Read Sirach 22 side by side with translations · The Final Bible
1 ⲉⲣⲉⲡⲣⲉϥϫⲛⲁⲁⲩ ⲧⲛⲧⲱⲛ ⲉⲩⲱⲛⲉ ⲉϥϩⲟⲣϣ ⲁⲩⲱ ⲟⲩⲟⲛ ⲛⲓⲙ ⲛⲁϥⲓϣⲙϣⲏϭⲉ ⲉϫⲛⲡⲉϥϣⲱⲥ
2 ⲉⲣⲉⲡⲣⲉϥϫⲛⲁⲁⲩ ⲧⲛⲧⲱⲛ ⲉⲩϩⲟⲉⲓⲣⲉ ⲛⲥⲟⲧ ... ⲉϣⲁϥⲛⲉϩⲧⲟⲟⲧϥ ⲉⲃⲟⲗ
3 ⲟⲩϣⲓⲡⲉ ⲛⲟⲩⲉⲓⲱⲧ ⲡⲉ ⲟⲩϣⲏⲣⲉ ⲛⲁⲧⲥⲃⲱ ⲧϣⲉⲉⲣⲉ ⲇⲉ ⲉⲧϩⲟⲟⲩ ⲟⲩϫⲡⲟ ⲛⲟⲩϭⲣⲱϩ ⲧⲉ
4 ⲧϣⲉⲉⲣⲉ ⲛⲥⲁⲃⲏ ⲛⲁⲕⲗⲏⲣⲟⲛⲟⲙⲉⲓ ⲙⲡⲉⲥϩⲁⲓ ⲁⲩⲱ ⲧⲣⲉϥϯϣⲓⲡⲉ ⲟⲩⲗⲩⲡⲏ ⲧⲉ ⲙⲡⲉⲥⲉⲓⲱⲧ
5 ϣⲁⲣⲉⲧⲛⲁϣⲧⲙⲙⲉ ϯϣⲓⲡⲉ ⲙⲡⲉⲥⲉⲓⲱⲧ ⲙⲛⲡⲉⲥϩⲁⲓ ⲁⲩⲱ ϣⲁⲥϫⲓⲥⲱϣ ϩⲓⲧⲟⲟⲧⲟⲩ ⲙⲡⲉⲥⲛⲁⲩ
6 ⲟⲩϣⲁϫⲉ ⲛⲁⲧⲟⲩⲟⲉⲓϣ ⲡⲉ ϩⲛⲟⲩⲗⲗⲉ ϩⲛⲟⲩϩⲏⲃⲉ ⲙⲙⲁⲥⲧⲓⲅⲝ ⲇⲉ ⲁⲩⲱ ⲧⲉⲥⲃⲱ ⲉⲩϩⲛ ⲟⲟⲩⲟⲉⲓϣ ⲛⲓⲙ ⲙⲛⲟⲩⲥⲟⲫⲓⲁ
9 ⲉⲣⲉⲡⲉⲧϯⲥⲃⲱ ⲛⲟⲩⲥⲟϭ ⲟ ⲛⲧϩⲉ ⲙⲡⲉⲧⲧⲉϭⲃⲗϫⲉ ⲉⲃⲗϫⲉ ⲁⲩⲱ ⲛⲧϩⲉ ⲙⲡⲉⲧⲧⲟⲩⲛⲟⲥ ⲙⲡⲉⲧⲛⲕⲟⲧⲕ ϩⲛⲟⲩϩⲓⲛⲏⲃ ⲉϥϩⲟⲣϣ
10 ⲉⲣⲉⲡⲉⲧϣⲁϫⲉ ⲙⲛⲟⲩⲥⲟϭ ⲟ ⲛⲧϩⲉ ⲙⲡⲉⲧϣⲁϫⲉ ⲙⲛⲟⲩⲁ ⲉϥϩⲓⲛⲏⲃ ⲁⲩⲱ ⲧϩⲁⲏ ϣⲁϥϫⲟⲟⲥ ϫⲉⲟⲩ ⲡⲉⲧϣⲟⲟⲡ
11 ⲣⲓⲙⲉ ⲉϫⲛⲟⲩⲕⲱⲱⲥ ϫⲉⲁϥⲕⲁⲡⲟⲩⲟⲉⲓⲛ ⲛⲥⲱϥ ⲁⲩⲱ ⲣⲓⲙⲉ ⲉϫⲛⲟⲩⲥⲟϭ ϫⲉⲁϥⲕⲱ ⲛⲥⲱϥ ⲛⲧⲙⲛⲧⲥⲁⲃⲉ ⲛⲁⲛⲟⲩⲣⲓⲙⲉ ⲉϫⲛⲟⲩⲕⲱⲱⲥ ϫⲉⲁϥⲙⲟⲧⲛⲉϥ ⲡⲱⲛϩ ⲇⲉ ⲙⲡⲥⲟϭ ϩⲟⲟⲩ ⲉϩⲟⲩⲉ ⲡⲉϥⲙⲟⲩ
12 ⲥⲁϣϥ ⲛϩⲟⲟⲩ ⲡⲉ ⲡϩⲏⲃⲉ ⲛⲟⲩⲕⲱⲱⲥ ⲡⲁⲡⲥⲟϭ ⲇⲉ ⲙⲛⲡⲁⲥⲉⲃⲏⲥ ⲡⲉ ⲡⲉϥⲁϩⲉ ⲧⲏⲣϥ
13 ⲙⲡⲣⲧⲁϣⲉϣⲁϫⲉ ⲙⲛⲟⲩⲥⲟϭ ⲁⲩⲱ ⲙⲡⲣⲃⲱⲕ ⲉⲣⲁⲧϥ ⲛⲟⲩⲁⲧϩⲏⲧ ⲁⲣⲉϩ ⲉⲣⲟⲕ ⲉⲣⲟϥ ϫⲉⲕⲁⲥ ⲛⲛⲉⲕϣⲡϩⲓⲥⲉ ⲁⲩⲱ ⲛⲛⲉⲕⲧⲱⲗⲙ ⲉϥϣⲁⲛⲛⲉϩϥ ⲉⲃⲟⲗ ⲥⲁϩⲱⲕ ⲉⲃⲟⲗ ⲙⲙⲟϥ ⲧⲁⲣⲉⲕϩⲉ ⲉⲩⲙⲧⲟⲛ ⲁⲩⲱ ⲛⲛⲉⲕⲙⲕⲁϩ ⲛϩⲏⲧ ϩⲛⲧⲉϥⲁⲡⲟⲛⲟⲓⲁ
14 ⲟⲩ ⲡⲉⲧϩⲟⲣϣ ⲉⲡⲧⲁϩⲧ ⲁⲩⲱ ⲟⲩ ⲡⲉ ⲡⲉϥⲣⲁⲛ ⲛⲥⲁⲥⲟϭ
15 ⲥⲙⲟⲧⲛ ⲉϥⲓ ϩⲁⲟⲩϣⲱ ⲙⲛⲟⲩϩⲙⲟⲩ ⲙⲛⲟⲩⲧⲁϭ ⲙⲡⲉⲛⲓⲡⲉ ⲉϩⲟⲩⲟ ⲉⲩⲣⲱⲙⲉ ⲛⲁⲧϩⲏⲧ
16 ⲛⲧϩⲉ ⲛⲟⲩⲗⲟϭⲗⲉϭ ⲛϣⲉ ⲉϥⲙⲏⲣ ϩⲛⲟⲩⲕⲱⲧ ⲉⲛϥⲛⲁⲕⲓⲙ ⲁⲛ ϩⲛⲟⲩⲕⲙⲧⲟ ⲧⲁⲓ ⲧⲉ ⲧϩⲉ ⲛⲟⲩϩⲏⲧ ⲉϥⲧⲁϫⲣⲏⲩ ⲉϫⲛⲟⲩⲙⲉⲉⲩⲉ ⲛϣⲟϫⲛⲉ
17 ⲙⲛⲟⲩϩⲏⲧ ⲉϥⲧⲁϫⲣⲏⲩ ⲉϫⲛⲟⲩⲙⲉⲉⲩⲉ ⲙⲙⲛⲧⲣⲙⲛⲧϩⲏⲧ ⲉⲛϥⲛⲁⲣϩⲟⲧⲉ ⲁⲛ ⲉⲛⲉϩ ⲛⲧϩⲉ ⲙⲡⲥⲁ ⲛⲟⲩϫⲟ ⲉⲥϫⲏϩ
18 ⲏ ⲛⲧϩⲉ ⲛϩⲛⲕⲁϣ ⲉⲩϩⲓϫⲛ ⲟⲩⲙⲁ ⲉϥϫⲟⲥⲉ ⲉⲛⲛⲉⲩϭⲱ ⲛⲛⲁϩⲣⲛⲧⲏⲩ ⲛⲓⲙ ⲧⲁⲓ ⲧⲉ ⲧϩⲉ ⲛⲟⲩϩⲏⲧ ⲛϭⲱⲃ ϩⲛⲟⲩⲙⲉⲉⲩⲉ ⲛⲥⲟϭ ⲉⲛⲛⲉϥϭⲱ ⲛⲛⲁϩⲣⲛϩⲟⲧⲉ ⲛⲓⲙ
19 ⲡⲉⲧⲛⲁⲧⲃⲥⲟⲩⲃⲁⲗ ϥⲛⲁⲑⲉⲓⲉϩⲉⲛⲣⲙⲉⲓⲏ ⲁⲩⲱ ⲡⲉⲧⲛⲁⲧⲃⲥⲟⲩϩⲏⲧ ϥⲛⲁⲟⲩⲱⲛϩ ⲉⲃⲟⲗ ⲛⲟⲩⲁⲓⲥⲑⲏⲥⲓⲥ
20 ⲡⲉⲧⲛⲁⲛⲉϫⲟⲩⲱⲛⲉ ⲉϩⲛϩⲁⲗⲏⲧ ϥⲛⲁⲛⲟϣⲡⲟⲩ ⲉⲃⲟⲗ ⲁⲩⲱ ⲡⲉⲧⲛⲁⲛⲉϭⲛⲉϭⲡⲉϥϣⲃⲏⲣ ϥⲛⲁⲃⲱⲗ ⲉⲃⲟⲗ ⲛⲧⲉϥⲙⲛⲧϣⲃⲏⲣ
21 ⲉⲕϣⲁⲛⲣⲡⲕⲉⲧⲉⲕⲙⲧⲉⲕⲥⲏϥⲉ ⲉϫⲛⲡⲉⲕϣⲃⲏⲣ ⲙⲡⲣⲉⲓⲁⲧⲟⲟⲧⲕ ⲛⲥⲱϥ ⲟⲩⲛⲧϩⲉ ⲅⲁⲣ ⲉⲧⲣⲉⲛⲕⲟⲧⲕ ⲉⲣⲟϥ
22 ⲉⲕϣⲁⲛⲟⲩⲱⲛ ⲛⲣⲱⲕ ⲉϫⲙⲡⲉⲕϣⲃⲏⲣ ⲙⲡⲣⲣϩⲟⲧⲉ ⲟⲩⲛⲧϩⲉ ⲅⲁⲣ ⲛϩⲱⲧⲡ ⲉⲣⲟϥ ϣⲁⲧⲛ ⲛⲉϭⲛⲟⲩϭϥ ⲁⲩⲱ ⲉϫⲓⲥⲉ ⲛϩⲏⲧ ⲉϫⲱϥ ⲁⲩⲱ ⲉϭⲗⲡⲡⲉϥⲙⲩⲥⲧⲏⲣⲓⲟⲛ ⲉⲃⲟⲗ ⲁⲩⲱ ⲉⲣⲟⲩⲡⲗⲏⲅⲏ ⲉⲣⲟϥ ⲛⲕⲣⲟϥ ϣⲃⲏⲣ ⲛⲓⲙ ⲛⲁⲕⲁⲁⲕ ⲉⲧⲃⲉⲛⲁⲓ
23 ϫⲡⲟ ⲛⲁⲕ ⲛⲟⲩⲛⲁϩⲧⲉ ⲙⲛⲡⲉⲕϣⲃⲏⲣ ϩⲛⲧⲉϥⲙⲛⲧϩⲏⲕⲉ ϫⲉⲉⲕⲉⲉⲩⲫⲣⲁⲛⲉ ϩⲛⲛⲉϥⲁⲅⲁⲑⲟⲛ ⲙⲟⲩⲛ ⲉⲃⲟⲗ ⲛⲉⲙⲁϥ ϩⲙⲡⲉⲟⲩⲟⲉⲓϣ ⲛⲛⲉϥⲑⲗⲓⲯⲓⲥ ϫⲉⲉⲕⲉⲕⲗⲏⲣⲟⲛⲟⲙⲉⲓ ⲛⲙⲙⲁϥ ϩⲛⲧⲉϥⲕⲗⲏⲣⲟⲛⲟⲙⲓⲁ
24 ⲛⲧϩⲉ ⲉⲧⲉⲣⲉⲟⲩⲗϩⲱⲃ ⲛϩⲣⲱ ⲙⲛⲟⲩⲕⲁⲡⲛⲟⲥ ⲡⲃⲟⲗ ⲛⲟⲩⲕⲱϩⲧ ⲧⲁⲓ ⲧⲉ ⲧϩⲉ ϩⲛⲥⲁϩⲟⲩ ⲛⲉⲧϩⲁⲧϩⲏ ⲙⲡⲉϩⲧⲥⲛⲟϥ ⲉⲃⲟⲗ
25 ⲛϯⲛⲁϣⲓⲡⲉ ⲁⲛ ⲉϩⲉⲡⲡⲁϣⲃⲏⲣ ⲁⲩⲱ ⲛⲛⲁϩⲟⲡⲧ ϩⲏⲧϥ
26 ⲕⲁⲛ ⲉϣⲱⲡⲉ ⲟⲩⲛϩⲛⲡⲉⲧϩⲟⲟⲩ ⲛⲁⲧⲁϩⲟⲓ ⲉⲧⲃⲏⲧϥ ⲟⲩⲟⲛ ⲛⲓⲙ ⲉⲧⲛⲁⲥⲱⲧⲙ ⲛⲁⲁⲣⲉϩ ⲉⲣⲟϥ ⲉⲣⲟϥ
27 ⲛⲓⲙ ⲡⲉⲧⲛⲁϯ ⲛⲁⲓ ⲛⲟⲩⲁⲣⲉϩ ⲉⲣⲛ ⲣⲱⲓ ⲁⲩⲱ ⲟⲩⲥⲫⲣⲁⲅⲓⲥ ⲙⲙⲛⲧⲣⲙⲛⲧϩⲏⲧ ⲉϫⲛⲛⲁⲥⲡⲟⲧⲟⲩ ϫⲉⲕⲁⲁⲥ ⲉⲛⲛⲁϩⲉ ϩⲛⲣⲱⲓ ⲁⲩⲱ ⲛⲧⲉⲡⲁⲗⲁⲥ ⲧⲁⲕⲟⲓ
Sirach 21 · Sirach 23 · Greek (Septuagint / SBLGNT) · Aramaic (Peshitta) · Latin (Vulgate)