Wisdom 3 — Coptic (Sahidic)

1 ⲛⲉⲯⲩⲭⲏ ⲇⲉ ⲛⲛⲇⲓⲕⲁⲓⲟⲥ ⲉⲩϩⲛⲧϭⲓϫ ⲙⲡϫⲟⲉⲓⲥ ⲁⲩⲱ ⲙⲛⲃⲁⲥⲁⲛⲟⲥ ⲛⲧⲉⲡⲙⲟⲩ ⲛⲁϫⲱϩ ⲉⲣⲟⲟⲩ

2 ⲁⲩⲣⲧϩⲉ ⲛⲛⲉⲛⲧⲁⲩⲙⲟⲩ ⲙⲡⲉⲙⲧⲟ ⲉⲃⲟⲗ ⲛⲛⲁⲧϩⲏⲧ ⲁⲩⲱ ⲁⲩⲟⲡ ⲡⲉⲩⲃⲱⲕ ⲉⲃⲟⲗ ⲉⲩⲙⲟⲕϩ

3 ⲁⲩⲱ ⲡⲉⲩⲃⲱⲕ ⲉⲃⲟⲗ ϩⲓⲧⲟⲟⲧⲛ ⲉⲩⲟⲩⲱϣ ⲛⲧⲟⲟⲩ ⲇⲉ ⲥⲉϣⲟⲟⲡ ϩⲛⲟⲩⲉⲓⲣⲏⲛⲏ

4 ⲕⲁⲛ ⲉⲩϣⲁⲛⲕⲟⲗⲁⲍⲉ ⲙⲙⲟⲟⲩ ⲙⲡⲉⲙⲧⲟ ⲉⲃⲟⲗ ⲛⲛⲣⲱⲙⲉ ⲧⲉⲩϩⲉⲗⲡⲓⲥ ϫⲏⲕ ⲉⲃⲟⲗ ⲛⲱⲛϩ

5 ⲛⲧⲁⲩϯⲥⲃⲱ ⲛⲁⲩ ⲛϩⲉⲛⲕⲟⲩⲓ ⲉⲩⲛⲁⲣϩⲉⲛⲛⲟϭ ⲛⲁⲩ ⲙⲡⲉⲧⲛⲁⲛⲟⲩϥ ϫⲉⲡⲛⲟⲩⲧⲉ ⲡⲉⲛⲧⲁϥⲡⲉⲓⲣⲁⲍⲉ ⲙⲙⲟⲟⲩ ⲁϥϩⲉ ⲉⲣⲟⲟⲩ ⲉⲩⲙⲡϣⲁ ⲙⲙⲟϥ

6 ⲁϥⲇⲟϭⲓⲙⲁⲍⲉ ⲙⲙⲟⲟⲩ ⲛⲧϩⲉ ⲛⲟⲩⲛⲟⲩⲃ ϩⲛⲟⲩϩⲣⲱ ⲁϥϣⲟⲡⲟⲩ ⲉⲣⲟϥ ⲛⲧϩⲉ ⲛϩⲉⲛϭⲗⲓⲗ ⲛⲑⲩⲥⲓⲁ

7 ϩⲙⲡⲉⲟⲩⲟⲉⲓϣ ⲙⲡⲉⲩϭⲙⲡϣⲓⲛⲉ ⲥⲉⲛⲁⲣⲟⲩⲟⲉⲓⲛ ⲥⲉⲛⲁⲡⲱⲧ ⲛⲧϩⲉ ⲛϩⲉⲛϯⲕ ϩⲛⲟⲩⲣⲟⲟⲩⲉ

8 ⲥⲉⲛⲁⲕⲣⲓⲛⲉ ⲛϩⲉⲛϩⲉⲑⲛⲟⲥ ⲛⲥⲉⲁⲙⲁϩⲧⲉ ⲉϫⲛϩⲉⲛⲗⲁⲟⲥ ⲁⲩⲱ ⲡϫⲟⲉⲓⲥ ⲛⲁⲣⲣⲣⲟ ⲉϩⲣⲁⲓ ⲉϫⲱⲟⲩ ϣⲁⲛⲓⲉⲛⲉϩ

9 ⲛⲉⲧⲛⲁϩⲧⲉ ⲉⲣⲟϥ ⲥⲉⲛⲁⲥⲟⲩⲛⲧⲙⲉ ⲁⲩⲱ ⲙⲡⲓⲥⲧⲟⲥ ϩⲛⲧⲁⲅⲁⲡⲏ ⲛⲁϭⲱϣⲧ ⲉⲃⲟⲗ ϩⲏⲧϥ ϫⲉⲟⲩⲛⲟⲩⲭⲁⲣⲓⲥ ⲙⲛⲟⲩⲛⲁ ⲛⲁϣⲱⲡⲉ ⲛⲛⲉϥⲥⲱⲧⲡ

10 ⲛⲁⲥⲉⲃⲏⲥ ⲇⲉ ⲛⲧⲟⲟⲩ ⲕⲁⲧⲁⲛⲉⲛⲧⲁⲩⲙⲉⲉⲩⲉ ⲉⲣⲟⲟⲩ ⲥⲉⲛⲁϫⲓ ⲛⲟⲩⲉⲡⲓⲧⲓⲙⲓⲁ ⲛⲁⲓ ⲉⲛⲧⲁⲩⲁⲙⲉⲗⲓ ⲉⲡⲇⲓⲕⲁⲓⲟⲥ ⲁⲩⲥⲁϩⲱⲟⲩ ⲉⲃⲟⲗ ⲙⲡϫⲟⲉⲓⲥ

11 ⲟⲩⲉⲃⲓⲏⲛ ⲅⲁⲣ ⲡⲉ ⲡⲉⲧⲥⲱϣϥ ⲛⲧⲥⲟⲫⲓⲁ ⲙⲛⲧⲉⲥⲃⲱ ⲧⲉⲩϩⲉⲗⲡⲓⲥ ϣⲟⲩⲉⲓⲧ ⲁⲩⲱ ⲛⲉⲩϩⲓⲥⲉ ⲙⲛϩⲏⲩ ⲛϩⲏⲧⲟⲩ ⲁⲩⲱ ⲛⲉⲩϩⲃⲏⲩⲉ ϩⲉⲛⲁⲧϣⲁⲩ ⲛⲉ

12 ⲛⲉⲩϩⲓⲟⲙⲉ ϩⲉⲛⲁⲧϩⲏⲧ ⲛⲉ ⲁⲩⲱ ⲛⲉⲩϣⲏⲣⲉ ϩⲉⲛⲡⲟⲛⲏⲣⲟⲥ ⲛⲉ ⲁⲩⲱ ⲡⲥϩⲟⲩⲟⲣⲧ ⲛϭⲓⲡⲉⲩϫⲡⲟ

13 ϫⲉⲛⲁⲓⲁⲧⲥ ⲛⲟⲩⲁϭⲣⲏⲛ ⲉⲙⲡⲉⲥⲧⲱⲗⲙ ⲧⲁⲓ ⲉⲧⲉⲙⲡⲥⲥⲟⲩⲛⲙⲁ ⲛⲛⲕⲟⲧⲕ ϩⲛⲟⲩⲛⲟⲃⲉ ⲥⲛⲁϫⲓ ⲅⲁⲣ ⲛⲟⲩⲕⲁⲣⲡⲟⲥ ϩⲙⲡϭⲙⲡϣⲓⲛⲉ ⲛⲛⲉⲯⲩⲭⲏ

14 ⲁⲩⲱ ⲟⲩⲥⲓⲟⲩⲣ ⲉⲙⲡϥⲣⲁⲛⲟⲙⲓⲁ ϩⲛⲛⲉϥϭⲓϫ ⲟⲩⲇⲉ ⲙⲡϥⲙⲉⲉⲩⲉ ⲉⲡⲉⲧϩⲟⲟⲩ ⲉϩⲟⲩⲛ ⲉⲡϫⲟⲉⲓⲥ ⲥⲉⲛⲁϯ ⲅⲁⲣ ⲛⲁϥ ⲛⲟⲩⲭⲁⲣⲓⲥ ⲛⲥⲱⲧⲡ ϩⲁⲧⲉϥⲡⲓⲥⲧⲓⲥ ⲁⲩⲱ ⲟⲩⲕⲗⲏⲣⲟⲥ ⲉⲛⲁⲛⲟⲩϥ ϩⲙⲡⲉⲣⲡⲉ ⲙⲡϫⲟⲉⲓⲥ

15 ϥⲧⲁⲓⲏⲩ ⲅⲁⲣ ⲛϭⲓⲡⲕⲁⲣⲡⲟⲥ ⲛⲛϩⲓⲥⲉ ⲉⲧⲛⲁⲛⲟⲩⲟⲩ ⲁⲩⲱ ⲥⲧⲁϫⲣⲏⲩ ⲛϭⲓⲧⲛⲟⲩⲛⲉ ⲛⲧⲙⲛⲧⲣⲙⲛϩⲏⲧ

16 ⲛϣⲏⲣⲉ ⲇⲉ ⲛⲛⲛⲟⲉⲓⲕ ϩⲉⲛϣⲁⲣⲁϩⲉ ⲛⲉ ⲁⲩⲱ ϥⲛⲁϥⲱⲧⲉ ⲉⲃⲟⲗ ⲛϭⲓⲡⲉⲥⲡⲉⲣⲙⲁ ⲉⲃⲟⲗ ϩⲛⲟⲩⲙⲁⲛⲛⲕⲟⲧⲕ ⲙⲡⲁⲣⲁⲛⲟⲙⲟⲥ

17 ⲉⲩϣⲁⲛⲣⲟⲩ ⲛⲟϭ ⲅⲁⲣ ⲛⲁϩⲉ ⲉⲩⲛⲁⲟⲡⲟⲩ ⲉⲩⲗⲁⲁⲩ ⲁⲩⲱ ⲧⲉⲩϩⲉⲗⲡⲓⲥ ⲛⲁϣⲱⲡⲉ ⲉⲥⲥⲏϣ ϩⲛⲧⲉⲩϩⲁⲏ

18 ⲉϣⲱⲡⲉ ⲟⲛ ⲉⲩϣⲁⲛⲙⲟⲩ ⲉⲩⲟ ⲛϣⲁⲣⲁϩⲉ ⲙⲛⲧⲟⲩϩⲉⲗⲡⲓⲥ ⲙⲙⲁⲩ ⲟⲩⲇⲉ ⲟⲩⲥⲟⲗⲥⲗ ϩⲙⲡⲉϩⲟⲟⲩ ⲙⲡϭⲙⲡϣⲓⲛⲉ

19 ⲧϩⲁⲏ ⲅⲁⲣ ϩⲟⲟⲩ ⲛⲧⲅⲉⲛⲉⲁ ⲛⲛⲣⲉϥϫⲓⲛϭⲟⲛⲥ