Wisdom 15 — Coptic (Sahidic)

1 ⲛⲧⲟⲕ ⲇⲉ ⲡⲛⲟⲩⲧⲉ ⲛⲧⲕ ⲟⲩⲭⲣⲏⲥⲧⲟⲥ ⲁⲩⲱ ⲛⲧⲕ ⲟⲩⲙⲉ ⲛⲧⲕ ⲟⲩϩⲁⲣϣϩⲏⲧ ⲉⲕⲥⲙⲓⲉ ⲙⲡⲧⲏⲣϥ ϩⲛⲧⲱϣ ϩⲓⲛⲁ

2 ⲕⲁⲛ ⲉⲛϣⲁⲛⲣⲛⲟⲃⲉ ⲁⲛⲟⲛ ⲡⲉⲧⲉⲛⲱⲕ ⲛⲉ ⲉⲛⲥⲟⲟⲩⲛ ⲛⲧⲉⲕⲁⲙⲁϩⲧⲉ ⲛⲧⲛⲛⲁⲣⲛⲟⲃⲉ ⲁⲛ ⲉⲛⲥⲟⲟⲩⲛ ϫⲉⲉⲛⲏⲡ ⲉⲣⲟⲕ

3 ⲟⲩⲇⲓⲕⲁⲓⲟⲥⲩⲛⲏ ⲅⲁⲣ ⲉⲥϫⲏⲕ ⲉⲃⲟⲗ ⲡⲉ ⲡⲥⲟⲩⲱⲛⲅ ⲁⲩⲱ ⲧⲛⲟⲩⲛⲉ ⲙⲡⲱⲛϩ ⲡⲉ ⲡⲥⲟⲟⲩⲛ ⲙⲡⲉⲕⲁⲙⲁϩⲧⲉ

4 ⲟⲩⲧⲉ ⲅⲁⲣ ⲙⲡⲥⲡⲗⲁⲛⲁ ⲙⲙⲟⲛ ⲛϭⲓⲧⲉϩⲓⲏ ⲉⲧϩⲟⲟⲩ ⲙⲛⲡⲙⲉⲉⲩⲉ ⲛⲛⲣⲱⲙⲉ ⲟⲩⲧⲉ ⲡϩⲓⲥⲉ ⲛⲁⲧⲕⲁⲣⲡⲟⲥ ⲛⲛⲣⲉϥⲥⲉϩϩⲁⲓⲃⲉⲥ ⲙⲛⲛⲉⲥⲙⲟⲧ ⲉⲧϫⲏϩ ϩⲛϩⲉⲛⲁⲩⲁⲛ ⲉⲩϣⲟⲃⲉ

5 ⲛⲁⲓ ⲉⲧⲉϣⲁⲣⲉⲛⲁⲧϩⲏⲧ ⲉⲡⲓⲑⲩⲙⲉⲓ ⲉⲣⲟⲟⲩ ⲉⲩⲙⲉ ⲙⲡⲉⲓⲛⲉ ⲛⲧϩⲓⲕⲱⲛ ⲉⲧⲙⲟⲟⲩⲧ ⲉⲧⲉⲙⲛⲡⲛⲉⲩⲙⲁ ⲛϩⲏⲧⲥ

6 ⲉⲩⲟ ⲙⲙⲁⲓⲛⲉⲧϩⲟⲟⲩ ⲉⲩⲙⲡϣⲁ ⲛⲛϩⲉⲗⲡⲓⲥ ⲛⲧⲉⲓⲙⲓⲛⲉ ⲛϭⲓⲛⲉⲧⲧⲁⲙⲓⲟ ⲙⲙⲟⲟⲩ ⲙⲛⲛⲉⲧϣⲙϣⲉ ⲛⲁⲩ

7 ⲕⲁⲓ ⲅⲁⲣ ⲟⲩⲕⲉⲣⲁⲙⲉⲩⲥ ⲉϥϩⲓⲥⲉ ⲙⲙⲟϥ ⲉϥⲟⲩⲱϣⲙ ⲙⲡⲟⲙⲉ ϥⲡⲗⲁⲥⲥⲉ ⲙⲡⲟⲩⲁ ⲡⲟⲩⲁ ⲛⲛⲉϩⲛⲁⲁⲩ ⲙⲡⲉⲛϣⲙϣⲉ ϩⲟⲓⲛⲉ ⲙⲉⲛ ⲉⲛⲉϩⲃⲏⲩⲉ ⲉⲧⲧⲁⲓⲏⲩ ⲧⲏⲣⲟⲩ ϩⲟⲓⲛⲉ ⲇⲉ ⲛ ⲉⲧⲥⲏϣ ⲉⲃⲟⲗ ϩⲙⲡⲓⲟⲙⲉ ⲛⲟⲩⲱⲧ ⲡⲉⲧⲣϩⲱⲃ ⲇⲉ ⲉⲣⲟⲟⲩ ⲡⲉⲧⲥⲟⲟⲩⲛ ϫⲉⲟⲩ ⲧⲉ ⲧⲉⲭⲣⲉⲓⲁ ⲙⲡⲟⲩⲁ ⲡⲟⲩⲁ

8 ⲁⲩⲱ ⲡⲣⲉϥϩⲁⲥⲧϥ ⲉⲡⲡⲉⲧϩⲟⲟⲩ ⲉⲃⲟⲗ ϩⲙⲡⲓⲟⲙⲉ ⲛⲟⲩⲱⲧ ⲁϥⲡⲗⲁⲥⲥⲉ ⲛⲟⲩⲙⲟⲩⲧⲉ ⲡⲁⲓ ⲉⲛⲧⲁⲩⲧⲁⲙⲓⲟϥ ⲉⲃⲟⲗ ϩⲙⲡⲕⲁϩ ϩⲁⲧϩⲏ ⲛⲟⲩⲕⲟⲩⲓ ⲙⲛⲛⲥⲁⲕⲉ ⲕⲟⲩⲓ ⲉϥⲛⲁⲃⲱⲕ ⲉⲡⲙⲁ ⲛⲧⲁϥⲉⲓ ⲉⲃⲟⲗ ⲛϩⲏⲧϥ ⲉⲁⲩϥⲓ ⲧⲉϥⲯⲩⲭⲏ ⲛⲧⲟⲟⲧϥ

9 ⲁⲗⲗⲁ ⲛⲉϥϥⲓⲣⲟⲟⲩϣ ⲁⲛ ϫⲉⲉϥⲛⲁⲙⲟⲩ ⲏ ϫⲉⲟⲩⲕⲟⲩⲓ ⲡⲉ ⲡⲉϥⲁϩⲉ ⲁⲗⲗⲁ ⲁϥϯⲧⲱⲛ ⲙⲛⲛϩⲁⲩⲛⲟⲩⲃ ⲙⲛⲛⲣⲉϥⲣϩⲁⲧ ⲙⲛⲛⲥⲁⲛϩⲟⲙⲛⲧ ⲉϥϣⲟⲩϣⲟⲩ ⲙⲙⲟϥ ϫⲉⲉϥⲧⲁⲙⲓⲉⲥⲙⲟⲧ ⲙⲃⲗϫⲉ

10 ⲉⲩⲕⲣⲙⲉⲥ ⲡⲉ ⲡⲉϥϩⲏⲧ ⲁⲩⲱ ⲧⲉϥϩⲉⲗⲡⲓⲥ ⲥⲟϣϥ ⲉⲩⲕⲁϩ ⲁⲩⲱ ⲡⲉϥⲱⲛϩ ⲥⲏϣ ⲉⲩⲟⲙⲉ

11 ⲉⲃⲟⲗ ϫⲉⲙⲡϥⲥⲟⲩⲛⲡⲉⲛⲧⲁϥⲡⲗⲁⲥⲥⲉ ⲙⲙⲟϥ ⲡⲉⲛⲧⲁϥⲛⲓϥⲉ ⲉϩⲟⲩⲛ ⲉϩⲣⲁϥ ⲛⲟⲩⲯⲩⲭⲏ ⲉⲥⲉⲛⲉⲣⲅⲉⲓ ⲁⲩⲱ ⲡⲉⲛⲧⲁϥϯ ⲛⲁϥ ⲛⲟⲩⲡⲛⲉⲩⲙⲁ ⲛⲱⲛϩ

12 ⲁⲗⲗⲁ ⲛⲧⲁϥⲙⲉⲉⲩⲉ ϫⲉⲟⲩϣⲟⲩⲥⲱⲃⲉ ⲙⲙⲟϥ ⲡⲉ ⲡⲉⲛⲱⲛϩ ⲁⲩⲱ ⲡⲉⲛⲁϩⲉ ⲛⲧϩⲉ ⲛⲟⲩϣⲁ ⲛϯϩⲏⲩ ...ϩⲏⲩ ⲛϩⲱⲃ ⲛⲓⲙ ... ⲡⲉⲧϩⲟⲟⲩ

13 ⲡⲁⲓ ⲅⲁⲣ ⲥⲟⲟⲩⲛ ⲉϩⲟⲩⲟ ⲛⲟⲩⲟⲛ ⲛⲓⲙ ϫⲉϥⲣⲛⲟⲃⲉ ⲉϥⲧⲁⲙⲓⲟ ⲛϩⲡⲙⲟⲩⲛⲅ ... ⲉⲩⲛⲁⲟⲩⲱϭⲡ ⲉⲃⲟⲗ ϩⲛⲧϩⲩⲗⲏ ⲙⲡⲕⲁϩ

14 ϩⲉⲛⲉⲃⲓⲏⲛ ⲛⲉ ⲁⲩⲱ ϩⲉⲛⲁⲧϩⲏⲧ ⲛⲉ ⲉϩⲟⲩⲟ ⲉⲟⲩⲯⲩⲭⲏ ⲛϣⲏⲣⲉ ⲕⲟⲩⲓ ⲛϫⲓϫⲉⲉⲩⲉ ⲙⲡⲉⲕⲗⲁⲟⲥ ⲉⲧϫⲓ ⲙⲙⲟϥ ⲛϭⲟⲛⲥ

15 ϫⲉⲛⲉⲓⲇⲱⲗⲟⲛ ⲧⲏⲣⲟⲩ ⲛⲛⲉⲉⲑⲛⲟⲥ ⲉⲩⲙⲉⲉⲩⲉ ϫⲉϩⲉⲛⲛⲟⲩⲧⲉ ⲛⲉ ⲛⲁⲓ ⲉⲧⲉⲛⲥⲉⲛⲁⲩ ⲉⲃⲟⲗ ⲁⲛ ϩⲛⲛⲉⲩⲃⲁⲗ ⲟⲩⲧⲉ ⲛⲥⲉϣⲱⲗⲙ ⲁⲛ ϩⲛϣⲁⲁⲛⲧⲟⲩ ⲟⲩⲧⲉ ⲛⲥⲉⲥⲱⲧⲙ ⲁⲛ ϩⲛⲛⲉⲩⲙⲁⲁϫⲉ ⲟⲩⲧⲉ ⲛⲥⲉϭⲟⲙϭⲙ ⲁⲛ ϩⲛⲛⲧⲏⲏⲃⲉ ⲛⲛⲉⲩϭⲓϫ ⲡⲉⲩⲕⲉⲟⲩⲉⲣⲏⲧⲉ ϩⲉⲛⲁⲣⲅⲟⲛ ⲛⲉ ⲉⲙⲉⲩⲙⲟⲟϣⲉ

16 ⲟⲩⲣⲱⲙⲉ ⲅⲁⲣ ⲉⲣⲉⲡⲉϥⲡⲛⲉⲩⲙⲁ ⲉⲣⲟϥ ⲡⲉⲛⲧⲁϥⲧⲁⲙⲓⲟⲟⲩ ⲙⲛϣϭⲟⲙ ⲇⲉ ⲛⲗⲁⲁⲩ ⲛⲣⲱⲙⲉ ⲉⲡⲗⲁⲥⲥⲉ ⲛⲟⲩⲛⲟⲩⲧⲉ ⲁϥⲉⲓⲛⲉ ⲙⲙⲟϥ

17 ⲟⲩⲣⲉϥⲙⲟⲩⲧⲉ ⲇⲉ ϥⲣϩⲱⲃ ⲟⲛ ⲉⲡⲉⲧⲙⲟⲟⲩⲧ ϩⲛⲛⲉϥϭⲓϫ ⲛⲁⲛⲟⲙⲟⲛ ⲛⲧⲟϥ ⲅⲁⲣ ϥⲥⲟⲧⲡ ⲉⲛⲉⲧϥϣⲙϣⲉ ⲙⲙⲟⲟⲩ ϫⲉⲛⲧⲟϥ ⲙⲉⲛ ϥⲟⲛϩ ⲛⲏⲇⲉ ⲙⲡⲟⲩⲱⲛϩ ⲉⲛⲉϩ

18 ⲡⲕⲉⲧⲃⲛⲟⲟⲩⲉ ⲉⲧⲥⲏϣ ⲥⲉⲟⲩⲱϣⲧ ⲙⲙⲟⲟⲩ ϩⲛⲉ... ⲉⲩⲧⲟⲛⲧⲛ ⲅⲁⲣ ⲙⲙⲟⲟⲩ ⲥⲉϩⲟⲟⲩ ⲉⲡⲕⲉⲥⲉⲉⲡⲉ

19 ⲟⲩⲇⲉ ⲛⲛⲉⲥⲱⲟⲩ ⲁⲛ ϩⲙⲡⲉⲩϩⲟ ⲉⲧⲣⲉⲩⲟⲩⲁϣⲟⲩ ϩⲛⲛⲍⲱⲟⲛ ⲥⲉⲟ ⲇⲉ ⲛϣⲙⲙⲟ ⲉⲡⲧⲁⲉⲓⲟ ⲙⲡⲛⲟⲩϯ ⲙⲛⲡⲉⲥⲙⲟⲩ