Sirach 39 — Coptic (Sahidic)

1 ϥⲛⲁϣⲓⲛⲉ ⲛⲥⲁⲧⲥⲟⲫⲓⲁ ⲛⲛⲓⲁⲣⲭⲁⲓⲟⲥ ⲧⲏⲣⲟⲩ ⲁⲩⲱ ⲛϥⲧⲙⲥⲣϥⲉ ϩⲛⲛⲉⲩⲡⲣⲟⲫⲏⲧⲓⲁ

2 ϥⲛⲁⲁⲣⲉϩ ⲉⲡϣⲟϫⲛⲉ ⲛⲛⲓⲣⲙⲛⲥⲟⲉⲓⲧ ⲁⲩⲱ ϥⲛⲁⲃⲱⲕ ⲉϩⲟⲩⲛ ⲛⲙⲙⲁⲩ ϩⲛϩⲉ(ⲛ)ⲕⲧⲟ ⲙⲡⲁⲣⲁⲃⲟⲗⲏ

3 ϥⲛⲁϣⲓⲛⲉ ⲛⲥⲁⲙⲡⲉⲧϩⲏⲡ ⲛⲙⲡⲁⲣϩⲟⲓⲙⲓⲁ ⲁⲩⲱ ϥⲛⲁⲃⲱⲕ ϩⲛⲛⲁⲓⲛⲓⲅⲙⲁ ⲛⲙⲡⲁⲣⲁⲃⲟⲗⲏ

4 ϥⲛⲁϣⲙϣⲉ ϩⲛⲧⲙⲏⲧⲉ ⲛⲛⲛⲟϭ ⲛϥⲟⲩⲱⲛϩ ⲉⲃⲟⲗ ϩⲛⲛⲓⲁⲛϫⲱϫ ϥⲛⲏⲩ ⲉⲃⲟⲗ ϩⲓⲧⲛⲡⲕⲁϩ ⲛϩⲛϩⲉⲑⲛⲟⲥ ⲛϣⲙⲙⲟ ⲛⲁⲅⲁⲑⲟⲛ ⲅⲁⲣ ⲙⲛⲙⲡⲉⲧϩⲟⲟⲩ ⲉⲧϩⲛⲛⲣⲱⲙⲉ ⲁϥϫⲟⲛⲧⲟⲩ

5 ϥⲛⲁϯⲡⲉϥϩⲏⲧ ⲛϣⲟⲣⲡ ⲉⲡϫⲟⲉⲓⲥ ⲡⲉⲛⲧⲁϥⲧⲁⲙⲓⲟϥ ⲁⲩⲱ ⲛϥⲥⲟⲡⲥ ⲙⲡⲉⲙⲧⲟ ⲉⲃⲟⲗ ⲙⲡⲉⲧϫⲟⲥⲉ ϥⲛⲁⲟⲩⲱⲛ ⲛⲣⲱϥ ϩⲙⲡⲉϥϣⲗⲏⲗ ⲁⲩⲱ ϥⲛⲁⲥⲟⲡⲥ ϩⲁⲛⲉϥⲛⲟⲃⲉ

6 ⲉⲣϣⲁⲛⲡϫⲟⲉⲓⲥ ⲡⲛⲟϭ ⲟⲩⲱϣ ϥⲛⲁⲙⲁϩϥ ⲙⲡⲛⲉⲩⲙⲁ ⲙ... ⲁⲩⲱ ϥⲛⲁⲧⲁⲟⲩⲟ ⲉ...... ⲛⲧⲉϥⲥⲟⲫⲓⲁ ϥⲛⲁⲉⲝⲟⲙⲟⲗⲟⲅⲉⲓ ⲙⲡϫⲟⲉⲓⲥ ϩⲙⲡϣⲗⲏⲗ

7 ⲁⲩⲱ ⲛⲧⲟϥ ϥⲛⲁⲥⲟⲟⲩⲧⲛ ⲙⲡⲉϥϣⲟϫⲛⲉ ⲙⲛⲧⲉϥⲥⲃⲱ ϥⲛⲁⲙⲉⲕⲙⲟⲩⲕϥ ϩⲛⲛⲉϥⲡⲉⲧϩⲏⲡ

8 ⲛⲧⲟϥ ϥⲛⲁⲟⲩⲱⲛϩ ⲉⲃⲟⲗ ⲛⲧⲉⲥⲃⲱ ⲙⲡⲉϥⲧⲥⲁⲃⲟ ⲁⲩⲱ ϥⲛⲁϣⲟⲩϣⲟⲩ ⲙⲙⲟϥ ϩⲙⲡⲛⲟⲙⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ

9 ⲁⲩⲱ ⲟⲩⲛϩⲁϩ ⲛⲁⲥⲙⲟⲩ ⲉⲧⲉϥⲙⲛⲧⲣⲙⲛϩⲏⲧ ⲁⲩⲱ ⲛⲥⲛⲁϥⲱⲧⲉ ⲉⲃⲟⲗ ⲁⲛ ⲛϣⲁⲉⲛⲉϩ ⲡⲉϥⲣⲡⲙⲉⲉⲩⲉ ⲛⲁⲗⲟ ⲁⲛ ⲁⲩⲱ ⲡⲉϥⲣⲁⲛ ⲛⲁⲱⲛϩ ϣⲁϩⲛϫⲱⲙ ⲛϫⲱⲙ

10 ⲛϩⲉⲑⲛⲟⲥ ⲛⲁϫⲱ ⲛⲧⲉϥⲥⲟⲫⲓⲁ ⲁⲩⲱ ⲟⲩⲛⲟⲩⲥⲟⲟⲩϩⲥ ⲛⲁϫⲱ ⲙⲡⲉϥⲧⲁⲉⲓⲟ

11 ⲉϥϣⲁⲛⲙⲟⲩⲛ ⲉⲃⲟⲗ ϥⲛⲁⲕⲱ ⲙⲡⲉϥⲣⲁⲛ ⲉϩⲟⲩⲉϣⲟ ⲁⲩⲱ ⲉϥϣⲁⲛⲙⲟⲩ ϥⲛⲁⲣϩⲱⲃ ⲛⲁϥ

12 ⲉⲧⲓ ⲇⲉ ⲁⲓⲙⲉⲕⲙⲟⲩⲕⲧ ϯⲛⲁϣⲁϫⲉ ⲁⲩⲱ ⲁⲓⲙⲟⲩϩ ⲛⲧϩⲉ ⲙⲡⲟⲟϩ

13 ⲥⲱⲧⲙ ⲉⲣⲟⲓ ⲛⲁϣⲏⲣⲉ ⲉⲧⲟⲩⲁⲁⲃ ⲛⲧⲉⲧⲛϯⲟⲩⲱ ⲛⲧϩⲉ ⲛⲟⲩⲉⲣⲧ ⲉϥⲣⲏⲧ ϩⲓϫⲛⲟⲩⲙⲟⲟⲩ ⲉϥϫⲁⲓⲉ

14 ⲁⲩⲱ ⲛⲧⲉⲧⲛϯ ⲙⲡⲉⲧⲛⲥϯⲛⲟⲩϥⲉ ⲛⲧϩⲉ ⲛⲟⲩⲗⲓⲃⲁⲛⲟⲥ ⲛⲧⲉⲧⲛϯⲟⲩⲱ ⲛⲟⲩϩⲣⲏⲣⲉ ⲛⲧϩⲉ ⲛⲟⲩⲕⲣⲓⲛⲟⲛ ϯ ⲙⲡⲉⲧⲛⲥⲧⲟⲓ ⲛⲧⲉⲧⲛⲥⲙⲟⲩ ϩⲛⲟⲩⲥⲙⲟⲩ ⲥⲙⲟⲩ ⲉⲡϫⲟⲉⲓⲥ ⲉϫⲛⲛⲉϥϩⲃⲏⲩⲉ ⲧⲏⲣⲟⲩ

15 ϯⲟⲩⲙⲛⲧⲛⲟϭ ⲙⲡⲉϥⲣⲁⲛ ⲁⲩⲱ ⲛⲧⲉⲧⲛⲟⲩⲱⲛϩ ⲉⲃⲟⲗ ⲙⲡⲉϥⲥⲙⲟⲩ ϩⲛϩⲉⲛϩⲱⲇⲏ ⲛⲥⲡⲟⲧⲟⲩ ⲙⲛϩⲛϭⲓⲛⲩⲣⲁ ⲁⲩⲱ ⲛⲧⲉⲧⲛϫⲟⲟⲥ ⲛⲧⲉⲓϩⲉ ⲉⲧⲉⲧⲛⲟⲩⲱⲛϩ ⲉⲃⲟⲗ

16 ϫⲉⲛⲉϩⲃⲏⲩⲉ ⲧⲏⲣⲟⲩ ⲙⲡϫⲟⲉⲓⲥ ⲛⲁⲛⲟⲩⲟⲩ ⲉⲙⲁⲧⲉ ⲁⲩⲱ ⲟⲩⲉϩⲥⲁϩⲛⲉ ⲛⲓⲙ ⲛⲁϣⲱⲡⲉ ⲙⲡⲉϥⲟⲩⲟⲉⲓϣ

17 ⲛⲛⲉⲕⲉϣϫⲟⲟⲥ ϫⲉⲟⲩ ⲡⲉ ⲡⲁⲓ ⲁⲩⲱ ⲉⲩⲛⲁⲣⲟⲩ ⲙⲡⲁⲓ ⲥⲉⲛⲁϣⲓⲛⲉ ⲅⲁⲣ ⲛⲥⲱⲟⲩ ⲧⲏⲣⲟⲩ ϩⲙⲡⲉⲩⲟⲩⲟⲉⲓϣ ϩⲙⲡⲉϥϣⲁϫⲉ ⲁⲡⲙⲟⲟⲩ ⲁϩⲉⲣⲁⲧϥ ⲛⲧϩⲉ ⲛⲟⲩϫⲁⲧⲙⲉ ⲛϫⲛⲟⲟⲩ ⲁⲩⲱ ⲛⲛⲟⲩⲧⲉ ⲙⲙⲟⲟⲩ ϩⲛⲛϣⲁϫⲉ ⲛⲣⲱϥ

18 ⲉⲣⲉⲡⲉϥⲟⲩⲱϣ ⲧⲏⲣϥ ϩⲙⲡⲉϥⲟⲩⲉϩⲥⲁϩⲛⲉ ⲁⲩⲱ ⲙⲛⲡⲉⲧⲛⲁϣϭⲱϫⲃ ϩⲙⲡⲉϥⲟⲩϫⲁⲓ

19 ⲛⲉϩⲃⲏⲩⲉ ⲛⲥⲁⲣⲝ ⲛⲓⲙ ⲙⲡⲉϥⲙⲧⲟ ⲉⲃⲟⲗ ⲁⲩⲱ ⲛⲛⲉⲩϩⲱⲡ ⲉⲛⲉϥⲃⲁⲗ

20 ⲁϥϭⲱϣⲧ ⲉϫⲱⲟⲩ ϫⲓⲛⲉⲛⲉϩ ⲛϣⲁ ⲉⲛⲉϩ ⲁⲩⲱ ⲙⲛⲗⲁⲁⲩ ⲛϣⲡⲏⲣⲉ ⲙⲡⲉϥⲙⲧⲟ ⲉⲃⲟⲗ

21 ⲛⲛⲉⲕⲉϣϫⲟⲟⲥ ϫⲉⲟⲩ ⲡⲉ ⲡⲁⲓ ⲁⲩⲱ ⲉⲩⲛⲁⲣⲟⲩ ⲙⲡⲁⲓ ⲛⲧⲁⲩⲥⲟⲛⲧⲟⲩ ⲅⲁⲣ ⲧⲏⲣⲟⲩ ⲉⲧⲉⲩⲭⲣⲉⲓⲁ

22 ⲁⲡⲉϥⲥⲙⲟⲩ ⲙⲟⲩϩ ⲛⲧϩⲉ ⲙⲡⲓⲉⲣⲟ ⲁⲩⲱ ⲁϥⲧⲥⲟ ⲙⲡⲕⲁϩ ⲛⲧϩⲉ ⲛⲟⲩⲕⲁⲧⲁⲕⲗⲩⲥⲙⲟⲥ

23 ⲧⲁⲓ ⲧⲉ ⲧϩⲉ ⲉⲧⲉⲣⲉⲧⲉϥⲟⲣⲅⲏ ⲛⲁⲕⲗⲏⲣⲟⲛⲟⲙⲉⲓ ⲛϩⲉⲑⲛⲟⲥ ⲛⲓⲙ ⲛⲧϩⲉ ⲉⲛⲧⲁϥⲕⲧⲉϩⲉⲛⲙⲟⲟⲩ ⲉⲩⲙⲗϩ

24 ⲛⲉϥϩⲓⲟⲟⲩⲉ ⲥⲟⲩⲧⲱⲛ ⲛⲛⲉⲧⲟⲩⲁⲁⲃ ⲁⲩⲱ ⲥⲉⲟ ⲛϫⲣⲟⲡ ⲛⲛⲁⲛⲟⲙⲟⲥ

25 ⲛⲧⲁϥⲥⲛⲧⲛⲁⲅⲁⲑⲟⲛ ⲛⲛⲉⲧⲛⲁⲛⲟⲩⲟⲩ ϫⲓⲛⲛϣⲟⲣⲡ ⲁⲩⲱ ⲙⲡⲉⲧϩⲟⲟⲩ ⲛⲛⲣⲉϥⲣⲛⲟⲃⲉ

26 ⲧⲁⲣⲭⲏ ⲛⲭⲣⲉⲓⲁ ⲛⲓⲙ ϩⲙⲡⲱⲛϩ ⲙⲡⲣⲱⲙⲉ ⲡⲉ ⲡⲙⲟⲟⲩ ⲙⲛⲡⲕⲱϩⲧ ⲙⲛⲡⲡⲉⲛⲓⲡⲉ ⲙⲛⲡⲉϩⲙⲟⲩ ⲁⲩⲱ ⲡⲥⲁⲙⲓⲧ ⲙⲡⲥⲟⲩⲟ ⲙⲛⲡⲉⲣⲱⲧⲉ ⲙⲛⲡⲉⲃⲓⲱ ⲁⲩⲱ ⲡⲉⲥⲛⲟϥ ⲙⲡⲉⲗⲟⲟⲗⲉ ⲙⲛⲡⲛⲉϩ ⲙⲛⲧⲉϣⲧⲏⲛ

27 ⲛⲁⲓ ⲧⲏⲣⲟⲩ ⲛⲧⲁⲩⲥⲟⲛⲧⲟⲩ ⲛⲛⲣⲙⲛⲛⲟⲩⲧⲉ ⲉϩⲛⲁⲅⲁⲑⲟⲛ ⲧⲁⲓ ⲧⲉ ⲧϩⲉ ⲉⲧⲟⲩⲛⲁⲕⲧⲟⲟⲩ ⲛⲛⲣⲉϥⲣⲛⲟⲃⲉ ⲉϩⲛⲡⲉⲧϩⲟⲟⲩ

28 ⲟⲩⲛϩⲛⲡⲛⲁ ⲛⲧⲁⲩⲥⲟⲛⲧⲟⲩ ⲉϫⲓⲕⲃⲁ ⲁⲩⲱ ϩⲛⲡⲉⲩϭⲱⲛⲧ ⲁⲩⲧⲁϫⲣⲟ ⲛⲛⲉⲩⲙⲁⲥⲧⲓⲅⲝ ϩⲛⲡⲉⲟⲩⲟⲉⲓϣ ⲛⲧϩⲁⲏ ⲥⲉⲛⲁⲡⲱϩⲧ ⲛⲧⲉⲩϭⲟⲙ ⲁⲩⲱ ⲥⲉⲛⲁϯϩⲣⲟⲕ ⲙⲡϭⲱⲛⲧ ⲙⲡⲉⲛⲧⲁϥⲧⲁⲙⲓⲟⲟⲩ

29 ⲡⲕⲱϩⲧ ⲙⲛⲧⲉⲭⲁⲗⲁⲍⲁ ⲙⲛⲡϩⲉⲃⲱⲱⲛ ⲙⲛⲡⲙⲟⲩ ⲛⲁⲓ ⲧⲏⲣⲟⲩ ⲛⲧⲁⲩⲥⲟⲛⲧⲟⲩ ⲉϫⲓⲕⲃⲁ

30 ⲛⲛⲁϫϩⲉ ⲛⲛⲉⲑⲏⲣⲓⲟⲛ ⲙⲛⲛⲟⲩⲟⲟϩⲉ ⲙⲛⲛϩⲟϥ ⲁⲩⲱ ⲧⲥⲏϥⲉ ⲉⲧϫⲓⲕⲃⲁ ⲉⲡⲧⲁⲕⲟ ⲛⲛⲁⲥⲉⲃⲏⲥ

31 ⲥⲉⲛⲁⲉⲩⲫⲣⲁⲛⲉ ϩⲛⲧⲉϥⲉⲛⲧⲟⲗⲏ ⲁⲩⲱ ⲛⲥⲉⲥⲃⲧⲱⲧ ϩⲛⲛⲉϥϭⲓϫ ϩⲓϫⲙⲡⲕⲁϩ ⲛⲛⲉⲩⲡⲁⲣⲁⲃⲁ ⲛⲟⲩϣⲁϫⲉ ϩⲛⲟⲩⲟⲩⲟⲉⲓϣ

32 ⲉⲧⲃⲉⲡⲁⲓ ⲁⲓⲧⲁϫⲣⲟⲓ ϫⲓⲛⲛϣⲟⲣⲡ ⲁⲓⲙⲉⲕⲙⲟⲩⲕⲧ ⲁⲓⲕⲁⲁⲩ ϩⲛⲟⲩⲥϩⲁⲓ

33 ϫⲉⲛⲉϩⲃⲏⲩⲉ ⲧⲏⲣⲟⲩ ⲙⲡϫⲟⲉⲓⲥ ⲛⲁⲛⲟⲩⲟⲩ ⲁⲩⲱ ϥⲛⲁϯⲭⲣⲉⲓⲁ ⲛⲓⲙ ϩⲛⲧⲉⲥⲟⲩⲛⲟⲩ

34 ⲙⲉⲕⲉϣϫⲟⲟⲥ ϫⲉⲡⲁⲓ ϩⲟⲟⲩ ⲉⲡⲁⲓ ⲛⲁⲛⲟⲩⲟⲩ ⲅⲁⲣ ⲧⲏⲣⲟⲩ ϩⲙⲡⲉⲩⲟⲩⲟⲉⲓϣ

35 ⲧⲉⲛⲟⲩ ϭⲉ ⲥⲙⲟⲩ ⲉⲣⲟϥ ϩⲙⲡⲉⲧⲛϩⲏⲧ ⲧⲏⲣϥ ⲙⲛⲧⲉⲧⲛⲧⲁⲡⲣⲟ ⲛⲧⲉⲧⲛⲥⲙⲟⲩ ⲉⲡⲣⲁⲛ ⲙⲡϫⲟⲉⲓⲥ