Read Sirach 32 side by side with translations · The Final Bible
1 ⲡⲉⲧⲁⲣⲉϩ ⲉⲡⲛⲟⲙⲟⲥ ⲉϥⲧⲁϣⲉⲡⲣⲟⲥⲫⲟⲣⲁ
2 ⲡⲉⲧϯ ⲛϩⲧⲏϥ ⲉⲛⲉⲛⲧⲟⲗⲏ ⲡⲉ ⲡⲉⲧϯⲑⲩⲥⲓⲁ ⲛⲟⲩϫⲁⲓ
3 ⲡⲉⲧϯ ⲛⲟⲩϩⲙⲟⲧ ⲡⲉ ⲡⲉⲧ... ⲛⲟⲩⲥⲁⲙⲓⲧ
4 ⲡⲉⲧϯ ⲛⲟⲩⲙⲛⲧⲛⲁ ⲡⲉⲧⲑⲩⲥⲓⲁⲍⲓ ⲛⲟⲩⲥⲙⲟⲩ
5 ⲡⲟⲩⲱϣ ⲙⲡϫⲟⲉⲓⲥ ⲡⲉ ⲥⲁϩⲱⲕ ⲉⲃⲟⲗ ⲛⲧⲡⲟⲛⲏⲣⲓⲁ ⲁⲩⲱ ⲡⲉϥⲕⲱ ⲉⲃⲟⲗ ⲡⲉ ⲥⲁϩⲱⲕ ⲉⲃⲟⲗ ⲙⲡϫⲓⲛϭⲟⲛⲥ
6 ⲙⲡⲣⲟⲩⲱⲛϩ ⲉⲃⲟⲗ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲉⲕϣⲟⲩⲉⲓⲧ
7 ⲛⲁⲓ ⲅⲁⲣ ⲧⲏⲣⲟⲩ ⲉⲧⲃⲉⲧⲉⲛⲧⲟⲗⲏ
8 ϣⲁⲣⲉⲧⲉⲡⲣⲟⲥⲫⲟⲣⲁ ⲙⲡⲇⲓⲕⲁⲓⲟⲥ ϯⲕⲛⲛⲉ ⲙⲡⲉⲑⲩⲥⲓⲁⲥⲧⲏⲣⲓⲟⲛ ⲁⲩⲱ ⲡⲉⲥⲥϯⲛⲟⲩϥⲉ ⲙⲡⲉⲙⲧⲟ ⲉⲃⲟⲗ ⲙⲡⲉⲧϫⲟⲟⲥ
9 ⲧⲉⲑⲩⲥⲓⲁ ⲛⲟⲩⲣⲱⲙⲉ ⲛⲇⲓⲕⲁⲓⲟⲥ ϣⲏⲡ ⲁⲩⲱ ⲛⲥⲉⲛⲁⲣⲡⲱⲃϣ ⲁⲛ ⲙⲡⲉⲥⲣⲡⲙⲉⲉⲩⲉ
10 ϯⲉⲟⲟⲩ ⲙⲡϫⲟⲉⲓⲥ ϩⲛⲟⲩⲃⲁⲗ ⲛⲁⲅⲁⲑⲟⲥ ⲁⲩⲱ ⲙⲡⲣⲧⲥⲃⲕⲟ ⲛⲛⲁⲡⲁⲣⲭⲏ ⲛⲛⲉⲕϭⲓϫ
11 ϯⲟⲩⲣⲟⲧ ⲙⲡⲉⲕϩⲟ ϩⲛⲛⲉⲕϯ ⲧⲏⲣⲟⲩ ⲛⲅⲧⲃⲃⲟ ⲛⲛⲉⲕⲣⲉⲙⲏⲧ ϩⲛⲟⲩⲟⲩⲛⲟϥ
12 ϯ ⲙⲡⲉⲧϫⲟⲥⲉ ⲕⲁⲧⲁⲡⲉϥϯ ⲁⲩⲱ ⲡⲉⲧⲕⲛⲁϭⲛⲧϥ ϩⲛⲛⲉⲕϭⲓϫ ϩⲛⲟⲩⲃⲁⲗ ⲛⲁⲅⲁⲑⲟⲥ
13 ϫⲉⲟⲩⲣⲉϥⲧⲱⲱⲃⲉ ⲡⲉ ⲡϫⲟⲉⲓⲥ ⲁⲩⲱ ϥⲛⲁⲧⲱⲱⲃⲉ ⲛⲁⲕ ⲛⲥⲁϣϥ ⲛⲕⲱⲃ
14 ⲙⲡⲣϯⲇⲱⲣⲟⲛ ϫⲉⲙⲉϥϫⲓ
15 ⲁⲩⲱ ⲙⲡⲣⲕⲁϩⲧⲏⲕ ⲉⲑⲩⲥⲓⲁ ⲛϫⲓⲛϭⲟⲛⲥ ϫⲉⲟⲩⲕⲣⲓⲧⲏⲥ ⲡⲉ ⲡϫⲟⲉⲓⲥ ⲁⲩⲱ ⲙⲛⲉⲟⲟⲩ ⲛⲣⲱⲙⲉ ⲛⲛⲁϩⲣⲁϥ
16 ⲁⲩⲱ ⲙⲉϥϫⲓϩⲟ ϩⲓϩⲏⲕⲉ ϥⲛⲁⲥⲱⲧⲙ ⲉⲡⲥⲟⲡⲥ ⲙⲡⲉⲧϫⲏⲩ ⲛϭⲟⲛⲥ
17 ⲛⲛⲉϥⲟⲃϣϥ ⲉⲧⲙⲛⲧϩⲙϩⲁⲗ ⲛⲟⲩⲟⲣⲫⲁⲛⲟⲥ ⲁⲩⲱ ⲟⲩⲭⲏⲣⲁ ⲉⲥϣⲁⲛϫⲱ ⲙⲡⲉⲥϣⲁϫⲉ
18 ⲙⲏ ⲙⲉⲣⲉⲛⲣⲙⲉⲓⲏ ⲛⲟⲩⲭⲏⲣⲁ ⲉⲓ ⲉϫⲛⲛⲉⲥⲟⲩⲟⲟϭⲉ
19 ⲁⲩⲱ ⲉⲣⲉⲡⲉⲥⲁϣϣⲕⲁⲕ ⲛⲛⲏⲩ ⲉϫⲛⲡⲉⲛⲧⲁϥⲛⲧⲟⲩ ⲉϩⲣⲁⲓ
20 ⲉⲩⲛⲁϫⲓ ⲡⲉⲧⲣϩⲱⲃ ⲉϩⲛⲁϥ ⲁⲩⲱ ⲡⲉϥⲥⲟⲡⲥ ⲛⲁⲡⲱϩ ϣⲁⲛⲉⲕⲗⲟⲟⲗⲉ
21 ϣⲁⲣⲉⲡⲉϣⲗⲏⲗ ⲙⲡⲉⲧⲑⲃⲃⲓⲏⲩ ϫⲉⲧⲛⲉⲕⲗⲟⲟⲗⲉ ⲁⲩⲱ ⲛⲉⲩⲥⲉⲡⲥⲱⲡϥ ⲙⲡⲁⲧϥϩⲱⲛ ⲉϩⲟⲩⲛ ⲁⲩⲱ ⲛⲉϥⲥⲁϩⲱϥ ⲉⲃⲟⲗ ⲙⲡⲁⲧⲉⲡⲉⲧϫⲟⲥⲉ ϭⲙⲡⲉϥϣⲓⲛⲉ
22 ⲁⲩⲱ ϥⲛⲁⲕⲣⲓⲛⲉ ⲛⲛⲇⲓⲕⲁⲓⲟⲥ ⲛϥⲣⲡⲉⲩϩⲁⲡ ⲁⲩⲱ ⲛⲛⲉⲡϫⲟⲉⲓⲥ ⲱⲥⲕ ⲁⲩⲱ ⲛⲛⲉϥϩⲣⲟϣ ⲛϩⲏⲧ ⲉϩⲣⲁⲓ ⲉϫⲱⲟⲩ ϣⲁⲛⲧϥⲟⲩⲱϣϥ ⲛⲛϯⲡⲉ ⲛⲛⲁⲧⲛⲁ
23 ⲁⲩⲱ ⲛϥⲧⲱⲱⲃⲉ ⲛⲟⲩⲕⲃⲁ ⲛⲛϩⲉⲑⲛⲟⲥ ϣⲁⲛⲧϥϥⲓ ⲙⲡⲙⲏⲏϣⲉ ⲛⲛⲣⲉϥⲥⲱϣ ⲁⲩⲱ ⲛϥⲟⲩⲱϣϥ ⲛⲛⲉϭⲣⲏⲡⲉ ⲛⲛⲣⲉϥϫⲓⲛϭⲟⲛⲥ
24 ⲁⲩⲱ ⲛϥⲧⲱⲱⲃⲉ ⲙⲡⲣⲱⲙⲉ ⲕⲁⲧⲁⲛⲉϥϩⲃⲏⲩⲉ ⲁⲩⲱ ⲛⲉϩⲃⲏⲩⲉ ⲛⲛⲣⲱⲙⲉ ⲕⲁⲧⲁⲛⲉⲩⲙⲉⲉⲩⲉ
25 ϣⲁⲛⲧϥⲕⲣⲓⲛⲉ ⲛⲧⲉⲕⲣⲓⲥⲓⲥ ⲙⲡⲉϥⲗⲁⲟⲥ ⲁⲩⲱ ⲛϥⲉⲩⲫⲣⲁⲁⲛⲉ ⲙⲙⲟⲟⲩ ϩⲙⲡⲉϥⲛⲁ
26 ⲉϣϫⲉ ⲛⲉⲥⲉⲡⲛⲁ ϩⲙⲡⲉⲟⲩⲟⲉⲓϣ ⲛⲧⲉⲑⲗⲓⲯⲓⲥ ⲛⲧϩⲉ ⲛⲛⲉⲕⲗⲟⲟⲗⲉ ⲛϩⲱⲟⲩ ϩⲙⲡⲉⲟⲩⲟⲉⲓϣ ⲉⲙⲛϩⲱⲟⲩ
Sirach 31 · Sirach 33 · Greek (Septuagint / SBLGNT) · Aramaic (Peshitta) · Latin (Vulgate)