Sirach 49 — Aramaic (Peshitta)

1 ܫܡܗ ܕܝܘܫܝܐ ܐܝܟ ܦܝܪܡܐ ܕܒܣ̈ܡܐ ܕܚܠܝܛ ܒܣܓܝܐܘܬܐ ܕܒܣܡ̈ܢܐ ܐܝܟ ܕܒܫܐ ܠܚܟܐ ܚ̣ܠܐ ܕܘܟܪܢܗ ܘܐܝܟ ܬܫܒܘܚܬܐ ܥܠ ܡܫܬܝܐ ܕܚܡܪܐ

2 ܡܛܠ ܕܐܬܛܫܝ ܡܢ ܢܣܝܘ̈ܢܐ ܘܒ̇ܛܠ ܥܒ̈ܕܐ ܕܛܠܝܘܬܐ

3 ܘܐܫܠܡ ܠܐܠܗܐ ܠܒܗ ܘܒܝܘܡ̈ܝ ܚܛܗ̈ܐ ܥ̣ܒܕ ܩܘܫܬܐ

4 ܒܠܚܘܕ ܠܒܪ ܡܢ ܕܘܝܕ ܘܚܙܩܝܐ ܘܝܘܫܝܐ ܟܠܗܘܢ ܚ̇ܒܠܘ ܘܫܒܩܘ ܢܡܘܣܐ ܡ̈ܠܟܐ ܕܒܝܬ ܝܗܘܕܐ ܥܕܡܐ ܠܐܚܪܝܬܐ

5 ܘܝܗܒܘ ܥܘܫܢܗܘܢ ܠܐܚܪ̈ܢܐ ܘܐܝܩܪܗܘܢ ܠܥܡܐ ܢܘܟܪܝܐ

6 ܘܥܩܪܘ ܩܘܪܝܬ ܩܘܕܫܐ ܘܐܨܕܝܘ ܟܠܗܝܢ ܚܪ̈ܒܬܗ ܒܝ̈ܘܡܝ ܐܪܡܝܐ

7 ܕܗܘܐ ܡܢ ܟܪܣܐ ܕܐܡܗ ܢܒܝܐ

8 ܘܚܙܩܝܐܝܠ ܚܘܝ ܓܢܣܐ ܕܡܪܟܒܬܐ ܘܚܙܐ ܚܙܘܐ

9 ܘܐܦ ܥܠ ܐܝܘܒ ܐܡܪ ܕܟܠܗܝܢ ܐܘܪ̈ܚܬܗ ܙܕܝܩܘܬܐ ܗ̈ܘܝ

10 ܘܐܦ ܬܪ̈ܥܣܪ ܢܒ̈ܝܝܢ ܢܗܘܘܢ ܓܪ̈ܡܝܗܘܢ ܡܙܗܪܝܢ ܬܚܘܬܝܗܘܢ ܕܐܣܝܘ ܠܐܝܣܪܝܠ ܘܐܬܟܠܘ ܐܢܘܢ ܕܡܬܦܪܩܝܢ

11 ܡܢܐ ܢܫܒܚ ܠܙܘܪܒܒܠ ܕܗ̣ܘܐ ܐܝܟ ܚܬܡܐ ܥܠ ܐܝܕܐ ܕܝܡܝܢܐ

12 ܘܐܦ ܝܫܘܥ ܒܪ ܝܘܙܕܩ ܕܒܡܣܟܢܘܬܗܘܢ ܐܩܝܡܘ ܡܕܒܚܐ ܘܒܢܘ ܗܝܟܠܐ ܩܕܝܫܐ ܕܥܬܝܕ ܠܐܝܩܪܐ ܕܠܥܠܡ

13 ܢܚܡܝܐ ܢܣܓܐ ܕܘܟܪܢܗ ܕܐܩܝܡ ܚܪ̈ܒܬܢ ܘܒ̇ܢܝ ܡܣ̈ܚܦܬܢ ܘܥܒܕ ܬܪ̈ܥܝܢ ܘܣܘܟܪ̈ܝܢ

14 ܙܥܘܪܝܢ ܐܬܒܪܝܘ ܥܠ ܐܪܥܐ ܐܝܟ ܚܢܘܟ

15 ܘܐܡܐ ܐܝܟ ܝܘܣܦ ܠܐ ܝܠܕܬ ܘܐܦ ܦܓܪܗ ܐܬܟܢܫ ܒܫܠܡܐ

16 ܫܝܬ ܘܫܝܡ ܘܐܢܘܫ ܒܐܢܫܐ ܐܬܒܪܝܘ ܘܥܠ ܟܘܠܗܝܢ ܗܠܝܢ ܬܫܒܘܚܬܗ ܕܐܕܡ