Read Sirach 24 side by side with translations · The Final Bible
1 ⲧⲥⲟⲫⲓⲁ ⲛⲁⲥⲙⲟⲩ ⲉⲧⲉⲥⲯⲩⲭⲏ ⲥⲛⲁϣⲟⲩϣⲟⲩ ⲙⲙⲟⲥ ϩⲛⲧⲙⲏⲧⲉ ⲙⲡⲉⲥⲗⲁⲟⲥ
2 ⲥⲛⲁⲟⲩⲱⲛ ⲛⲣⲱⲥ ϩⲛⲧⲉⲕⲕⲗⲏⲥⲓⲁ ⲙⲡⲉⲧϫⲟⲥⲉ ⲛⲥϣⲟⲩϣⲟⲩ ⲙⲙⲟⲥ ⲙⲡⲉⲙⲧⲟ ⲉⲃⲟⲗ ⲛⲛⲉϥϭⲟⲙ
3 ϫⲉⲁⲛⲟⲕ ⲛⲧⲁⲓⲉⲓ ⲉⲃⲟⲗ ϩⲛⲣⲱϥ ⲙⲡⲉⲧϫⲟⲥⲉ ⲁⲩⲱ ⲁⲓϩⲃⲥⲡⲕⲁϩ ⲛⲧϩⲉ ⲛⲟⲩⲛⲓϥ
4 ⲁⲛⲟⲕ ⲁⲓⲟⲩⲱϩ ϩⲛⲛⲉⲧϫⲟⲥⲉ ⲁⲩⲱ ⲉⲣⲉⲡⲁⲑⲣⲟⲛⲟⲥ ϩⲛⲟⲩⲥⲧⲩⲗⲟⲥ ⲛⲕⲗⲟⲟⲗⲉ
5 ⲁⲓⲕⲱⲧⲉ ⲉⲡⲕⲱⲧⲉ ⲛⲧⲡⲉ ⲙⲁⲩⲁⲁⲧ ⲁⲓⲙⲟⲟϣⲉ ϩⲙⲡϣⲓⲕ ⲛⲛⲛⲟⲩⲛ
6 ϩⲛⲛϩⲟⲉⲓⲙ ⲛⲧⲑⲁⲗⲁⲥⲥⲁ ⲙⲛⲡⲕⲁϩ ⲧⲏⲣϥ ⲁⲓⲕⲱ ⲛⲁⲓ ϩⲛⲗⲁⲟⲥ ⲛⲓⲙ ⲙⲛϩⲉⲑⲛⲟⲥ ⲛⲓⲙ
7 ⲁⲓϣⲓⲛⲉ ⲛⲥⲁⲟⲩⲱϩ ⲛⲙⲙⲁⲩ ⲧⲏⲣⲟⲩ ⲉⲓⲛⲁⲟⲩⲱϩ ϩⲛⲧⲉⲕⲗⲏⲣⲟⲛⲟⲙⲓⲁ ⲛⲛⲓⲙ
8 ⲧⲟⲧⲉ ⲁϥϩⲱⲛ ⲉⲧⲟⲟⲧⲛϭⲓⲡⲣⲉϥⲥⲱⲛⲧ ⲛⲛⲕⲁ ⲛⲓⲙ ⲁⲩⲱ ⲡⲉⲛⲧⲁϥⲥⲟⲛⲧⲧ ⲁϥⲥⲙⲓⲛⲉ ⲙⲡⲙⲁ ⲛϣⲱⲡⲉ ⲁϥϫⲟⲟⲥ ⲛⲁⲓ ϫⲉⲟⲩⲱϩ ϩⲛⲓⲁⲕⲱⲃ ⲁⲩⲱ ϫⲓⲕⲗⲏⲣⲟⲛⲟⲙⲓⲁ ϩⲙⲡⲓⲥⲣⲁⲏⲗ
9 ϩⲁⲧϩⲏ ⲛⲉⲛⲉϩ ⲁϥⲥⲟⲛⲧⲧ ϫⲓⲛⲛϣⲟⲣⲡ ⲁⲩⲱ ⲛϯⲛⲁⲱϫⲛ ⲁⲛ ⲛϣⲁⲉⲛⲉϩ
10 ⲁⲓϣⲙϣⲉ ϩⲛⲧⲉⲥⲕⲏⲛⲏ ⲉⲧⲟⲩⲁⲁⲃ ⲙⲡⲉϥⲙⲧⲟ ⲉⲃⲟⲗ ⲁⲩⲱ ⲧⲁⲓ ⲧⲉ ⲧϩⲉ ⲛⲧⲁϥⲧⲁϫⲣⲟⲓ ϩⲛⲥⲓⲱⲛ
11 ⲁϥⲧⲣⲁⲟⲩⲱϩ ϩⲛⲧⲉϥⲡⲟⲗⲓⲥ ⲙⲙⲉⲣⲓⲧ ⲁⲩⲱ ⲉⲣⲉⲧⲁⲉⲝⲟⲩⲥⲓⲁ ϩⲛⲧϩⲓⲉⲣⲟⲩⲥⲁⲗⲏⲙ
12 ⲁⲓϫⲉⲛⲟⲩⲛⲉ ⲉⲃⲟⲗ ϩⲙⲡⲗⲁⲟⲥ ⲉⲧⲧⲁⲓⲏⲩ ϩⲛⲧⲙⲉⲣⲓⲥ ⲛⲧⲉⲕⲗⲏⲣⲟⲛⲟⲙⲓⲁ ⲙⲡϫⲟⲉⲓⲥ
13 ⲁⲓϫⲓⲥⲉ ⲛⲧϩⲉ ⲛⲛⲓⲕⲉⲇⲣⲟⲥ ⲉⲧϩⲛⲡⲗⲓⲃⲁⲛⲟⲥ ⲁⲩⲱ ⲛⲧϩⲉ ⲛⲛⲓⲕⲩⲡⲁⲣⲓⲥⲥⲟⲥ ⲉⲧϩⲛⲛⲧⲟⲟⲩ ⲛⲛⲁⲉⲣⲙⲱⲛ
14 ⲁⲓϫⲓⲥⲉ ⲛⲧϩⲉ ⲛⲛⲓⲃⲛⲛⲉ ⲉⲧϩⲛⲛⲉⲕⲣⲱⲟⲩ ⲁⲩⲱ ⲛⲧϩⲉ ⲛⲛⲓϣⲉ ⲛⲛⲓⲟⲩⲣⲧ ⲉⲧϩⲛϩⲓⲉⲣⲓⲭⲱ ⲁⲩⲱ ⲛⲧϩⲉ ⲛⲟⲩⲃⲱ ⲛϫⲟⲉⲓⲧ ⲉⲛⲉⲥⲱⲥ ϩⲛⲧⲥⲱϣⲉ ⲁⲓϫⲓⲥⲉ ⲛⲧϩⲉ ⲛⲟⲩⲡⲗⲁⲧⲁⲛⲟⲥ
15 ⲁⲩⲱ ⲛⲧϩⲉ ⲛⲟⲩϭⲓⲛⲁⲙⲱⲙⲟⲛ ⲁⲩⲱ ⲟⲩϣⲉ ⲛⲥⲱⲧϥ ⲙⲛⲟⲩⲁⲥⲡⲁⲗⲁⲑⲟⲥ ⲛⲁⲣⲱⲙⲁⲧⲁ ⲁⲓϯ ⲙⲡⲁⲥⲧⲟⲓ ⲁⲩⲱ ⲛⲧϩⲉ ⲛⲟⲩⲭⲁⲗⲃⲁⲛⲏ ⲙⲛⲟⲩⲉⲓⲃ ⲙⲛⲟⲩⲥⲧⲁⲕⲧⲏ ⲁⲩⲱ ⲛⲧϩⲉ ⲛⲟⲩⲗϩⲱⲃ ⲛⲗⲓⲃⲁⲛⲟⲥ ϩⲛⲟⲩⲥⲕⲏⲛⲏ
16 ⲁⲛⲟⲕ ⲁⲓⲡeⲣϣⲛⲁⲕⲗⲁⲇⲟⲥ ⲉⲃⲟⲗ ⲛⲧϩⲉ ⲛⲟⲩⲧⲉⲣⲉⲃⲓⲛⲑⲟⲥ ⲁⲩⲱ ⲛⲁⲕⲗⲁⲇⲟⲥ ϩⲛⲕⲗⲁⲇⲟⲥ ⲛⲉⲟⲟⲩ ⲛⲉ ϩⲓⲭⲁⲣⲓⲥ
17 ⲁⲛⲟⲕ ⲁⲓϯⲟⲩⲱ ⲛⲧⲉⲭⲁⲣⲓⲥ ⲛⲧϩⲉ ⲛⲟⲩⲃⲱ ⲛⲉⲗⲟⲟⲗⲉ ⲁⲩⲱ ⲛⲁϯⲟⲩⲱ ϩⲉⲛⲕⲁⲣⲡⲟⲥ ⲛⲉⲟⲟⲩ ⲛⲉ ϩⲓⲙⲛⲧⲣⲙⲙⲁⲟ
19 ⲛⲉⲧⲉⲡⲉⲓⲑⲩⲙⲉⲓ ⲉⲣⲟⲓ ϯⲡⲉⲧⲛⲟⲩⲟⲓ ⲉⲣⲟⲓ ⲛⲧⲉⲧⲛⲥⲉⲓ ⲉⲃⲟⲗ ϩⲛⲛⲁϭⲣⲱϭ
20 ⲡⲁⲣⲡⲙⲉⲉⲩⲉ ⲅⲁⲣ ϩⲟⲗϭ ⲉϩⲟⲩⲟ ⲉⲡⲉⲃⲓⲱ ⲁⲩⲱ ⲧⲁⲕⲗⲏⲣⲟⲛⲟⲙⲓⲁ ⲉϩⲟⲩⲟ ⲉⲡⲉⲃⲓⲱ ⲙⲡⲙⲟⲩⲗϩ
21 ⲛⲉⲧⲟⲩⲱⲙ ⲙⲙⲟⲓ ⲥⲉⲛⲁϩⲕⲟ ⲙⲙⲟⲓ ⲟⲛ ⲁⲩⲱ ⲛⲉⲧⲥⲱ ⲙⲙⲟⲓ ⲥⲉⲛⲁⲉⲓⲃⲉ ⲙⲙⲟⲓ ⲟⲛ
22 ⲡⲉⲧⲥⲱⲧⲙ ⲉⲣⲟⲓ ϥⲛⲁϫⲓϣⲓⲡⲉ ⲁⲛ ⲁⲩⲱ ⲛⲉⲧⲣϩⲱⲃ ⲛϩⲏⲧ ⲛⲛⲉⲩⲣⲛⲟⲃⲉ
23 ⲛⲁⲓ ⲧⲏⲣⲟⲩ ⲡϫⲱⲱⲙⲉ ⲡⲉ ⲛⲧⲇⲓⲁⲑⲏⲕⲏ ⲙⲡⲛⲟⲩⲧⲉ ⲉⲧϫⲟⲥⲉ ⲡⲛⲟⲙⲟⲥ ⲡⲉ ⲛⲧⲁⲙⲱⲩⲥⲏⲥ ϩⲟⲛϥ ⲉⲧⲟⲟⲧⲛ ⲛⲕⲗⲏⲣⲟⲛⲟⲙⲓⲁ ⲛⲛⲥⲩⲛⲁⲅⲱⲅⲏ ⲛⲓⲁⲕⲱⲃ
25 ⲡⲉⲧⲙⲟⲩϩ ⲛⲧϩⲉ ⲙⲫⲉⲓⲥⲱⲛ ϩⲛⲧⲥⲟⲫⲓⲁ ⲁⲩⲱ ⲛⲧϩⲉ ⲛⲧⲓⲅⲣⲓⲥ ϩⲛⲛⲉϩⲟⲟⲩ ⲛⲃⲣⲣⲉ
26 ⲡⲉⲧⲙⲟⲩϩ ϩⲛⲧⲙⲛⲧⲣⲙⲛⲧϩⲏⲧ ⲛⲧϩⲉ ⲙⲡⲉⲩⲫⲣⲁⲧⲏⲥ ⲁⲩⲱ ⲛⲧϩⲉ ⲙⲡⲓⲟⲣⲇⲁⲛⲏⲥ ϩⲛⲛⲉϩⲟⲟⲩ ⲙⲡⲱϩⲥ
27 ⲡⲉⲧⲟⲩⲱⲛϩ ⲉⲃⲟⲗ ⲛⲧⲉⲥⲃⲱ ⲛⲧϩⲉ ⲙⲡⲟⲩⲟⲉⲓⲛ ⲁⲩⲱ ⲛⲧϩⲉ ⲛⲅⲏⲱⲛ ϩⲛⲛⲉϩⲟⲟⲩ ⲙⲡϫⲱⲱⲗⲉ
28 ⲙⲡⲉⲡϣⲟⲣⲡ ϫⲱⲕ ⲉⲉⲓⲙⲉ ⲉⲣⲟⲥ ⲁⲩⲱ ⲙⲡⲉⲡϩⲁⲉ ϩⲉⲧϩⲱⲧⲥ
29 ⲁⲛⲉⲥⲙⲉⲉⲩⲉ ⲅⲁⲣ ⲁϣⲁⲓ ⲉⲃⲟⲗ ϩⲛⲧⲉⲑⲁⲗⲁⲥⲥⲁ ⲁⲩⲱ ⲡⲉⲥϣⲟϫⲛⲉ ⲉⲃⲟⲗ ϩⲙⲡⲛⲟϭ ⲛⲛⲟⲩⲛ
30 ϫⲉⲁⲛⲟⲕ ⲉⲓⲟ ⲛⲧϩⲉ ⲛⲟⲩⲉⲓⲟⲟⲣ ⲉⲃⲟⲗ ϩⲛⲟⲩⲓⲉⲣⲟ ⲁⲩⲱ ⲛⲧϩⲉ ⲛⲟⲩϥⲟ ⲉⲥⲥⲱⲕ ⲉⲩϣⲛⲏ
31 ⲁⲓϫⲟⲟⲥ ϫⲉϯⲛⲁⲧⲥⲟ ⲙⲡⲁⲙⲁ ⲛⲟⲩⲟⲟⲧⲉ ⲁⲩⲱ ϯⲛⲁⲧⲥⲟ ⲙⲡⲁⲧⲗⲟⲙ ⲁⲩⲱ ⲉⲓⲥ ϩⲏⲏⲧⲉ ⲁⲡⲁⲉⲓⲟⲟⲣ ϣⲱⲡⲉ ⲛⲁⲓ ⲛⲓⲉⲣⲟ ⲁⲩⲱ ⲁⲡⲁⲓⲉⲣⲟ ϣⲱⲡⲉ ⲛⲁⲓ ⲛⲧⲑⲁⲗⲁⲥⲥⲁ
32 ⲉⲧⲓ ϯⲛⲁⲟⲩⲉⲛϩⲧⲥⲟⲫⲓⲁ ⲉⲃⲟⲗ ⲛⲧϩⲉ ⲛϩⲧⲟⲟⲩⲉ ⲛⲧⲁⲟⲩⲟⲛϩⲟⲩ ⲉⲃⲟⲗ ⲉⲡⲟⲩⲉ
33 ⲉⲧⲓ ϯⲛⲁⲡⲉϩⲧⲧⲉⲥⲃⲱ ⲛⲧϩⲉ ⲛⲟⲩⲡⲣⲟⲫⲏⲧⲓⲁ ⲁⲩⲱ ⲛⲧⲁⲕⲁⲁⲥ ϣⲁⲛϫⲱⲙ ⲛϣⲁⲉⲛⲉϩ
34 ⲁⲛⲁⲩ ϫⲉⲛⲧⲁⲓϣⲡϩⲓⲥⲉ ⲛⲁⲓ ⲙⲁⲩⲁⲁⲧ ⲁⲛ ⲁⲗⲗⲁ ⲛⲟⲩⲟⲛ ⲛⲓⲙ ⲉⲧϣⲓⲛⲉ ⲛⲥⲱⲥ
Sirach 23 · Sirach 25 · Greek (Septuagint / SBLGNT) · Aramaic (Peshitta) · Latin (Vulgate)