ ⲧⲉⲛⲧⲁⲥⲧⲟⲩϫⲉⲡⲗⲁⲟⲥ ⲉⲧⲟⲩⲁⲁⲃ ⲁⲩⲱ ⲡⲉⲥⲡⲉⲣⲙⲁ ⲛⲥⲱⲧⲡ ⲉⲃⲟⲗ ϩⲛⲟⲩϩⲉⲑⲛⲟⲥ ⲉϥⲑⲗⲓⲃⲉ ⲙⲙⲟⲟⲩ

16 ⲉⲁⲥⲃⲱⲕ ⲉϩⲟⲩⲛ ⲉⲧⲉⲯⲩⲭⲏ ⲙⲡϩⲙϩⲁⲗ ⲙⲡⲛⲟⲩⲧⲉ ⲉⲁϥⲁϩⲉⲣⲁⲧϥ ⲉϩⲉⲛⲛⲟϭ ⲛⲛⲉⲣⲣⲱⲟⲩ ϩⲛϩⲉⲛⲙⲁⲉⲓⲛ ⲙⲛϩⲉⲛϣⲡⲏⲣⲉ

17 ⲁⲥϯ ⲛⲛⲉⲧⲟⲩⲁⲁⲃ ⲙⲡⲃⲉⲕⲉ ⲛⲛⲉⲩϩⲓⲥⲉ ⲁⲥϫⲓⲙⲟⲉⲓⲧ ϩⲏⲧⲟⲩ ϩⲛⲟⲩϩⲓⲏ ⲛϣⲡⲏⲣⲉ ⲁⲥϣⲱⲡⲉ ⲛⲁⲩ ⲉⲩϩⲁⲉⲓⲃⲉⲥ ⲙⲡⲉϩⲟⲟⲩ ⲁⲩⲱ ϩⲉⲛⲥⲓⲟⲩⲣ ⲉⲩⲣⲟⲩⲟⲉⲓⲛ ⲛⲧⲉⲩϣⲏ

18 ⲁⲥϫⲓⲟⲟⲣ ⲙⲙⲟⲟⲩ ⲛⲧⲉⲣⲩⲑⲣⲁ ⲑⲁⲗⲁⲥⲥⲁ ⲁⲥⲛⲧⲟⲩ ⲉⲃⲟⲗ ϩⲓⲧⲛⲟⲩⲙⲟⲟⲩ ⲉⲛⲁϣⲱϥ

19 ⲁⲥϩⲱⲃⲥ ⲉⲃⲟⲗ ⲉϫⲛⲛⲉⲩϫⲓϫⲉⲉⲩⲉ ⲁⲥϩⲃⲣⲃⲱⲣⲟⲩ ⲉϩⲣⲁⲓ ⲉⲡϣⲓⲕ ⲙⲡⲛⲟⲩⲛ

20 ⲉⲧⲃⲉⲡⲁⲓ ⲁⲛⲇⲓⲕⲁⲓⲟⲥ ϣⲗⲛⲁⲥⲉⲃⲏⲥ ⲁⲩⲱ ⲁⲩⲥⲙⲟⲩ ⲉⲡⲉⲕⲣⲁⲛ ⲉⲧⲟⲩⲁⲁⲃ ⲡϫⲟⲉⲓⲥ ⲁⲩϯⲉⲟⲟⲩ ϩⲓⲟⲩⲥⲟⲡ ⲛⲧⲉⲕϭⲓϫ ⲉⲧⲙⲓϣⲉ ⲉϫⲱⲟⲩ

21 ϫⲉⲧⲥⲟⲫⲓⲁ ⲁⲥⲟⲩⲱⲛ ⲉⲧⲧⲁⲡⲣⲟ ⲛⲛⲉⲙⲡⲟ ⲁⲥϯⲧϭⲟⲙ ⲙⲡⲗⲁⲥ ⲛⲛⲕⲟⲩⲓ