Read Sirach 21 side by side with translations · The Final Bible
1 ⲡⲁϣⲏⲣⲉ ⲁⲕⲣⲛⲟⲃⲉ ⲙⲡⲣⲟⲩⲱϩ ⲉⲧⲟⲟⲧⲕ ⲁⲩⲱ ⲥⲟⲡⲥ ϩⲁⲛⲉⲕⲛⲟⲃⲉ ⲛϣⲟⲣⲡ
2 ⲡⲱⲧ ⲉⲃⲟⲗ ⲙⲡⲛⲟⲃⲉ ⲛⲧϩⲉ ⲙⲡⲉⲧⲡⲏⲧ ϩⲏⲧϥ ⲛⲟⲩϩⲟϥ ⲉϥϣⲁⲛϯ ⲙⲡⲉⲕⲟⲩⲟⲓ ⲉϩⲟⲩⲛ ⲉⲣⲟϥ ϥⲛⲁⲗⲟⲕⲥⲕ ϩⲛⲛⲁϫϩⲉ ⲙⲙⲟⲩⲓ ⲛⲉ ⲛⲉϥⲛⲁϫϩⲉ
3 ⲉⲣⲉⲁⲛⲟⲙⲓⲁ ⲛⲓⲙ ⲟ ⲛⲧϩⲉ ⲛⲟⲩⲥⲏϥⲉ ⲛϩⲟ ⲥⲛⲁⲩ ⲉⲙⲛⲧⲁⲗϭⲟ ϩⲛⲧⲉⲥⲡⲗⲏⲅⲏ
4 ϣⲁⲣⲉⲟⲩⲛⲟⲩϣⲥ ⲙⲛⲟⲩⲥⲱϣ ϣⲉϥⲟⲩⲙⲛⲧⲣⲙⲙⲁⲟ ⲧⲁⲓ ⲧⲉ ⲧϩⲉ ⲉⲣⲉⲡⲏⲓ ⲛⲛϫⲁⲥⲓϩⲏⲧ ⲛⲁϣⲱϥ ⲙⲙⲟⲥ {ⲁⲩⲱ ...}
5 ⲡⲥⲟⲡⲥ ⲙⲡϩⲏⲕⲉ ϫⲓⲛⲣⲱϥ ⲡⲉ ϣⲁⲛⲉϥⲙⲁⲁϫⲉ ⲁⲩⲱ ⲡⲉϥϩⲁⲡ ⲛⲛⲏⲩ ϩⲛⲟⲩϭⲉⲡⲏ
6 ⲉϥⲙⲟⲥⲧⲉ ⲙⲡⲉⲧϫⲡⲓⲟ ϩⲙⲡⲟⲩⲱⲛϩ ⲉⲃⲟⲗ ⲙⲡⲣⲉϥⲣⲛⲟⲃⲉ ⲁⲩⲱ ⲡⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲛⲁⲕⲧⲉⲡⲉϥϩⲏⲧ
7 ⲡⲇⲩⲛⲁⲧⲟⲥ ϩⲙⲡⲉϥⲗⲁⲥ ⲟⲩⲟⲛϩ ⲉⲃⲟⲗ ⲙⲡⲟⲩⲉ ⲡⲣⲉϥⲛⲟⲓ ⲇⲉ ⲉⲓⲙⲉ ⲉϥϣⲁⲛⲥⲗⲁⲁⲧⲉ
8 ⲉⲣⲉⲡⲉⲧⲕⲱⲧ ⲙⲡⲉϥⲏⲓ ϩⲛϩⲛⲭⲣⲏⲙⲁ ⲉⲛⲛⲟⲩϥ ⲁⲛ ⲛⲉ ⲉϥⲟ ⲛⲧϩⲉ ⲙⲡⲉⲧⲥⲱⲟⲩϩ ⲉϩⲟⲩⲛ ⲛϩⲛⲱⲛⲉ ⲉⲩⲭⲓⲙⲱⲛ
9 ⲟⲩⲗⲁⲥ ⲉϥϩⲟⲟⲩ ⲡⲉ ⲧⲥⲩⲛⲁⲅⲱⲅⲏ ⲛⲛⲁⲛⲟⲙⲟⲥ ⲁⲩⲱ ⲧⲉⲩϩⲁⲏ ⲡⲉ ⲟⲩϣⲁϩ ⲛⲕⲱϩⲧ
10 ⲧⲉϩⲓⲏ ⲛⲛⲣⲉϥⲣⲛⲟⲃⲉ ⲟⲩⲉⲃⲟⲗ ⲧⲉ ϩⲛϩⲛⲱⲛⲉ ⲉⲥⲥⲏϣ ⲁⲩⲱ ⲧⲉⲥϩⲁⲏ ⲡⲉ ⲡⲉϩⲓⲉⲓⲧ ⲛⲁⲙⲛⲧⲉ
11 ⲡⲉⲧⲁⲣⲉϩ ⲉⲡⲛⲟⲙⲟⲥ ⲛⲁⲁⲙⲁϩⲧⲉ ⲛⲛⲉϥⲙⲉⲉⲩⲉ ⲁⲩⲱ ⲧⲉϥϩⲁⲏ ⲡⲉ ⲧϩⲟⲧⲉ ⲙⲡϫⲟⲉⲓⲥ
12 ⲙⲁⲣⲉⲡⲁⲧϩⲏⲧ ϫⲓⲥⲃⲱ ⲟⲩⲛⲟⲩⲙⲛⲧⲣⲙⲛϩⲏⲧ ⲇⲉ ⲉϣⲁⲥⲧⲁϣⲉⲡⲓⲕⲣⲓⲁ
13 ⲡⲥⲟⲟⲩⲛ ⲛⲟⲩⲥⲟⲫⲟⲥ ⲛⲁⲁϣⲁⲓ ⲛⲧϩⲉ ⲛⲟⲩⲕⲁⲧⲁⲕⲗⲩⲥⲙⲟⲥ ⲁⲩⲱ ⲉⲣⲉⲡⲉϥϣⲟϫⲛⲉ ⲟ ⲛⲧϩⲉ ⲛⲟⲩⲡⲏⲅⲏ ⲛⲱⲛϩ
14 ⲉⲣⲉⲛⲥⲁ ⲛϩⲟⲩⲛ ⲛⲟⲩⲥⲟϭ ⲟ ⲛⲧϩⲉ ⲛⲟⲩϩⲛⲁⲁⲩ ⲉϥⲟⲩⲟϣϥ ⲉⲛⲛⲉϥⲉϣⲁⲙⲁϩⲧⲉ ⲛⲥⲟⲟⲩⲛ ⲛⲓⲙ
15 ⲉⲣϣⲁⲛⲟⲩⲥⲁⲃⲉ ⲥⲉⲧⲙⲟⲩϣⲁϫⲉ ⲙⲙⲛⲧⲣⲙⲛⲧϩⲏⲧ ϣⲁϥⲧⲁⲉⲓⲟϥ ⲛϥⲟⲩⲱϩ ⲉⲣⲟϥ ϣⲁⲣⲉⲡⲉⲧⲥⲡⲁⲧⲁⲗⲁ ⲇⲉ ⲥⲟⲧⲙⲉϥ ⲙⲁϥⲣⲁⲛⲁϥ ⲁⲩⲱ ϣⲁϥⲛⲟϫϥ ϩⲓⲡⲁϩⲟⲩ ⲙⲙⲟϥ
16 ⲉⲣⲉⲡϣⲁϫⲉ ⲛⲟⲩⲥⲟϭ ⲟ ⲛⲧϩⲉ ⲛⲟⲩⲉⲧⲡⲱ ϩⲓⲟⲩϩⲓⲏ ϣⲁⲩϩⲉ ⲇⲉ ⲉⲩⲭⲁⲣⲓⲥ ϩⲓⲛⲉⲥⲡⲟⲧⲟⲩ ⲙⲡⲥⲁⲃⲉ
17 ϣⲁⲩϣⲓⲛⲉ ⲛⲥⲁⲧⲧⲁⲡⲣⲟ ⲛⲟⲩⲥⲁⲃⲉ ϩⲛⲟⲩⲙⲏⲏϣⲉ ⲁⲩⲱ ϣⲁⲩⲙⲉⲕⲙⲟⲩⲕⲟⲩ ⲉⲛⲉϥϣⲁϫⲉ ϩⲙⲡⲉⲩϩⲏⲧ
18 ⲛⲧϩⲉ ⲛⲟⲩⲏⲓ ⲉϥⲧⲁⲕⲏⲩ ⲧⲁⲓ ⲧⲉ ⲧϩⲉ ⲛⲧⲥⲟⲫⲓⲁ ⲛⲛⲥⲟϭ ⲁⲩⲱ ϩⲛϣⲁϫⲉ ⲉⲙⲡⲟⲩϫⲛϫⲱⲛⲟⲩ ⲛⲉ ⲡⲥⲟⲟⲩⲛ ⲛⲟⲩⲥⲟϭ
19 ⲉⲣⲉⲧⲉⲥⲃⲱ ⲛⲟⲩⲥⲟϭ ⲟ ⲛⲧϩⲉ ⲛⲛⲓⲡⲁⲓⲇⲉⲥ ϩⲛⲛⲉϥⲟⲩⲉⲣⲏⲧⲉ ⲁⲩⲱ ⲛⲧϩⲉ ⲛⲛⲓⲡⲁⲓⲇⲉⲥ ϩⲛⲧⲉϥϭⲓϫ ⲛⲟⲩⲛⲁⲙ
20 ϣⲁⲣⲉⲟⲩⲥⲟϭ ......... ⲟⲩⲣⲱⲙⲉ ⲇⲉ ⲛⲥⲁⲃⲉ ⲙⲟⲅⲓⲥ ⲛϥⲛⲉⲧϥ
21 ⲉⲣⲉⲧⲉⲥⲃⲱ ⲟ ⲛⲧϩⲉ ⲛⲟⲩⲕⲟⲥⲙⲟⲥ ⲛⲛⲟⲩⲃ ⲙⲡⲥⲁⲃⲉ ⲁⲩⲱ ⲛⲧϩⲉ ⲛϩⲛⲧⲱⲧⲉ ϩⲓϫⲛⲟⲩϭⲃⲟⲓ ⲛⲟⲩⲛⲁⲙ
22 ϣⲁⲣⲉⲛⲟⲩⲉⲣⲏⲧⲉ ⲙⲡⲥⲟϭ ϭⲉⲡⲏ ⲉϩⲟⲩⲛ ⲉⲡⲏⲓ ϣⲁⲣⲉⲟⲩⲣⲱⲙⲉ ⲇⲉ ⲉϥⲧⲥⲁⲃⲏⲩ ϣⲓⲡⲉ ϩⲏⲧϥ ⲛⲛⲣⲱⲙⲉ
23 ϣⲁⲣⲉⲡⲁⲧϩⲏⲧ ⲥⲟⲩⲧⲛϫⲱϥ ⲉϩⲟⲩⲛ ⲙⲡⲣⲟ ⲙⲡⲏⲓ ⲟⲩⲣⲱⲙⲉ ⲇⲉ ⲉϥⲧⲥⲁⲃⲏⲩ ϣⲁϥⲱϩⲉⲣⲁⲧϥ ϩⲓⲣⲛ ⲡⲣⲟ
24 ⲟⲩⲙⲛⲧⲁⲧⲥⲃⲱ ⲛⲟⲩⲣⲱⲙⲉ ⲡⲉ ϫⲓⲥⲙⲏ ϩⲓⲣⲛ ⲟⲩⲣⲟ ⲡⲥⲁⲃⲉ ⲇⲉ ⲛⲧⲟϥ ϣⲁϥϥⲓ ϩⲁⲡⲉϥϣⲱⲥ
25 ⲛⲉⲥⲡⲟⲧⲟⲩ ⲛϩⲁϩ ⲛⲁϣⲁϫⲉ ⲉⲣⲟϥ ⲉⲣⲉⲛϣⲁϫⲉ ⲛⲛⲥⲟⲫⲟⲥ ϣⲏⲩ ϩⲛⲟⲩⲙⲁϣⲉ
26 ⲉⲣⲉⲡϩⲏⲧ ⲛⲟⲩⲥⲟϭ ϩⲛⲧⲉϥⲧⲁⲡⲣⲟ ⲡϩⲏⲧ ⲇⲉ ⲛⲛⲥⲁⲃⲉ ⲡⲉ ⲣⲣⲱⲟⲩ
27 ϩⲙⲡⲧⲣⲉⲡⲁⲥⲉⲃⲏⲥ ⲥⲁϩⲟⲩ ⲙⲡⲥⲁⲧⲁⲛⲁⲥ ⲉϥⲥⲁϩⲟⲩ ⲛⲧⲉϥⲯⲩⲭⲏ ⲙⲙⲓⲛⲙⲙⲟϥ
28 ⲡⲣⲉϥⲕⲁⲥⲕⲥ ⲛⲁⲧⲱⲗⲙ ⲛⲧⲉϥⲯⲩⲭⲏ ⲁⲩⲱ ⲥⲉⲛⲁⲙⲉⲥⲧⲱϥ ϩⲙⲡⲉϥⲙⲁ ⲛϭⲟⲉⲓⲗⲉ
Sirach 20 · Sirach 22 · Greek (Septuagint / SBLGNT) · Aramaic (Peshitta) · Latin (Vulgate)