Read Sirach 43 side by side with translations · The Final Bible
1 ⲡϣⲟⲩϣⲟⲩ ⲙⲡϫⲓⲥⲉ ⲙⲡⲧⲃⲃⲟ ⲙⲡⲉⲥⲧⲉⲣⲉⲱⲙⲁ ......ⲟⲩϩⲟⲣⲟⲙⲁ ⲛⲉⲟⲟⲩ
2 ⲡⲣⲏ ⲉϥϣⲁⲛϣⲁ ⲉϥⲟⲩⲱⲛϩ ⲉⲃⲟⲗ ϩⲙⲡⲉϥⲓ ⲉⲃⲟⲗ ⲟⲩⲥⲕⲉⲩⲟⲥ ⲛϣⲡⲏⲣⲉ ⲡⲉ ⲟⲩϩⲱⲃ ⲛⲧⲉⲡⲉⲧϫⲟⲥⲉ ⲡⲉ
3 ϩⲙⲡⲛⲁⲩ ⲙⲙⲉⲉⲣⲉ ϣⲁϥϣⲉϩⲃⲛⲉⲭⲱⲣⲁ ⲁⲩⲱ ⲛⲓⲙ ⲡⲉⲧⲛⲁϣⲱϩ ⲉⲣⲁⲧϥ ⲙⲡⲉⲙⲧⲟ ⲉⲃⲟⲗ ⲙⲡⲉϥⲕⲁⲩⲙⲁ
4 ⲟⲩϩⲣⲱ ⲉⲩⲛⲓϥⲉ ⲉⲣⲟⲥ ⲉϫⲉⲣⲉϩⲛϩⲃⲏⲩⲉ ⲡⲣⲏ ⲣⲱⲕϩ ⲛⲛⲧⲟⲟⲩ ⲛϣⲙⲧⲕⲱⲃ ⲉϩⲟⲩⲉⲣⲟⲥ ⲉϥⲛⲓϥⲉ ⲛϩⲛⲗϩⲱⲃ ⲛⲕⲱϩⲧ ⲁⲩⲱ ϣⲁϥϯϩⲗⲟⲥⲧⲛ ⲛⲛⲃⲁⲗ ⲉϥⲧⲁⲁⲧⲉ ⲛⲛⲉϥⲁⲕⲧⲓⲛ
5 ⲟⲩⲛⲟϭ ⲡⲉ ⲡϫⲟⲉⲓⲥ ⲉⲛⲧⲁϥⲧⲁⲙⲓⲟϥ ⲁⲩⲱ ϩⲣⲁⲓ ϩⲛⲛⲉϥϣⲁϫⲉ ⲁϥϭⲉⲡⲏ ϩⲛⲧⲉϥϩⲓⲏ
6 ⲁⲩⲱ ⲡⲟⲟϩ ⟨ϩⲛ⟩(?) ϩⲱⲃ ⲛⲓⲙ ⲙⲡⲉϥⲟⲩⲟⲉⲓϣ ⲡⲟⲩⲱⲛϩ ⲉⲃⲟⲗ ⲛⲛⲉϥⲟⲩⲟⲉⲓϣ ⲡⲉ ⲁⲩⲱ ⲡⲙⲁⲉⲓⲛ ⲛϣⲁⲉⲛⲉϩ ⲡⲉ
7 ⲉⲣⲉⲡⲙⲁⲉⲓⲛ ⲙⲡϣⲁ ⲉⲃⲟⲗ ϩⲙⲡⲟⲟϩ ⲡⲣⲉϥⲣⲟⲩⲟⲉⲓⲛ ⲉϥϭⲱϫⲃ ϩⲛⲧⲉϥϩⲁⲏ
8 ⲉⲩⲙⲟⲩⲧⲉ ⲉⲡⲉⲃⲟⲧ ⲕⲁⲧⲁⲡⲉϥⲣⲁⲛ ⲟⲩϣⲡⲏⲣⲉ ⲡⲉ ϩⲙⲡⲉϥⲙⲟⲩϩ ⲉϥϣⲓⲃⲉ ⲡⲉⲥⲕⲉⲩⲟⲥ ⲛⲙⲡⲁⲣⲁⲃⲟⲗⲏ ⲙⲡϫⲓⲥⲉ ⲉϥⲣⲟⲩⲟⲉⲓⲛ ϩⲙⲡⲉⲥⲧⲉⲣⲉⲱⲙⲁ ⲛⲧⲡⲉ
9 ⲡⲥⲁ ⲛⲧⲡⲉ ⲡⲉⲟⲟⲩ ⲛⲛⲥⲓⲟⲩ ⲡϫⲟⲉⲓⲥ ⲡⲉⲧⲧⲁⲙⲓⲟ ⲉⲧⲣⲟⲩⲟⲉⲓⲛ ϩⲛⲛⲉⲧϫⲟⲥⲉ
10 ϩⲣⲁⲓ ϩⲛⲛⲉϥϣⲁϫⲉ ⲥⲉⲛⲁ...... ⲁⲩⲱ ⲛⲉⲩⲃⲱⲗ ⲉⲃⲟⲗ ϩⲛⲛⲉⲩ......
11 ⲁⲛⲁⲩ ⲉⲧⲡⲓⲧⲉ ⲛⲅⲥⲙⲟⲩ ⲉⲡⲉⲛⲧⲁϥⲧⲁⲙⲓⲟⲥ ⲛⲉⲥⲱⲥ ⲉⲙⲁⲧⲉ ϩⲙⲡⲉⲥⲟⲩⲟⲉⲓⲛ
12 ⲁⲥⲕⲧⲉⲧⲡⲉ ⲙⲡⲕⲱⲧⲉ ⲙⲡⲉⲥⲉⲟⲟⲩ ⲛϭⲓϫ ⲙⲡϫⲟⲉⲓⲥ ⲛⲉⲛⲧⲁⲩϫⲱⲕⲥ ⲉⲃⲟⲗ
13 ϩⲣⲁⲓ ϩⲙⲡⲉϥⲟⲩⲉϩⲥⲁϩⲛⲉ ⲁϥϫⲉⲣⲉⲡⲉⲭⲓⲱⲛ ⲁⲩⲱ ϣⲁϥϫⲉⲣⲙⲛⲉⲃⲣⲏϭⲉ ϩⲙⲡⲉϥⲧⲱϣ
14 ⲁⲩⲱ ⲁⲛⲉⲕⲗⲟⲟⲗⲉ ⲉⲓ ⲉϩⲣⲁⲓ ⲛⲧϩⲉ ⲛⲛⲉⲧϩⲏⲗ ⲁⲛⲁϩⲱⲣ ⲟⲩⲱⲛ ⲉⲧⲃⲉⲡⲁⲓ
15 ⲁϥϯϭⲟⲙ ⲛⲛⲉⲕⲗⲟⲟⲗⲉ ⲛⲧⲉϥⲙⲛⲧⲛⲟϭ ⲁⲩⲱ ⲁϥϫⲱⲱⲣⲉ ⲉⲃⲟⲗ ⲛⲛⲱⲛⲉ ⲛⲧⲉⲭⲁⲗⲁⲍⲁ
16 ⲁⲩⲱ ⲛⲧⲟⲟⲩ ⲛⲁⲕⲓⲙ ϩⲙⲡⲉϥⲟⲩⲱⲛϩ ⲉⲃⲟⲗ ⲉⲣⲉⲡⲧⲟⲩⲣⲏⲥ ⲛⲁⲥⲱⲕ ϩⲙⲡⲉϥⲟⲩⲱϣ
17 (b) ⲁⲩⲱ ⲧϩⲁⲧⲏⲩ ⲙⲡⲉⲙϩⲓⲧ ϩⲛⲟⲩⲕⲟⲧⲥ ⲛⲧⲏⲩ ϣⲁϥⲡⲏⲥⲥⲉ ⲙⲡⲉⲭⲓⲱⲛ ⲛⲧϩⲉ ⲛϩⲛϩⲁⲗⲏⲧ ⲉⲩϩⲏⲗ ⲁⲩⲱ ⲡⲉϥⲓ ⲉϩⲣⲁⲓ ⲛⲧϩⲉ ⲛϩⲛϣϫⲉ ⲉⲩⲟⲩⲱϩ
18 ϣⲁⲣⲉⲡⲃⲁⲗ ϣⲧⲟⲣⲧⲣ ϩⲙⲡⲟⲩⲃⲁϣ ⲙⲡⲉϥⲛⲁ ϣⲁⲣⲉⲫⲏⲧ ⲣϣⲡⲏⲣⲉ ϩⲛⲧⲉϥϭⲓⲛϩⲱⲟⲩ
19 ......ⲡϫⲁϥ ⲉϫⲛⲡⲕⲁϩ ⲛⲧϩⲉ ⲛⲟⲩϩⲙⲟⲩ ⲁⲩⲱ ⲉϥϣⲁⲛⲱϭⲣ ϣⲁϥⲣⲧϩⲉ ⲛϩⲧⲏⲩ ⲛⲛⲥⲟⲩⲣⲉ
20 ϣⲁⲣⲉⲡⲉⲙϩⲓⲧ ⲥⲱⲕ ⲛⲟⲩⲧⲏⲩ ⲉϥⲕⲏⲃ ϣⲁⲣⲉⲡⲉⲕⲣⲩⲥⲧⲁⲗⲗⲟⲥ ⲱϭⲣ ϩⲓϫⲛⲙⲙⲟⲟⲩ ⲁⲩⲱ ⲉϥⲛⲏⲩ ⲉϫⲛⲥⲟⲟⲩϩⲥ ⲛⲓⲙ ⲙⲙⲟⲟⲩ ⲁⲩⲱ ϣⲁϥϭⲗⲡⲙⲟⲟⲩ ⲛⲧϩⲉ ⲛⲟⲩϩⲱⲕ
21 ϥⲛⲁⲟⲩⲱⲙ ⲛⲛⲧⲟⲟⲩ ⲛϥⲣⲱⲕϩ ⲙⲡϫⲁⲓⲉ ⲛϥϩⲉϭⲙⲛⲟⲩⲟⲧⲟⲩⲉⲧ ⲛⲧϩⲉ ⲛⲟⲩⲕⲱϩⲧ
22 ⲡⲧⲁⲗϭⲟ ⲛⲛⲁⲓ ⲧⲏⲣⲟⲩ ϩⲛⲟⲩⲥⲡⲟⲩⲇⲏ ⲡⲉ ⲡⲛⲓϥ ϣⲁⲣⲉⲟⲩⲉⲓⲱⲧⲉ ϯⲟⲩⲣⲟⲧ ⲛⲁⲩ ⲙⲛⲛⲥⲁⲟⲩϩⲙⲟⲙ
23 ϩⲣⲁⲓ ϩⲙⲡⲉϥϣⲟϫⲛⲉ ⲁϥⲥⲙⲛⲡⲛⲟⲩⲛ ⲁⲩⲱ ⲁⲓⲏⲥⲟⲩⲥ ϫⲟⲟϥⲉϥ
24 ⲛⲉⲧⲡⲗⲉⲁ ϩⲛⲧϩⲁⲗⲁⲥⲥⲁ ⲛⲉⲧϫⲱ ⲙⲡⲉⲥϭⲓⲛⲇⲩⲛⲟⲥ ⲁⲩⲱ ⲧⲛⲣϣⲡⲏⲣⲉ ⲛⲛⲉⲧⲛⲥⲱⲧⲙ ⲉⲣⲟⲟⲩ
25 ⲉⲣⲉⲛⲉϣⲡⲏⲣⲉ ⲙⲙⲁⲩ ⲙⲛⲛⲉϩⲃⲏⲩⲉ ⲉⲧⲟ ⲛⲁⲩⲓ ⲛⲁⲩⲁⲛ ⲙⲛⲍⲱⲟⲛ ⲛⲓⲙ
26 ⲉⲣⲉⲡⲥⲟⲟⲩⲧⲛ ϣⲟⲟⲡ ⲉⲧⲃⲏⲧϥ ⲁⲩⲱ ⲡⲱϥ ⲡⲉ ⲡϫⲱⲕ ⲁⲩⲱ ⲉⲣⲉⲡⲧⲏⲣϥ ⲥⲙⲟⲛⲧ ϩⲙⲡⲉϥϣⲁϫⲉ
27 ⲧⲛⲛⲁⲩ ⲉϩⲁϩ ⲁⲩⲱ ⲧⲛⲛⲁϣⲡⲱϩ ⲉⲣⲟϥ ⲁⲛ ⲁⲩⲱ ⲡϫⲱⲕ ⲛⲛ.... ⲛⲧⲟϥ ⲡⲉ ⲡⲧⲏⲣϥ
28 ⲉⲛϯⲉⲟⲟⲩ ⲛⲁϥ ⲉⲛⲁϣⲡⲱϩ ⲉⲟⲩⲛⲧⲟϥ ⲅⲁⲣ ⲟⲩⲛⲟϭ ⲡⲉ ⲡⲁⲣⲁⲛⲉϥϩⲃⲏⲩⲉ ⲧⲏⲣⲟⲩ
29 ⲟⲩϩⲟⲧⲉ ⲡⲉ ⲡϫⲟⲉⲓⲥ ⲁⲩⲱ ⲟⲩⲛⲟϭ ⲉⲙⲁⲧⲉ ⲡⲉ ⲁⲩⲱ ⲟⲩϣⲡⲏⲣⲉ ⲧⲉ ⲧⲉϥϭⲟⲙ
30 ϫⲓⲥⲉ ⲙⲡϫⲟⲉⲓⲥ ⲉⲧⲉⲧⲛϯⲉⲟⲟⲩ ⲛⲁϥ ⲛⲧϩⲉ ⲉⲧⲉⲧⲛⲁϣⲁⲁⲥ ϥϫⲟⲥⲉ ⲅⲁⲣ ⲉϩⲟⲩⲟ ⲉⲣⲟⲥ ⲛϩⲟⲩⲟ ⲁⲩⲱ ⲙⲁⲧⲁϣⲟ ϩⲛⲟⲩϭⲟⲙ ⲉⲧⲉⲧⲛϫⲓⲥⲉ ⲙⲙⲟϥ ⲙⲡⲣϩⲓⲥⲉ ⲛⲛⲉⲧⲛⲉϣⲡⲱϩ ⲅⲁⲣ ⲉⲣⲟϥ
31 ⲛⲓⲙ ⲡⲉⲛⲧⲁϥⲛⲁⲩ ⲉⲣⲟϥ ⲧⲁⲣⲉϥϣⲁϫⲉ ⲉⲣⲟϥ ⲁⲩⲱ ⲛⲓⲙ ⲡⲉⲧⲛⲁϣϫⲁⲥⲧϥ ⲛⲧϩⲉ ⲉⲧϥⲟ ⲙⲙⲟⲥ
32 ϩⲉⲛⲕⲟⲩⲓ ⲅⲁⲣ ⲛⲉⲛⲧⲁⲛⲛⲁⲩ ⲉⲣⲟⲟⲩ ϩⲛⲛⲉϥϩⲃⲏⲩⲉ ⲉⲩⲛϩⲁϩ ⲉⲩϩⲏⲡ ⲉⲩⲟ ⲛⲛⲟϭ ⲉⲛⲁⲓ
33 ⲡϫⲟⲉⲓⲥ ⲛⲧⲟϥ ⲡⲉⲛⲧⲁϥⲧⲁⲙⲓⲉⲛⲕⲁ ⲛⲓⲙ ⲁⲩⲱ ⲁϥϯ ⲛⲧⲥⲟⲫⲓⲁ ⲛⲛⲣⲙⲛⲛⲟⲩⲧⲉ
Sirach 42 · Sirach 44 · Greek (Septuagint / SBLGNT) · Aramaic (Peshitta) · Latin (Vulgate)