Wisdom 2 — Coptic (Sahidic)

1 ⲁⲩϫⲟⲟⲥ ⲅⲁⲣ (ⲉⲁⲩⲙⲉⲉⲩⲉ ϩⲣⲁⲓ ⲛϩⲏⲧⲟⲩ ϩⲛⲟⲩⲥⲟⲟⲩⲧⲛ ⲁⲛ) ϫⲉⲟⲩⲕⲟⲩⲓ ⲡⲉ ⲡⲉⲛⲁϩⲉ ⲉϥⲙⲉϩ ⲛⲗⲩⲡⲏ ⲁⲩⲱ ⲙⲙⲛⲙⲧⲟⲛ ϣⲟⲟⲡ ϩⲛⲡⲙⲟⲩ ⲙⲡⲣⲱⲙⲉ ⲟⲩⲇⲉ ⲙⲡⲛⲥⲟⲩⲛ ⲟⲩⲁ ⲉⲁϥⲉⲓ ⲉϩⲣⲁⲓ ϩⲛⲁⲙⲛⲧⲉ

2 ϫⲉⲛⲧⲁⲛϣⲱⲡⲉ ⲉⲡⲡⲉⲧϣⲟⲩⲉⲓⲧ ⲙⲛⲛⲥⲱⲥ ⲉⲛⲛⲁⲣⲧϩⲉ ⲛⲛⲉⲧⲉⲙⲡⲟⲩϣⲱⲡⲉ ϫⲉⲟⲩⲕⲁⲡⲛⲟⲥ ⲡⲉ ⲡⲛⲓϥⲉ ⲉⲧϩⲛϣⲁⲛⲧⲛ ⲁⲩⲱ ⲟⲩϯⲕ ⲡⲉ ⲡϣⲁϫⲉ ⲉⲧⲕⲓⲙ ϩⲙⲡⲉⲛϩⲏⲧ

3 ⲡⲁⲓ ⲉϥϣⲁⲛⲱϣⲙ ⲉⲣⲉⲡⲥⲱⲙⲁ ⲧⲏⲣϥ ⲛⲁⲣⲧϩⲉ ⲛⲟⲩϫⲃⲃⲉⲥ ⲁⲩⲱ ⲡⲉⲛⲡⲛⲉⲩⲙⲁ ⲛⲁⲃⲱⲗ ⲉⲃⲟⲗ ⲛⲧϩⲉ ⲙⲡⲁⲏⲣ ⲉⲧϫⲟⲟⲣⲉ ⲉⲃⲟⲗ

4 ⲛⲥⲉⲣⲡⲱⲃϣ ⲙⲡⲉⲛⲣⲁⲛ ϩⲙⲡⲉⲛⲟⲩⲟⲉⲓϣ ⲛⲧⲉⲧⲙⲗⲁⲁⲩ ⲣⲡⲙⲉⲉⲩⲉ ⲛⲛⲉⲛϩⲃⲏⲩⲉ ⲁⲩⲱ ⲡⲉⲛⲁϩⲉ ⲛⲁⲟⲩⲉⲓⲛⲉ ⲛⲧϩⲉ ⲛⲟⲩⲕⲗⲟⲟⲗⲉ ⲁⲩⲱ ϥⲛⲁϫⲱⲱⲣⲉ ⲉⲃⲟⲗ ⲛⲧϩⲉ ⲛⲟⲩⲛⲓϥⲉ ⲉⲁϥⲃⲱⲗ ⲉⲃⲟⲗ ϩⲓⲧⲛⲡⲁⲕⲧⲓⲛ ⲙⲡⲣⲏ ⲁⲩⲱ ⲉⲁⲧⲉϥϩⲙⲙⲉ ϩⲣⲟϣ ⲉϫⲱϥ

5 ⲟⲩϩⲁⲉⲓⲃⲉⲥ ⲉⲁⲥⲟⲩⲉⲓⲛⲉ ⲡⲉ ⲡⲉⲛⲟⲩⲟⲉⲓϣ ⲁⲩⲱ ⲙⲙⲛⲕⲧⲟ ϣⲟⲟⲡ ⲙⲡⲉⲛⲙⲟⲩ ϫⲉⲁⲩⲧⲱⲱⲃⲉ ⲉⲣⲱⲟⲩ ⲁⲩⲱ ⲛⲛⲉⲗⲁⲁⲩ ⲕⲟⲧϥ

6 ⲁⲙⲏⲉⲓⲧⲛ ϭⲉ ⲛⲧⲛⲧⲥⲓⲟⲛ ⲛⲛⲁⲅⲁⲑⲟⲛ ⲉⲧϣⲟⲟⲡ ⲛⲧⲛⲭⲣⲱ ⲛⲧⲉⲕⲧⲓⲥⲓⲥ ϩⲛⲟⲩϭⲉⲡⲏ ⲛⲧϩⲉ ⲛⲟⲩⲙⲛⲧⲃⲣⲣⲉ

7 ⲙⲁⲣⲛⲧⲥⲓⲟⲛ ⲛⲏⲣⲡ ⲉⲛⲁⲛⲟⲩϥ ϩⲓⲥⲧⲓⲛⲟⲩϥⲉ ⲁⲩⲱ ⲙⲡⲣⲧⲣⲉⲩⲥⲁⲁⲧⲛ ⲛϭⲓⲛⲕⲁⲣⲡⲟⲥ ⲙⲡⲁⲏⲣ

8 ⲙⲁⲣⲛϯ ⲉϫⲱⲛ ⲛϩⲛⲕⲗⲟⲙ ⲛⲟⲩⲣⲧ ⲉⲙⲡⲁⲧⲧⲟⲩϩⲱϭⲃ

9 ⲙⲡⲣⲧⲣⲉⲗⲁⲁⲩ ⲙⲙⲟⲛ ϣⲱⲡⲉ ⲙⲡⲃⲟⲗ ⲛⲛⲉⲛⲙⲛⲧϣⲛⲁ ⲙⲁⲣⲛⲕⲁⲥⲩⲙⲃⲟⲩⲗⲏ ⲛⲟⲩⲛⲟϥ ϩⲙⲙⲁ ⲛⲓⲙ ϫⲉⲧⲁⲓ ⲧⲉ ⲧⲉⲛⲙⲉⲣⲓⲥ ⲁⲩⲱ ⲡⲉⲛⲕⲗⲏⲣⲟⲥ

10 ⲟⲩϩⲏⲕⲉ ⲛⲇⲓⲕⲁⲓⲟⲥ ⲙⲁⲣⲛϫⲓⲧϥ ⲛϭⲟⲛⲥ ⲙⲡⲣⲧⲣⲉⲛϯⲥⲟ ⲉⲧⲉⲭⲏⲣⲁ ⲟⲩⲇⲉ ⲙⲡⲣⲧⲣⲉⲛϣⲓⲡⲉ ϩⲏⲧⲟⲩ ⲛⲛⲉⲥⲕⲓⲙ ⲛⲟⲩϩⲗⲗⲟ ⲛⲛⲟϭ ⲛⲁϩⲉ

11 ⲙⲁⲣⲉⲧⲉⲛϭⲟⲙ ϣⲱⲡⲉ ⲛⲁⲛ ⲛⲛⲟⲙⲟⲥ ⲛⲇⲓⲕⲁⲓⲟⲥⲩⲛⲏ ⲧⲙⲛⲧϭⲱⲃ ⲅⲁⲣ ⲉϣⲁⲩϫⲡⲓⲟⲥ ϩⲱⲥ ⲁⲧϣⲁⲩ

12 ⲙⲁⲣⲛϭⲱⲣϭ ⲉⲡⲇⲓⲕⲁⲓⲟⲥ ϫⲉϥⲙⲟⲕϩ ⲉⲣⲭⲣⲏⲥⲧⲟⲥ ⲛⲁⲛ ⲁⲩⲱ ϥϯ ⲟⲩⲃⲉ ⲛⲉⲛϩⲃⲏⲩⲉ ϥⲛⲟϭⲛⲉϭ ⲙⲙⲟⲛ ⲛⲛⲉⲛⲛⲟⲃⲉ ϩⲓⲧⲙⲡⲛⲟⲙⲟⲥ ⲁⲩⲱ ϥⲟⲩⲱⲛϩ ⲉⲃⲟⲗ ⲛⲛⲉⲛⲛⲟⲃⲉ ϩⲓⲧⲛⲧⲉⲥⲃⲱ

13 ϥϫⲱ ⲙⲙⲟⲥ ϫⲉϯⲥⲟⲟⲩⲛ ⲙⲡⲛⲟⲩⲧⲉ ⲁⲩⲱ ϥⲉⲓⲣⲉ ⲙⲙⲟϥ ⲛϣⲏⲣⲉ ⲙⲡϫⲟⲉⲓⲥ

14 ϣⲁϥϣⲱⲡⲉ ⲛⲁⲛ ⲉⲩϫⲡⲓⲟ ⲛⲛⲉⲛⲙⲉⲉⲩⲉ ϥϩⲟⲣϣ ⲛⲁⲛ ⲉⲛⲁⲩ ⲉⲣⲟϥ

15 ϫⲉⲙⲡⲉϥⲃⲓⲟⲥ ⲉⲓⲛⲉ ⲁⲛ ⲙⲡⲁⲟⲩⲟⲛ ⲛⲓⲙ ⲁⲩⲱ ⲛⲉϥϩⲓⲟⲟⲩⲉ ⲥⲉϣⲟⲃⲉ

16 ⲉⲛⲏⲡ ⲛⲧⲟⲟⲧϥ ⲉϩⲉⲛϫⲟⲟⲩⲧ ⲁⲩⲱ ϥⲥⲁϩⲏⲩ ⲉⲃⲟⲗ ⲛⲛⲉⲛϩⲓⲟⲟⲩⲉ ⲛⲧϩⲉ ⲛⲛⲓⲁⲕⲁⲑⲁⲣⲥⲓⲁ ϥⲙⲁⲕⲁⲣⲓⲍⲉ ⲛⲧϩⲁⲏ ⲛⲛⲇⲓⲕⲁⲓⲟⲥ ⲁⲩⲱ ϥϣⲟⲩϣⲟⲩ ⲙⲙⲟϥ ϫⲉⲡⲁⲉⲓⲱⲧ ⲡⲉ ⲡⲛⲟⲩⲧⲉ

17 ⲙⲁⲣⲛⲛⲁⲩ ϫⲉϩⲙⲙⲉ ⲛⲉ ⲛⲉϥϣⲁϫⲉ ⲁⲩⲱ ⲛⲧⲛⲡⲉⲓⲣⲁⲍⲉ ⲛⲧⲉϥϩⲉⲛ

18 ⲉϣϫⲉ ⲡⲇⲓⲕⲁⲓⲟⲥ ⲅⲁⲣ ⲡⲉ ⲡϣⲏⲣⲉ ⲙⲡⲛⲟⲩⲧⲉ ϥⲛⲁϣⲟⲡϥ ⲉⲣⲟϥ ⲛϥⲛⲁϩⲙⲉϥ ⲛⲧⲟⲟⲧⲟⲩ ⲛⲛⲉⲧϯⲟⲩⲃⲏϥ

19 ⲙⲁⲣⲛϩⲉⲧⲁⲍⲉ ⲙⲙⲟϥ ϩⲛϩⲉⲛϣⲱϣ ⲙⲛϩⲉⲛⲃⲁⲥⲁⲛⲟⲥ ϫⲉⲕⲁⲥ ⲉⲛⲉⲉⲓⲙⲉ ⲉⲧⲉϥⲙⲛⲧϩⲁⲕ ⲁⲩⲱ ⲛⲧⲛⲇⲟⲕⲓⲙⲁⲍⲉ ⲛⲧⲉϥⲙⲛⲧϩⲁⲣϣϩⲏⲧ

20 ⲙⲁⲣⲛⲧϭⲁⲉⲓⲟϥ ϩⲛⲟⲩⲙⲟⲩ ⲉϥⲥⲏϣ ⲥⲉⲛⲁϭⲙⲡⲉϥϣⲓⲛⲉ ⲅⲁⲣ ⲕⲁⲧⲁⲛⲉϥϣⲁϫⲉ

21 ⲛⲁⲓ ⲁⲩⲙⲉⲉⲩⲉ ⲉⲣⲟⲟⲩ ⲁⲩⲱ ⲁⲩⲥⲱⲣⲙ ⲁⲧⲉⲩⲕⲁⲕⲓⲁ ⲅⲁⲣ ⲧⲱⲙ ⲙⲡⲉⲩϩⲏⲧ

22 ⲁⲩⲱ ⲙⲡⲟⲩⲥⲟⲩⲛ ⲙⲙⲩⲥⲧⲏⲣⲓⲟⲛ ⲙⲡⲛⲟⲩⲧⲉ ⲟⲩⲇⲉ ⲙⲡⲟⲩⲕⲁϩⲧⲏⲩ ⲉⲡⲃⲉⲕⲉ ⲛⲧⲇⲓⲕⲁⲓⲟⲥⲩⲛⲏ ⲙⲡⲟⲩⲡⲓⲥⲧⲉⲩⲉ ⲉⲡⲧⲁⲉⲓⲟ ⲛⲛⲉⲯⲩⲭⲏ ⲛⲛⲉⲧⲟⲩⲁⲁⲃ

23 ϫⲉⲡⲛⲟⲩⲧⲉ ⲁϥⲥⲱⲛⲧ ⲙⲡⲣⲱⲙⲉ ⲉⲩⲙⲛⲧⲁⲧⲧⲁⲕⲟ ⲁⲩⲱ ⲁϥⲧⲁⲙⲓⲟϥ ϩⲛⲧϩⲓⲕⲱⲛ ⲙⲡⲉϥⲉⲓⲛⲉ

24 ϩⲙⲡⲉⲫⲑⲟⲛⲟⲥ ⲇⲉ ⲙⲡⲇⲓⲁⲃⲟⲗⲟⲥ ⲁⲡⲙⲟⲩ ⲉⲓ ⲉϩⲟⲩⲛ ⲉⲡⲕⲟⲥⲙⲟⲥ

25 ⲥⲉⲡⲉⲓⲣⲁⲍⲉ ⲇⲉ ⲙⲙⲟϥ ⲛϭⲓⲧⲙⲉⲣⲓⲥ ⲙⲡⲉⲧⲙⲙⲁⲩ