Sirach 51 — Coptic (Sahidic)

1 ϯⲛⲁⲟⲩⲱⲛϩ ⲛⲁⲕ ⲉⲃⲟⲗ ⲡϫⲟⲉⲓⲥ ⲡⲁⲣⲣⲟ ϯⲛⲁⲥⲙⲟⲩ ⲉⲣⲟⲕ ⲡⲛⲟⲩⲧⲉ ⲡⲁⲥⲱⲧⲏⲣ ϯⲛⲁⲟⲩⲱⲛϩ ⲉⲃⲟⲗ ⲙⲡⲉⲕⲣⲁⲛ

2 ϫⲉⲁⲕϣⲱⲡⲉ ⲛⲁⲓ ⲛⲃⲟⲏⲑⲟⲥ ⲁⲩⲱ ⲛⲥⲕⲉⲡⲁⲥⲧⲏⲥ ⲁⲩⲱ ⲁⲕⲥⲱⲧⲉ ⲙⲡⲁⲥⲱⲙⲁ ⲉⲃⲟⲗ ϩⲙⲡⲧⲁⲕⲟ ⲁⲩⲱ ⲉⲩϭⲟⲣϭⲥ ⲛⲇⲓⲁⲃⲟⲗⲏ ⲛⲗⲁⲥ ⲙⲛⲛⲉⲥⲡⲟⲧⲟⲩ ⲛⲛⲉⲧⲣϩⲱⲃ ⲉⲡϭⲟⲗ ⲁⲩⲱ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲁϩⲉ ⲟⲩⲃⲏⲓ

3 ⲁⲩⲱ ⲁⲕⲥⲟⲧ ⲕⲁⲧⲁⲡⲁϣⲁⲓ ⲙⲡⲉⲕⲛⲁ ⲙⲛⲡⲉⲕⲣⲁⲛ ⲁⲕⲛⲁϩⲙⲉⲧ ⲉⲣⲱϥ ⲙⲡⲉⲧⲥⲃⲧⲱⲧ ⲉⲩⲟⲙⲧ ⲉⲃⲟⲗ ⲛⲛϭⲓϫ ⲛⲛⲉⲧϣⲓⲛⲉ ⲛⲥⲁⲧⲁⲯⲩⲭⲏ ⲉⲃⲟⲗ ϩⲙⲡⲙⲏⲏϣⲉ ⲛⲑⲗⲓⲯⲓⲥ ⲛⲧⲁⲩⲧⲁϩⲟⲓ

4 ⲁⲩⲱ ⲉⲡϭⲱⲛⲧ ⲛⲟⲩϣⲁϩ ⲙⲡⲁⲕⲱⲧⲉ ⲉⲙⲡⲟⲩⲣⲟⲕϩⲧ ⲉⲃⲟⲗ ϩⲛⲧⲙⲏⲧⲉ ⲛⲟⲩⲕⲱϩⲧ

5 ⲁⲩⲱ ⲉⲡϣⲓⲕ ⲛϩⲏⲧϥ ⲛⲁⲙⲛⲧⲉ ⲉⲩⲗⲁⲥ ⲛⲁⲕⲁⲑⲁⲣⲧⲟⲥ ⲙⲛⲟⲩϣⲁϫⲉ ⲛϭⲟⲗ

6 ⲁⲩⲱ ⲉⲩϩⲓⲗⲁ ⲛⲗⲁⲥ ⲛϫⲓⲛϭⲟⲛⲥ ⲛⲟⲩⲣⲣⲟ ⲁⲧⲁⲯⲩⲭⲏ ϩⲱⲛ ⲉϩⲟⲩⲛ ϣⲁⲡⲙⲟⲩ ⲁⲩⲱ ⲛⲉⲣⲉⲡⲁⲱⲛϩ ϩⲏⲛ ⲉϩⲟⲩⲛ ⲁⲙⲛⲧⲉ ⲙⲡⲉⲥⲏⲧ

7 ⲁⲩⲁⲙⲁϩⲧⲉ ⲙⲙⲟⲓ ⲛⲥⲁⲥⲁ ⲛⲓⲙ ⲁⲩⲱ ⲛⲉⲙⲛⲡⲉⲧⲃⲟⲏⲑⲉⲓ ⲉⲣⲟⲓ ⲉⲉⲓϭⲱϣⲧ ⲉⲧⲣⲉⲟⲩⲣⲱⲙⲉ ϣⲟⲡⲧ ⲉⲣⲟϥ ⲁⲩⲱ ⲙⲡⲓϭⲛⲧϥ

8 ⲁⲓⲣⲡⲙⲉⲉⲩⲉ ⲙⲡⲉⲕⲣⲁⲛ ⲡϫⲟⲉⲓⲥ ⲁⲩⲱ ⲡⲉⲕϩⲱⲃ ϫⲓⲛⲉⲛⲉϩ ϫⲉⲁⲕⲛⲟⲩϩⲙ ⲛⲛⲉⲧϩⲩⲡⲟⲙⲓⲛⲉ ⲉⲣⲟⲕ ⲁⲩⲱ ϣⲁⲕⲧⲟⲩϫⲟⲟⲩ ⲛϭⲓϫ ⲛⲛϫⲁϫⲉ

9 ⲁϥϫⲓⲥⲉ ⲛⲧⲁⲙⲛⲧϩⲙϩⲁⲗ ⲉⲃⲟⲗ ϩⲙⲡⲕⲁϩ ⲁⲩⲱ ⲁⲓⲥⲟⲡⲥ ⲉⲛⲁϩⲙⲉⲧ ⲉⲡⲙⲟⲩ

10 ⲁⲓⲉⲡⲓⲕⲁⲗⲉⲓ ⲙⲡϫⲟⲉⲓⲥ ⲡⲉⲓⲱⲧ ⲙⲡⲁϫⲟⲉⲓⲥ ⲉⲧⲙⲕⲁⲁⲧ ϩⲛⲛⲉϩⲟⲟⲩ ⲛⲧⲉⲑⲗⲓⲯⲓⲥ ϩⲛⲟⲩⲟⲩⲟⲉⲓϣ ⲛϫⲁⲥⲓϩⲏⲧ ⲉⲙⲛⲃⲟⲏⲑⲓⲁ

11 ϯⲛⲁⲥⲙⲟⲩ ⲉⲡⲉⲕⲣⲁⲛ ⲛⲟⲩⲟⲉⲓϣ ⲛⲓⲙ ⲁⲩⲱ ϯⲛⲁⲥⲙⲟⲩ ⲉⲣⲟⲕ ϩⲛⲟⲩⲟⲩⲱⲛϩ ⲉⲃⲟⲗ ϫⲉⲁⲕⲥⲱⲧⲙ ⲉⲡⲁⲥⲟⲡⲥ

12 ⲁⲕⲧⲟⲩϫⲟⲉⲓ ⲅⲁⲣ ⲉⲃⲟⲗ ϩⲙⲡⲧⲁⲕⲟ ⲁⲩⲱ ⲁⲕⲛⲁϩⲙⲉⲧ ⲉⲩⲟⲩⲟⲉⲓϣ ⲙⲡⲟⲛⲏⲣⲟⲛ ⲉⲧⲃⲉⲡⲁⲓ ϯⲛⲁⲟⲩⲱⲛϩ ⲛⲁⲕ ⲉⲃⲟⲗ ⲧⲁⲥⲙⲟⲩ ⲉⲣⲟⲕ ⲁⲩⲱ ⲧⲁⲥⲙⲟⲩ ⲉⲡⲉⲕⲣⲁⲛ ⲡϫⲟⲉⲓⲥ

13 ⲉⲧⲓ ⲉⲓⲟ ⲛⲕⲟⲩⲓ ⲉⲙⲡⲁⲧϯⲕⲱⲧⲉ ⲁⲓϣⲓⲛⲉ ⲛⲥⲁⲧⲥⲟⲫⲓⲁ ϩⲁⲧϩⲏ ⲙⲡⲁϣⲗⲏⲗ

14 ⲁⲩⲱ ⲁⲓⲧⲱⲃϩ ϩⲁⲧⲁⲓ ⲙⲡⲉⲙⲧⲟ ⲉⲃⲟⲗ ⲙⲡⲉⲣⲡⲉ ⲁⲩⲱ ϯⲛⲁϣⲓⲛⲉ ⲛⲥⲱⲥ ϣⲁⲧϩⲁⲏ

15 ⲁⲉⲓϯⲟⲩⲱ ⲛⲧϩⲉ ⲛⲟⲩⲗⲟⲟⲗⲉ ⲉⲁϥⲡⲱϩ ⲁⲡⲁϩⲏⲧ ⲉⲩⲫⲣⲁⲛⲉ ⲛϩⲏⲧⲥ ⲁⲧⲁⲟⲩⲉⲣⲏⲧⲉ ⲁϩⲉⲣⲁⲧⲥ ϩⲙⲡⲥⲟⲟⲩⲧⲛ ⲛⲉⲓϭⲱⲣϭ ⲛⲥⲱⲥ ϫⲓⲛⲧⲁⲙⲛⲧⲕⲟⲩⲓ

16 ⲁⲓⲣⲓⲕⲉ ⲙⲡⲁⲙⲁⲁϫⲉ ⲛⲟⲩϣⲏⲙ ⲁⲓϫⲓⲧⲥ ⲁⲓϩⲉ ⲛⲁⲓ ⲉⲩⲛⲟϭ ⲛⲥⲃⲱ ⲉⲧⲃⲏⲧⲥ

17 ⲁⲟⲩϫⲓⲥⲉ ϣⲱⲡⲉ ⲛⲁⲓ ⲛϩⲏⲧⲥ ϯⲛⲁϯⲉⲟⲟⲩ ⲙⲡⲉⲧϯ ⲛⲁⲓ ⲛⲧⲥⲟⲫⲓⲁ

18 ⲁⲓⲙⲉⲉⲩⲉ ⲅⲁⲣ ⲉⲁⲁⲥ ⲁⲓⲕⲱϩ ⲉⲡⲁⲅⲁⲑⲟⲛ ⲁⲩⲱ ⲛϯⲛⲁϫⲓϣⲓⲡⲉ ⲁⲛ

19 ⲁⲧⲁⲯⲩⲭⲏ ⲙⲓϣⲉ ϩⲣⲁⲓ ⲛϩⲏⲧⲥ ⲁⲩⲱ ⲁⲓϩⲉⲧϩⲱⲧⲥ ϩⲛⲟⲩϩⲕⲟ ⲁⲓⲡⲣϣⲛⲁϭⲓϫ ⲉϩⲣⲁⲓ ⲉⲧⲡⲉ ⲁⲩⲱ ⲁⲓⲣϩⲏⲃⲉ ⲛⲛⲁⲙⲛⲧⲁⲧⲥⲟⲟⲩⲛ ⲛϩⲏⲧⲥ

20 ⲁⲓⲥⲟⲟⲩⲧⲛ ⲛⲧⲁⲯⲩⲭⲏ ⲉⲣⲟⲥ ⲁⲩⲱ ⲁⲓϩⲉ ⲉⲣⲟⲥ ϩⲛⲟⲩⲧⲃⲃⲟ ⲁⲓϫⲡⲟ ⲛⲁⲓ ⲛⲟⲩϩⲏⲧ ⲛⲙⲙⲁⲩ ϫⲓⲛⲛϣⲟⲣⲡ ⲉⲧⲃⲉⲡⲁⲓ ⲛϥⲛⲁⲕⲁⲁⲧ ⲛⲥⲱϥ ⲁⲛ

21 ⲁⲩⲱ ⲁⲡⲁϩⲏⲧ ϣⲧⲟⲣⲧⲣ ⲉⲉⲓϣⲓⲛⲉ ⲛⲥⲱⲥ ⲉⲧⲃⲉⲡⲁⲓ ⲁⲓⲕⲱ ⲛⲁⲓ ⲛⲟⲩⲕⲧⲏⲙⲁ ⲉⲛⲁⲛⲟⲩϥ

22 ⲁⲡϫⲟⲉⲓⲥ ϯ ⲛⲁⲓ ⲛⲟⲩⲗⲁⲥ ⲛⲃⲉⲕⲉ ϯⲛⲁⲥⲙⲟⲩ ⲉⲣⲟϥ ⲛϩⲏⲧϥ

23 ⲁⲙⲏⲉⲓⲧⲛ ϣⲁⲣⲟⲓ ⲛⲁⲧⲥⲃⲱ ⲧⲁⲣⲉⲧⲛⲟⲩⲱϩ ϩⲛⲡⲏⲓ ⲛⲧⲉⲥⲃⲱ

24 ⲉⲧⲃⲉⲟⲩ ⲧⲉⲧⲛϣⲁⲁⲧ ⲉⲧⲉⲧⲛⲛⲁϣⲁϫⲉ ϩⲛⲛⲁⲓ ⲡⲉ ⲁⲩⲱ ⲛⲉⲧⲛⲯⲩⲭⲏ ⲟⲃⲉ ⲉⲙⲁⲧⲉ

25 ⲁⲓⲟⲩⲱⲛ ⲛⲣⲱⲓ ⲁⲓϣⲁϫⲉ ϣⲱⲡ ⲛⲏⲧⲛ ⲛϫⲓⲛϫⲏ

26 ⲕⲁⲡⲉⲧⲛⲙⲁⲕϩ ⲉϩⲟⲩⲛ ϩⲁⲡⲁⲛⲁϩⲃϥ ⲁⲩⲱ ⲙⲁⲣⲉⲧⲉⲧⲛⲯⲩⲭⲏ ϫⲓⲧⲉⲥⲃⲱ ⲥϩⲏⲛ ⲅⲁⲣ ⲉϩⲟⲩⲛ ⲉⲣⲟⲥ

27 ⲁⲛⲁⲩ ϩⲛⲛⲉⲧⲛⲃⲁⲗ ϫⲉⲛⲧⲁⲓϣⲡϩⲓⲥⲉ ⲛⲟⲩⲕⲟⲩⲓ ⲁⲩⲱ ⲁⲓϩⲉ ⲛⲁⲓ ⲉⲩⲛⲟϭ ⲛⲙⲧⲟⲛ

28 ϫⲓ ⲛⲏⲧⲛ ⲛⲧⲉⲥⲃⲱ ϩⲛⲟⲩⲛⲟϭ ⲛⲏⲡⲉ ⲛϩⲟⲙⲛⲧ ⲁⲩⲱ ⲧⲉⲧⲛⲛⲁϫⲡⲉⲟⲩⲛⲟϭ ⲛⲟⲩⲟⲉⲓϣ ⲛϩⲏⲧⲥ

29 ⲉⲣⲉⲧⲉⲧⲛⲯⲩⲭⲏ ⲉⲩⲫⲣⲁⲛⲉ ϩⲙⲡⲉϥⲛⲁ ⲁⲩⲱ ⲛⲛⲉⲧⲛϫⲓϣⲓⲡⲉ ϩⲙⲡⲉϥⲥⲙⲟⲩ

30 ⲁⲣⲓϩⲱⲃ ⲉⲡⲉⲧⲛϩⲱⲃ ϩⲁⲧϩⲏ ⲙⲡⲉⲟⲩⲟⲉⲓϣ ⲁⲩⲱ ϥⲛⲁϯ ⲛⲏⲧⲛ ⲙⲡⲃⲉⲕⲉ ⲙⲡⲉⲟⲩⲟⲉⲓϣ ⲧⲥⲟⲫⲓⲁ ⲛⲓⲏⲥⲟⲩⲥ ⲡϣⲏⲣⲉ ⲛⲥⲉⲓⲣⲁⲭ