Wisdom 5 — Coptic (Sahidic)

1 ⲧⲟⲧⲉ ⲡⲇⲓⲕⲁⲓⲟⲥ ⲛⲁⲁϩⲉⲣⲁⲧϥ ϩⲛⲟⲩⲛⲟϭ ⲙⲡⲁⲣϩⲏⲥⲓⲁ ⲉⲛⲁϣⲱⲥ ⲙⲡⲉⲙⲧⲟ ⲉⲃⲟⲗ ⲛⲛⲉⲛⲧⲁⲩⲑⲗⲓⲃⲉ ⲙⲙⲟϥ ⲁⲩⲱ ⲛⲉⲛⲧⲁⲩⲁⲑⲉⲧⲓ ⲛⲛⲉϥϩⲓⲥⲉ

2 ⲥⲉⲛⲁⲛⲁⲩ ⲛⲥⲉϣⲧⲟⲣⲧⲣ ϩⲛⲟⲩϩⲟⲧⲉ ⲉⲥⲛⲁϣⲧ ⲛⲥⲉⲡⲱϣⲥ ⲉϫⲛⲧⲙⲟⲉⲓϩⲉ ⲙⲡⲉϥⲟⲩϫⲁⲓ

3 ⲛⲥⲉϫⲟⲟⲥ ϩⲣⲁⲓ ⲛϩⲏⲧⲟⲩ ⲉⲩⲙⲉⲧⲁⲛⲟⲉⲓ ⲁⲩⲱ ⲉⲩⲁϣⲁϩⲟⲙ ⲉⲧⲃⲉⲡⲗⲱϫϩ ⲙⲡⲉⲩⲡⲛⲉⲩⲙⲁ ϫⲉⲡⲁⲓ ⲡⲉⲛⲉⲛⲥⲱⲃⲉ ⲛⲥⲱϥ ⲙⲡⲓⲟⲩⲟⲉⲓϣ ⲉϥϣⲟⲟⲡ ⲛⲁⲛ ⲙⲡⲁⲣⲁⲃⲟⲗⲏ ⲛⲛⲟϭⲛⲉϭ ⲛⲛⲓⲁⲧϩⲏⲧ

4 ⲉⲛⲱⲡ ⲙⲡⲉϥⲁϩⲉ ⲉⲩⲗⲓⲃⲉ ⲁⲩⲱ ⲡⲉϥⲙⲟⲩ ⲉⲩⲥⲱϣ

5 ⲛⲁϣ ⲛϩⲉ ⲁⲩⲟⲡϥ ϩⲛⲛϣⲏⲣⲉ ⲙⲡⲛⲟⲩⲧⲉ ⲁⲩⲱ ⲡⲉϥⲕⲗⲏⲣⲟⲥ ϩⲛⲛⲉⲧⲟⲩⲁⲁⲃ

6 ⲉⲉⲓⲉ ⲛⲧⲁⲛⲡⲗⲁⲛⲁ ⲛⲧⲟⲟⲩⲛ ⲉⲃⲟⲗ ϩⲛⲛⲉϩⲓⲟⲟⲩⲉ ⲛⲧⲙⲉ ⲁⲩⲱ ⲙⲡϥϣⲁ ⲛⲁⲛ ⲛϭⲓⲡⲟⲩⲟⲉⲓⲛ ⲛⲧⲇⲓⲕⲁⲓⲟⲥⲩⲛⲏ ⲁⲩⲱ ⲡⲣⲏ ⲙⲡϥⲡⲉⲓⲣⲉ ⲛⲁⲛ

7 ⲁⲛⲙⲟⲩϩ ⲛⲁⲛⲟⲙⲓⲁ ϩⲓⲧⲁⲕⲟ ⲛⲛⲉⲛϩⲓⲟⲟⲩⲉ ⲁⲛⲃⲱⲕ ϩⲓⲧⲛⲛϫⲁⲓⲉ ⲉⲙⲉⲩⲙⲟⲟϣⲉ ⲛϩⲏⲧⲟⲩ ⲧⲉϩⲓⲏ ⲇⲉ ⲙⲡϫⲟⲉⲓⲥ ⲙⲡⲛⲥⲟⲩⲱⲛⲥ

8 ⲛⲧⲁⲥϯⲟⲩ ⲙⲙⲟⲛ ⲛⲟⲩⲛϭⲓⲧⲛⲙⲛⲧϫⲁⲥⲓϩⲏⲧ ⲏ ⲧⲙⲛⲧⲣⲙⲙⲁⲟ ⲙⲛⲧⲙⲛⲧⲃⲁⲃⲉⲣⲱⲙⲉ ⲛⲧⲁⲥϯⲟⲩ ⲛⲟⲩⲛⲁⲛ

9 ⲁⲛⲏ ⲧⲏⲣⲟⲩ ⲟⲩⲉⲓⲛⲉ ⲛⲧϩⲉ ⲛⲟⲩϩⲁⲓⲃⲉⲥ ⲁⲩⲱ ⲛⲧϩⲉ ⲛⲟⲩⲱ ⲉⲁϥⲡⲁⲣⲁⲅⲉ

10 ⲏ ⲛⲧϩⲉ ⲛⲟⲩϫⲟⲉⲓ ⲉϥⲥϭⲏⲣ ϩⲛⲟⲩϩⲟⲉⲓⲙ ⲙⲙⲟⲟⲩ ⲉⲙⲛⲧϩⲉ ⲛϭⲛⲛⲉϥⲧⲁϭⲥⲉ ⲏ ⲧⲉϩⲓⲏ ⲙⲡⲉϥⲧⲟⲡ ϩⲛⲛϩⲟⲉⲓⲙ

11 ⲏ ⲛⲧϩⲉ ⲛⲟⲩϩⲁⲗⲏⲧ ⲉⲁϥϩⲱⲗ ⲉⲃⲟⲗ ⲉⲙⲉⲩϭⲛⲙⲁⲉⲓⲛ ⲙⲡⲉϥϩⲱⲗ ⲉⲃⲟⲗ ⲉϥϩⲓⲟⲩⲉ ⲛⲛⲉϥⲧⲛϩ ⲉⲡⲁⲏⲣ ⲉⲧⲁⲥⲱⲟⲩ ⲉϥⲡⲱϩ ⲙⲙⲟϥ ⲛϭⲟⲛⲥ ϩⲙⲡⲟⲩⲟⲓ ⲉϥⲕⲓⲙ ⲛⲛⲉϥⲧⲛϩ ⲉϥϩⲏⲗ ⲙⲛⲛⲥⲱⲥ ⲉⲙⲉⲩϭⲛⲙⲁⲉⲓⲛ ⲙⲡⲉϥϩⲱⲗ ⲉⲃⲟⲗ

12 ⲏ ⲛⲧϩⲉ ⲛⲟⲩⲥⲟⲧⲉ ⲉⲁⲩⲛⲟϫϥ ⲉⲡⲥⲟⲟⲩⲧⲛ ⲉⲁϥⲡⲉϩⲡⲁⲏⲣ ⲛⲧⲉⲩⲛⲟⲩ ⲟⲛ ⲁϥⲧⲱϭⲉ ⲉⲙⲉⲩⲥⲟⲩⲛⲧⲉϥϩⲓⲏ

13 ⲧⲁⲓ ⲧⲉ ⲧϩⲉ ϩⲱⲱⲛ ⲟⲛ ⲉⲁⲩϫⲡⲟⲛ ⲁⲛⲱϫⲛ ⲙⲡⲛϩⲉ ⲉⲩⲙⲁⲉⲓⲛ ⲛⲁⲣⲉⲧⲏ ⲉⲟⲩⲟⲛϩϥ ⲉⲃⲟⲗ

14 ϩⲣⲁⲓ ⲇⲉ ϩⲛⲧⲉⲛⲕⲁⲕⲓⲁ ⲁⲛⲧⲁⲕⲟ

15 ϫⲉⲧϩⲉⲗⲡⲓⲥ ⲙⲡⲁⲥⲉⲃⲏⲥ ⲉⲥⲟ ⲛⲧϩⲉ ⲛⲟⲩϣϩⲓϭ ⲉⲣⲉⲡⲧⲏⲩ ϥⲓ ⲙⲙⲟϥ ⲁⲩⲱ ⲛⲧϩⲉ ⲛⲟⲩϩⲁⲗⲟⲩⲥ ⲉϥϣⲟⲟⲙⲉ ⲉⲁⲩⲑⲗⲟϥ ⲉⲃⲟⲗ ϩⲓⲧⲛⲟⲩϩⲁⲧⲏⲩ ⲏ ⲛⲧϩⲉ ⲛⲟⲩⲕⲁⲡⲛⲟⲥ ⲉⲁⲩϩⲁⲧⲏⲩ ⲃⲟⲗϥ ⲉⲃⲟⲗ ⲛⲧϩⲉ ⲙⲡⲣⲡⲙⲉⲉⲩⲉ ⲛⲟⲩⲣⲙⲛϭⲟⲉⲓⲗⲉ ⲛⲟⲩϩⲟⲟⲩ ⲟⲩⲱⲧ ⲉⲁϥⲡⲁⲣⲁⲅⲉ

16 ⲛⲇⲓⲕⲁⲓⲟⲥ ⲇⲉ ⲛⲧⲟⲟⲩ ⲛⲁⲱⲛϩ ϣⲁⲉⲛⲉϩ ⲁⲩⲱ ⲉⲣⲉⲡⲉⲩⲃⲉⲕⲉ ϣⲟⲟⲡ ϩⲙⲡϫⲟⲉⲓⲥ ⲁⲩⲱ ⲡⲉⲩⲣⲟⲟⲩϣ ϩⲁⲧⲙ ⲡⲉⲧϫⲟⲥⲉ

17 ⲉⲧⲃⲉⲡⲁⲓ ⲥⲉⲛⲁϫⲓ ⲙⲡⲥⲁ ⲛⲧⲙⲛⲧⲣⲣⲟ ⲁⲩⲱ ⲟⲩϭⲣⲏⲡⲉ ⲉⲛⲉⲥⲱⲥ ⲉⲃⲟⲗ ϩⲓⲧⲟⲟⲧϥ ⲙⲡϫⲟⲉⲓⲥ ϫⲉϥⲛⲁⲣϩⲁⲓⲃⲉⲥ ⲉⲣⲟⲟⲩ ϩⲛⲧⲉϥⲟⲩⲛⲁⲙ ⲛϥⲣⲛⲁϣⲧⲉ ⲛⲁⲩ ϩⲙⲡⲉϥϭⲃⲟⲓ

18 ϥⲛⲁϫⲓ ⲛⲧⲡⲁⲛϩⲟⲡⲗⲓⲁ ⲙⲡⲉϥⲕⲱϩ ⲛϥϩⲟⲕϥ ⲛⲧⲉⲕⲧⲓⲥⲓⲥ ⲉⲡϫⲓⲕⲃⲁ ⲛⲛϫⲁϫⲉ

19 ϥⲛⲁϯ ϩⲓⲱⲱϥ ⲙⲫⲱⲕ ⲛⲧⲇⲓⲕⲁⲓⲟⲥⲩⲛⲏ ⲛϥϯ ⲉϫⲱϥ ⲛⲧⲡⲉⲣⲓⲕⲉⲫⲁⲗⲁⲓⲁ ⲛⲧⲉⲕⲣⲓⲥⲓⲥ ⲁϫⲛϩⲩⲡⲟⲕⲣⲓⲥⲓⲥ

20 ϥⲛⲁϫⲓ ⲙⲡϩⲟⲡⲗⲟⲛ ⲉⲧϫⲟⲟⲣ ⲙⲡⲧⲃⲃⲟ

21 ϥⲛⲁϫⲱⲣ ⲛⲧⲥⲏϥⲉ ⲛⲧⲉϥⲟⲣⲅⲏ ⲉⲧϣⲱⲱⲧ ⲉⲃⲟⲗ ⲛⲧⲉⲡⲕⲟⲥⲙⲟⲥ ⲛⲙⲙⲁϥ ⲙⲓϣⲉ ⲟⲩⲃⲉ ⲛⲁⲧϩⲏⲧ

22 ⲥⲉⲛⲁⲙⲟⲟϣⲉ ⲉⲩⲥⲟⲩⲧⲱⲛ ⲛϭⲓⲛⲥⲟⲧⲉ ⲛⲛⲉⲃⲣⲏϭⲉ ⲛⲥⲉϥⲱϭⲉ ⲉⲃⲟⲗ ϩⲛⲛⲉⲕⲗⲟⲟⲗⲉ ⲉⲡⲥⲟⲟⲩⲧⲛ ⲛⲧϩⲉ ⲉⲃⲟⲗ ϩⲛⲟⲩⲡⲓⲧⲉ ⲉⲥⲥⲟⲙⲧ

23 ⲥⲉⲛⲁⲛⲟⲩϫⲉ ⲛϩⲉⲛⲭⲁⲗⲁⲍⲁ ⲉⲩⲙⲉϩ ⲛϭⲱⲛⲧ ⲛⲧϩⲉ ⲉⲃⲟⲗ ϩⲛⲟⲩⲃⲁⲕⲱⲛⲉ ⲡⲙⲟⲟⲩ ⲛⲧⲑⲁⲗⲁⲥⲥⲁ ⲛⲁϩⲱⲃⲥ ⲉⲃⲟⲗ ⲉϫⲱⲟⲩ ⲛⲉⲓⲉⲣⲱⲟⲩ ⲛⲁⲟⲙⲥⲟⲩ ϩⲓⲟⲩⲥⲟⲡ

24 ⲟⲩⲛⲟⲩⲡⲛⲉⲩⲙⲁ ⲛϭⲟⲙ ⲛⲁϯⲟⲩⲃⲛⲟⲩ ⲛⲧⲉⲟⲩϩⲁⲧⲏⲩ ϣⲁϣⲟⲩ ⲉⲃⲟⲗ ⲧⲁⲛⲟⲙⲓⲁ ⲅⲁⲣ ⲛⲁⲣⲡⲕⲁϩ ⲧⲏⲣϥ ⲛϫⲁⲓⲉ ⲁⲩⲱ ⲡⲛⲟⲃⲉ ⲛⲁϣⲣϣⲣ ⲛⲉⲑⲣⲟⲛⲟⲥ ⲛⲛⲇⲩⲛⲁⲥⲧⲏⲥ