Read Sirach 49 side by side with translations · The Final Bible
1 ⲉⲣⲉⲡⲉⲣⲡⲙⲉⲉⲩⲉ ⲛⲓⲱⲥⲉⲓⲁⲥ ϣⲱⲡⲉ ⲉⲩⲥⲙⲓⲛⲉ ⲛϣⲟⲩϩⲏⲛⲉ ⲉϥⲧⲥⲁⲛⲏⲩ ⲛϩⲱⲃ ⲛⲣⲉϥⲡⲉⲥⲥⲟϭⲛ ϥⲛⲁϩⲗⲟϭ ⲛⲧϩⲉ ⲛⲟⲩⲉⲃⲓⲱ ϩⲛⲧⲧⲁⲡⲣⲟ ⲧⲏⲣⲥ ⲁⲩⲱ ⲛⲧϩⲉ ⲛϩⲛⲙⲟⲩⲥⲓⲕⲟⲛ ϩⲛϩⲉⲛⲥⲩⲙⲡⲟⲥⲓⲟⲛ ⲛⲏⲣⲡ
2 ⲛⲧⲟϥ ⲁϥⲥⲟⲟⲩⲧⲛ ⲙⲡⲉⲕⲧⲟ ⲙⲡⲗⲁⲟⲥ ⲁⲩⲱ ⲁϥϥⲓ ⲛⲛⲃⲟⲧⲉ ⲛⲧⲁⲛⲟⲙⲓⲁ
3 ⲁϥⲥⲟⲩⲧⲛ ⲡⲉϥϩⲏⲧ ⲉⲡϫⲟⲉⲓⲥ ⲁϥⲧⲁϫⲣⲉⲧⲙⲛⲧⲙⲁⲓⲛⲟⲩⲧⲉ ϩⲛⲛⲉϩⲟⲟⲩ ⲛⲛⲁⲛⲟⲙⲟⲥ
4 ⲡⲃⲟⲗ ⲛⲇⲁⲩⲉⲓⲇ ⲙⲛⲉⲍⲉⲕⲓⲁⲥ ⲙⲛⲓⲱⲥⲉⲓⲁⲥ ⲁⲩⲣⲛⲟⲃⲉ ⲧⲏⲣⲟⲩ ⲛⲟⲩⲛⲟⲃⲉ ⲁⲩⲕⲱ ⲅⲁⲣ ⲛⲥⲱⲟⲩ ⲙⲡⲛⲟⲙⲟⲥ ⲙⲡⲉⲧϫⲟⲥⲉ ⲁⲛⲉⲣⲱⲟⲩ ⲛⲓⲟⲩⲇⲁⲥ ⲱϫⲛ
5 ⲁⲩϯⲡⲉⲩⲧⲁⲡ ⲅⲁⲣ ⲛϩⲉⲛⲕⲟⲟⲩⲉ ⲁⲩⲱ ⲡⲉⲩⲉⲟⲟⲩ ⲛⲟⲩϩⲉⲑⲛⲟⲥ ⲛϣⲙⲙⲟ
6 ⲁⲩⲣⲱⲕϩ ⲅⲁⲣ ⲛⲧⲥⲱⲧⲡ ⲙⲡⲟⲗⲓⲥ ⲙⲡⲉⲩⲟⲩⲟⲡ ⲁⲩⲱ ⲁⲩⲣⲛⲉⲥϩⲓⲟⲟⲩⲉ ⲛϫⲁⲓⲉ
7 ϩⲛⲧⲟⲟⲧϥ ⲛⲓⲉⲣⲏⲙⲓⲁⲥ ⲁⲩⲑⲙⲕⲟϥ ⲅⲁⲣ ⲁⲩⲱ ⲛⲧⲟϥ ⲁⲩⲧⲃⲃⲟϥ ⲙⲡⲣⲟⲫⲏⲧⲏⲥ ϩⲛⲧⲟⲟⲧⲉ ⲉⲡⲱⲣⲕ ⲉⲧϩⲙⲕⲟ ⲉⲧⲁⲕⲟ ⲁⲩⲱ ⲉⲕⲱⲧ ⲉⲧⲱϭⲉ
8 ⲉⲍⲉⲕⲓⲏⲗ ⲡⲁⲓ ⲛⲧⲁϥⲛⲁⲩ ⲉⲧϩⲟⲣⲁⲥⲓⲥ ⲙⲡⲉⲟⲟⲩ ⲧⲉⲛⲧⲁϥⲧⲟⲩⲟⲥ ⲉⲣⲟϥ ϩⲓϫⲙⲫⲁⲣⲙⲁ ⲛⲛⲉⲭⲉⲣⲟⲩⲃⲓⲛ
9 ⲕⲁⲓ ⲅⲁⲣ ⲁϥⲣⲡⲙⲉⲉⲩⲉ ⲛⲛϫⲁϫⲉ ϩⲛⲟⲩϩⲱⲟⲩ ⲉⲣⲡⲉⲧⲛⲁⲛⲟⲩϥ ⲛⲛⲉⲧⲥⲟⲟⲩⲧⲛ ⲛⲛⲉϩⲓⲟⲩⲉ
10 ⲉⲣⲉⲛⲕⲉⲉⲥ ⲙⲡⲙⲛⲧⲥⲛⲟⲟⲩⲥ ⲙⲡⲣⲟⲫⲏⲧⲏⲥ ϯⲟⲩⲱ ⲉⲃⲟⲗ ϩⲙⲡⲉⲩⲙⲁ ⲁϥⲡⲁⲣⲁⲕⲁⲗⲉⲓ ⲇⲉ ⲛⲓⲁⲕⲱⲃ ⲁⲩⲱ ⲁϥⲥⲟⲧⲟⲩ ϩⲛⲟⲩⲡⲓⲥⲧⲓⲥ ⲛϩⲉⲗⲡⲓⲥ
11 ⲉⲛⲛⲁϫⲉⲥⲧⲍⲟⲣⲟⲃⲁⲃⲉⲗ ⲛⲁϣ ⲛϩⲉ ⲁⲩⲱ ⲛⲧⲟϥ ⲉϥⲟ ⲛⲧϩⲉ ⲛⲟⲩⲥⲫⲣⲁⲅⲓⲥ ϩⲛⲟⲩϭⲓϫ ⲛⲟⲩⲛⲁⲙ
12 ⲁⲩⲱ ⲓⲏⲥⲟⲩⲥ ⲡϣⲏⲣⲉ ⲛⲓⲱⲥⲉⲇⲉⲕ ⲛⲁⲓ ⲛⲧⲁⲩⲕⲉⲧⲡⲏⲓ ϩⲛⲛⲉⲩϩⲟⲟⲩ ⲁⲩⲱ ⲁⲩϫⲓⲥⲉ ⲙⲡⲗⲁⲟⲥ ⲉⲧⲟⲩⲁⲁⲃ ⲙⲡϫⲟⲉⲓⲥ ⲉⲧⲥⲃⲧⲱⲧ ⲉⲩⲉⲟⲟⲩ ⲛϣⲁⲉⲛⲉϩ
13 ⲁⲩⲱ ⲉⲧⲓ ⲉⲧⲛϯ ⲉⲙⲁⲧⲉ ⲙⲡⲉϥⲣⲡⲙⲉⲉⲩⲉ ⲙⲡⲉⲛⲧⲁϥⲧⲟⲩⲛⲉⲥⲛⲉⲛⲥⲟⲃⲧ ⲛⲧⲁⲩϩⲉ ⲁⲩⲱ ⲁϥⲧⲁϩⲟ ⲉⲣⲁⲧⲟⲩ ⲛⲙⲡⲩⲗⲏ ⲙⲛⲙⲙⲟⲭⲗⲟⲥ ⲁⲩⲱ ⲉⲁϥⲧⲟⲩⲛⲉⲥⲛⲉⲛⲏⲓ
14 ⲙⲡⲟⲩⲥⲛⲧⲗⲁⲁⲩ ϩⲓϫⲙⲡⲕⲁϩ ⲛⲧϩⲉ ⲛⲉⲛⲱⲭ ⲕⲁⲓ ⲅⲁⲣ ⲛⲧⲟϥ ⲁⲩⲁⲛⲁⲗⲁⲙⲃⲁⲛⲉ ⲙⲙⲟϥ ϩⲓϫⲙⲡⲕⲁϩ
15 ⲙⲡⲟⲩϫⲡⲉⲣⲱⲙⲉ ⲉϥⲉⲓⲛⲉ ⲛⲓⲱⲥⲏⲫ ⲛⲛⲟϭ ⲉⲛⲉϥⲥⲛⲏⲩ ⲛⲧⲁϫⲣⲟ ⲙⲡⲗⲁⲟⲥ ⲁⲩⲱ ⲁⲩϭⲙⲡϣⲓⲛⲉ ⲛⲛⲉϥⲕⲉⲉⲥ
16 ⲥⲏⲙ ⲙⲛⲥⲏⲑ ⲁⲩϫⲓⲉⲟⲟⲩ ϩⲛⲛⲣⲱⲙⲉ ⲁⲩⲱ ⲁⲇⲁⲙ ⲉϩⲟⲩⲉⲣⲱⲙⲉ ⲛⲓⲙ ϩⲙⲡⲥⲱⲛⲧ
Sirach 48 · Sirach 50 · Greek (Septuagint / SBLGNT) · Aramaic (Peshitta) · Latin (Vulgate)