Read Sirach 42 side by side with translations · The Final Bible
1 ⲁⲩⲱ ϩⲏⲧϥ ⲛⲟⲩϣⲁϫⲉ ⲉⲁⲕⲥⲟⲧⲙⲉϥ ⲁⲩⲱ ϩⲏⲧϥ ⲛϭⲗⲡϩⲛϣⲁϫⲉ ⲉⲃⲟⲗ ⲉⲩϩⲏⲡ ⲧⲁⲣⲉⲕϣⲱⲡⲉ ⲛⲁⲙⲉ ⲛϣⲡⲓⲏⲧ ⲁⲩⲱ ⲉⲕϭⲓⲛⲉ ⲛⲟⲩⲭⲁⲣⲓⲥ ⲙⲡⲉⲙⲧⲟ ⲉⲃⲟⲗ ⲛⲣⲱⲙⲉ ⲛⲓⲙ ⲙⲡⲣϣⲓⲡⲉ ⲛⲧⲟϥ ϩⲏⲧⲟⲩ ⲛⲛⲁⲓ ⲁⲩⲱ ⲙⲡⲣϫⲓϩⲟ ⲉⲧⲣⲉⲕⲣⲛⲟⲃⲉ
2 ⲉⲧⲃⲉⲡⲛⲟⲙⲟⲥ ⲙⲡⲉⲧϫⲟⲥⲉ ⲙⲛⲧⲇⲓⲁⲑⲏⲕⲏ ⲁⲩⲱ ϩⲛⲟⲩϩⲁⲡ ⲉⲧⲙⲁⲓⲉⲡⲁⲥⲉⲃⲏⲥ
3 ⲉⲧⲃⲉⲡϣⲁϫⲉ ⲛⲟⲩⲕⲟⲓⲛⲱⲛⲟⲥ ...ϣⲃⲏⲣ ⲉⲧⲃⲉⲡϯ ⲛⲧⲉⲕⲕⲗⲏⲣⲟⲛⲟⲙⲓⲁ ...
4 ⲉⲧⲃⲉⲟⲩⲁⲕⲣⲓⲃⲓⲁ ⲙⲙⲁϣⲉ ⲙⲛϩⲛϣⲓ ⲉⲧⲃⲉϫⲡⲉϩⲁϩ ϩⲓⲕⲟⲩⲓ
5 ⲉⲧⲃⲉⲟⲩⲙⲛⲧⲙⲁⲓϣⲓⲃⲉ ⲛϯⲉⲃⲟⲗ ϩⲓⲉϣⲱⲧ ⲉⲧⲃⲉϯⲟⲩⲥⲃⲱ ⲉⲛⲁϣⲱⲥ ⲛϩⲉⲛϣⲏⲣⲉ ⲉⲧⲃⲉⲧϩⲓⲉⲥⲛⲟϥ ⲛⲛⲥⲡⲓⲣⲟⲟⲩⲉ ⲛⲟⲩϩⲙϩⲁⲗ ⲉϥϩⲟⲟⲩ
6 ⲛⲁⲛⲟⲩⲟⲩⲥⲫⲣⲁⲅⲓⲥ ⲉϫⲛⲟⲩⲥϩⲓⲙⲉ ⲉⲥϩⲟⲟⲩ ⲁⲩⲱ ϣⲧⲙⲧⲟⲟⲧⲕ ϩⲙⲡⲙⲁ ⲛϩⲁϩ ⲛϭⲓϫ
7 ⲁⲩⲱ ⲛⲅϯⲡⲉⲧⲕⲛⲁⲧⲁⲁϥ ϩⲛⲟⲩⲏⲡⲉ ⲙⲛⲟⲩϣⲓ ⲁⲩⲱ ⲡϫⲓ ⲙⲛⲡϯ ϩⲛⲟⲩⲥϩⲁⲓ ⲧⲏⲣⲟⲩ
8 ⲉⲧⲃⲉϯⲥⲃⲱ ⲛⲟⲩⲁⲧϩⲏⲧ ⲙⲛⲟⲩⲥⲟϭ ⲁⲩⲱ ⲟⲩϩⲗⲗⲟ ⲉϥϫⲓϩⲁⲡ ⲉⲧⲃⲉⲟⲩⲡⲟⲣⲛⲉⲓⲁ ⲧⲁⲣⲉⲕϣⲱⲡⲉ ⲛⲁⲙⲉ ⲉⲕⲧⲥⲁⲃⲏⲩ ⲁⲩⲱ ⲉⲕⲥⲟⲧⲡ ⲙⲡⲉⲙⲧⲟ ⲉⲃⲟⲗ ⲛⲣⲱⲙⲉ ⲛⲓⲙ ⲉⲧⲟⲛϩ
9 ⲟⲩⲟⲩϣⲏ ⲛⲣⲟⲉⲓⲥ ⲉⲥϩⲏⲡ ⲛⲟⲩⲉⲓⲱⲧ ⲡⲉ ⲟⲩϣⲉⲉⲣⲉ ⲁⲩⲱ ϣⲁⲣⲉⲡⲉⲥⲣⲟⲟⲩϣ ⲥⲁϩⲉⲫⲓⲛⲏⲃ ⲉⲃⲟⲗ ⲙⲙⲟϥ ⲉⲥϩⲛⲧⲉⲥⲙⲛⲧⲕⲟⲩⲓ ϫⲉⲙⲏⲡⲟⲧⲉ ⲛⲥⲣⲛⲟϭ ⲁⲩⲱ ⲉⲁⲥϫⲓϩⲁⲓ ⲙⲏⲡⲟⲧⲉ ⲛϥⲙⲉⲥⲧⲱⲥ
10 ⲙⲏⲡⲟⲧⲉ ⲛⲥϫⲱϩⲙ ⲛⲧⲉⲥⲙⲛⲧⲣⲟⲟⲩⲛⲉ ... ... ϩⲙⲡⲏⲓ ⲛⲛⲉⲥⲉⲓⲟⲧⲉ ⲁⲩⲱ ⲉⲁⲥϫⲓϩⲁⲓ ⲙⲏⲡⲟⲧⲉ ⲛⲥⲡⲁⲣⲁⲃⲁ ⲁⲩⲱ ⲉⲥϩⲙⲟⲟⲥ ⲛⲙⲙⲁϥ ⲙⲏⲡⲟⲧⲉ ⲛⲥⲣⲁϭⲣⲏⲛ
11 ⲁⲣⲉϩ ⲉⲙⲁⲧⲉ ⲉⲩϣⲉⲉⲣⲉ ⲛⲛⲁϣⲧⲙⲙⲉ ⲙⲏⲡⲟⲧⲉ ⲛⲥⲧⲣⲉⲛⲉⲕϫⲁϫⲉ ⲣⲁϣⲉ ⲙⲙⲟⲕ ⲁⲩⲱ ⲛⲥϯϣⲓⲡⲉ ⲛⲁⲕ ϩⲛⲟⲩⲙⲏⲏϣⲉ ⲉⲛⲁϣⲱϥ
12 ⲙⲡⲣⲉⲓⲱⲣⲙ ⲛⲥⲁⲣⲱⲙⲉ ⲛⲓⲙ ⲉⲛⲉⲥⲱϥ ⲁⲩⲱ ⲙⲡⲣⲥⲱⲟⲩϩ ⲉϩⲟⲩⲛ ϩⲛⲧⲙⲏⲧⲉ ⲛϩⲛⲥϩⲓⲙⲉ
13 ⲉϣⲁⲣⲉⲑⲟⲟⲗⲉ ⲅⲁⲣ ⲉⲓ ⲉⲃⲟⲗ ϩⲛⲛϩⲟⲓⲧⲉ ⲁⲩⲱ ⲧⲡⲟⲛⲏⲣⲓⲁ ⲛⲟⲩⲥϩⲓⲙⲉ ⲟⲩⲉⲃⲟⲗ ϩⲛⲟⲩⲥϩⲓⲙⲉ ⲧⲉ
14 ⲛⲁⲛⲟⲩⲧⲡⲟⲛⲏⲣⲓⲁ ⲛⲟⲩϩⲟⲟⲩⲧ ⲉϩⲟⲩⲉⲟⲩⲥϩⲓⲙⲉ ⲛⲣⲉϥⲣⲡⲉⲧⲛⲁⲛⲟⲩϥ ⲁⲩⲱ ⲥⲛⲁϣⲱⲡⲉ ⲉⲩⲛⲟϭⲛⲉϭ ⲛϭⲓⲟⲩⲥϩⲓⲙⲉ ⲉⲥϯϣⲓⲡⲉ
15 ϯⲛⲁⲣⲡⲙⲉⲉⲩⲉ ⲛⲛⲉϩⲃⲏⲩⲉ ⲙⲡϫⲟⲉⲓⲥ ⲁⲩⲱ ϯⲛⲁϫⲱ ⲛⲛⲉⲛⲧⲁⲓⲛⲁⲩ ⲉⲣⲟⲟⲩ ⲉⲣⲉⲛⲉϩⲃⲏⲩⲉ ⲙⲡϫⲟⲉⲓⲥ ϩⲛⲛⲉϥϣⲁϫⲉ ⲁⲩⲱ ⲁϥϣⲱⲡⲉ ⲛϭⲓⲡⲉⲥⲙⲟⲩ ⲛⲛⲉϥϩⲁⲡ
16 ⲡⲣⲏ ⲉⲧⲣⲟⲩⲟⲉⲓⲛ ⲉⲧϭⲱϣⲧ ⲉϫⲱⲟⲩ ⲧⲏⲣⲟⲩ ⲁⲩⲱ ⲡϩⲱⲃ ⲙⲡϫⲟⲉⲓⲥ ⲙⲉϩ ϩⲛⲡⲉϥⲉⲟⲟⲩ
17 ⲙⲡⲉⲡϫⲟⲉⲓⲥ ϯⲧϩⲉ ⲛⲛⲉ......... ⲛⲉϥϣⲡⲏⲣⲉ ⲛⲉⲛⲧⲁⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ... ] ⲉⲧⲁϫⲣⲉⲡⲧⲏⲣϥ ϩⲛⲡⲉϥⲉⲟⲟⲩ
18 ⲁϥϩⲉⲧϩⲧⲡⲛⲟⲩⲛ ⲙⲛⲡϩⲏⲧ ⲁⲩⲱ ⲁϥⲙⲉⲕⲙⲟⲩⲕϥ ϩⲛⲛⲉϥⲥⲃⲟⲟⲩⲉ ⲁⲡϫⲟⲉⲓⲥ ⲅⲁⲣ ⲉⲓⲙⲉ ⲉⲥⲩⲛⲉⲓⲇⲏⲥⲓⲥ ⲛⲓⲙ ⲁⲩⲱ ⲁϥϭⲱϣⲧ ⲉⲩⲙⲁⲉⲓⲛ ϣⲁⲉⲛⲉϩ
19 ⲉϥϫⲱ ⲛⲛⲉⲛⲧⲁⲩⲟⲩⲉⲓⲛⲉ ⲙⲛⲛⲉⲧⲛⲁϣⲱⲡⲉ ⲁⲩⲱ ⲉϥϭⲱⲗⲡ ⲉⲃⲟⲗ ⲛⲙⲙⲁⲉⲓⲛ {ⲙ}ⲛⲛⲉⲧϩⲏⲡ
20 ⲙⲡⲉⲗⲁⲁⲩ ⲅⲁⲣ ⲙⲙⲉⲉⲩⲉ ⲥⲁⲁⲧϥ ⲁⲩⲱ ⲙⲡⲉⲟⲩϣⲁϫⲉ ⲛⲟⲩⲱⲧ ϩⲱⲡ ⲉⲣⲟϥ
21 ⲁϥⲧⲁⲙⲓⲟ ⲛ{ϩⲛ}ⲧⲙⲛⲧⲛⲟϭ ⲛⲧⲉϥⲥⲟⲫⲓⲁ ⲛⲧⲟϥ ϥϣⲟⲟⲡ ϩⲁⲧϩⲏ ⲛⲉⲛⲉϩ ⲁⲩⲱ ϣⲁⲉⲛⲉϩ ⲙⲡϥⲙⲟⲩϩ ⲟⲩⲇⲉ ⲙⲁϥϭⲱϫⲃ ⲁⲩⲱ ⲙⲡϥⲁϩⲉ ⲛⲗⲁⲁⲩ ⲛⲣⲉϥϫⲓϣⲟϫⲛⲉ
22 ⲛⲧϩⲉ ⲉⲧⲉⲣⲉⲛⲉϥϩⲃⲏⲩⲉ ⲧⲏⲣⲟⲩ ⲥⲟⲧⲡ ⲁⲩⲱ ϩⲁⲡⲧⲣⲉⲛⲛⲁⲩ ⲡⲉ ⲉⲁ(?)ⲩϯⲕ
23 ⲛⲁⲓ ⲧⲏⲣⲟⲩ ⲟⲛϩ ⲁⲩⲱ ⲥⲉϣⲟⲟⲡ ⲛϣⲁ ⲛⲓⲉⲛⲉϩ ⲁⲩⲱ ϩⲛⲭⲣⲉⲓⲁ ⲛⲓⲙ ⲥⲉⲛⲁⲥⲱⲧⲙ ⲧⲏⲣⲟⲩ
24 ⲥⲉⲟ ⲛⲥⲛⲁⲩ ⲥⲛⲁⲩ ⲧⲏⲣⲟⲩ ⲟⲩⲁ ⲙⲡⲉⲙⲧⲟ ⲉⲃⲟⲗ ⲛⲟⲩⲁ ⲁⲩⲱ ⲙⲡϥⲕⲁⲗⲁⲁⲩ ⲉϥϣⲁⲁⲧ
25 ⲁϥⲧⲁϫⲣⲉⲟⲩⲁ ⲛⲛⲉϥⲁⲅⲁⲑⲟⲛ ⲉⲟⲩⲁ ⲁⲩⲱ ⲛⲓⲙ ⲡⲉⲧⲛⲁⲥⲉⲓ ⲉϥⲛⲁⲩ ⲉⲡⲉϥⲉⲟⲟⲩ
Sirach 41 · Sirach 43 · Greek (Septuagint / SBLGNT) · Aramaic (Peshitta) · Latin (Vulgate)