Sirach 23 — Coptic (Sahidic)

1 ⲡϫⲟⲉⲓⲥ ⲡⲉⲓⲱⲧ ⲡϫⲟⲉⲓⲥ ⲙⲡⲁⲱⲛϩ ⲙⲡⲣⲕⲁⲁⲧ ⲛⲥⲱⲕ ϩⲙⲡⲉⲩϣⲟϫⲛⲉ ⲁⲩⲱ ⲙⲡⲣⲕⲁⲁⲧ ⲉϩⲉ ⲛϩⲏⲧⲟⲩ

2 ⲛⲓⲙ ⲡⲉⲧⲛⲁⲉⲓⲛⲉ ⲛϩⲉⲛⲙⲁⲥⲧⲓⲅⲝ ⲉϫⲛⲛⲁⲙⲉⲉⲩⲉ ⲁⲩⲱ ⲟⲩⲥⲃⲱ ⲛⲥⲟⲫⲓⲁ ⲉϫⲛⲡⲁϩⲏⲧ ϫⲉⲕⲁⲥ ⲛⲛⲉⲩϯⲥⲟ ⲉϫⲛⲛⲁⲙⲛⲧⲁⲧⲥⲟⲟⲩⲛ

3 ϫⲉⲛⲉⲛⲁⲟⲃϣⲥ ⲁϣⲁⲓ ⲛⲧⲉⲛⲁⲛⲟⲃⲉ ⲣϩⲟⲩⲟ ⲛⲧⲁϩⲉ ⲙⲡⲉⲙⲧⲟ ⲉⲃⲟⲗ ⲛⲛⲁϫⲁϫⲉ ⲁⲩⲱ ⲛⲧⲉⲡⲁϫⲁϫⲉ ⲣⲁϣⲉ ⲙⲙⲟⲓ

4 ⲡϫⲟⲉⲓⲥ ⲡⲉⲓⲱⲧ ⲡⲛⲟⲩⲧⲉ ⲙⲡⲁⲱⲛϩ ⲙⲡⲣϯ ⲛⲁⲓ ⲛⲟⲩⲙⲛⲧⲧⲁⲥⲃⲁⲗ

5 ⲁⲩⲱ ⲕⲧⲟ ⲉⲃⲟⲗ ⲙⲙⲟⲓ ⲛⲛⲉⲡⲓⲑⲩⲙⲓⲁ

6 ⲙⲡⲣⲧⲣⲉⲟⲩⲙⲛⲧⲙⲁⲓⲥϩⲓⲙⲉ ⲧⲁϩⲟⲓ ⲙⲛⲟⲩⲟⲩⲱϣ ⲛⲧⲉⲧϩⲏ ⲙⲡⲣⲧⲁⲁⲧ ⲉⲧⲟⲟⲧⲥ ⲛⲟⲩⲯⲩⲭⲏ ⲛⲁⲧⲃⲁⲗ ⲧⲉⲥⲃⲱ ⲛⲧⲧⲁⲡⲣⲟ

7 ⲥⲱⲧⲙ ⲛⲁϣⲏⲣⲉ ⲉⲧⲉⲥⲃⲱ ⲛⲧⲧⲁⲡⲣⲟ ⲁⲩⲱ ⲡⲉⲧϩⲁⲣⲉϩ ⲉⲣⲟⲥ ⲛⲛⲉϥⲧⲁⲕⲟ

8 ⲁⲩⲱ ⲥⲉⲛⲁⲧⲁϩⲟⲥ ϩⲓⲛⲉϥⲥⲡⲟⲧⲟⲩ ⲡⲣⲉϥⲣⲛⲟⲃⲉ ⲙⲛⲡⲣⲉϥⲥⲁϩⲟⲩ ⲙⲛⲡϫⲁⲥⲓϩⲏⲧ ⲛⲁⲥⲕⲁⲛⲇⲁⲗⲓⲍⲉ ⲛϩⲏⲧⲟⲩ

9 ⲙⲡⲣⲧⲥⲁⲃⲉⲣⲱⲕ ⲉⲱⲣⲕ ⲁⲩⲱ ⲙⲡⲣⲧⲟⲡⲕ ⲉⲧⲁⲩⲉⲡⲣⲁⲛ ⲙⲡⲉⲧⲟⲩⲁⲁⲃ

10 ⲛⲧϩⲉ ⲅⲁⲣ ⲛⲟⲩϩⲙϩⲁⲗ ⲉⲩϫⲛⲟ ⲙⲙⲟϥ ⲛϩⲁϩ ⲛⲥⲟⲡ ⲉⲛϥⲛⲁⲣⲃⲟⲗ ⲁⲛ ⲉⲥⲏϣⲉ ⲧⲁⲓ ⲧⲉ ⲧϩⲉ ⲙⲡⲉⲧⲱⲣⲕ ⲉϥⲧⲁⲩⲟ ⲙⲡⲣⲁⲛ ⲛϩⲁϩ ⲛⲥⲟⲡ ⲉⲛϥⲛⲁⲧⲃⲃⲟ ⲁⲛ ⲉⲛⲟⲃⲉ

11 ⲟⲩⲣⲱⲙⲉ ⲛⲣⲉϥⲁϣⲁⲓ ⲛⲱⲣⲕ ϥⲛⲁⲙⲟⲩϩ ⲛⲁⲛⲟⲙⲓⲁ ⲁⲩⲱ ⲛⲛⲉⲙⲁⲥⲧⲓⲅⲝ ⲕⲁⲡⲉϥⲏⲓ ⲉϥϣⲁⲛⲣϩⲧⲏϥ ⲡⲉϥⲛⲟⲃⲉ ⲛϩⲏⲧϥ ⲕⲁⲛ ⲉϥϣⲁⲛⲟⲃϣϥ ⲁϥⲣⲛⲟⲃⲉ ⲥⲛⲁⲩ ⲁⲩⲱ ⲉϣⲱⲡⲉ ⲛⲧⲁϥⲱⲣⲕ ⲉⲡϫⲓⲛϫⲏ ⲛϥⲛⲁⲧⲙⲁⲉⲓⲟ ⲁⲛ ⲡⲉϥⲏⲓ ⲅⲁⲣ ⲛⲁⲙⲟⲩϩ ⲙⲙⲟⲭⲣⲓⲥⲧⲟⲥ

12 ⲟⲩϣⲁϫⲉ ⲉϥϭⲟⲟⲗⲉ ⲙⲡⲙⲟⲩ ⲛⲛⲉⲩϭⲛⲧϥ ϩⲛⲧⲉⲕⲗⲏⲣⲟⲛⲟⲙⲓⲁ ⲛⲓⲁⲕⲱⲃ ⲛⲁⲓ ⲅⲁⲣ ⲧⲏⲣⲟⲩ ⲛⲁⲟⲩⲉ ⲛⲛⲣⲙⲛⲛⲟⲩⲧⲉ ⲁⲩⲱ ⲛⲉ...ⲛⲧⲟⲩ ϩⲛⲛⲟⲃⲉ

13 ⲙⲡⲣⲧⲥⲁⲃⲉⲧⲉⲕⲧⲁⲡⲣⲟ ⲉⲥⲃⲱ ⲉⲥϩⲟⲟⲩ ϫⲉⲟⲩⲛϣⲁϫⲉ ⲛⲛⲟⲃⲉ ⲛϩⲏⲧⲥ

14 ⲁⲣⲓⲡⲙⲉⲉⲩⲉ ⲙⲡⲉⲕⲉⲓⲱⲧ ⲙⲛⲧⲉⲕⲙⲁⲁⲩ ⲉⲕⲛⲁⲥⲱⲟⲩϩ ⲅⲁⲣ ⲉϩⲟⲩⲛ ϩⲛⲧⲙⲏⲧⲉ ⲛϩⲉⲛⲛⲟϭ ⲙⲏⲡⲟⲧⲉ ⲛⲅⲣⲡⲱⲃϣ ⲙⲡⲉⲩⲙⲧⲟ ⲉⲃⲟⲗ ⲛⲅⲣⲥⲟϭ ⲛⲧⲉⲕⲧⲟⲡⲥ ⲛⲅⲟⲩⲱϣ ⲉⲛⲉⲙⲡⲟⲩϫⲡⲟⲕ ⲛⲅⲥϩⲟⲩⲣⲡⲉϩⲟⲟⲩ ⲛⲧⲁⲩⲙⲁⲥⲧⲕ

15 ⲟⲩⲣⲱⲙⲉ ⲉϥⲧⲁⲡⲏⲩ ⲉϩⲛϣⲁϫⲉ ⲛⲛⲟϭⲛⲉϭ ⲛⲛⲉϥϫⲓⲥⲃⲱ ⲛⲛⲉϥϩⲟⲟⲩ ⲧⲏⲣⲟⲩ

16 ϩⲱⲃ ⲥⲛⲁⲩ ⲛⲉϣⲁⲩⲧⲁϣⲉⲛⲟⲃⲉ ⲁⲩⲱ ⲡⲙⲉϩϣⲟⲙⲛⲧ ϣⲁϥⲉⲓⲛⲉ ⲛⲟⲩⲟⲣⲅⲏ

17 ⲟⲩⲯⲩⲭⲏ ⲛϩⲏⲧ ϣⲏⲙ ⲛⲧϩⲉ ⲛⲟⲩⲕⲱϩⲧ ⲉϥⲙⲟⲩϩ ⲁⲩⲱ ⲟⲩⲣⲱⲙⲉ ⲙⲡⲟⲣⲛⲟⲥ ϩⲙⲡⲥⲱⲙⲁ ⲛⲧⲉϥⲥⲁⲣⲝ ⲁⲩⲱ ⲛⲉϥⲕⲁⲧⲟⲟⲧϥ ⲉⲃⲟⲗ ⲉⲙⲡϥϫⲉⲣⲉⲟⲩⲕⲱϩⲧ ⲟⲉⲓⲕ ⲛⲓⲙ ϩⲟⲗϭ ⲛⲟⲩⲣⲱⲙⲉ ⲙⲡⲟⲣⲛⲟⲥ ⲁⲩⲱ ⲛⲉϥⲕⲁⲧⲟⲟⲧϥ ⲉⲃⲟⲗ ⲉⲙⲡϥⲙⲟⲩ

18 ⲟⲩⲣⲱⲙⲉ ⲉϥⲧⲱⲟⲩⲛ ϩⲓⲡⲉϥϭⲗⲟϭ ⲉϥϫⲱ ⲙⲙⲟⲥ ϩⲙⲡⲉϥϩⲏⲧ ϫⲉⲛⲓⲙ ⲡⲉⲧⲛⲁⲩ ⲉⲣⲟⲓ ⲡⲕⲁⲕⲉ ⲙⲡⲁⲕⲱⲧⲉ ⲁⲩⲱ ⲛⲓϫⲟ ϩⲱⲃⲥ ⲙⲙⲟⲓ ⲙⲛⲗⲁⲁⲩ ⲛⲁⲩ ⲉⲣⲟⲓ ⲉⲓⲣϩⲟⲧⲉ ϩⲏⲧϥ ⲛⲛⲓⲙ ⲙⲡⲉⲧϫⲟⲥⲉ ⲛⲁⲣⲡⲙⲉⲉⲩⲉ ⲁⲛ ⲛⲛⲁⲛⲟⲃⲉ

19 ⲛⲃⲁⲗ ⲛⲛⲣⲱⲙⲉ ⲛⲉⲧϥⲣϩⲟⲧⲉ ϩⲏⲧⲟⲩ ⲛϥⲉⲓⲙⲉ ⲁⲛ ϫⲉⲛⲃⲁⲗ ⲙⲡϫⲟⲉⲓⲥ ⲟ ⲛⲟⲩⲟⲉⲓⲛ ⲉⲡⲣⲏ ⲛⲟⲩⲧⲃⲁ ⲛⲕⲱⲃ ⲉⲩϭⲱϣⲧ ⲉϫⲛⲛⲉϩⲓⲟⲟⲩⲉ ⲧⲏⲣⲟⲩ ⲛⲛⲣⲱⲙⲉ ⲁⲩⲱ ⲉⲩⲛⲁⲩ ⲉⲙⲙⲁ ⲉⲧϩⲏⲡ

20 ⲉⲙⲡⲁⲧϥⲥⲛⲧⲛⲕⲁ ⲛⲓⲙ ⲥⲉⲟⲩⲟⲛϩ ⲉⲣⲟϥ ⲁⲩⲱ ⲟⲩⲟⲛ ⲛⲓⲙ ⲙⲛⲛⲥⲁⲧⲣⲉϥϫⲱⲕⲟⲩ ⲉⲃⲟⲗ

21 ⲥⲉⲛⲁϫⲓⲕⲃⲁ ⲙⲡⲁⲓ ϩⲛⲛⲉⲡⲗⲁϯⲁ ⲛⲟⲩⲡⲟⲗⲓⲥ ⲁⲩⲱ ⲥⲉⲛⲁϭⲟⲡϥ ϩⲙⲡⲉⲧⲉⲙⲡϥⲙⲉⲉⲩⲉ ⲉⲣⲟϥ

22 ⲧⲁⲓ ⲟⲛ ⲧⲉ ⲧϩⲉ ⲛⲟⲩⲥϩⲓⲙⲉ ⲉⲥⲛⲁⲕⲁⲡⲉⲥϩⲁⲓ ⲛⲥⲱⲥ ⲛⲥϫⲡⲉϣⲏⲣⲉ ⲙⲛⲕⲉⲟⲩⲁ

23 ϣⲟⲣⲡ ⲙⲉⲛ ϫⲉⲁⲥⲣⲁⲧⲥⲱⲧⲙ ⲛⲥⲁⲡⲛⲟⲙⲟⲥ ⲙⲡⲉⲧϫⲟⲥⲉ ⲡⲙⲉϩⲥⲛⲁⲩ ϫⲉⲁⲥⲣⲛⲟⲃⲉ ⲉⲡⲉⲥϩⲁⲓ ⲡⲙⲉϩϣⲟⲙⲛⲧ ⲛⲧⲁⲥⲣⲛⲟⲉⲓⲕ ϩⲛⲟⲩⲡⲟⲣⲛⲉⲓⲁ ⲁⲩⲱ ⲁⲥϫⲡⲉϣⲏⲣⲉ ⲙⲛⲕⲉⲟⲩⲁ

24 ⲉⲩⲉⲛⲧⲁⲓ ⲉⲃⲟⲗ ⲉⲧⲙⲏⲧⲉ ⲛⲟⲩⲙⲏⲏϣⲉ ⲁⲩⲱ ⲉⲩⲉϭⲛⲡϣⲓⲛⲉ ⲛⲛⲉⲥϣⲏⲣⲉ

25 ⲛⲛⲉⲛⲉⲥϣⲏⲣⲉ ϫⲉⲛⲟⲩⲛⲉ ⲉⲃⲟⲗ ⲁⲩⲱ ⲛⲉⲛⲉⲥⲕⲗⲁⲇⲟⲥ ⲧⲁⲩⲉⲕⲁⲣⲡⲟⲥ

26 ⲥⲛⲁⲕⲁⲡⲉⲥⲣⲡⲙⲉⲉⲩⲉ ⲉⲛⲥⲁϩⲟⲩ ...

27 ⲁⲩⲱ ⲥⲉⲛⲁⲉⲓⲙⲉ ⲛϭⲓⲛⲉⲛⲧⲁⲩϣⲱϫⲡ ϫⲉⲙⲛⲡⲉⲧⲛⲁⲛⲟⲩϥ ⲉⲧϩⲟⲧⲉ ⲙⲡϫⲟⲉⲓⲥ ⲁⲩⲱ ⲙⲛⲡⲉⲧϩⲟⲗϭ ⲉϯϩⲧⲏⲕ ⲉⲛⲉϥⲉⲛⲧⲟⲗⲏ