Wisdom 17 — Coptic (Sahidic)

1 ϩⲉⲛⲛⲟϭ ⲅⲁⲣ ⲛⲉ ⲛⲉⲕϩⲁⲡ ⲛⲛⲉⲩϣⲧⲁϩⲟⲟⲩ ⲉⲧⲃⲉⲡⲁⲓ ⲁⲩⲥⲱⲣⲙ ⲛϭⲓⲛⲉⲯⲩⲭⲏ ⲛⲛⲁⲧⲥⲃⲱ

2 ⲉⲩⲙⲉⲉⲩⲉ ⲅⲁⲣ ⲛϭⲓⲛⲁⲛⲟⲙⲟⲥ ⲉϫⲓ ⲛⲟⲩϩⲉⲑⲛⲟⲥ ⲉϥⲟⲩⲁⲁⲃ ⲛϭⲟⲛⲥ ⲉⲁⲩⲙⲟⲣⲟⲩ ϩⲛⲟⲩⲕⲁⲕⲉ ⲙⲛⲟⲩⲛⲟϭ ⲛⲉⲓⲛⲉ ⲛϩⲟⲙⲛⲧ ⲛⲧⲉⲩϣⲏ ⲉⲁⲩⲟⲧⲡⲟⲩ ⲉϩⲟⲩⲛ ⲉⲩⲏⲓ ⲁⲩϣⲱⲡⲉ ⲉⲩⲧϭⲁⲓⲏⲩ ϩⲓⲧⲛⲧⲉⲡⲣⲟⲛⲟⲓⲁ ϣⲁⲉⲛⲉϩ

3 ⲉⲩⲣⲛⲟⲃⲉ ⲅⲁⲣ ⲉⲩⲙⲉⲉⲩⲉ ϫⲉⲉⲩⲛⲁϣϩⲱⲡ ⲁϥⲑⲙⲕⲟⲟⲩ ϩⲛⲟⲩϩⲃⲥ ⲛⲕⲁⲕⲉ ⲙⲛⲟⲩⲟⲃϣ ⲉⲩⲧϩⲣϣⲟ ⲙⲙⲟⲟⲩ ⲉⲙⲁⲧⲉ ⲁⲩⲱ ⲉⲩϣⲧⲟⲣⲧⲣ ⲙⲙⲟⲟⲩ ϩⲓⲧⲛϩⲉⲛϩⲣⲃ

4 ⲛⲕⲉⲏⲓ ⲅⲁⲣ ⲉⲧⲟⲩⲟⲧⲡ ⲉϩⲟⲩⲛ ⲉⲣⲟⲟⲩ ⲙⲡⲟⲩϣⲱⲡⲉ ⲛϩⲏⲧⲟⲩ ⲁϫⲛϩⲟⲧⲉ ⲁⲗⲗⲁ ⲛⲉⲩⲧϩⲣϣⲟ ⲙⲙⲟⲟⲩ ϩⲓⲧⲛϩⲉⲛⲛⲟϭ ⲛϩⲣⲟⲟⲩ ⲙⲛϩⲉⲛⲣⲁⲥⲟⲩ ⲛⲥⲙⲟⲧ ⲛϩⲟⲧ ⲉⲩⲟⲕⲙ ⲉⲩⲛⲏⲩ ⲉⲩⲛⲏⲩ ⲙⲡⲉⲩⲙⲧⲟ ⲉⲃⲟⲗ ⲛⲥⲉⲛⲁⲧϥ ⲁⲛ

5 ⲧⲕⲉϭⲟⲙ ⲙⲡⲕⲱϩⲧ ⲙⲡⲉⲥⲣⲟⲩⲟⲉⲓⲛ ⲉⲣⲟⲟⲩ ⲟⲩⲧⲉ ⲡϣⲁϩ ⲙⲡⲟⲩⲟⲉⲓⲛ ⲛⲛⲥⲓⲟⲩ ⲙⲡϥϩⲩⲡⲟⲙⲓⲛⲉ ⲉⲙⲟⲩϩ ⲛⲧⲉⲩϣⲏ ⲉⲧⲙⲙⲁⲩ ⲉⲧⲟⲛϩⲟⲧⲉ

6 ⲛⲉⲥⲟⲩⲱⲛϩ ⲇⲉ ⲛⲁⲩ ⲉⲃⲟⲗ ⲙⲙⲁⲧⲉ ⲛϭⲓⲟⲩⲥⲁⲧⲉ ⲉⲥϫⲉⲣⲟ ⲙⲁⲩⲁⲁⲥ ⲉⲥⲙⲉϩ ⲛϩⲟⲧⲉ ⲛⲉⲧⲟⲩⲛⲁⲩ ⲇⲉ ⲉⲣⲟⲟⲩ ⲛⲉⲩⲛⲁϣⲧ ⲛⲁⲩ ⲡⲉ ⲉϩⲟⲩⲟ ⲛ ⲉⲧⲧϩⲣϣⲟ ⲙⲙⲟⲟⲩ ⲉⲛⲥⲉⲛⲁⲩ ⲉⲣⲟⲟⲩ ⲁⲛ

7 ⲛⲉⲣⲉⲛⲁⲓ ⲇⲉ ϣⲟⲟⲡ ⲛⲛⲟϭⲛⲉϭ ⲛⲧⲧⲉⲭⲛⲏ ⲛⲛⲣⲉϥⲣϩⲓⲕ ⲁⲩⲱ ⲛϫⲡⲓⲟ ϩⲓⲥⲱϣ ⲛⲧⲉⲙⲛⲧⲃⲁⲃⲉⲣⲱⲙⲉ ⲛⲧⲉⲩⲥⲟⲫⲓⲁ

8 ⲉϣⲁⲩⲉⲣⲏⲧ ⲅⲁⲣ ⲛϩⲉⲛⲕⲟⲟⲩⲉ ⲛⲛⲟⲩϫ ⲉⲃⲟⲗ ϩⲛⲛϩⲟⲧⲉ ⲙⲛⲛⲉϣⲧⲟⲣⲧⲣ ⲛⲛⲉⲯⲩⲭⲏ ⲉⲧϣⲱⲛⲉ ⲛⲧⲟⲟⲩ ϩⲱⲟⲩ ⲟⲛ ⲛⲉⲩϣⲱⲛⲉ ⲡⲉ ϩⲛⲟⲩϩⲟⲧⲉ ⲛⲥⲱⲃⲉ

9 ⲉⲛⲉⲙⲛⲗⲁⲁⲩ ⲅⲁⲣ ⲛϩⲟⲧⲉ ⲧϩⲣϣⲟ ⲙⲙⲟⲟⲩ ⲁⲗⲗⲁ ⲛⲉⲩⲃⲱⲗ ⲉⲃⲟⲗ ϩⲁⲡⲉⲥⲧⲱⲧ ϩⲓⲧⲛϩⲉⲛϩⲣⲟⲟⲩ ⲛⲑⲏⲣⲓⲟⲛ ϩⲓϫⲁⲧϥⲉ ⲉⲩⲥⲱⲣ ⲉⲃⲟⲗ ϩⲓⲧⲟⲟⲧⲟⲩ ⲉϩⲛⲁⲩ ϭⲉ ⲁⲛ ⲉϭⲱϣⲧ ⲉⲡⲁⲏⲣ ⲡⲁⲓ ⲉⲧⲉⲙⲛϩⲓⲏ ⲛⲣⲃⲟⲗ ⲉⲣⲟϥ ⲛⲥⲁⲗⲁⲁⲩ ⲛⲥⲁ

10 ⲧⲡⲟⲛⲏⲣⲓⲁ ⲅⲁⲣ ⲉⲩⲕⲟⲗⲁⲍⲉ ⲙⲙⲟⲥ ϣⲁⲥⲣⲙⲛⲧⲣⲉ ⲙⲙⲟⲥ ⲛϩⲉⲛⲕⲉⲡⲉⲧϩⲟⲟⲩ ⲉⲧⲣⲉⲩⲧⲁϩⲟⲥ ⲁⲩⲱ ϣⲁⲥϭⲱϣⲧ ⲉⲃⲟⲗ ϩⲏⲧⲟⲩ ⲛϩⲉⲛⲕⲟⲟⲩⲉ ⲉⲩⲛⲁϣⲧ ⲛⲟⲩⲟⲉⲓϣ ⲛⲓⲙ ⲉⲩⲣⲱϩⲧ ⲙⲙⲟϥ ϩⲏⲧϥ ⲛϩⲉⲛⲕⲟⲟⲩⲉ ⲉⲩⲛⲁϣⲧ ⲛⲟⲩⲟⲉⲓϣ ⲛⲓⲙ ⲉⲩⲣⲱϩⲧ ⲙⲙⲟϥ ϩⲓⲧⲛⲧⲉⲩⲥⲩⲛⲉⲓⲇⲏⲥⲓⲥ

11 ⲟⲩⲗⲁⲁⲩ ⲅⲁⲣ ⲧⲉ ⲧϩⲟⲧⲉ ⲉⲧⲣⲉⲟⲩⲁ ⲛⲁⲧⲁⲁϥ ⲛϭⲃⲟⲓ ⲉⲁϥⲥⲟⲩⲛⲧⲛⲁϣⲧⲉ ⲉⲧϥϭⲱϣⲧ ϩⲏⲧⲥ

12 ⲧϩⲉⲗⲡⲓⲥ ⲇⲉ ⲉⲁⲥϭⲃⲃⲉ ϩⲓϩⲟⲩⲛ ϣⲁⲥⲙⲕⲁϩ ⲛϩⲏⲧ ⲛⲧⲙⲛⲧⲁⲧⲥⲟⲟⲩⲛ ⲉϩⲟⲩⲟ ⲉⲧⲉⲧⲓⲁ ⲉⲧⲉⲓⲣⲉ ⲛⲁⲥ ⲛⲧⲃⲁⲥⲁⲛⲟⲥ

13 ⲛⲧⲟⲟⲩ ϩⲱⲟⲩ ⲟⲛ ⲉⲩⲛⲕⲟⲧⲕ ϩⲛϯⲟⲩϣⲏ ⲟⲩⲱⲧ ⲉⲧⲛⲁϣⲧ ⲛⲧⲁⲥⲉⲓ ⲉϩⲣⲁⲓ ϩⲛⲙⲙⲁ ⲛⲕⲁⲕⲉ ⲛⲁⲙⲛⲧⲉ

14 ⲡⲁⲓ ⲙⲉⲛ ⲉϥϣⲧⲟⲣⲧⲣ ⲙⲙⲟⲟⲩ ϩⲓⲧⲛⲛϩⲣⲃ ⲉⲧⲟⲩⲛⲁⲩ ⲉⲣⲟⲟⲩ ⲡⲁⲓ ⲇⲉ ⲛⲉⲩⲃⲱⲗ ⲉⲃⲟⲗ ϩⲓⲧⲙⲡϭⲃⲃⲉ ⲛⲧⲉⲯⲩⲭⲏ ϩⲛⲟⲩϣⲥⲛⲉ ⲁⲥⲉⲓ ⲉϩⲣⲁⲓ ⲉϫⲱⲟⲩ ⲛϭⲓⲧϩⲟⲧⲉ ⲉⲛⲥⲉϭⲱϣⲧ ϩⲏⲧⲥ ⲁⲛ

15 ⲟⲩⲟⲛ ⲇⲉ ⲛⲓⲙ ⲉⲧⲛⲁⲧⲱⲙⲧ ⲉⲡⲙⲁ ⲉⲧⲙⲙⲁⲩ ⲛⲉⲩⲁⲣⲉϩ ⲉⲣⲟϥ ⲡⲉ ⲉϥⲟⲧⲡ ⲉⲩⲉϣⲧⲉⲕⲟ ⲛⲕⲁⲕⲉ

16 ⲉⲓⲧⲉ ⲟⲩⲟⲉⲓ ⲡⲉ ⲏ ⲟⲩϣⲱⲥ ⲏ ⲟⲩⲉⲣⲅⲁⲧⲏⲥ ⲉϥϩⲛⲥⲱϣⲉ ⲉⲁⲧⲁⲛⲁⲅⲕⲏ ⲉⲧⲙⲙⲁⲩ ⲧⲁϩⲟϥ ⲙⲡϥⲣⲃⲟⲗ ⲉⲣⲟⲥ

17 ⲛⲧⲟⲟⲩ ⲅⲁⲣ ⲁⲩⲙⲟⲣⲟⲩ ϩⲛⲟⲩϩⲁⲗⲩⲥⲓⲥ ⲛⲟⲩⲱⲧ ⲛⲧⲉⲡⲕⲁⲕⲉ ⲉⲓⲧⲉ ⲟⲩⲡⲛⲉⲩⲙⲁ ⲉϥⲱϣ ⲉⲃⲟⲗ ϩⲛϩⲉⲛⲕⲗⲁⲇⲟⲥ ⲛϣⲏⲛ ⲉϥⲟϣ ⲛϭⲱⲃⲉ ⲏ ⲟⲩϩⲣⲟⲟⲩ ⲛϩⲁⲗⲏⲧ ⲏ ⲡⲉϩⲣⲟⲟⲩ ⲛⲟⲩⲙⲟⲟⲩ ⲉϥⲥⲱⲕ ϩⲛⲟⲩⲛϣⲟⲧ ⲏ ⲟⲩϩⲣⲟⲟⲩ ⲉϥⲥⲱ...ⲛⲟϭ ⲛⲱⲛⲉ ⲉⲩϩⲃⲟⲣⲃⲣ ⲙⲙⲟⲟⲩ

18 ⲏ ϩⲉⲛⲍⲱⲟⲛ ⲉⲩⲡⲏⲧ ⲉⲛⲥⲉⲛⲁⲩ ⲉⲣⲟⲟⲩ ⲁⲛ ⲏ ⲧⲉⲥⲙⲏ ⲛ ϩⲉⲛⲑⲏⲣⲓⲟⲛ ⲉⲩⲛⲁϣⲧ ⲉⲩⲗϩⲏⲙ ⲏ ⲡⲉϩⲣⲟⲟⲩ ⲛϩⲉⲛϩⲁⲗⲁⲧⲉ ⲉⲩⲟⲩⲱϩ ⲉⲡⲉⲥⲏⲧ ⲉⲩϩⲏⲩ ⲉϩⲣⲁⲓ ⲉⲩⲉ...ⲉⲓⲁ ⲛⲁⲓ ⲧⲏⲣⲟⲩ ⲁⲩⲟϫⲛⲟⲩ ⲉⲩⲧϩⲣϣⲟ ⲙⲙⲟⲟⲩ

19 ⲡⲕⲟⲥⲙⲟⲥ ⲅⲁⲣ ⲧⲏⲣϥ ⲉϥϣⲟⲟⲡ ϩⲛⲟⲩⲟⲉⲓⲛ ⲉϥⲧⲃⲃⲏⲩ ⲁⲩⲱ ⲛⲉϥⲥⲓⲧⲉ ⲉϩⲣⲁⲓ ϩⲛⲛⲉϩⲃⲏⲩⲉ ⲉⲧⲙⲏⲛ ⲉⲃⲟⲗ

20 ⲛⲏⲇⲉ ⲙⲁⲩⲁⲁⲩ ⲛⲉⲩϩⲟⲧⲡ ⲉϩⲟⲩⲛ ϩⲛⲧⲉⲟⲩϣⲏ ⲉⲧϩⲟⲣϣ ⲛⲧⲟⲥ ⲧⲉ ⲧϩⲓⲕⲱⲛ ⲙⲡⲕⲁⲕⲉ ⲉⲧⲟⲩⲛⲁⲃⲱⲕ ⲉⲣⲟϥ ⲛⲧⲟⲟⲩ ⲇⲉ ⲛⲉⲩϩⲟⲣϣ ⲉⲣⲟⲟⲩ ⲙⲁⲩⲁⲁⲩ ⲉϩⲟⲩⲟ ⲉⲡⲕⲁⲕⲉ