Read Sirach 50 side by side with translations · The Final Bible
1 ⲥⲓⲙⲱⲛ ⲡϣⲏⲣⲉ ⲛⲓⲉⲭⲟⲛⲓⲁⲥ ⲡⲛⲟϭ ⲛⲟⲩⲏⲏⲃ ⲡⲁⲓ ⲛⲧⲁϥϫⲓϫⲁⲥϥⲉ ⲙⲡⲏⲓ ϩⲙⲡⲉϥⲱⲛϩ ⲁⲩⲱ ⲁϥⲧⲁϫⲣⲉⲡⲉⲣⲡⲉ ϩⲛⲛⲉϥϩⲟⲟⲩ
2 ⲁⲩⲱ ⲁⲩⲥⲙⲛⲥⲛⲧⲉ ⲙⲡϫⲓⲥⲉ ⲛⲧⲇⲓⲡⲗⲏ ⲉⲃⲟⲗ ϩⲓⲧⲟⲟⲧϥ ⲧⲡⲉ ⲙⲛⲡϫⲓⲥⲉ ⲙⲡⲕⲱⲧⲉ ⲙⲡⲉⲣⲡⲉ
3 ϩⲣⲁⲓ ϩⲛⲛⲉϥϩⲟⲟⲩ ⲁⲛⲥⲟⲟⲩϩⲥ ⲙⲙⲟⲟⲩ ⲱϫⲛ ⲁϥⲧⲁϣⲉⲡϣⲓ ⲙⲫⲟⲙⲧ ⲛⲧⲉⲑⲁⲗⲁⲥⲥⲁ
4 ⲡⲉⲧϥⲓ ⲙⲡⲣⲟⲟⲩϣ ⲙⲡⲉϥⲗⲁⲟⲥ ϫⲉⲛⲛⲉϥϩⲉ ⲁⲩⲱ ⲁϥϯϭⲟⲙ ⲛⲧⲡⲟⲗⲓⲥ ϩⲙⲡⲕⲱⲧⲉ ⲉⲣⲟⲥ
5 ⲛⲧϩⲉ ⲛⲧⲁϥϫⲓⲉⲟⲟⲩ ϩⲙⲡⲉⲕⲧⲟ ⲙⲡⲗⲁⲟⲥ ϩⲙⲡⲉⲓⲉⲃⲟⲗ ⲙⲡⲏⲓ ⲙⲡⲕⲁⲧⲁⲡⲉⲧⲁⲥⲙⲁ
6 ⲉϥⲟ ⲛⲧϩⲉ ⲛⲟⲩⲥⲓⲟⲩ ⲛϩⲧⲟⲟⲩⲉ ⲛⲧⲙⲏⲧⲉ ⲛⲛⲉⲕⲗⲟⲟⲗⲉ ⲁⲩⲱ ⲛⲧϩⲉ ⲙⲡⲟⲟϩ ⲉⲧⲙⲉϩ ⲛ... ϩⲛⲛⲉϥϩⲟⲟⲩ
7 ⲛⲧϩⲉ ⲙⲡⲣⲏ ⲉⲧⲣⲟⲩⲟⲉⲓⲛ ⲉϫⲙⲡⲣⲡⲉ ⲙⲡⲉⲧϫⲟⲥⲉ ⲁⲩⲱ ⲛⲧϩⲉ ⲛⲧⲡⲓⲧⲉ ⲉⲧⲣⲟⲩⲟⲉⲓⲛ ϩⲛⲛⲉⲕⲗⲟⲟⲗⲉ ⲛⲉⲟⲟⲩ
8 ⲛⲧϩⲉ ⲛϩⲉⲛϩⲣⲏⲣⲉ ⲛⲟⲩⲣⲧ ϩⲛⲛⲉϩⲟⲟⲩ ⲛⲃⲣⲣⲉ ⲁⲩⲱ ⲛⲧϩⲉ ⲛⲟⲩⲕⲣⲓⲛⲟⲛ ⲉϥϩⲓϫⲛ ⲟⲩⲙⲟⲟⲩ ⲉϥϩⲁⲧⲉ ⲛⲧϩⲉ ⲛⲟⲩϯⲟⲩⲱ ⲛⲗⲓⲃⲁⲛⲟⲥ ϩⲛⲛⲉϩⲟⲟⲩ ⲙⲡϣⲱⲙ
9 ⲁⲩⲱ ⲛⲧϩⲉ ⲛⲟⲩⲕⲱϩⲧ ⲙⲛⲟⲩⲗⲓⲃⲁⲛⲟⲥ ⲉϫⲛⲟⲩϣⲟⲩⲣⲏ ⲁⲩⲱ ⲛⲧϩⲉ ⲛⲟⲩϩⲛⲁⲁⲩ ⲛⲛⲟⲩⲃ ⲛϫⲁϩϫ ⲉϥⲟ ⲛⲉⲓⲉⲡⲉⲛⲉⲙⲙⲉ ⲛⲓⲙ
10 ⲁⲩⲱ ⲛⲧϩⲉ ⲛⲟⲩⲃⲱ ⲛϫⲟⲉⲓⲧ ⲉⲥⲧⲁⲩⲟ ⲉⲃⲟⲗ ⲛⲛⲉⲥⲕⲁⲣⲡⲟⲥ ⲛⲧϩⲉ ⲛⲟⲩⲕⲩⲡⲁⲣⲓⲥⲥⲟⲥ ⲉⲥϫⲟⲥⲉ ϩⲛⲛⲉⲕⲗⲟⲟⲗⲉ
11 ϩⲙⲡⲧⲣⲉϥϫⲓ ⲛⲟⲩⲥⲧⲟⲗⲏ ⲛⲉⲟⲟⲩ ⲁⲩⲱ ⲛϥϯ ϩⲓⲱⲱϥ ⲛⲟⲩⲥⲩⲛⲧⲉⲗⲉⲓⲁ ⲛϣⲟⲩϣⲟⲩ ϩⲙⲡⲧⲣⲉϥⲁⲗⲉ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲉⲧⲟⲩⲁⲁⲃ ⲁϥϯⲉⲟⲟⲩ ⲙⲡⲉⲣϣⲱⲛ ⲙⲡⲉⲩⲟⲡ
12 ϩⲙⲡⲧⲣⲉϥϫⲓ ⲇⲉ ⲛⲟⲩⲉⲃⲓⲱ ⲛⲧⲛⲛϭⲓϫ ⲉⲧⲛⲉⲥⲱⲟⲩ ⲁⲩⲱ ⲛⲧⲟϥ ⲉϥⲁϩⲉⲣⲁⲧϥ ϩⲁⲧⲛⲧⲉⲥⲭⲁⲣⲁ ⲛⲧϣⲟⲩⲣⲏ ⲉϥⲟ ⲛⲟⲩⲕⲗⲟⲙ ⲉϥⲙⲡⲕⲱⲧⲉ ⲛⲛⲉⲥⲛⲏⲩ ⲉϥⲟ ⲛⲧϩⲉ ⲛⲟⲩϯⲟⲩⲱ ⲛⲕⲉⲛⲇⲣⲟⲥ ϩⲙⲡⲗⲓⲃⲁⲛⲟⲥ ⲁⲩⲱ ⲁⲩⲕⲱⲧⲉ ⲉⲣⲟϥ ⲛⲧϩⲉ ⲛⲛⲓⲕⲁϥ ⲛⲃⲛⲛⲉ
13 ⲁⲩⲱ ⲛϣⲏⲣⲉ ⲧⲏⲣⲟⲩ ⲛⲁⲁⲣⲱⲛ ϩⲙⲡⲉⲩⲉⲟⲟⲩ ⲉⲣⲉⲧⲉⲡⲣⲟⲥⲫⲟⲣⲁ ⲙⲡϫⲟⲉⲓⲥ ϩⲛⲛⲉⲩϭⲓϫ ⲙⲡⲉⲙⲧⲟ ⲉⲃⲟⲗ ⲛⲧⲉⲕⲕⲗⲏⲥⲓⲁ ⲧⲏⲣⲥ ⲙⲡⲓⲥⲣⲁⲏⲗ
14 ⲁⲩⲱ ⲡϫⲱⲕ ⲉⲃⲟⲗ ⲛⲛⲣⲉϥϣⲙϣⲉ ϩⲓϫⲛⲛϣⲏⲟⲩⲉ ⲉⲕⲟⲥⲙⲉⲓ ⲛⲧⲉⲡⲣⲟⲥⲫⲟⲣⲁ ⲙⲡⲡⲁⲛⲧⲟⲕⲣⲁⲧⲱⲣ ⲉⲧϫⲟⲥⲉ
15 ⲁϥⲥⲟⲩⲧⲛⲧⲟⲟⲧϥ ⲉⲃⲟⲗ ⲉⲡⲉⲛⲕⲁ ⲛⲟⲩⲱⲧⲛ ⲉⲃⲟⲗ ⲁⲩⲱ ⲁϥⲟⲩⲱⲧⲛ ⲉⲃⲟⲗ ⲙⲡⲉⲥⲛⲟϥ ⲙⲡⲉⲗⲟⲟⲗⲉ ⲁϥⲡⲱϩⲧ ϩⲁⲣⲁⲧϥ ⲙⲡⲉⲑⲩⲥⲓⲁⲥⲧⲏⲣⲓⲟⲛ ⲛⲟⲩⲥϯⲛⲟⲩϥⲉ ⲙⲡⲉⲧϫⲟⲥⲉ ⲡⲣⲣⲟ ⲙⲡⲧⲏⲣϥ
16 ⲧⲟⲧⲉ ⲁⲛϣⲏⲣⲉ ⲛⲁⲁⲣⲱⲛ ϫⲓϣⲕⲁⲕ ⲉⲃⲟⲗ ⲁⲩⲙⲟⲩⲧⲉ ϩⲛϩⲉⲛⲥⲁⲗⲡⲓⲅⲝ ⲛϫⲁϩϫϩ ⲁⲩⲧⲣⲉⲩⲥⲱⲧⲙ ⲉⲩⲛⲟϭ ⲛⲥⲙⲏ ⲉⲩⲣⲡⲙⲉⲉⲩⲉ ⲙⲡⲉⲙⲧⲟ ⲉⲃⲟⲗ ⲙⲡⲉⲧϫⲟⲥⲉ
17 ⲧⲟⲧⲉ ⲁⲡⲗⲁⲟⲥ ⲧⲏⲣϥ ϭⲉⲡⲏ ϩⲓⲟⲩⲥⲟⲡ ⲁⲩⲡⲁϩⲧⲟⲩ ⲉϫⲙⲡⲉⲩϩⲟ ⲉϫⲙⲡⲕⲁϩ ⲉⲩⲟⲩⲱϣⲧ ⲙⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲡⲛⲟⲩⲧⲉ ⲉⲧϫⲟⲥⲉ
18 ⲁⲩⲱ ⲁⲛⲣⲉϥⲯⲁⲗⲗⲉⲓ ⲥⲙⲟⲩ ϩⲛⲛⲉⲩⲥⲙⲏ ⲁⲟⲩⲗⲗⲉ ⲥⲱⲕ ϩⲙⲡⲛⲟϭ ⲛⲏⲓ
19 ⲁⲩⲱ ⲁⲡⲗⲁⲟⲥ ⲥⲉⲡⲥⲡϫⲟⲉⲓⲥ ⲉⲧϫⲟⲥⲉ ϩⲙⲡⲉⲩϣⲗⲏⲗ ⲙⲡⲉⲙⲧⲟ ⲉⲃⲟⲗ ⲙⲡⲛⲁϩⲏⲧ ϣⲁⲛⲧⲉⲡⲕⲟⲥⲙⲟⲥ ⲙⲡϫⲟⲉⲓⲥ ϫⲱⲕ ⲉⲃⲟⲗ ⲁⲩⲱ ⲁⲩϫⲱⲕ ⲉⲃⲟⲗ ⲙⲡⲉϥϣⲙϣⲉ
20 ⲧⲟⲧⲉ ⲁϥⲉⲓ ⲉⲡⲉⲥⲏⲧ ⲁϥϥⲓ ⲛⲛⲉϥϭⲓϫ ⲉϩⲣⲁⲓ ⲉϫⲛⲧⲥⲟⲟⲩϩⲥ ⲧⲏⲣⲥ ⲛⲛϣⲏⲣⲉ ⲙⲡⲓⲥⲣⲁⲏⲗ ⲉϯ ⲙⲡⲉⲥⲙⲟⲩ ⲙⲡϫⲟⲉⲓⲥ ⲉⲃⲟⲗ ϩⲛⲛⲉⲩⲥⲡⲟⲧⲟⲩ ⲁⲩⲱ ⲉϣⲟⲩϣⲟⲩ ϩⲙⲡⲉϥⲣⲁⲛ
21 (b) ⲉϫⲓ ⲡⲉⲥⲙⲟⲩ ⲛⲧⲛⲡⲉⲧϫⲟⲥⲉ
22 ⲧⲉⲛⲟⲩ ϭⲉ ⲥⲙⲟⲩ ⲉⲡⲛⲟⲩⲧⲉ ⲛⲟⲩⲟⲛ ⲛⲓⲙ ⲡⲉϯⲣⲉ ⲛⲙⲙⲛⲧⲛⲟϭ ϩⲙⲙⲁ ⲛⲓⲙ ⲡⲉⲧϫⲓⲥⲉ ⲛⲛⲉⲛϩⲟⲟⲩ ⲉⲃⲟⲗ ϩⲛⲧⲟⲟⲧⲉ ⲡⲉⲧⲉⲓⲣⲉ ⲛⲙⲙⲁⲛ ⲕⲁⲧⲁⲡⲉϥⲛⲁ
23 ⲉϥⲉϯ ⲛⲁⲛ ⲛⲟⲩⲟⲩⲛⲟϥ ⲛϩⲏⲧ ⲉⲧⲣⲉⲟⲩⲉⲓⲣⲏⲛⲏ ϣⲱⲡⲉ ϩⲛⲛⲉⲛϩⲟⲟⲩ ϩⲙⲡⲓⲥⲣⲁⲏⲗ ⲕⲁⲧⲁⲛⲉϩⲟⲟⲩ ⲛϣⲁⲉⲛⲉϩ
24 ⲉⲧⲁⲛϩⲉⲧⲡⲉϥⲛⲁ ⲛⲙⲙⲁⲛ ⲁⲩⲱ ⲉⲥⲟⲧⲛ ϩⲛⲛⲉϥϩⲟⲟⲩ
25 ⲁⲧⲁⲯⲩⲭⲏ ⲙⲉⲥⲧⲉϩⲉⲑⲛⲟⲥ ⲥⲛⲁⲩ ⲁⲩⲱ ⲡⲙⲉϩϣⲟⲙⲛⲧ ⲛⲟⲩϩⲉⲑⲛⲟⲥ ⲁⲛ ⲡⲉ
26 ⲛⲉⲫⲓⲗⲓⲥⲧⲓⲉⲓⲙ ⲉⲧⲟⲩⲏϩ ϩⲛⲧⲥⲁⲙⲁⲣⲓⲁ ⲁⲩⲱ ⲡⲗⲁⲟⲥ ⲛⲥⲟϭ ⲉⲧⲟⲩⲏϩ ϩⲛⲥⲓϭⲓⲙⲁ
27 ⲧⲉⲥⲃⲱ ⲛⲧⲙⲛⲧⲣⲙⲛϩⲏⲧ ⲙⲛⲧⲙⲛⲧⲥⲁⲃⲉ ⲁⲓⲥϩⲁⲓⲥⲟⲩ ϩⲓⲡⲉⲓϫⲱⲱⲙⲉ ⲓⲏⲥⲟⲩⲥ ⲡϣⲏⲣⲉ ⲛⲥⲉⲓⲣⲁⲭ ⲉⲗⲉⲁⲍⲁⲣ ⲡϩⲓⲉⲣⲟⲥⲟⲗⲩⲙⲉⲓⲧⲏⲥ ⲡⲁⲓ ⲛⲧⲁϥⲃⲉⲉⲃⲉ ⲛⲧⲥⲟⲫⲓⲁ ϩⲙⲡⲉϥϩⲏⲧ
28 ⲛⲁⲉⲓⲁⲧϥ ⲙⲡⲉⲧⲛⲁⲙⲟⲟϣⲉ ϩⲛⲛⲁⲓ ⲁⲩⲱ ⲡⲉⲧⲛⲁⲕⲁⲁⲩ ϩⲙⲡⲉϥϩⲏⲧ ⲛⲁⲣⲥⲁⲃⲉ
29 ⲉϥϣⲁⲛⲣⲛⲁⲓ ⲅⲁⲣ ϥⲛⲁϭⲙϭⲟⲙ ⲉⲣⲟⲟⲩ ⲧⲏⲣⲟⲩ ϫⲉⲡⲟⲩⲟⲉⲓⲛ ⲙⲡϫⲟⲉⲓⲥ ⲡⲉ ⲡⲉϥⲟⲩⲱⲛϩ ⲉⲃⲟⲗ
Sirach 49 · Sirach 51 · Greek (Septuagint / SBLGNT) · Aramaic (Peshitta) · Latin (Vulgate)