Read Sirach 25 side by side with translations · The Final Bible
1 ⲁⲓⲥⲁⲁⲧϣⲟⲙⲛⲧ ⲛϩⲱⲃ ⲁⲩⲱ ⲁⲓⲧⲱⲱⲛ ⲉⲛⲉⲥⲱⲓ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲙⲛⲛⲣⲱⲙⲉ ϩⲛϩⲉⲛⲥⲛⲏⲩ ⲉⲩⲟ ⲛⲟⲩϩⲏⲧ ⲛⲟⲩⲟⲧ ⲁⲩⲱ ⲟⲩϣⲃⲏⲣ ⲙⲛⲡⲉⲧϩⲓⲧⲟⲩⲱϥ ⲁⲩⲱ ⲟⲩⲣⲱⲙⲉ ⲙⲛⲧⲉϥⲥϩⲓⲙⲉ ⲉⲩϥⲓ ϩⲁⲛⲉⲩⲉⲣⲏⲩ
2 ϣⲟⲙⲛⲧ ⲛϩⲱⲃ ⲛⲉⲛⲧⲁⲧⲁⲯⲩⲭⲏ ⲙⲉⲥⲧⲱⲟⲩ ⲁⲩⲱ ⲁⲓⲙⲉⲥⲧⲉⲛⲉⲩϩⲃⲏⲩⲉ ⲉⲙⲁⲧⲉ ⲟⲩϩⲏⲕⲉ ⲛϫⲁⲥⲓϩⲏⲧ ⲙⲛⲟⲩⲣⲙⲙⲁⲟ ⲛⲣⲉϥϫⲓϭⲟⲗ ⲙⲛⲟⲩϩⲗⲗⲟ ⲛⲛⲟⲉⲓⲕ ⲛⲁⲧϩⲏⲧ
3 ⲉⲙⲡϥⲥⲱⲟⲩϩ ⲉϩⲟⲩⲛ ϩⲛⲧⲉϥⲙⲛⲧⲕⲟⲩⲓ ⲉϥⲛⲁϭⲓⲛⲉ ⲧⲱⲛ ϩⲛⲧⲉϥⲙⲛⲧϩⲗⲗⲟ
4 ⲉϣϫⲉ ⲛⲉⲥⲉⲫⲁⲡ ⲛⲛⲣⲙⲛⲥⲕⲓⲙ ⲁⲩⲱ ⲛϩⲗⲗⲟ ⲉⲧⲣⲉⲩⲉⲓⲙⲉ ⲉϣⲟϫⲛⲉ
5 ⲉϣϫⲉ ⲛⲉⲥⲉⲧⲥⲟⲫⲓⲁ ⲛⲛϩⲗⲗⲟ ⲁⲩⲱ ⲡⲙⲉⲉⲩⲉ ⲙⲛⲡϣⲟϫⲛⲉ ⲛⲛⲉⲧⲧⲁⲓⲏⲩ
6 ⲡϫⲛⲧϩⲁϩ ⲡⲉ ⲡⲉⲕⲗⲟⲙ ⲛⲛϩⲗⲗⲟ ⲁⲩⲱ ⲡⲉⲩϣⲟⲩϣⲟⲩ ⲡⲉ ⲧϩⲟⲧⲉ ⲙⲡϫⲟⲉⲓⲥ
7 ⲁⲓⲙⲁⲕⲁⲣⲓⲍⲉ ⲙⲯⲓⲧ ⲛϩⲱⲃ ϩⲙⲡⲁϩⲏⲧ ⲁⲩⲱ ϯⲛⲁϫⲉⲡⲙⲉϩⲙⲏⲧ ϩⲙⲡⲁⲗⲁⲥ ⲟⲩⲣⲱⲙⲉ ⲉϥⲉⲩⲫⲣⲁⲛⲉ ⲉϫⲛⲛⲉϥϣⲏⲣⲉ ⲉϥⲟⲛϩ ⲉϥϭⲱϣⲧ ⲉⲡϩⲉ ⲛⲛⲉϥϫⲁϫⲉ
8 ⲛⲁⲓⲁⲧϥ ⲙⲡⲉⲧϣⲟⲟⲡ ⲙⲛⲟⲩⲥϩⲓⲙⲉ ⲛⲥⲁⲃⲉ ⲁⲩⲱ ⲡⲉⲧⲉⲙⲡϥⲥⲗⲁⲁⲧⲉ ϩⲙⲡⲉϥⲗⲁⲥ ⲙⲛⲡⲉⲧⲉⲙⲡϥⲣϩⲙϩⲁⲗ ⲙⲡⲉⲧⲥⲏϣ ⲉⲣⲟϥ
9 ⲛⲁⲓⲁⲧϥ ⲙⲡⲉⲛⲧⲁϥϩⲉ ⲉⲧⲙⲛⲧⲥⲁⲃⲉ ⲁⲩⲱ ⲡⲉⲧϣⲁϫⲉ ⲉⲩⲙⲁⲁϫⲉ ⲙⲡⲉⲧⲥⲱⲧⲙ
10 ⲉϣϫⲉ ⲟⲩⲛⲟϭ ⲡⲉ ⲡⲉⲛⲧⲁϥϩⲉ ⲉⲧⲥⲟⲫⲓⲁ ⲁⲗⲗⲁ ⲙⲛⲡⲉⲧⲟ ⲛⲛⲟϭ ⲉⲡⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ
11 ⲧϩⲟⲧⲉ ⲙⲡϫⲟⲉⲓⲥ ⲥⲟⲧⲡ ⲉⲣⲟⲟⲩ ⲧⲏⲣⲟⲩ ⲉⲣⲉⲡⲉⲧⲁⲙⲁϩⲧⲉ ⲙⲙⲟⲥ ⲧⲛⲧⲱⲛ ⲉⲛⲓⲙ
13 ⲛⲁⲛⲟⲩⲡⲗⲏⲅⲏ ⲛⲓⲙ ⲉⲡⲗⲏⲅⲏ ⲛϩⲏⲧ ⲛⲁⲛⲟⲩⲡⲟⲛⲏⲣⲓⲁ ⲛⲓⲙ ⲉⲡⲟⲛⲏⲣⲓⲁ ⲛⲥϩⲓⲙⲉ
14 ⲛⲁⲛⲟⲩⲙⲟⲭⲣⲓⲥⲧⲟⲥ ⲛⲓⲙ ⲉϩⲟⲩⲉ ⲙⲟⲕϩⲥ ⲛⲛⲉⲧⲙⲟⲥⲧⲉ ⲛⲁⲛⲟⲩϫⲓⲕⲃⲁ ⲛⲓⲙ ⲉϩⲟⲩⲟ ⲉϫⲓⲕⲃⲁ ⲛϫⲁϫⲉ
15 ⲙⲛⲁⲡⲉ ϩⲟⲟⲩ ⲉⲧⲁⲡⲉ ⲙⲡϩⲟϥ ⲁⲩⲱ ⲙⲛϭⲱⲛⲧ ⲉⲡⲁⲡϫⲁϫⲉ
16 ϯⲛⲁⲟⲩⲉϣⲟⲩⲱϩ ⲙⲛⲟⲩⲙⲟⲩⲓ ⲙⲛⲟⲩⲇⲣⲁⲕⲱⲛ ⲉϩⲟⲩⲟ ⲉⲟⲩⲱϩ ⲙⲛⲟⲩⲥϩⲓⲙⲉ ⲉⲥϩⲟⲟⲩ ⲁⲩⲱ ⲛⲣⲉϥϭⲱⲛⲧ
17 ϣⲁⲣⲉⲧⲡⲟⲛⲏⲣⲓⲁ ⲛⲟⲩⲥϩⲓⲙⲉ ⲉⲥϩⲟⲟⲩ ϣⲓⲃⲉ ⲙⲡⲉⲥϩⲟ ⲁⲩⲱ ϣⲁⲥⲣⲡⲉⲥϩⲟ ⲛⲕⲁⲕⲉ ⲛⲧϩⲉ ⲛⲟⲩϭⲟⲟⲩⲛⲉ
18 ⲉⲣϣⲁⲛⲡⲉⲥϩⲁⲓ ⲛⲟϫϥ ϩⲛⲧⲙⲏⲧⲉ ⲙⲡⲉⲧϩⲓⲧⲟⲩⲱϥ ⲛϥⲥⲱⲧⲙ ϣⲁϥⲁϣⲁϩⲟⲙ ⲉϥⲥⲁϣⲉ
19 ⲕⲁⲕⲓⲁ ⲛⲓⲙ ⲥⲟⲃⲕ ⲛⲛⲁϩⲣⲛⲧⲕⲁⲕⲓⲁ ⲛⲧⲉⲥϩⲓⲙⲉ ⲉⲣⲉⲡⲉⲕⲗⲏⲣⲟⲥ ⲛⲟⲩⲣⲉϥⲣⲛⲟⲃⲉ ϩⲉ ⲉⲧⲟⲟⲧⲥ
20 ⲛⲧϩⲉ ⲛⲟⲩϩⲗⲗⲟ ⲉϥⲱⲗ ⲉϩⲣⲁⲓ ϩⲛⲟⲩⲥⲕⲁⲣⲁⲕⲓⲣ ⲛϣⲱ ⲧⲁⲓ ⲧⲉ ⲧϩⲉ ⲛⲟⲩⲥϩⲓⲙⲉ ⲛⲣⲉϥⲁϣⲕⲁⲕ ⲉⲃⲟⲗ ⲛⲛⲁϩⲣⲛⲟⲩϩⲁⲓ ⲛⲣⲙⲣⲁϣ
21 ⲙⲡⲣϩⲉ ⲉⲧⲟⲟⲧⲥ ⲛⲟⲩⲥϩⲓⲙⲉ ⲉⲛⲉⲥⲱⲥ ⲁⲩⲱ ⲙⲡⲣⲙⲉⲣⲉⲥϩⲓⲙⲉ
22 ⲟⲩⲟⲣⲅⲏ ⲙⲛⲟⲩⲙⲛⲧⲁⲧⲃⲁⲗ ⲙⲛⲟⲩϣⲓⲡⲉ ⲡⲉ ⲟⲩⲥϩⲓⲙⲉ ⲉⲥϯ ⲉⲧⲟⲟⲧϥ ⲙⲡⲉⲥϩⲁⲓ
23 ⲟⲩϩⲏⲧ ⲉϥⲑⲃⲓⲏⲩ ⲙⲛⲟⲩϩⲟ ⲉϥⲟⲕⲙ ⲙⲛⲟⲩⲡⲗⲏⲅⲏ ⲛϩⲏⲧ ⲡⲉ ⲟⲩⲥϩⲓⲙⲉ ⲉⲥϩⲟⲟⲩ ϩⲛϭⲓϫ ⲉⲩⲕⲏ ⲙⲛϩⲛⲡⲁⲧ ⲉⲩⲃⲏⲗ ⲉⲃⲟⲗ ⲡⲉ ⲟⲩⲥϩⲓⲙⲉ ⲉⲛⲥⲙⲁⲕⲁⲣⲓⲍⲉ ⲁⲛ ⲙⲡⲉⲥϩⲁⲓ
24 ⲛⲧⲁⲧⲁⲣⲭⲏ ⲙⲡⲛⲟⲃⲉ ⲉⲓ ⲉⲃⲟⲗ ϩⲛⲧⲉⲥϩⲓⲙⲉ ⲁⲩⲱ ⲉⲧⲃⲏⲧⲥ ⲉⲛⲁⲙⲟⲩ ⲧⲏⲣⲛ
25 ⲙⲡⲣϯⲧⲉϩⲓⲏ ⲛⲟⲩⲙⲟⲟⲩ ⲉϥⲥⲱⲕ ⲙⲡⲣϯⲡⲁⲣϩⲏⲥⲓⲁ ⲛⲟⲩⲥϩⲓⲙⲉ ⲉⲥϩⲟⲟⲩ
26 ⲉϣⲱⲡⲉ ⲉⲛⲥⲛⲁⲟⲩⲁϩⲥ ⲛⲥⲱⲕ ⲁⲛ ⲥⲟⲗⲡⲥ ⲉⲃⲟⲗ ⲛⲛⲉⲕⲥⲁⲣⲝ
Sirach 24 · Sirach 26 · Greek (Septuagint / SBLGNT) · Aramaic (Peshitta) · Latin (Vulgate)