Read Wisdom 14 side by side with translations · The Final Bible
1 ⲟⲩⲁ ⲟⲛ ⲉϥⲛⲁⲥϭⲏⲣ ϩⲓⲧⲛⲛⲛⲟϭ ⲛϩⲟⲉⲓⲙ ⲉϥⲱϣ ⲉϩⲣⲁⲓ ⲉⲩϣⲉ ⲉϥϩⲟⲟⲩ ⲉⲡϫⲟⲉⲓ ⲉⲧϥⲁⲗⲉ ⲉⲣⲟϥ
2 ⲡⲏ ⲅⲁⲣ ⲛⲧⲁⲩⲙⲉⲉⲩⲉ ⲉⲣⲟϥ ⲉⲧⲃⲉⲧⲉⲡⲓⲑⲩⲙⲓⲁ ⲙⲡϩⲏⲩ ⲧⲥⲟⲫⲓⲁ ⲇⲉ ⲉⲧⲛⲉⲥⲃⲱⲱⲥ ⲧⲉⲛⲧⲁⲥⲙⲟⲛⲕϥ
3 ⲛⲧⲟⲕ ⲇⲉ ⲡⲉⲛⲉⲓⲱⲧ ⲧⲉⲕⲡⲣⲟⲛⲟⲓⲁ ⲧⲉⲧⲣϩⲙⲙⲉ ⲙⲙⲟϥ ϫⲉⲁⲕϯϩⲓⲏ ⲟⲛ ⲛⲧⲑⲁⲗⲁⲥⲥⲁ ⲁⲩⲱ ϩⲓⲏ ⲙⲙⲟⲟϣⲉ ⲉϥⲟⲣϫ ϩⲛⲛϩⲟⲉⲓⲙ
4 ⲉⲕⲧⲁⲙⲟ ⲙⲙⲟⲛ ϫⲉⲟⲩⲛϭⲟⲙ ⲙⲙⲟⲕ ⲉⲧⲟⲩϫⲟ ⲉⲃⲟⲗ ϩⲙⲙⲁ ⲛⲓⲙ ϫⲉⲕⲁⲥ ϩⲱⲟⲩ ⲟⲛ ⲉⲩⲉⲁⲗⲉ ⲛϭⲓⲛⲉⲧⲉⲛⲥⲉⲥⲟⲟⲩⲛ ⲁⲛ ⲛⲛⲏⲏⲃⲉ
5 ⲕⲟⲩⲱϣ ⲉⲧⲙⲧⲣⲉⲩϣⲱⲡⲉ ⲉⲩⲟ ⲛⲁⲣⲅⲟⲛ ⲛϭⲓⲛⲉϩⲃⲏⲩⲉ ⲛⲧⲉⲕⲥⲟⲫⲓⲁ ⲉⲧⲃⲉⲡⲁⲓ ⲛⲣⲱⲙⲉ ⲡⲓⲥⲧⲉⲩⲉ ⲛⲛⲉⲩⲯⲩⲭⲏ ⲛⲟⲩⲉⲗⲁⲭⲓⲥⲧⲟⲛ ⲛϣⲉ ⲁⲩⲱ ⲥⲉⲟⲩϫⲁⲓ ⲉⲡϩⲟⲉⲓⲙ ⲉⲩϫⲓⲟⲟⲣ ⲛⲛⲉⲩⲉϫⲏⲩ
6 ϩⲛⲧⲉϩⲟⲩⲉⲓⲧⲉ ⲅⲁⲣ ⲉⲩϣⲁⲛϥⲱⲧⲉ ⲉⲃⲟⲗ ⲛⲛⲅⲓⲅⲁⲥ ⲛϫⲁⲥⲓϩⲏⲧ ⲛⲧⲁⲧϩⲉⲗⲡⲓⲥ ⲙⲡⲕⲟⲥⲙⲟⲥ ⲟⲩϫⲁⲓ ⲉⲃⲟⲗ ϩⲓⲧⲛⲟⲩϫⲟⲉⲓ ⲁⲥϣⲱϫⲡ ⲛⲟⲩⲥⲡⲉⲣⲙⲁ ⲙⲡϫⲡⲟ ⲙⲡⲕⲟⲥⲙⲟⲥ ⲉⲁⲧⲉⲕϭⲓϫ ⲣϩⲙⲙⲉ ⲙⲙⲟⲥ
7 ⲁⲩⲥⲙⲟⲩ ⲅⲁⲣ ⲉⲡϣⲉ ⲉⲧⲉⲣⲉⲧⲇⲓⲕⲁⲓⲟⲥⲩⲛⲏ ⲛⲁϣⲱⲡⲉ ⲉⲃⲟⲗ ϩⲓⲧⲟⲟⲧϥ
8 ϥⲥϩⲟⲩⲟⲣⲧ ⲇⲉ ⲛⲧⲟϥ ⲛϭⲓⲡⲙⲟⲩⲛⲅ ⲛϭⲓϫ ϣⲟⲟⲡ ⲙⲛⲡⲉⲛⲧⲁϥⲣϩⲱⲃ ⲉⲣⲟϥ ϫⲉⲡⲁⲓ ⲙⲉⲛ ⲁϥⲣϩⲱⲃ ⲡⲏ ⲇⲉ ⲁⲩⲙⲟⲩⲧⲉ ⲉⲣⲟϥ ϫⲉⲛⲟⲩⲧⲉ ⲉⲩϣⲉ ⲉϥⲧⲁⲕⲏⲟⲩ ⲡⲉ
9 ⲡⲁⲥⲉⲃⲏⲥ ⲅⲁⲣ ⲁⲩⲱ ⲧⲉϥⲕⲉⲙⲛⲧϣⲁϥⲧ ⲡⲛⲟⲩⲧⲉ ⲙⲟⲥⲧⲉ ⲙⲙⲟⲟⲩ ϩⲓⲟⲩⲥⲟⲡ
10 ⲕⲁⲓ ⲅⲁⲣ ⲡⲉⲛⲧⲁϥⲙⲟⲛⲅϥ ⲥⲉⲛⲁⲕⲟⲗⲁⲍⲉ ⲙⲙⲟϥ ⲙⲛⲡⲉⲛⲧⲁϥⲧⲁⲙⲓⲟϥ
11 ⲉⲧⲃⲉⲡⲁⲓ ⲥⲉⲛⲁϭⲙⲡϣⲓⲛⲉ ⲛⲛⲕⲉⲉⲓⲇⲱⲗⲟⲛ ⲛⲛϩⲉⲑⲛⲟⲥ ϫⲉϩⲙⲡⲥⲱⲛⲧ ⲙⲡⲛⲟⲩⲧⲉ ⲁⲩϣⲱⲡⲉ ⲉϩⲛⲃⲟⲧⲉ ⲁⲩⲱ ϩⲛⲥⲕⲁⲛⲇⲁⲗⲟⲛ ⲛⲛⲉⲯⲩⲭⲏ ⲛⲛⲣⲱⲙⲉ ⲁⲩⲱ ⲉⲩϭⲟⲣϭⲥ ⲛⲛⲟⲩⲉⲣⲏⲧⲉ ⲛⲛⲁⲧϩⲏⲧ
12 ⲧⲁⲣⲭⲏ ⲛⲧⲡⲟⲣⲛⲉⲓⲁ ⲡⲉ ⲡⲧⲁⲙⲓⲟ ⲛⲛⲉⲓⲇⲱⲗⲟⲛ ⲁⲩⲱ ⲡⲉⲩⲙⲟⲛⲅ ⲡⲉ ... ⲡⲉⲩⲱⲛϩ
13 ⲟⲩⲇⲉ ⲅⲁⲣ ⲛⲉⲩϣⲟⲟⲡ ⲁⲛ ⲛϣⲁⲉⲛⲉϩ
14 ϩⲛⲧⲙⲛⲧϣⲟⲩϣⲟⲩ ⲅⲁⲣ ⲛⲛⲣⲱⲙⲉ ⲉⲛⲧⲁⲩⲉⲓ ⲉϩⲟⲩⲛ ⲉⲡⲕⲟⲥⲙⲟⲥ ⲉⲧⲃⲉⲡⲁⲓ ⲁⲩⲧⲟϣⲧ ϩⲛⲟⲩϩⲁⲡ ⲉⲧⲃⲉⲟⲩϣⲱⲱⲧ ⲉⲃⲟⲗ
15 ⲟⲩⲉⲓⲱⲧ ⲅⲁⲣ ⲉϥⲗⲩⲡⲉⲓ ⲉϫⲛⲡϩⲏⲃⲉ ⲙⲡⲉϥϣⲏⲣⲉ ⲛⲧⲁⲩϥⲓⲧϥ ϩⲛⲟⲩϭⲉⲡⲏ ⲉϥⲟ ⲛϣⲁⲣⲁϩⲉ ⲁϥⲧⲁⲙⲓⲉⲟⲩϩⲓⲕⲱⲛ ⲛⲁϥ ⲉⲩⲣⲱⲙⲉ ⲉϥⲙⲟⲟⲩⲧ ⲙⲡⲓⲟⲩⲟⲉⲓϣ ⲡⲉ ⲧⲉⲛⲟⲩ ⲁϥⲧⲁⲙⲓⲟϥ ⲛⲧϩⲉ ⲛⲟⲩⲛⲟⲩⲧⲉ ⲁϥϯ ⲉⲧⲟⲟⲧⲟⲩ ⲛϩⲉⲛⲙⲩⲥⲧⲏⲣⲓⲟⲛ ⲙⲛϩⲉⲛϣⲙϣⲉ ⲛⲛⲉⲧϩⲁⲣⲁⲧϥ
16 ⲉⲓⲧⲁ ϩⲙⲡⲉⲟⲩⲟⲉⲓϣ ⲁϥϭⲙϭⲟⲙ ⲛϭⲓⲡⲉⲓⲥⲱⲛⲧ ⲛϣⲁϥⲧ ⲉⲩⲁⲣⲉϩ ⲉⲣⲟϥ ⲛⲧϩⲉ ⲛⲟⲩⲛⲟⲙⲟⲥ ⲁⲩⲱ ϩⲙⲡⲟⲩⲉϩⲥⲁϩⲛⲉ ⲛⲛⲧⲩⲣⲁⲛⲛⲟⲥ ⲁⲩⲟⲩⲱϣⲧ ⲛⲙⲙⲟⲩⲛϭ ⲛϭⲓϫ
17 ⲛⲕⲉⲣⲱⲙⲉ ⲇⲉ ⲉⲧⲟⲩⲏⲟⲩ ⲙⲙⲟⲟⲩ ⲙⲡⲟⲩⲉϣⲧⲁⲉⲓⲟⲟⲩ ⲙⲡⲉⲩⲙⲧⲟ ⲉⲃⲟⲗ ⲁⲩϥⲓⲡⲧⲟⲛⲧⲛ ⲙⲫⲟ ⲉⲧⲟⲩⲏⲟⲩ ⲙⲙⲟⲟⲩ ⲁⲩⲧⲁⲙⲓⲉⲟⲩϩⲓⲕⲱⲛ ⲉⲛⲉⲥⲱⲥ ⲙⲡⲣⲣⲟ ⲉⲩⲧⲁⲉⲓⲟ ⲙⲙⲟϥ ϫⲉⲕⲁⲥ ⲉⲩⲉⲣⲁⲧⲟⲟⲧⲟⲩ ⲉⲕⲱⲣϣ ⲉⲡⲉⲧⲟⲩⲏⲩ ⲛⲧϩⲉ ⲛⲟⲩⲁ ⲉϥϩⲁⲧⲏⲩ
18 ⲁⲩⲱ ⲧⲙⲛⲧⲣⲉϥⲧⲱⲣⲉ ⲙⲡⲣⲉϥⲣⲉⲓⲟⲡⲉ ⲁⲥⲥⲉⲕ ⲛⲕⲟⲟⲩⲉ ⲉⲩⲟⲛⲁⲧⲥⲟⲟⲩⲛ ⲙⲛⲛⲥⲱⲥ ⲉϣⲙϣⲉ ⲛⲁϥ ⲉⲩⲙⲏⲛ ⲉⲃⲟⲗ
19 ⲛⲧⲟϥ ⲅⲁⲣ ⲉϥⲟⲩⲉϣⲁⲣⲉⲥⲕⲉ ⲙⲡⲣⲣⲟ ϩⲣⲁⲓ ⲅⲁⲣ ϩⲛⲧⲉϥⲧⲉⲭⲛⲏ ⲁϥⲙⲟⲛⲕϥ ⲁϥⲧⲁⲙⲓⲟϥ ⲉⲛⲉⲥⲱϥ ⲉϩⲟⲩⲟ ⲙⲡⲉϥⲉⲓⲛⲉ
20 ⲡⲙⲏⲏϣⲉ ⲉⲩⲥⲱⲕ ⲙⲙⲟϥ ⲉⲧⲃⲉⲡϩⲱⲃ ⲉⲧⲛⲉⲥⲱϥ ⲛϯⲟⲡⲉ ⲡⲣⲱⲙⲉ ⲛⲧⲁⲩⲧⲁⲙⲓⲟϥ ϩⲁⲧϩⲏ ⲛⲟⲩⲕⲟⲩⲓ ⲧⲉⲛⲟⲩ ⲁⲩⲙⲉⲉⲩⲉ ϫⲉⲟⲩⲛⲟⲩⲧⲉ ⲡⲉ
21 ⲁⲡⲁⲓ ϣⲱⲡⲉ ⲉⲩϭⲟⲣϭⲥ ϩⲙⲡⲉⲩⲱⲛϩ ϫⲉⲛⲣⲱⲙⲉ ⲛⲧⲁⲩⲣϩⲙϩⲁⲗ ⲙⲫⲏⲃⲉ ⲛⲛⲣⲣⲱⲟⲩ ⲡⲣⲁⲛ ⲉⲛϣⲟⲩⲧⲁⲁϥ ⲁⲛ ⲉϭⲉ ⲗⲁⲁⲩ ⲁⲩⲧⲁⲁϥ ⲉϩⲉⲛⲱⲛⲉ ⲙⲛϩⲉⲛϣⲉ
22 ⲉⲓⲧⲁ ⲙⲡϥⲣⲱϣⲉ ⲛⲁⲩ ⲉⲥⲱⲣⲙ ⲉⲃⲟⲗ ϩⲙⲡϣⲟϫⲛⲉ ⲙⲡⲛⲟⲩⲧⲉ ⲁⲗⲗⲁ ⲁⲩⲣⲡⲕⲉⲱⲛϩ ϩⲛⲟⲩⲛⲟϭ ⲙⲡⲟⲗⲉⲙⲟⲥ ⲙⲙⲛⲧⲁⲧⲥⲟⲟⲩⲛ ⲛⲉⲓⲡⲉⲧϩⲟⲟⲩ ⲧⲏⲣⲟⲩ ⲥⲉⲙⲟⲩⲧⲉ ⲉⲣⲟⲟⲩ ϫⲉⲧⲉⲓⲣⲏⲛⲏ
23 ⲏ ⲅⲁⲣ ⲥⲉϣⲱⲱⲧ ⲛⲛⲉⲩϣⲏⲣⲉ ϩⲛⲛⲉⲩⲙⲁ ⲏ ⲥⲉⲉⲓⲣⲉ ⲛϩⲉⲛⲙⲩⲥⲧⲏⲣⲓⲟⲛ ⲉⲩϩⲏⲡ ⲏ ⲉⲩⲟ ⲛϣⲟⲉⲓⲧ ϩⲛϩⲉⲛⲙⲁ ⲛⲥⲱⲉⲃⲟⲗ ϩⲛϩⲉⲛⲕⲉⲥⲱⲛⲧ ⲉⲩϣⲟⲃⲉ
24 ⲁⲩⲗⲟ ϭⲉ ⲉⲩϩⲁⲣⲉϩ ... ⲉϥⲧⲃⲃⲏⲩ ⲡⲟⲩⲁ ⲇⲉ ⲡⲟⲩⲁ ⲉϥϭⲱⲣϭ ⲉⲛⲉϥⲉⲣⲏⲩ ⲉϩⲱⲧⲃ ⲙⲙⲟϥ ⲏ ⲉⲣⲕⲣⲟϥ ... ⲛϥⲑⲙⲕⲟ ⲙⲙⲟϥ
25 ⲁⲙⲁ ⲛⲓⲙ ⲙⲟⲩϩ ⲛⲕⲣⲟϥ ϩⲓϩⲱⲧⲃ ϩⲓⲥⲛⲟϥ ϩⲓϫⲓⲟⲩⲉ ⲧⲁⲕⲟ ϩⲓⲁⲡⲓⲥⲧⲓⲁ ϣⲧⲟⲣⲧⲣ ⲱⲣⲕ ⲛⲛⲟⲩϫ ⲡⲣⲡⲱⲃϣ ⲛⲛⲁⲅⲁⲑⲟⲛ
26 ⲧⲙⲛⲧⲁⲧϩⲙⲟⲧ ⲡⲥⲱϣϥ ⲛⲛⲉⲯⲩⲭⲏ ⲡϣⲓⲃⲉ ⲙⲡⲥⲱⲛⲧ ⲙⲛⲡⲅⲁⲙⲟⲥ ⲉϥϣⲧⲣⲧⲱⲣ ⲧⲙⲛⲧⲛⲟⲉⲓⲕ ⲁⲩⲱ ⲡϫⲱϩⲙ
27 ⲡϣⲙϣⲉ ⲅⲁⲣ ⲛⲛⲉⲓⲇⲱⲗⲟⲛ ⲉⲧⲉⲛϩⲛϣⲟⲩⲧⲁⲩⲉⲣⲓⲛⲟⲩ ⲁⲛ ⲛⲧⲟϥ ⲡⲉ ⲧⲁⲣⲭⲏ ⲙⲡⲉⲧϩⲟⲟⲩ ⲛⲓⲙ ⲙⲛⲧⲁⲓⲧⲓⲁ ⲙⲛⲧϩⲁⲏ
28 ⲏ ⲅⲁⲣ ⲥⲉⲗⲟⲃⲉ ϩⲁⲡϯϩⲉ ⲏ ⲥⲉⲡⲣⲟⲫⲏⲧⲉⲩⲉ ⲛⲛⲟⲩϫ ⲥⲉⲟⲛϩ ϩⲛⲟⲩϫⲓⲛϭⲟⲛⲥ ⲏ ⲥⲉϭⲉⲡⲏ ⲉⲱⲣⲕ ⲛⲛⲟⲩϫ
29 ⲉⲩⲕⲱ ⲅⲁⲣ ⲛϩⲧⲏⲩ ⲉϩⲛⲉⲓⲇⲱⲗⲟⲛ ⲉⲩⲙⲟⲟⲩⲧ ⲥⲉⲱⲣⲕ ⲕⲁⲕⲱⲥ ⲛⲥⲉⲣϩⲟⲧⲉ ⲁⲛ ϫⲉⲛⲛⲉⲡⲉⲧϩⲟⲟⲩ ⲧⲁϩⲟⲟⲩ
30 ⲡϩⲁⲡ ⲛⲁⲧⲁϩⲟⲟⲩ ⲙⲡⲉⲙⲡϣⲁ ⲙⲡϩⲱⲃ ⲥⲛⲁⲩ ϫⲉⲁⲩⲙⲉⲉⲩⲉ ⲕⲁⲕⲱⲥ ⲉϩⲟⲩⲛ ⲉⲡⲛⲟⲩⲧⲉ ⲉⲩⲕⲱ ⲛϩⲧⲏⲩ ⲉϩⲛⲉⲓⲇⲱⲗⲟⲛ ⲁⲩⲱ ⲉⲩⲱⲣⲕ ⲕⲁⲕⲱⲥ ϩⲛⲟⲩϫⲓⲛϭⲟⲛⲥ ⲙⲛⲟⲩⲕⲣⲟϥ ⲉⲁⲩⲕⲁⲧⲁⲫⲣⲟⲛⲉⲓ ⲛⲧⲉⲕⲣⲓⲥⲓⲥ
31 ⲛⲧϭⲟⲙ ⲅⲁⲣ ⲁⲛ ⲛⲛⲉⲧⲟⲩⲱⲣⲕ ⲙⲙⲟⲟⲩ ⲁⲗⲗⲁ ⲡϩⲁⲡ ⲛⲛⲉⲧⲣⲛⲟⲃⲉ ⲡⲉ ⲉϣⲁϥⲉⲓ ⲛⲥⲟⲡ ⲛⲓⲙ ⲉϫⲛⲧⲡⲁⲣⲁⲃⲁⲥⲓⲥ ⲛⲛⲣⲉϥϫⲓⲛϭⲟⲛⲥ
Wisdom 13 · Wisdom 15 · Greek (Septuagint / SBLGNT) · Aramaic (Peshitta) · Latin (Vulgate)