Read Wisdom 1 side by side with translations · The Final Bible
1 ⲙⲉⲣⲉⲧⲇⲓⲕⲁⲓⲟⲥⲩⲛⲏ ⲛⲉⲧⲕⲣⲓⲛⲉ ⲙⲡⲕⲁϩ ⲁⲣⲓⲡⲙⲉⲉⲩⲉ ⲙⲡϫⲟⲉⲓⲥ ϩⲛⲟⲩⲙⲛⲧⲁⲅⲁⲑⲟⲥ ⲛⲧⲉⲧⲛϣⲓⲛⲉ ⲛⲥⲱϥ ϩⲛⲟⲩⲙⲛⲧϩⲁⲡⲗⲟⲩⲥ ⲛⲧⲉⲡⲉⲧⲛϩⲏⲧ
2 ϫⲉϣⲁⲩϩⲉ ⲉⲣⲟϥ ⲛϭⲓⲛⲉⲧⲉⲛⲥⲉⲡⲉⲓⲣⲁⲍⲉ ⲙⲙⲟϥ ⲁⲛ ϣⲁϥⲟⲩⲱⲛϩ ⲇⲉ ⲉⲃⲟⲗ ⲛⲛⲉⲧⲉⲛⲥⲉⲟ ⲛⲁⲧⲛⲁϩⲧⲉ ⲉⲣⲟϥ ⲁⲛ
3 ϣⲁⲣⲉⲡⲙⲉⲉⲩⲉ ⲅⲁⲣ ⲉⲧϩⲟⲟⲩ ⲡⲟⲣϫⲟⲩ ⲉⲡⲛⲟⲩⲧⲉ ⲁⲩⲱ ⲧⲉϥϭⲟⲙ ⲉⲧⲟⲩⲟⲛϩ ⲉⲃⲟⲗ ϣⲁⲥϫⲡⲓⲉ ⲛⲁⲧϩⲏⲧ
4 ϫⲉⲙⲉⲣⲉⲧⲥⲟⲫⲓⲁ ⲅⲁⲣ ⲃⲱⲕ ⲉϩⲟⲩⲛ ⲉⲟⲩⲯⲩⲭⲏ ⲉⲥϩⲟⲟⲩ ⲟⲩⲇⲉ ⲙⲉⲥⲟⲩⲱϩ ϩⲛⲥⲱⲙⲁ ⲛⲣⲉϥⲣⲛⲟⲃⲉ
5 ⲡⲉⲡⲛⲉⲩⲙⲁ ⲅⲁⲣ ⲉⲧⲟⲩⲁⲁⲃ ⲛⲧⲥⲟⲫⲓⲁ ϣⲁϥⲡⲱⲧ ⲉⲃⲟⲗ ⲛⲕⲣⲟϥ ⲁⲩⲱ ϣⲁϥⲟⲩⲉ ⲛⲙⲙⲟⲕⲙⲉⲕ ⲛⲛⲁⲧϩⲏⲧ ⲁⲩⲱ ϣⲁϥϫⲡⲓⲉ ⲡϫⲓⲛϭⲟⲛⲥ ⲉϥϣⲁⲛⲉⲓ
6 ⲟⲩⲙⲁⲓⲣⲱⲙⲉ ⲅⲁⲣ ⲡⲉ ⲡⲉⲡⲛⲉⲩⲙⲁ ⲛⲧⲥⲟⲫⲓⲁ ⲁⲩⲱ ϥⲛⲁⲧⲙⲁⲓⲉ ⲡϫⲓⲟⲩⲁ ⲁⲛ ϩⲛⲛⲉϥⲥⲡⲟⲧⲟⲩ ϫⲉⲡⲛⲟⲩⲧⲉ ⲡⲉ ⲡⲙⲛⲧⲣⲉ ⲛⲛⲉϥϭⲗⲟⲧⲉ ⲁⲩⲱ ⲡⲉⲧⲙⲟⲩϣⲧ ⲛⲁⲙⲉ ⲙⲡⲉϥϩⲏⲧ ⲁⲩⲱ ⲡⲉⲧⲥⲱⲧⲙ ⲉⲡⲉϥⲗⲁⲥ
7 ϫⲉⲡⲉⲡⲛⲉⲩⲙⲁ ⲙⲡϫⲟⲉⲓⲥ ⲁϥⲙⲉϩⲧⲟⲓⲕⲟⲩⲙⲉⲛⲏ ⲁⲩⲱ ⲡⲉⲧϣⲱⲡ ⲙⲡⲧⲏⲣϥ ⲉϥⲥⲟⲟⲩⲛ ⲙⲡⲉⲩϩⲣⲟⲟⲩ
8 ⲉⲧⲃⲉⲡⲁⲓ ⲙⲛⲗⲁⲁⲩ ⲛⲁϩⲱⲡ ⲉϥϣⲁϫⲉ ϩⲛⲟⲩϫⲓⲛϭⲟⲛⲥ ⲟⲩⲇⲉ ⲛϥⲛⲁⲣⲃⲟⲗ ⲁⲛ ⲉⲧⲉⲕⲣⲓⲥⲓⲥ ⲉⲧⲛⲛⲏⲩ
9 ⲥⲉⲛⲁϭⲙⲡϣⲓⲛⲉ ⲅⲁⲣ ⲙⲡϣⲟϫⲛⲉ ⲙⲡⲁⲥⲉⲃⲏⲥ ⲁⲩⲱ ⲡϫⲟⲉⲓⲥ ⲛⲁⲥⲱⲧⲙ ⲉⲛⲉϥϣⲁϫⲉ ⲉⲡⲟⲩⲱⲛϩ ⲉⲃⲟⲗ ⲛⲛⲉϥⲁⲛⲟⲙⲓⲁ
10 ϫⲉⲡⲙⲁⲁϫⲉ ⲙⲡⲉϥⲕⲱϩ ϣⲁϥⲥⲱⲧⲙ ⲉϩⲱⲃ ⲛⲓⲙ ⲁⲩⲱ ⲡⲉϩⲣⲟⲟⲩ ⲛⲛⲉⲕⲣⲙⲣⲙ ⲛⲁϩⲱⲡ ⲁⲛ
11 ϩⲁⲣⲉϩ ϭⲉ ⲉⲣⲱⲧⲛ ⲉⲡⲉⲕⲣⲙⲣⲙ ⲉⲧϣⲟⲩⲉⲓⲧ ⲁⲩⲱ ϯⲥⲟ ⲉⲡⲉⲧⲛⲗⲁⲥ ⲉⲃⲟⲗ ϩⲛⲧⲕⲁⲗⲁⲧⲁⲗⲓⲁ ϫⲉⲙⲛⲟⲩϣⲁϫⲉ ⲉϥϣⲟⲩⲉⲓⲧ ⲛⲁϩⲱⲡ ⲟⲩⲧⲁⲡⲣⲟ ⲉⲥϫⲓϭⲟⲗ ϣⲁⲥⲧⲁⲕⲉⲧⲉⲯⲩⲭⲏ
12 ⲙⲡⲣⲕⲱϩ ϭⲉ ⲉⲡⲙⲟⲩ ϩⲛⲧⲉⲡⲗⲁⲛⲏ ⲙⲡⲉⲧⲛⲱⲛϩ ⲟⲩⲇⲉ ⲙⲡⲣⲥⲱⲕ ⲛⲏⲧⲛ ⲙⲡⲧⲁⲕⲟ ϩⲛⲛⲉϩⲃⲏⲩⲉ ⲛⲛⲉⲧⲛϭⲓϫ
13 ϫⲉⲙⲡⲉⲡⲛⲟⲩⲧⲉ ⲧⲁⲙⲓⲉⲡⲙⲟⲩ ⲟⲩⲇⲉ ⲛϥⲣⲁϣⲉ ⲁⲛ ⲉϫⲙⲡⲧⲁⲕⲟ ⲛⲛⲉⲧⲟⲛϩ
14 ⲛⲧⲁϥⲥⲟⲛⲧⲟⲩ ⲅⲁⲣ ⲧⲏⲣⲟⲩ ⲉⲧⲣⲉⲩϭⲱ ϣⲁⲃⲟⲗ ⲁⲩⲱ ⲉⲧⲣⲉⲩⲟⲩϫⲁⲓ ⲛϭⲓⲛⲥⲱⲛⲧ ⲙⲡⲕⲟⲥⲙⲟⲥ ⲙⲙⲛⲡⲁϩⲣⲉ ⲙⲙⲟⲩ ϩⲣⲁⲓ ⲛϩⲏⲧⲟⲩ ⲟⲩⲇⲉ ⲙⲛⲧⲣⲣⲟ ⲛⲁⲙⲛⲧⲉ ϩⲓϫⲙⲡⲕⲁϩ
15 ⲧⲇⲓⲕⲁⲓⲟⲥⲩⲛⲏ ⲅⲁⲣ ⲟⲩⲁⲧⲙⲟⲩ ⲧⲉ
16 ⲛⲁⲥⲉⲃⲏⲥ ⲇⲉ ϩⲛⲛⲉⲩϭⲓϫ ⲙⲛⲛⲉⲩϣⲁϫⲉ ⲁⲩⲥⲟⲧⲡϥ ⲛⲁⲩ ⲁⲩⲧⲁⲁϥ ⲛⲁⲩ ⲛϣⲃⲏⲣ ⲁⲩⲃⲱⲗ ⲉⲃⲟⲗ ⲁⲩⲥⲙⲓⲛⲉ ⲛⲟⲩⲇⲓⲁⲑⲏⲕⲏ ⲛⲙⲙⲁϥ ϫⲉⲥⲉⲙⲡϣⲁ ⲛⲧⲙⲉⲣⲟⲥ ⲙⲡⲉⲧⲙⲙⲁⲩ
Wisdom 2 · Greek (Septuagint / SBLGNT) · Aramaic (Peshitta) · Latin (Vulgate)