Sirach 41 — Coptic (Sahidic)

1 ⲱ ⲡⲙⲟⲩ ⲉϣϫⲉ ⲡⲉⲕⲣⲡⲙⲉⲉⲩⲉ ⲥⲁϣⲉ ⲛⲟⲩⲣⲱⲙⲉ ⲉϥⲥⲙⲟⲛⲧ ϩⲛⲛⲉϥϩⲩⲡⲁⲣⲭⲟⲛⲧⲁ ⲛⲟⲩⲣⲱⲙⲉ ⲉϥⲟ ⲛⲁⲧⲣⲟⲟⲩϣ ⲁⲩⲱ ⲉϥⲥⲟⲩⲧⲱⲛ ϩⲛϩⲱⲃ ⲛⲓⲙ ⲁⲩⲱ ⲉⲩⲛϭⲟⲙ ⲙⲙⲟϥ ⲉⲟⲩⲱⲙⲧⲉϥϩⲣⲉ

2 ⲱ ⲡⲙⲟⲩ ⲉϣϫⲉ ⲛⲁⲛⲟⲩⲡⲉⲕϩⲁⲡ ⲛⲟⲩⲣⲱⲙⲉ ⲛϩⲏⲕⲉ ⲉϥⲟ ⲛϭⲱⲃ ⲛϩⲗⲗⲟ ⲉⲙⲁⲧⲉ ⲉϥⲡⲉⲣⲓⲥⲡⲁ ϩⲛϩⲱⲃ ⲛⲓⲙ ⲉϥⲟ ⲛⲁⲧⲛⲁϩⲧⲉ ⲉⲁϥⲕⲱ ⲛⲥⲱϥ ⲛⲧϩⲩⲡⲟⲙⲟⲛⲏ

3 ⲙⲡⲣⲣϩⲟⲧⲉ ϩⲏⲧϥ ⲙⲡⲉⲕⲣⲓⲙⲁ ⲙⲡⲙⲟⲩ ⲁⲣⲓⲡⲙⲉⲉⲩⲉ ⲛⲛⲉⲕϣⲟⲣⲡ ⲙⲛⲛⲉⲕϩⲁⲉⲉⲩ

4 ϫⲉⲡⲁⲓ ⲡⲉ ⲡⲧⲱϣ ⲛⲥⲁⲣⲝ ⲛⲓⲙ ⲉⲃⲟⲗ ϩⲓⲧⲛⲡϫⲟⲉⲓⲥ ⲁⲩⲱ ⲉⲕⲛⲁϣⲥⲧⲉⲟⲩ ⲉⲃⲟⲗ ⲉⲡⲟⲩⲱϣ ⲙⲡⲉⲧϫⲟⲥⲉ ⲡⲉ ⲉⲓⲧⲉ ⲉⲕⲣⲙⲏⲧⲉ ⲉⲓⲧⲉ ⲉⲕⲣϣⲉ ⲉⲓⲧⲉ ⲉⲕⲣϣⲟ ⲛⲣⲟⲙⲡⲉ ⲙⲛϫⲡⲓⲉⲁϩⲉ ϩⲛⲁⲙⲛⲧⲉ

5 ⲛϣⲏⲣⲉ ⲛⲛⲣⲉϥⲣⲛⲟⲃⲉ ⲛⲁⲣϩⲛϣⲏⲣⲉ ⲉⲩⲃⲏⲧ ⲁⲩⲱ ⲛⲉⲧⲙⲟⲟϣⲉ ϩⲛⲙⲙⲁ ⲛϣⲱⲡⲉ ⲛⲛⲁⲥⲉⲃⲏⲥ

6 ⲧⲉⲕⲗⲏⲣⲟⲛⲟⲙⲓⲁ ⲛⲁⲧⲁⲕⲟ ⲛⲛϣⲏⲣⲉ ⲛⲛⲣⲉϥⲣⲛⲟⲃⲉ ⲁⲩⲱ ⲡⲛⲟϭⲛⲉϭ ⲛⲁⲙⲟⲩⲛ ⲉⲃⲟⲗ ⲙⲛⲡⲉⲩⲥⲡⲉⲣⲙⲁ

7 ϣⲁⲣⲉⲛϣⲏⲣⲉ ϭⲛⲁⲣⲓⲕⲉ ⲉⲩⲉⲓⲱⲧ ⲛⲁⲥⲉⲃⲏⲥ ϫⲉⲥⲉⲛⲁⲛⲉϭⲛⲟⲩϭⲟⲩ ⲉⲧⲃⲏⲧϥ

8 ⲟⲩⲟⲓ ⲛⲏⲧⲛ ⲛⲣⲱⲙⲉ ⲛⲁⲥⲉⲃⲏⲥ ⲛⲁⲓ ⲉⲛⲧⲁⲩⲕⲱ ⲛⲥⲱⲟⲩ ⲙⲡⲛⲟⲙⲟⲥ ⲙⲡⲛⲟⲩⲧⲉ ⲉⲧϫⲟⲥⲉ

9 ϫⲉⲉⲩϣⲁⲛϫⲡⲉⲧⲏⲩⲧⲛ ⲉⲩⲛⲁϫⲡⲉⲧⲏⲩⲧⲛ ⲉⲡⲥⲁϩⲟⲩ ⲁⲩⲱ ⲟⲛ ⲉⲧⲉⲧⲛϣⲁⲛⲙⲟⲩ ⲉⲩⲛⲁⲧⲉϣⲧⲏⲩⲧⲛ ⲉⲡⲥⲁϩⲟⲩ

10 ⲛⲕⲁ ⲛⲓⲙ ⲉⲛⲧⲁⲩⲉⲓ ⲉⲃⲟⲗ ϩⲙⲡⲕⲁϩ ⲉⲩⲛⲁⲕⲟⲧⲟⲩ ⲉⲡⲕⲁϩ ⲧⲁⲓ ⲧⲉ ⲧϩⲉ ⲛⲛⲁⲥⲉⲃⲏⲥ ⲉⲃⲟⲗ ϩⲙⲡⲥⲁϩⲟⲩ ⲉⲩⲛⲁ ⲉⲡⲧⲁⲕⲟ

11 ⲉⲣⲉⲡϩⲏⲃⲉ ⲛⲛⲣⲱⲙⲉ ϩⲙⲡⲉⲩⲥⲱⲙⲁ ⲡⲣⲁⲛ ⲇⲉ ⲛⲛⲣⲱⲙⲉ ⲉⲧⲛⲁⲛⲟⲩⲟⲩ ⲛⲁϥⲱⲧⲉ ⲉⲃⲟⲗ ⲁⲛ

12 ϥⲓⲡⲣⲟⲟⲩϣ ⲙⲡⲉⲕⲣⲁⲛ ϫⲉⲛⲧⲟϥ ⲡⲉⲧⲛⲁϭⲱ ⲛⲁⲕ ⲉϩⲟⲩⲉϣⲟ ⲛⲁϩⲟ ⲛⲛⲟϭ ⲛⲛⲟⲩⲃ

13 ⲟⲩⲏⲡⲉ ⲛϩⲟⲟⲩ ⲡⲉ...... ⲁⲩⲱ ⲟⲩⲛⲟⲩⲣⲁⲛ ⲉⲛⲁⲛⲟⲩϥ ⲛⲁϣⲱⲡⲉ ⲛϣⲁⲉⲛⲉϩ

14 ⲛⲁϣⲏⲣⲉ ⲁⲣⲉϩ ⲉⲧⲉⲥⲃⲱ ϩⲛⲟⲩⲉⲓⲣⲏⲛⲏ ⲟⲩⲥⲟⲫⲓⲁ ⲉⲥϩⲏⲡ ⲙⲛⲟⲩⲁϩⲟ ⲉⲛϥⲟⲩⲟⲛϩ ⲉⲃⲟⲗ ⲁⲛ ⲟⲩ ⲡⲉ ⲡⲉⲩϩⲏⲩ ⲙⲡⲉⲥⲛⲁⲩ

15 ⲛⲁⲛⲟⲩⲟⲩⲣⲱⲙⲉ ⲉϥϩⲱⲡ ⲛⲧⲉϥⲙⲛⲧⲥⲟϭ ⲉϩⲟⲩⲉ ⲟⲩⲣⲱⲙⲉ ⲉϥϩⲱⲡ ⲛⲧⲉϥⲙⲛⲧⲥⲁⲃⲉ

16 ⲉⲧⲃⲉⲡⲁⲓ ϭⲉ ϣⲓⲡⲉ ϩⲓⲡⲁϣⲁϫⲉ ⲛⲁⲛⲟⲩϣⲓⲡⲉ ⲅⲁⲣ ⲁⲛ ϩⲛϣⲓⲡⲉ ⲛⲓⲙ ⲁⲩⲱ ϩⲱⲃ ⲛⲓⲙ ⲥⲟⲧⲡ ⲁⲛ ⲛⲥⲟⲡ ⲛⲓⲙ ⲛⲟⲩⲟⲛ ⲛⲓⲙ

17 ϣⲓⲡⲉ ϩⲏⲧϥ ⲙⲡⲉⲧⲛⲉⲓⲱⲧ ⲙⲛⲧⲉⲧⲛⲙⲁⲁⲩ ϩⲓⲟⲩⲡⲟⲣⲛⲉⲓⲁ ⲁⲩⲱ ϩⲏⲧϥ ⲛⲟⲩⲛⲟϭ ⲙⲛⲟⲩⲇⲩⲛⲁⲥⲧⲏⲥ ⲉⲧⲃⲉϭⲟⲗ

18 ⲁⲩⲱ ϩⲏⲧϥ ⲛⲟⲩⲕⲣⲓⲧⲏⲥ ⲙⲛⲟⲩⲁⲣⲭⲱⲛ ⲉⲧⲃⲉⲛⲟⲃⲉ ⲁⲩⲱ ϩⲏⲧϥ ⲛⲟⲩⲥⲩⲛⲁⲅⲱⲅⲏ ⲙⲛⲟⲩⲗⲁⲟⲥ ⲉⲧⲃⲉⲁⲛⲟⲙⲓⲁ ⲁⲩⲱ ϩⲏⲧϥ ⲛⲟⲩⲕⲟⲓⲛⲱⲛⲟⲥ ⲙⲛⲟⲩϣⲃⲏⲣ ⲉⲧⲃⲉϫⲓⲛϭⲟⲛⲥ

19 ⲁⲩⲱ ⲡⲙⲁ ⲉⲧⲕϭⲁⲗⲱⲟⲩ ⲉⲣⲟϥ ⲉⲧⲃⲉⲟⲩϩⲱϥⲧ ⲁⲩⲱ ϩⲏⲧⲥ ⲛⲧⲙⲉ ⲙⲡⲛⲟⲩⲧⲉ ⲙⲛⲧⲇⲓⲁⲑⲏⲕⲏ ......ⲟϫⲕ ϩⲛⲟⲩⲙⲁ ⲛⲥⲱⲁⲩⲱ ϩⲏⲧϥ {ϩ}ⲛⲟⲩⲙⲛⲧⲙⲁⲓϣⲓⲃⲉ ϩⲛⲟⲩϫⲓ ⲙⲛⲟⲩϯ

20 ⲁⲩⲱ ϩⲏⲧⲟⲩ ⲛⲛⲉⲧⲁⲥⲡⲁⲍⲉ ⲙⲙⲟⲕ ⲛⲅⲕⲁⲣⲱⲕ ⲁⲩⲱ ϩⲏⲧϥ ⲛⲛⲁⲩ ⲉⲩⲥϩⲓⲙⲉ ⲛϩⲉⲧⲉⲣⲁ

21 ⲁⲩⲱ ϩⲏⲧϥ ⲛⲕⲧⲉⲡⲉⲕϩⲟ ⲉⲃⲟⲗ ⲛⲟⲩⲥⲩⲅⲅⲉⲛⲏⲥ ⲁⲩⲱ ϩⲏⲧϥ ⲛⲟⲩϣⲱⲡ ⲙⲛⲟⲩϯ ⲁⲩⲱ ϩⲏⲧϥ ⲛⲛⲁⲩ ⲉⲩⲥϩⲓⲙⲉ ⲉⲩⲛⲧⲥϩⲁⲓ

22 ⲁⲩⲱ ϩⲏⲧϥ ⲙⲙⲉϣⲧⲧⲉϥϩⲙϩⲁⲗ ⲁⲩⲱ ⲙⲡⲣⲁϩⲉⲣⲁⲧⲕ ϩⲓϫⲛⲡⲉⲥⲙⲁ ⲛⲛⲕⲟⲧⲕ ⲁⲩⲱ ϩⲏⲧϥ ⲛϩⲛϣⲃⲉⲉⲣ ⲉⲧⲃⲉⲟⲩϣⲁϫⲉ ⲛⲛⲟϭⲛⲉϭ ⲁⲩⲱ ⲙⲡⲣⲛⲉϭⲛⲟⲩϭⲟⲩ ⲙⲛⲛⲥⲁⲧⲣⲉⲕϯⲛⲁⲩ