Read Sirach 40 side by side with translations · The Final Bible
1 ⲁⲩⲥⲛⲧⲟⲩⲛⲟϭ ⲙⲙⲛⲧⲁⲧⲥⲣϥⲉ ⲛⲣⲱⲙⲉ ⲛⲓⲙ ⲁⲩⲱ ⲟⲩⲛⲁϩⲃ ⲉϥϩⲟⲣϣ ⲉϫⲛⲛϣⲏⲣⲉ ⲛⲁⲇⲁⲙ ϫⲓⲛⲡⲉϩⲟⲟⲩ ⲛⲧⲁⲩⲉⲓ ⲉⲃⲟⲗ ⲛϩⲏⲧⲥ ⲛⲧⲉⲩⲙⲁⲁⲩ ϣⲁⲡⲉϩⲟⲟⲩ ⲙⲡⲧⲟⲙⲥⲟⲩ ⲉⲡⲙⲁ ⲛⲟⲩⲟⲛ ⲛⲓⲙ
2 ⲉⲧⲉⲛⲉⲩⲙⲟⲕⲙⲉⲕ ⲛⲉ ⲙⲛⲧϩⲟⲧⲉ ⲙⲡⲉⲩϩⲏⲧ ⲙⲙⲉⲉⲩⲉ ⲉⲧⲟⲩϭⲱϣⲧ ⲉⲃⲟⲗ ϩⲏⲧⲟⲩ ⲙⲛⲡⲉϩⲟⲟⲩ ⲙⲡⲉⲩⲙⲟⲩ
3 ϫⲓⲛⲡⲉⲧϩⲙⲟⲟⲥ ϩⲓⲟⲩⲑⲣⲟⲛⲟⲥ ⲉϥϩⲁⲉⲟⲟⲩ ϣⲁⲡⲉⲧⲑⲃⲃⲓⲏⲩ ϩⲛⲡⲕⲁϩ ⲙⲛⲡⲕⲣⲙⲉⲥ
4 ϫⲓⲛⲡⲉⲧⲫⲟⲣⲉⲓ ⲛⲟⲩϩⲩⲁⲕⲓⲛⲑⲓⲛⲟⲛ ⲙⲛⲟⲩⲕⲗⲟⲙ ϣⲁϩⲣⲁⲓ ⲉⲡⲉⲧⲉⲣⲉⲟⲩϭⲁϭⲓⲧⲱⲛ ϩⲓⲱⲱϥ
5 ⲡϭⲱⲛⲧ ⲙⲛⲡⲕⲱϩ ⲙⲛⲡⲉϣⲧⲟⲣⲧⲣ ⲙⲛⲡⲕⲓⲙ ⲁⲩⲱ ⲧϩⲟⲧⲉ ⲙⲡⲙⲟⲩ ⲙⲛⲡⲉⲛⲟⲩϭⲥ ⲙⲛⲡϯⲧⲱⲛ ⲁⲩⲱ ϩⲛⲧⲉⲩⲛⲟⲩ ⲙⲡⲉⲙⲧⲟⲛ ϩⲓⲡⲉⲩⲙⲁ ⲛⲛⲕⲟⲧⲕ ϣⲁⲣⲉⲫⲓⲛⲏⲃ ⲛⲧⲉⲩϣⲏ ϣⲓⲃⲉ ⲙⲡⲉϥⲥⲟⲟⲩⲛ
6 ⲟⲩⲕⲟⲩⲓ ⲛⲧϩⲉ ⲛⲟⲩⲗⲁⲁⲩ ⲡⲉ ⲡⲉϥⲙⲧⲟⲛ ⲁⲩⲱ ϩⲙⲡⲁⲓ ⲉϣϫⲉ ⲉϥϩⲙ ⲡⲉϩⲟⲟⲩ ϩⲙⲡϭⲱϣⲧ ⲉⲃⲟⲗ ⲛⲣⲣⲁⲥⲟⲩ ⲉϥϣⲧⲣⲧⲱⲣ ϩⲛⲧϩⲟⲣⲁⲥⲓⲥ ⲙⲡⲉϥϩⲏⲧ ⲛⲧϩⲉ ⲙⲡⲉⲛⲧⲁϥⲣⲃⲟⲗ ϩⲛⲟⲩⲡⲟⲗⲉⲙⲟⲥ
7 ⲁϥⲧⲱⲟⲩⲛ ϩⲛⲧⲉⲩⲛⲟⲩ ⲙⲡⲉϥⲟⲩϫⲁⲓ ⲉⲛϥⲣϣⲡⲏⲣⲉ ⲁⲛ ⲛⲗⲁⲁⲩ ⲛϩⲟⲧⲉ
8 ⲙⲛⲥⲁⲣⲝ ⲛⲓⲙ ϫⲓⲛⲛⲣⲱⲙⲉ ϣⲁⲛⲧⲉⲃⲛⲏ ⲁⲩⲱ ⲥⲁϣϥ ⲛⲕⲱⲃ ⲛⲛⲁⲓ ⲛⲉⲧⲛⲛⲏⲩ ⲉϫⲛⲛⲣⲉϥⲣⲛⲟⲃⲉ
9 ⲡⲙⲟⲩ ⲙⲛⲡϯⲧⲱⲛ ⲙⲛⲡⲉⲥⲛⲟϥ ⲙⲛⲧⲥⲏϥⲉ ⲛⲉⲥⲛⲁⲩϩ ⲙⲛⲡϩⲉⲃⲱⲱⲛ ⲙⲛⲡⲟⲩⲱϣϥ ⲙⲛⲙⲙⲁⲥⲧⲓⲅⲝ
10 ⲛⲧⲁⲩⲥⲛⲧⲛⲁⲓ ⲧⲏⲣⲟⲩ ⲉⲛⲁⲛⲟⲙⲟⲥ ⲁⲩⲱ ⲛⲧⲁⲡⲕⲁⲧⲁⲕⲗⲩⲥⲙⲟⲥ ϣⲱⲡⲉ ⲉⲧⲃⲏⲧⲟⲩ
11 ⲛⲕⲁ ⲛⲓⲙ ⲉⲛⲧⲁⲩⲉⲓ ⲉⲃⲟⲗ ϩⲙⲡⲕⲁϩ ⲉⲩⲛⲁⲕⲟⲧⲟⲩ ⲉⲡⲕⲁϩ ⲁⲩⲱ ⲛⲉⲃⲟⲗ ϩⲛⲙⲟⲩ ⲉⲩⲛⲁⲕⲟⲧⲟⲩ ⲉⲑⲁⲗⲁⲥⲥⲁ
12 ⲇⲱⲣⲟⲛ ⲛⲓⲙ ⲁⲩⲱ ϫⲓⲛϭⲟⲛⲥ ⲛⲓⲙ ⲛⲁϥⲱⲧⲉ ⲉⲃⲟⲗ ⲧⲡⲓⲥⲧⲓⲥ ⲇⲉ ⲛⲁⲁϩⲉⲣⲁⲧⲥ ⲛϣⲁⲉⲛⲉϩ
13 ⲛⲉⲭⲣⲏⲙⲁ ⲛⲛⲣⲉϥϫⲓⲛϭⲟⲛⲥ ⲛⲁϣⲟⲟⲩⲉ ⲛⲧϩⲉ ⲛⲟⲩⲓⲉⲣⲟ ⲁⲩⲱ ⲥⲉⲛⲁⲱϣ ⲉⲃⲟⲗ ⲛⲧϩⲉ ⲛⲟⲩϩⲣⲟⲩⲃⲃⲁⲉⲓ ⲛⲟϭ ϩⲛⲟⲩϩⲱⲟⲩ
14 ϩⲙⲡⲧⲣⲉϥⲟⲩⲱⲛ ⲛⲛⲉϥϭⲓϫ ⲥⲉⲛⲁⲉⲩⲫⲣⲁⲛⲉ ⲧⲁⲓ ⲧⲉ ⲧϩⲉ ⲛⲛⲉⲧⲡⲁⲣⲁⲃⲁ ⲥⲉⲛⲁⲱϫⲛ ⲛⲧϩⲁⲏ
15 ⲛⲛⲉⲛϣⲏⲣⲉ ⲛⲁⲥⲉⲃⲏⲥ ⲧⲁϣⲉⲛⲉⲩⲕⲗⲁⲇⲟⲥ ⲁⲩⲱ ⲛⲛⲟⲩⲛⲉ ⲛⲛⲓⲁⲕⲁⲑⲁⲣⲧⲟⲥ ⲉⲩⲟ ⲛⲧϩⲉ ⲛⲛⲉⲧϩⲓϫⲛ ⲛⲓⲡⲉⲧⲣⲁ ⲉⲧⲛⲁϣⲧ
16 ϣⲁⲩϥⲉϭⲡⲁϩⲣ ⲉⲧϩⲓϫⲛ ⲙⲟⲟⲩ ⲛⲓⲙ ⲁⲩⲱ ⲛⲉⲥⲡⲟⲧⲟⲩ ⲙⲡⲓⲉⲣⲟ ϩⲁⲧϩⲏ ⲛⲭⲟⲣⲧⲟⲥ ⲛⲓⲙ
17 ⲉⲣⲉⲧⲉⲭⲁⲣⲓⲥ ⲟ ⲛⲧϩⲉ ⲛⲟⲩⲡⲁⲣⲁⲇⲓⲥⲟⲥ ϩⲛⲛⲉⲥⲙⲟⲩ ⲁⲩⲱ ⲧⲙⲛⲧⲛⲁ ⲛⲁϣⲱⲡⲉ ⲛϣⲁⲉⲛⲉϩ
18 ⲛⲁⲛⲟⲩⲡⲱⲛϩ ⲉⲧⲧⲏϣ ⲛⲟⲩⲉⲣⲅⲁⲧⲏⲥ ⲛⲁϥ ⲡⲉⲛⲧⲁϥϩⲉ ⲇⲉ ⲉⲩⲁϩⲟ ⲥⲟⲧⲡ ⲉⲣⲟϥ
19 ϣⲏⲣⲉ ϩⲓⲕⲱⲧ ⲙⲡⲟⲗⲓⲥ ⲛⲉϣⲁⲩⲧⲁϫⲣⲉⲣⲁⲛ ⲟⲩⲛⲟⲩⲥϩⲓⲙⲉ ⲇⲉ ⲉⲥⲟⲩⲁⲁⲃ ⲥⲟⲧⲡ ⲉϩⲟⲩⲉ ϩⲣⲁⲓ ⲙⲡⲉⲥⲛⲁⲩ
20 ⲏⲣⲡ ϩⲓⲙⲟⲩⲥⲓⲕⲟⲛ ⲡⲉϣⲁϥⲉⲩⲫⲣⲁⲛⲉ ⲙⲡϩⲏⲧ ⲧⲁⲅⲁⲡⲏ ⲇⲉ ⲙⲛⲧⲥⲟⲫⲓⲁ ⲥⲟⲧⲡ ⲉⲣⲟⲟⲩ ⲙⲡⲉⲥⲛⲁⲩ
21 ⲥⲏϥⲉ ⲛϫⲱ ϩⲓⲯⲁⲗⲧⲏⲣⲓⲟⲛ ⲛⲉϣⲁⲩϯ ⲛⲟⲩⲗⲗⲉ ⲟⲩⲗⲁⲥ ⲇⲉ ⲉϥⲛⲟⲧⲙ ⲥⲟⲧⲡ ⲉⲣⲟⲟⲩ ⲙⲡⲉⲥⲛⲁⲩ
22 ⲡⲉⲕⲃⲁⲗ ⲛⲁⲉⲡⲓⲑⲩⲙⲉⲓ ⲉⲩⲭⲁⲣⲓⲥ ⲙⲛⲟⲩⲥⲁ ⲡⲟⲩⲟⲧⲟⲩⲉⲧ ⲇⲉ ⲛⲧⲥⲱϣⲉ ⲥⲟⲧⲡ ⲉⲣⲟⲟⲩ ⲙⲡⲉⲥⲛⲁⲩ
23 ϣⲁⲣⲉⲡⲉⲕϣⲃⲏⲣ ⲙⲛⲡⲉⲕⲣⲱⲙⲉ ⲧⲱⲙⲛⲧ ⲉⲣⲟⲕ ⲙⲡⲉⲕⲟⲩⲟⲉⲓϣ ⲟⲩⲥϩⲓⲙⲉ ⲇⲉ ⲙⲛⲡⲉⲥϩⲁⲓ ⲥⲟⲧⲡ ⲉⲣⲟⲟⲩ ⲙⲡⲉⲥⲛⲁⲩ
24 ϣⲁⲣⲉϩⲛⲥⲛⲏⲩ ϯⲧⲟⲟⲧⲕ ⲙⲛⲟⲩⲃⲟⲏⲑⲓⲁ ϩⲙⲡⲉⲟⲩⲟⲉⲓϣ ⲛⲟⲩⲑⲗⲓⲯⲓⲥ ⲧⲙⲛⲧⲛⲁ ⲇⲉ ⲛⲁⲛⲟⲩϩⲙ ⲉϩⲟⲩⲉⲣⲟⲟⲩ ⲙⲡⲉⲥⲛⲁⲩ
25 ϣⲁⲣⲉⲡⲛⲟⲩⲃ ⲙⲛⲡϩⲁⲧ ⲥⲙⲛⲡⲣⲱⲙⲉ ⲡϣⲟϫⲛⲉ ⲇⲉ ⲥⲟⲧⲡ ⲉⲣⲟⲟⲩ ⲙⲡⲉⲥⲛⲁⲩ
26 ϣⲁⲣⲉⲭⲣⲏⲙⲁ ϩⲓϭⲟⲙ ϫⲓⲥⲉ ⲙⲡϩⲏⲧ ⲧϩⲟⲧⲉ ⲇⲉ ⲙⲡϫⲟⲉⲓⲥ ⲥⲟⲧⲡ ⲉⲣⲟⲟⲩ ⲙⲡⲉⲥⲛⲁⲩ ⲙⲛϣⲱⲱⲧ ϩⲛⲧϩⲟⲧⲉ ⲙⲡϫⲟⲉⲓⲥ ⲁⲩⲱ ⲙⲛⲧⲣⲉⲕϣⲓⲛⲉ ⲛⲥⲁⲃⲟⲏⲑⲓⲁ ⲉⲕⲛϩⲏⲧⲥ
27 ⲉⲣⲉⲧϩⲟⲧⲉ ⲙⲡϫⲟⲉⲓⲥ ⲟ ⲛⲧϩⲉ ⲛⲟⲩⲡⲁⲣⲁⲇⲓⲥⲟⲥ ⲛⲥⲙⲟⲩ ⲁⲩⲱ ⲥⲛⲁϩⲟⲃⲥϥ ⲉϩⲟⲩⲉⲟⲩⲟⲛ ⲛⲓⲙ
28 ⲡⲁϣⲏⲣⲉ ⲙⲡⲣⲣⲧϭⲓⲛⲱⲛϩ ⲛⲟⲩⲣⲉϥⲧⲱⲃϩ ⲛⲁⲛⲟⲩⲥ ⲅⲁⲣ ⲉⲧⲣⲉⲕⲙⲟⲩ ⲉϩⲟⲩⲉⲧⲱⲃϩ
29 ⲟⲩⲣⲱⲙⲉ ⲉϥϭⲱϣⲧ ⲉⲩⲧⲣⲁⲡⲉⲍⲁ ⲛⲧⲱϥ ⲁⲛ ⲧⲉ ⲛⲟⲩⲁϩⲉ ⲁⲛ ϥⲛⲁⲧⲙⲙⲉⲧⲉϥⲯⲩⲭⲏ ⲛϩⲉⲛϭⲓⲛⲟⲩⲟⲟⲙ ⲉⲛⲛⲟⲩϥ ⲁⲛ ⲛⲉ ⲟⲩⲛⲟⲩⲣⲱⲙⲉ ⲇⲉ ⲛⲥⲁⲃⲉ ⲁⲩⲱ ⲉϥⲧⲥⲁⲃⲏⲩ ⲛⲁϩⲁⲣⲉϩ ⲉⲣⲟϥ
30 ⲡⲧⲱⲃϩ ⲛⲁϩⲗⲟϭ ϩⲛⲧⲧⲁⲡⲣⲟ ⲙⲡⲁⲧϣⲓⲡⲉ ⲁⲩⲱ ⲟⲩⲛⲟⲩⲕⲱϩⲧ ⲛⲁⲙⲟⲩϩ ⲛϩⲏⲧϥ
Sirach 39 · Sirach 41 · Greek (Septuagint / SBLGNT) · Aramaic (Peshitta) · Latin (Vulgate)