Read Sirach 32 side by side with translations · The Final Bible
1 ܪܒܐ ܐܩܝܡܘܟ ܠܐ ܬܬܪܝܡ ܘܒܪܝܫ ܥܬܝܪ̈ܐ ܠܐ ܬܣܬܡܟ ܗ̣ܘܝ ܠܟ ܐܝܟ ܚܕ ܡܢܗܘܢ ܘܝܨܦ ܕܝܠܗܘܢ ܘܡܢ ܒܬܪ ܟܢ ܐܣܬܡܟ
2 ܒܟܠ ܣܢܝܩܘܬܗܘܢ ܬ̇ܩܢ ܘܪܒܥ ܡܛܠ ܗܢܐ ܐܦ ܒܐܚܪܝܬܗܘܢ ܬܚܕܐ ܘܥܠ ܦܬܘܪܐ ܬ̇ܩܒܠ ܐܝܩܪܐ
4 ܒܐܬܪܐ ܕܡܫܬܬܐ ܒܗ ܚܡܪܐ ܠܐ ܬܐܡܪ ܒܗ ܫܘܥ̈ܝܬܐ ܘܒܟܠܥܕܢ ܠܐ ܬܬܚܟܡ
5 ܐܝܟ ܚܬܡܐ ܥܠ ܟܝܣܐ ܕܕܗܒܐ ܗܟܢܐ ܗܝ ܬܫܒܘܚܬܐ ܕܐܠܗܐ ܥܠ ܡܫܬܝܐ ܕܚܡܪܐ
6 ܐܝܟ ܥܩܐ ܕܕܗܒܐ ܘܛܒ̈ܥܐ ܘܙܡܪ̈ܓܕܐ ܗܟܢܐ ܡ̈ܠܐ ܫܦܝܪ̈ܬܐ ܥܠ ܡܫܬܝܐ ܕܚܡܪܐ
9 ܒܝܢܬ ܫܠܝ̈ܛܢܐ ܠܐ ܬܬܪܘܪܒ ܘܠܕܣܒܝܢ ܡܢܟ ܠܐ ܬܨܒܐ ܠܡܨܥܪܘ
11 ܒܥܕܢܐ ܕܦܬܘܪܐ ܠܐ ܬܣܓܐ ܠܡܡܠܠܘ ܘܥܕ ܐܝܬ ܒܟ ܥܘܗܕܢܐ ܦܛܪ ܠܒܝܬܟ
12 ܘܥ̣ܒܕ ܨܒܝܢܟ ܒܕܚܠܬܗ ܕܐܠܗܐ ܘܠܐ ܒܚܘܣܪܢܐ
13 ܘܥܠ ܟܠܗܝܢ ܗܠܝܢ ܒ̇ܪܟ ܫܡܗ ܕܐܠܗܐ ܕܣܒܥܟ ܡܢ ܛܒ̈ܬܗ
14 ܕܒ̇ܥܐ ܦܘܠܚܢܐ ܕܐܠܗܐ ܢܩ̇ܒܠ ܝܘܠܦܢܐ ܘܟܕ ܡܨܠܐ ܩܕܡܘܗܝ ܢܥܢܝܘܗܝ
16 ܕܚ̈ܠܘܗܝ ܕܐܠܗܐ ܢܬܚܟܡܘܢ ܒܕ̈ܝܢܘܗܝ ܘܚܟܡܬܐ ܣܓܝܐܬܐ ܡܢ ܠܒܗܘܢ ܢܦܩܘܢ
17 ܒܪܢܫܐ ܥܪܝܡܐ ܡ̇ܛܫܐ ܝܘܠܦܢܐ ܘܒܬܪ ܨܒܝܢܗ ܥ̇ܒܕ ܐܘܪܚܗ
18 ܒܪܢܫܐ ܚܟܝܡܐ ܠܐ ܫܒ̇ܩ ܚܟܡܬܐ ܟܕ ܡܟܣܝܐ ܘܥ̇ܘܠܐ ܠܐ ܢ̇ܛܪ ܠܫܢܗ
19 ܕܠܐ ܡ̣ܠܟܐ ܠܐ ܬܥܒܕ ܨܒܘ ܘܡܢ ܒܬܪ ܕܥ̇ܒܕ ܐܢܬ ܠܐ ܬܟܪܐ ܠܟ
20 ܒܐܘܪܚܐ ܕܫܚܘܪܬܐ ܠܐ ܬܐܙܠ ܕܠܡܐ ܬܬܩܠ ܒܟܐܦܐ ܕܬܪ̈ܬܝܢ ܙܒ̈ܢܝܢ
21 ܠܐ ܬܬܟܠ ܥܠ ܐܘܪܚܐ ܕܥ̇ܘ̈ܠܐ
22 ܘܒܐܘܪ̈ܚܬܟ ܗܘܝܬ ܙܗܝܪ
23 ܒܟܠ ܥܒ̈ܕܝܟ ܛܪ ܢܦܫܟ ܡܛܠ ܕܟܠ ܕܗܟܢܐ ܗܘ ܢ̇ܛܪ ܦܘܩܕܢܐ ܗܘ
24 ܕܢ̇ܛܪ ܐܘܪܚܗ ܢ̇ܛܪ ܦܘܩܕܢܐ ܕܐܠܗܐ ܘܡ̇ܢ ܕܢܬܬܟܠ ܥܠ ܐܠܗܐ ܠܐ ܢܐܒܕ ܠܥܠܡ
Sirach 31 · Sirach 33 · Greek (Septuagint / SBLGNT) · Latin (Vulgate) · Coptic (Sahidic)