Wisdom 16 — Coptic (Sahidic)

1 ⲉⲧⲃⲉⲡⲁⲓ ⲉⲁⲩⲕⲟⲗⲁⲍⲉ ⲙⲙⲟⲟⲩ ϩⲛⲟⲩⲙⲡϣⲁ ... ϩⲟⲓⲛⲉ ⲛⲧⲉⲓⲙⲓⲛⲉ ⲁⲩⲱ ⲉⲩⲃⲁⲥⲁⲛⲓⲍⲉ ⲙⲙⲟⲟⲩ ϩⲓⲧⲛⲟⲩⲁϣⲏ ⲛⲍⲱⲟⲛ

2 ⲉⲡⲙⲁ ⲛⲧⲉⲓⲕⲟⲗⲁⲥⲓⲥ ⲁⲕⲣⲡⲉⲧⲛⲁⲛⲟⲩϥ ⲙⲡⲉⲕⲗⲁⲟⲥ ⲁⲕⲥⲟⲃⲧⲉ ⲛⲁⲩ ⲛⲟⲩϩⲏ ⲙⲡⲏⲣⲁ ⲛϩⲣⲉ ϩⲛⲟⲩϯⲡⲉ ⲙⲃⲣⲣⲉ ⲉⲥϫⲱⲕ ⲉⲃⲟⲗ ⲛⲧⲉⲩⲉⲡⲓⲑⲩⲙⲓⲁ

3 ϫⲉⲕⲁⲥ ⲛⲏⲙⲉⲛ ⲉⲩⲉⲡⲓⲑⲩⲙⲉⲓ ⲉⲟⲩⲱⲙ ⲛⲥⲉⲧⲙϭⲙϭⲟⲙ ⲉϫⲓ ⲛⲧⲉⲩϩⲣⲉ ⲉⲧⲃⲉⲛⲉⲛⲧⲁⲩⲧⲛⲛⲟⲟⲩⲥⲟⲩ ⲉϫⲱⲟⲩ ⲛⲁⲓ ⲇⲉ ⲛⲧⲟⲟⲩ ⲁⲩϣⲡϩⲓⲥⲉ ⲛⲟⲩϣⲏⲙ ⲁⲩϫⲓϯⲡⲉ ⲛⲟⲩϩⲣⲉ ⲙⲃⲣⲣⲉ

4 ϣϣⲉ ⲅⲁⲣ ⲉⲧⲣⲉⲟⲩϩⲕⲟ ⲉϥⲛⲁϣⲧ ⲉⲓ ⲉϩⲣⲁⲓ ⲉϫⲛⲛⲏⲉⲧⲟ ⲛⲣⲉϥϫⲓϫⲛⲁϩ ⲛⲁⲓ ⲇⲉ ⲉⲧⲁⲙⲟⲟⲩ ⲙⲙⲁⲧⲉ ⲉⲧϩⲉ ⲉⲛⲧⲁⲩⲃⲁⲥⲁⲛⲓⲍⲉ ⲛⲛⲉⲩϫⲁϫⲉ

5 ⲕⲁⲓ ⲅⲁⲣ ⲛⲧⲉⲣⲉϥⲉⲓ ⲟⲛ ⲉϩⲣⲁⲓ ⲉϫⲱⲟⲩ ⲛϭⲓⲡϭⲱⲛⲧ ⲛⲛⲉⲑⲏⲣⲓⲟⲛ ⲁⲩⲗⲱⲕⲥ ⲙⲙⲟⲟⲩ ϩⲓⲧⲛϩⲉⲛϩⲟϥ ⲉⲩⲛⲁϣⲧ ⲙⲡⲉⲧⲉⲕⲟⲣⲅⲏ ⲙⲟⲩⲛ ⲉⲃⲟⲗ ϣⲁⲡⲧⲏⲣϥ

6 ⲛⲧⲁⲕϣⲧⲣⲧⲱⲣⲟⲩ ⲇⲉ ⲡⲣⲟⲥ ⲟⲩⲕⲟⲩⲓ ⲉⲕϯⲥⲃⲱ ⲛⲁⲩ ⲉⲁⲩϫⲓ ⲛⲟⲩⲙⲁⲉⲓⲛ ⲛⲟⲩϫⲁⲓ ⲣⲡⲙⲉⲉⲩⲉ ⲛⲉⲛⲧⲟⲗⲏ ⲙⲡⲉⲕⲛⲟⲙⲟⲥ

7 ⲡⲉⲛⲧⲁⲕⲧⲟϣϥ ⲅⲁⲣ ⲉϣⲁϥⲛⲟⲩϩⲙ ⲁⲛ ⲉⲧⲃⲉⲡⲉⲧϥⲛⲁⲩ ⲙⲙⲟϥ ⲁⲗⲗⲁ ⲉⲧⲃⲏⲧⲕ ⲡⲥⲱⲧⲏⲣ ⲛⲟⲩⲟⲛ ⲛⲓⲙ

8 ϩⲙⲡⲁⲓ ⲇⲉ ⲁⲕⲧⲁⲙⲉⲛⲉⲛϫⲁϫⲉ ϫⲉⲛⲧⲟⲕ ⲡⲉ ⲉϣⲁⲕⲧⲟⲩϫⲟ ⲉⲃⲟⲗ ϩⲙⲡⲉⲧϩⲟⲟⲩ ⲛⲓⲙ

9 ⲛⲏⲙⲉⲛ ⲁϩⲉⲛϣϫⲉ ⲙⲛϩⲉⲛⲁϥ ⲛⲟⲩϩⲟⲣ ⲙⲟⲟⲩⲧⲟⲩ ⲉⲩⲗⲱⲕⲥ ⲙⲙⲟⲟⲩ ⲁⲩⲱ ⲙⲡⲟⲩϩⲉ ⲉⲧⲁⲗϭⲟ ⲛⲛⲉⲩⲯⲩⲭⲏ ϫⲉⲛⲉⲩⲙⲡϣⲁ ⲛⲕⲟⲗⲁⲍⲉ ⲙⲙⲟⲟⲩ ϩⲓⲧⲛϩⲉⲛⲧⲉⲓⲙⲓⲛⲉ

10 ⲛⲉⲕϣⲏⲣⲉ ⲇⲉ ⲛⲧⲟⲟⲩ ⲙⲡⲟⲩϫⲣⲟ ⲉⲣⲟⲟⲩ ⲛϭⲓⲛⲟⲃϩⲉ ⲛⲛϩⲟϥ ⲛⲃⲁⲕⲙⲁⲧⲟⲩ ⲡⲉⲕⲛⲁ ⲅⲁⲣ ⲁϥⲉⲓ ⲉϫⲱⲟⲩ ⲁϥⲧⲁⲗϭⲟⲟⲩ

11 ⲛⲧⲁⲩⲧⲟⲃⲥⲟⲩ ⲅⲁⲣ ⲉⲧⲣⲉⲩⲣⲡⲙⲉⲉⲩⲉ ⲛⲛⲉⲕϣⲁϫⲉ ⲁⲩⲱ ⲛⲧⲉⲩⲛⲟⲩ ⲁⲩⲟⲩϫⲁⲓ ϫⲉⲛⲛⲉⲟⲩⲛⲟϭ ⲛⲱⲃϣ ⲧⲁϩⲟⲟⲩ ⲛⲥⲉⲣⲡⲱⲃϣ ⲛⲛⲉⲕⲡⲉⲧⲛⲁⲛⲟⲩⲟⲩ

12 ⲟⲩⲧⲉ ⲅⲁⲣ ⲛⲟⲩⲛⲧⲏϭ ⲁⲛ ⲟⲩⲧⲉ ⲛⲟⲩⲡⲁϩⲣⲉ ⲁⲛ ⲧⲉⲛⲧⲁⲥⲧⲁⲗϭⲟⲟⲩ ⲁⲗⲗⲁ ⲡⲉⲕϣⲁϫⲉ ⲡⲉ ⲡϫⲟⲉⲓⲥ ⲉⲧⲧⲟⲩϫⲟ ⲛⲟⲩⲟⲛ ⲛⲓⲙ

13 ⲧⲱⲕ ⲅⲁⲣ ⲧⲉ ⲧⲉⲝⲟⲩⲥⲓⲁ ⲙⲡⲱⲛϩ ⲙⲛⲡⲙⲟⲩ ⲉⲕϫⲓ ⲉϩⲣⲁⲓ ⲉⲙⲡⲩⲗⲏ ⲛⲁⲙⲛⲧⲉ ⲁⲩⲱ ⲉⲕⲉⲓⲛⲉ ⲉϩⲣⲁⲓ ...

14 ⲡⲣⲱⲙⲉ ⲇⲉ ϣⲁϥⲙⲟⲩⲟⲩⲧ ϩⲛⲧⲉϥⲕⲁⲕⲓⲁ ⲉⲣϣⲁⲛⲡⲉⲡⲛⲉⲩⲙⲁ ⲉⲓ ⲉⲃⲟⲗ ⲁⲩⲱ ⲧⲉϥⲯⲩⲭⲏ ⲙⲉⲥⲕⲟⲧⲥ ⲉⲣⲟϥ

15 ⲙⲛⲗⲁⲁⲩ ⲛⲁϣϭⲙϭⲟⲙ ⲉⲡⲱⲧ ⲉⲛⲉⲕϭⲓϫ

16 ⲛⲧⲉⲣⲟⲩ... ⲅⲁⲣ ⲛϭⲓⲛⲁⲥⲉⲃⲏⲥ ϫⲉⲛⲥⲉⲥⲟⲟⲩⲛ ⲙⲙⲟⲕ ⲁⲛ ⲁⲕⲙⲁⲥⲧⲓⲅⲟⲩ ⲙⲙⲟⲟⲩ ϩⲛⲧϭⲟⲙ ⲙⲡⲉⲕϭⲃⲟⲓ ⲉⲩⲇⲓⲱⲕⲉ ⲛⲥⲱⲟⲩ ϩⲛϩⲉⲛϩⲱⲟⲩ ⲉⲩⲛⲁϣⲧ ⲙⲛⲟⲩⲛⲟϭ ⲛⲁⲗⲙⲡⲉ ⲙⲛⲟⲩⲕⲱϩⲧ ⲉϥⲱϫⲛ ⲙⲙⲟⲟⲩ

17 ⲧⲉϣⲡⲏⲣⲉ ⲅⲁⲣ ⲧⲉ ϫⲉⲛⲉⲣⲉⲡⲕⲱϩⲧ ⲉⲛⲉⲣⲅⲉⲓ ⲛϩⲟⲩⲟ ⲉⲡⲙⲟⲟⲩ ⲉⲧⲱϣⲙ ⲙⲡⲧⲏⲣϥ ⲡⲕⲟⲥⲙⲟⲥ ⲅⲁⲣ ϣⲁϥⲙⲓϣⲉ ⲉϫⲛⲛⲇⲓⲕⲁⲓⲟⲥ

18 ϩⲉⲛⲥⲟⲡ ⲙⲉⲛ ⲛⲧⲉⲡⲕⲱϩⲧ ⲁⲣⲟϣ ⲛϥⲧⲙⲣⲱⲕϩ ⲛⲛⲍⲱⲟⲛ ⲛⲧⲁⲩⲛⲧⲟⲩ ⲉϫⲛⲛⲁⲥⲉⲃⲏⲥ ϫⲉⲕⲁⲁⲥ ⲉⲩⲉⲛⲁⲩ ⲛⲥⲉⲉⲓⲙⲉ ϫⲉⲉⲩⲑⲙⲕⲟ ⲙⲙⲟⲟⲩ ϩⲓⲧⲛⲧⲉⲕⲣⲓⲥⲓⲥ ⲙⲡⲛⲟⲩⲧⲉ

19 ϩⲉⲛⲥⲟⲡ ⲇⲉ ϩⲛⲧⲙⲏⲧⲉ ⲙⲡⲙⲟⲟⲩ ⲛϥⲣⲱⲕϩ ⲙⲙⲟⲟⲩ ⲉϩⲟⲩⲟ ⲉⲧϭⲟⲙ ⲛⲧⲥⲁⲧⲉ ϫⲉⲕⲁⲥ ⲉϥⲉⲧⲁⲕⲉⲛⲕⲁⲣⲡⲟⲥ ⲙⲡⲕⲁϩ ⲛⲛⲣⲉϥϫⲓⲛϭⲟⲛⲥ

20 ⲉⲡⲙⲁ ⲛⲛⲁⲓ ⲁⲕⲧⲙⲙⲉⲡⲉⲕⲗⲁⲟⲥ ϩⲛⲧⲉϩⲣⲉ ⲛⲛⲁⲅⲅⲉⲗⲟⲥ ⲁⲕⲧⲛⲛⲟⲟⲩ ⲛⲁⲩ ⲉⲃⲟⲗ ϩⲛⲧⲡⲉ ⲛⲟⲩⲟⲉⲓⲕ ⲉϥⲥⲃⲧⲱⲧ ⲛⲁⲩ ⲁϫⲛϩⲓⲥⲉ ⲉϥϭⲙϭⲟⲙ ⲉϩⲗⲟϭ ⲛⲓⲙ ⲁⲩⲱ ⲉϥⲛⲏⲩ ⲉϩⲛϯⲡⲉ ⲛⲓⲙ

21 ⲧϭⲟⲙ ⲅⲁⲣ ⲙⲡⲉⲕϩⲗⲟϭ ⲁⲥⲟⲩⲱⲛϩ ⲉⲃⲟⲗ ⲉϩⲟⲩⲛ ⲉⲛⲉⲕϣⲏⲣⲉ ⲉϥϣⲙϣⲉ ⲅⲁⲣ ⲙⲡⲟⲩⲱϣ ⲛⲛⲉⲧϫⲓ ⲙⲙⲟϥ ⲛⲉϥϣⲓⲃⲉ ⲡⲉ ϩⲙⲡⲉⲧⲉⲣⲉⲡⲟⲩⲁ ⲡⲟⲩⲁ ⲉⲡⲓⲑⲩⲙⲉⲓ ⲉⲣⲟϥ

22 ⲡⲭⲓⲱⲛ ⲁⲩⲱ ⲡⲉⲕⲣⲩⲥⲧⲁⲗⲟⲥ ⲁⲩϥⲓ ϩⲁⲡⲕⲱϩⲧ ⲙⲡⲟⲩⲃⲱⲗ ⲉⲃⲟⲗ ϫⲉⲕⲁⲥ ⲉⲩⲉⲉⲓⲙⲉ ϫⲉⲡⲕⲱϩⲧ ⲁϥⲧⲁⲕⲉⲛⲕⲁⲣⲡⲟⲥ ⲛⲛϫⲁϫⲉ ⲉϥϫⲉⲣⲟ ϩⲛⲧⲉⲭⲁⲗⲁⲍⲁ ⲁⲩⲱ ⲉϥⲙⲟⲩϩ ⲛⲛϩⲱⲟⲩ ⲁⲩⲱ ⲁϥⲣⲡⲱⲃϣ ⲛⲧⲉϥⲕⲉϭⲟⲙ

23 ⲡⲁⲓ ⲇⲉ ⲟⲛ ϫⲉⲕⲁⲥ ⲉⲣⲉⲛⲇⲓⲕⲁⲓⲟⲥ ⲥⲁⲁⲛϣ

24 ⲧⲉⲕⲧⲓⲥⲓⲥ ⲅⲁⲣ ⲉⲥϣⲙϣⲉ ⲛⲁⲕ ⲡⲉⲛⲧⲁϥⲧⲁⲙⲓⲟⲥ ϩⲉⲛⲥⲟⲡ ⲙⲉⲛ ⲛⲥⲛϣⲟⲧ ⲉⲩⲕⲟⲗⲁⲥⲓⲥ ⲛⲛⲣⲉϥϫⲓⲛϭⲟⲛⲥ ϩⲉⲛⲥⲟⲡ ⲇⲉ ⲟⲛ ⲛⲥⲃⲱϣ ⲉⲩⲙⲧⲟⲛ ⲛⲛⲉⲧⲛⲁϩⲧⲉ ⲉⲣⲟⲕ

25 ⲉⲧⲃⲉⲡⲁⲓ ⲟⲛ ⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲛⲉⲥϣⲓⲃⲉ ⲉϩⲱⲃ ⲛⲓⲙ ⲉⲥϣⲙϣⲉ ⲛⲧⲉⲕⲇⲱⲣⲉⲁ ⲉⲥⲁⲁⲛϣ ⲙⲡⲧⲏⲣϥ ⲛⲛⲁϩⲣⲛⲡⲟⲩⲱϣ ⲛⲛⲉⲧϩⲕⲁⲉⲓⲧ

26 ϫⲉⲕⲁⲥ ⲉⲩⲉⲉⲓⲙⲉ ⲛϭⲓⲛⲉⲕϣⲏⲣⲉ ⲛⲧⲁⲕⲙⲉⲣⲓⲧⲟⲩ ⲡϫⲟⲉⲓⲥ ϫⲉⲛⲕⲁⲣⲡⲟⲥ ⲁⲛ ⲉⲧⲣⲏⲧⲛⲉⲧϣⲁⲁⲛϣ ⲙⲡⲣⲱⲙⲉ ⲁⲗⲗⲁ ⲡⲉⲕϣⲁϫⲉ ⲡⲉⲧϩⲁⲣⲉϩ ⲉⲛⲉⲧⲕⲱ ⲛϩⲧⲏⲩ ⲉⲣⲟⲕ

27 ⲡⲉⲧⲉⲙⲉϥⲃⲱⲗ ⲅⲁⲣ ⲉⲃⲟⲗ ϩⲓⲧⲙⲡⲕⲱϩⲧ ϩⲁⲡⲗⲱⲥ ϩⲓⲧⲛⲟⲩⲕⲟⲩⲓ ⲛⲁⲕⲧⲓⲛ ⲙⲡⲣⲏ ϣⲁϥϩⲙⲟⲙ ⲛϥⲃⲱⲗ ⲉⲃⲟⲗ

28 ϫⲉⲕⲁⲥ ⲉⲩⲉⲉⲓⲙⲉ ϫⲉϣϣⲉ ϩⲁⲧϩⲏ ⲛϣⲁ ⲙⲡⲣⲏ ⲉϣⲡϩⲙⲟⲧ ⲛⲧⲟⲟⲧⲕ ⲁⲩⲱ ⲉϣⲗⲏⲗ ⲉⲡⲉⲉⲓⲃⲧ ⲉⲣⲟⲕ

29 ⲧϩⲉⲗⲡⲓⲥ ⲅⲁⲣ ⲙⲡⲁⲧϩⲙⲟⲧ ⲛⲁⲃⲱⲗ ⲉⲃⲟⲗ ⲛⲧϩⲉ ⲙⲡϫⲁϥ ⲛⲧⲉⲡⲣⲱ ⲁⲩⲱ ⲥⲛⲁϩⲁⲧⲉ ⲛⲧϩⲉ ⲛⲟⲩⲙⲟⲟⲩ ⲛⲁⲧϣⲁⲩ