Sirach 20 — Coptic (Sahidic)

1 ⲟⲩⲛϫⲡⲓⲟ ⲉⲛⲉⲥⲱϥ ⲁⲛ ⲁⲩⲱ ⲟⲩⲛⲡⲉⲧⲕⲱ ⲛⲣⲱϥ ⲉⲩⲥⲁⲃⲉ ⲡⲉ

2 ⲉϣϫⲉ ⲛⲁⲛⲟⲩϫⲡⲓⲟ ⲉϩⲟⲩⲟ ⲉϭⲱⲛⲧ

3 ⲁⲩⲱ ⲡⲉⲧⲣϩⲧⲏϥ ⲛⲁⲁⲙⲁϩⲧⲉ ⲙⲙⲟϥ ⲉⲡⲛⲟⲃⲉ

4 ⲛⲧϩⲉ ⲛⲧⲉⲡⲓⲑⲩⲙⲓⲁ ⲛⲟⲩⲥⲓⲟⲩⲣ ⲉⲣⲟⲩⲡⲁⲣⲑⲉⲛⲟⲥ ⲛⲥϩⲓⲙⲉ ⲧⲁⲓ ⲧⲉ ⲧϩⲉ ⲙⲡⲉⲧⲉⲓⲣⲉ ⲛⲛⲉϩⲃⲏⲩⲉ ⲛϭⲟⲛⲥ

5 ⲟⲩⲛⲡⲉⲧⲕⲱ ⲛⲣⲱϥ ⲉϣⲁⲩϩⲉ ⲉⲣⲟϥ ⲛⲥⲁⲃⲉ ⲁⲩⲱ ⲟⲩⲛⲡⲉϣⲁⲩⲙⲉⲥⲧⲱϥ ⲉⲧⲃⲉⲧⲉϥⲙⲛⲧϩⲁϩ ⲛϣⲁϫⲉ

6 ⲟⲩⲛⲡⲉⲧⲕⲱ ⲛⲣⲱϥ ⲉⲙⲛⲧϥϣⲁϫⲉ ⲙⲙⲁⲩ ⲉϫⲱ ⲁⲩⲱ ⲟⲩⲛⲡⲉⲧⲕⲱ ⲛⲣⲱϥ ⲉϥϭⲱϣⲧ ⲉⲡⲉⲟⲩⲟⲉⲓϣ ⲛϣⲁϫⲉ

7 ⲟⲩⲣⲱⲙⲉ ⲛⲥⲁⲃⲉ ϣⲁϥⲕⲁⲣⲱϥ ϣⲁⲡⲉⲟⲩⲟⲉⲓϣ ϣⲁϥⲣⲉⲟⲩⲟⲉⲓϣ

8 ⲡⲉⲧⲟ ⲛϩⲁϩ ⲛϣⲁϫⲉ ϣⲁⲩϥⲱⲧⲉ ⲁⲩⲱ ⲡⲉϯⲣⲉ ⲙⲡⲉϥϩⲧⲟⲣ ⲥⲉⲛⲁⲙⲉⲥⲧⲱϥ

9 ⲟⲩⲛⲟⲩⲥⲟⲟⲩⲧⲛ ⲙⲡⲣⲱⲙⲉ ϩⲛⲛⲉϥⲡⲉⲧⲛⲁⲛⲟⲩⲟⲩ ⲁⲩⲱ ⲟⲩⲛⲟⲩϭⲓⲛⲉ ϣⲟⲟⲡ ⲉⲩϣⲱⲱⲧ ⲡⲉ

10 ⲁⲩⲱ ⲟⲩⲛⲟⲩϯ ⲉⲛϥⲣⲛⲟϥⲣⲉ ⲛⲁⲕ ⲁⲛ ⲁⲩⲱ ⲟⲩⲛⲟⲩϯ ⲉⲣⲉⲡⲉϥⲧⲱⲱⲃⲉ ⲕⲏⲃ

11 ⲟⲩⲛⲡⲉⲧⲣϭⲣⲱϩ ϫⲉⲁⲩϯⲉⲟⲟⲩ ⲛⲁϥ ⲁⲩⲱ ⲟⲩⲛⲡⲉⲛⲧⲁϥϫⲓⲥⲉ ⲉⲃⲟⲗ ϩⲙⲡⲉϥⲑⲃⲃⲓⲟ

12 ⲟⲩⲛⲡⲉⲧϣⲉⲡϩⲁϩ ϩⲁⲟⲩⲕⲟⲩⲓ ⲁⲩⲱ ⲛϥⲧⲟⲟⲃⲟⲩ ⲛⲥⲁϣϥ ⲛⲕⲱⲃ

13 ⲡⲥⲟⲫⲟⲥ ϩⲛⲛⲉϥϣⲁϫⲉ ϣⲁϥⲧⲣⲉⲩⲙⲉⲣⲓⲧϥ ⲛⲉⲭⲁⲣⲓⲥ ⲇⲉ ⲛⲛⲥⲟϭ ⲛⲁⲡⲱⲱⲛⲉ ⲉⲃⲟⲗ

14 ⲙⲛϯ ⲛⲁⲧϩⲏⲧ ⲛⲁⲣⲛⲟϥⲣⲉ ⲛⲁⲕ ϩⲁϩ ⲅⲁⲣ ⲛⲉ ⲛⲉϥⲃⲁⲗ ⲉⲡⲙⲁ ⲛⲟⲩⲁ

15 ϥⲛⲁϯ ⲛⲁⲕ ⲛϩⲉⲛⲕⲟⲩⲓ ⲛϥϫⲡⲓⲟⲕ ⲉⲙⲁⲧⲉ ⲛϥⲟⲩⲏⲛ ⲛⲣⲱϥ ⲉϫⲱⲕ ⲛⲧϩⲉ ⲛⲟⲩⲕⲏⲣⲩⲝ ϥⲛⲁϯⲛⲁⲕⲥⲉ ⲙⲡϩⲟⲟⲩ ⲛϥⲧⲟⲕⲥⲉ ⲛⲣⲁⲥⲧⲉ ⲟⲩⲙⲉⲥⲧⲉ ⲡⲉ ⲡⲉⲓⲣⲱⲙⲉ ⲛⲧⲉⲓϩⲉ

16 ϣⲁⲣⲉⲡⲥⲟϭ ϫⲟⲟⲥ ϫⲉⲙⲛϯϣⲃⲏⲣ ⲁⲩⲱ ⲙⲛϩⲙⲟⲧ ϣⲟⲟⲡ ⲛⲛⲁⲡⲉⲧⲛⲁⲛⲟⲩⲟⲩ

17 ⲉⲩϩⲟⲟⲩ ϩⲛⲛⲉⲩⲗⲁⲥ ⲛϭⲓⲛⲉⲧⲟⲩⲱⲙ ⲛⲛⲁⲟⲉⲓⲕ ϩⲁϩ ⲛⲥⲟⲡ ⲟⲩⲛⲟⲩⲙⲏⲏϣⲉ ⲛⲁⲥⲱⲃⲉ ⲛⲥⲱϥ

18 ⲛⲁⲛⲟⲩ...ⲙⲡⲕⲁϩ ⲉϩⲟⲩⲟ ⲉ...ⲗⲁⲥ ⲧⲁⲓ ⲧⲉ ⲧϩⲉ ⲉⲧⲉⲣⲉⲡⲉϩⲧⲟⲡ ⲛⲛⲉⲧϩⲟⲟⲩ ⲛⲏⲩ ϩⲛⲟⲩϭⲉⲡⲏ

19 ⲟⲩⲣⲱⲙⲉ ⲛⲁⲧϩⲙⲟⲧ ⲟⲩϣⲁϫⲉ ⲡⲉ ⲛⲁⲧⲟⲩⲟⲉⲓϣ ⲉϥⲛⲁⲁϣⲁⲓ ϩⲛⲣⲱⲟⲩ ⲛⲛⲁⲧⲥⲃⲱ

20 ϣⲁⲩⲥⲧⲟ ⲉⲃⲟⲗ ⲛⲧⲡⲁⲣⲁⲃⲟⲗⲏ ϩⲛⲣⲱϥ ⲙⲡⲥⲟϭ ⲛⲛⲉϥϫⲟⲟⲥ ⲅⲁⲣ ⲙⲡⲉⲥⲟⲩⲟⲉⲓϣ

21 ⲟⲩⲛⲡⲉⲧⲉⲛϥⲣⲛⲟⲃⲉ ⲁⲛ ⲉⲧⲃⲉⲧⲉϥⲙⲛⲧϩⲏⲕⲉ

22 ⲟⲩⲛⲡⲉϣⲁϥⲥⲉⲣⲙⲧⲉϥⲯⲩⲭⲏ ⲉⲧⲃⲉϣⲓⲡⲉ ⲁⲩⲱ ⲛϥⲧⲁⲕⲟ ⲉⲧⲃⲉϫⲓϩⲟ

23 ⲟⲩⲛⲡⲉϣⲁϥⲉⲣⲏⲧ ⲙⲡⲉϥϣⲃⲏⲣ ⲉⲧⲃⲉⲡϣⲓⲡⲉ

24 ⲟⲩϫⲃⲓⲛ ⲉϥϩⲟⲟⲩ ⲡⲉ ⲡϭⲟⲗ ϩⲙⲡⲣⲱⲙⲉ ⲉϥⲛⲁⲁϣⲁⲓ ϩⲛⲧⲧⲁⲡⲣⲟ ⲛⲛⲁⲧⲥⲃⲱ

25 ⲛⲁⲛⲟⲩⲟⲩⲣⲉϥϩⲱϥⲧ ⲉϩⲟⲩⲉ ⲟⲩⲣⲉϥⲁϣⲁⲓ ⲛϫⲓϭⲟⲗ ⲉⲩⲛⲁⲕⲗⲏⲣⲟⲛⲟⲙⲉⲓ ⲇⲉ ⲙⲡⲧⲁⲕⲟ ⲙⲡⲉⲥⲛⲁⲩ

26 ⲟⲩⲥⲱϣ ⲡⲉ ⲡϩⲏⲧ ⲙⲡⲣⲱⲙⲉ ⲛⲣⲉϥϫⲓϭⲟⲗ ⲁⲩⲱ ⲡⲉϥϣⲓⲡⲉ ⲟϣ ⲛⲉⲙⲁϥ

27 ϣⲁⲣⲉⲡⲥⲟⲫⲟⲥ ϩⲛⲛⲉϥϣⲁϫⲉ ϩⲟⲛϥ ⲉϩⲟⲩⲛ ⲁⲩⲱ ⲟⲩⲣⲱⲙⲉ ⲛⲥⲁⲃⲉ ϣⲁϥⲁⲣⲉⲥⲕⲉ ⲛ...

28 ⲡⲉⲧⲣϩⲱⲃ ⲉⲡⲉϥⲕⲁϩ ϥ......... ⲁⲩⲱ ⲡⲉⲧⲁⲣⲉⲥⲕⲉ ⲛϩⲛⲁ... ⲉϥⲛⲁⲣ... ⲉϫⲓⲛϭⲟⲛⲥ

29 ⲛⲧⲁⲉⲓⲟ ⲙⲛⲛⲇⲱⲣⲟⲛ ϣⲁⲩⲧⲟⲙⲛⲃⲁⲗ ⲛⲛⲥⲟⲫⲟⲥ ⲁⲩⲱ ϣⲁⲩⲕⲧⲟ ⲉⲃⲟⲗ ⲛⲟⲩϫⲡⲓⲟ ⲛⲧϩⲉ ⲛⲟⲩϣⲧⲟⲃ ⲉϥϩⲛ ⲟⲩⲧⲁⲡⲣⲟ

30 ⲟⲩⲥⲟⲫⲓⲁ ⲉⲥϩⲏⲡ ⲙⲛⲟⲩⲁϩⲟ ⲉⲛϥⲟⲩⲟⲛϩ ⲉⲃⲟⲗ ⲁⲛ ⲟⲩ ⲡⲉ ⲡⲉⲩϩⲏⲩ ⲙⲡⲉⲥⲛⲁⲩ

31 ⲛⲁⲛⲟⲩⲟⲩⲣⲱⲙⲉ ⲉϥϩⲱⲡ ⲛⲧⲉϥⲙⲛⲧⲥⲟϭ ⲉϩⲟⲩⲟ ⲉⲟⲩⲁ ⲉϥϩⲱⲡ ⲛⲧⲉϥⲙⲛⲧⲥⲁⲃⲉ .