Read Sirach 19 side by side with translations · The Final Bible
1 ⲟⲩⲉⲣⲅⲁⲧⲏⲥ ⲛⲣⲉϥϯϩⲉ ϥⲛⲁⲣⲣⲙⲙⲁⲟ ⲁⲛ ⲡⲉⲧϣⲱⲥ ⲛⲛⲉⲓϣⲁϫⲉ ϥⲛⲁϩⲉ ϣⲏⲙ ϣⲏⲙ
2 ϣⲁⲣⲉⲏⲣⲡ ϩⲓⲥϩⲓⲙⲉ ⲡⲉϣⲥⲛⲥⲁⲃⲉ ⲁⲩⲱ ⲡⲉⲧⲧⲱϭⲉ ⲙⲙⲟϥ ⲉⲡⲟⲣⲛⲏ ϥⲛⲁⲣⲧⲟⲗⲙⲏⲣⲟⲥ
3 ϩⲛⲗⲟϥⲗⲉϥ ⲙⲛϩⲉⲛϥⲛⲧ ⲛⲉⲧⲛⲁⲕⲗⲏⲣⲟⲛⲟⲙⲉⲓ ⲙⲙⲟϥ ⲧⲉⲯⲩⲭⲏ ⲛⲛⲧⲟⲗⲙⲏⲣⲟⲥ ⲛⲁⲧⲁⲕⲟ
4 ⲁⲩⲱ ⲡⲉϣⲁϥⲛⲁϩⲧⲉ ϩⲛⲟⲩϭⲉⲡⲏ ϥⲁⲥⲱⲟⲩ ϩⲙⲡⲉϥϩⲏⲧ ⲡⲉⲧⲣⲛⲟⲃⲉ ⲉϩⲟⲩⲛ ⲉⲧⲉϥⲯⲩⲭⲏ ϥⲛⲁⲣϩⲧⲏϥ
5 ⲡⲉⲧⲉⲩⲫⲣⲁⲛⲉ ......ϫ...
6 ⲡⲉⲧⲙⲉⲥⲧⲉ(?) ⲛⲣϩⲁϩ ⲛϣⲁϫⲉ ϥⲛⲁ...
7 ⲙⲡⲣ...ⲟⲩϣⲁϫⲉ ⲉⲛⲉϩ ⲁⲩⲱ ⲛⲕⲛⲁϣⲱⲱⲧ ⲁⲛ ⲛⲗⲁⲁⲩ
8 ⲙⲡⲣϣⲁϫⲉ ϩⲛⲧⲙⲏⲧⲉ ⲛⲟⲩϣⲃⲏⲣ ⲙⲛⲟⲩϫⲁϫⲉ ⲁⲩⲱ ⲉϣϫⲉ ⲙⲛⲧⲕⲛⲟⲃⲉ ⲙⲡⲣⲟⲩⲟⲛϩ(?) ⲉⲃⲟⲗ
9 ϥⲛⲁⲥⲱⲧⲙ ⲅⲁⲣ ⲉⲣⲟⲕ ⲛϥϯϩⲧⲏϥ ⲉⲣⲟⲕ ⲁⲩⲱ ⲛⲉϥⲙⲉⲥⲧⲱⲕ ϩⲛⲟⲩⲟⲩⲟⲉⲓϣ
10 ⲁⲕⲥⲱⲧⲙ ⲉⲩϣⲁϫⲉ ⲙⲁⲣⲉϥⲙⲟⲩ ⲛⲙⲙⲁⲕ ⲧⲱⲕ ⲙⲙⲟⲕ ⲛⲛⲉϥⲣⲁϩⲧⲕ
11 ϣⲁⲣⲉⲡⲥⲟϭ ϯⲛⲁⲁⲕⲉ ⲛⲛⲁϩⲣⲛⲡϣⲁϫⲉ ⲛⲧϩⲉ ⲛⲧⲉⲧⲛⲁⲙⲓⲥⲉ ⲛⲛⲁϩⲣⲛⲡⲉⲥϣⲏⲣⲉ
12 ⲛⲧϩⲉ ⲛⲟⲩⲥⲟⲧⲉ ⲉϥⲧⲣⲧⲱⲣ ϩⲛⲟⲩⲙⲏⲣⲟⲥ ⲛⲥⲁⲣⲝ ⲧⲁⲓ ⲧⲉ ⲧϩⲉ ⲛⲟⲩϣⲁϫⲉ ϩⲛⲧϩⲏ ⲛⲟⲩⲥⲟϭ
13 ϫⲡⲓⲉⲡⲉⲕϣⲃⲏⲣ ϫⲉⲙⲉϣⲁϥ ⲙⲡϥⲁⲁⲥ ⲁⲩⲱ ⲉϣϫⲉ ⲁϥⲁⲁⲥ ϫⲉⲛⲉϥⲟⲩⲁϩⲙⲉϥ
14 ϫⲡⲓⲉⲡⲉⲕϣⲃⲏⲣ ϫⲉⲙⲉϣⲁϥ ⲙⲡϥϫⲟⲟⲥ ⲉϣϫⲉ ⲁϥϫⲟⲟⲥ ϫⲉⲛⲉϥⲟⲩⲁϩⲙⲉϥ
15 ϫⲡⲓⲉⲡⲉⲕϣⲃⲏⲣ ϫⲉϣⲁⲣⲉⲇⲓⲁⲃⲟⲗⲏ ⲅⲁⲣ ϣⲱⲡⲉ ⲛϩⲁϩ ⲛⲥⲟⲡ ⲁⲩⲱ ⲙⲡⲣⲧⲁⲛϩⲉⲧϣⲁϫⲉ ⲛⲓⲙ
16 ⲟⲩⲛⲡⲉϣⲁϥⲥⲗⲁⲁⲧⲉ ⲉⲛⲧⲁϥⲁⲁⲥ ⲁⲛ ϩⲙⲡⲉϥϩⲏⲧ
17 ϫⲡⲓⲉⲡⲉⲕϣⲃⲏⲣ ⲉⲙⲡⲁⲧⲕⲛⲟⲩϭⲥ ⲉⲣⲟϥ ⲁⲩⲱ ⲛⲅϯⲡⲙⲁ ⲙⲡⲛⲟⲙⲟⲥ ⲙⲡⲉⲧϫⲟⲥⲉ
20 ⲥⲟⲫⲓⲁ ⲛⲓⲙ ⲡⲉ ⲧϩⲟⲧⲉ ⲙⲡϫⲟⲉⲓⲥ ⲁⲩⲱ ⲡⲓⲣⲉ ⲙⲡⲛⲟⲙⲟⲥ ϩⲛⲥⲟⲫⲓⲁ ⲛⲓⲙ
22 ⲙⲛⲧⲉⲡⲟⲛⲏⲣⲓⲁ ⲥⲃⲱ ⲛⲥⲟⲫⲓⲁ ⲁⲩⲱ ⲟⲩⲙⲛⲧⲣⲙⲛϩⲏⲧ ⲁⲛ ⲡⲉ ⲟⲩϣⲟϫⲛⲉ ⲛⲣⲉϥⲣⲛⲟⲃⲉ
23 ⲟⲩⲛⲟⲩⲡⲟⲛⲏⲣⲓⲁ ⲉⲩⲃⲟⲧⲉ ⲧⲉ ⲁⲩⲱ ⲟⲩⲛⲁⲧϩⲏⲧ ⲉϥϣⲁⲁⲧ ⲛⲥⲟⲫⲓⲁ
24 ⲛⲁⲛⲟⲩⲡⲉⲧϣⲁⲁⲧ ⲙⲙⲛⲧⲣⲙⲛⲧϩⲏⲧ ⲉϥⲟ ⲛϩⲟⲧⲉ ⲉϩⲟⲩⲟ ⲉⲡⲉⲧⲟϣ ⲙⲙⲛⲧⲣⲙⲛⲧϩⲏⲧ ⲉϥⲡⲁⲣⲁⲃⲁ ⲙⲡⲛⲟⲙⲟⲥ
25 ⲟⲩⲛⲟⲩⲡⲟⲛⲏⲣⲓⲁ ⲉⲥⲟⲣϫ ⲉⲩϫⲓⲛϭⲟⲛⲥ ⲧⲉ ⲁⲩⲱ ⲟⲩⲛⲡⲉϣⲁϥⲧⲁⲕⲟ ϫⲉⲉϥⲉϫⲓ ⲛⲟⲩϩⲁⲡ
26 ⲟⲩⲛⲡⲉⲧⲟ ⲙⲡⲟⲛⲏⲣⲟⲥ ⲉⲣⲉϫⲱϥ ⲃⲏϩ ⲉⲡⲉⲥⲏⲧ ⲉϥϩⲏⲡ ⲁⲩⲱ ⲉⲣⲉⲡⲉϥϩⲟⲩⲛ ⲙⲉϩ ⲛⲕⲣⲟϥ
27 ⲉϥⲡⲱϩⲧ ⲙⲡⲉϥϩⲟ ⲉⲡⲉⲥⲏⲧ ⲉϥⲱⲃϣ ⲙⲙⲟϥ ⲉϥⲛⲁⲣϣⲟⲣⲡ ⲉⲣⲟⲕ ϩⲙⲡⲙⲁ ⲉⲧⲕⲛⲁⲧⲁⲛϩⲟⲩⲧϥ ⲉⲣⲟϥ ⲁⲛ
28 ⲉϣⲱⲡⲉ ⲉϥϣⲁⲛϩⲉ ⲉⲟⲩⲟⲉⲓϣ ϥ...... ϩⲛϣⲁϫⲉ ⲛⲙⲡⲁⲣⲁⲃⲟⲗⲏ
29 ϣⲁⲩⲛⲟⲉⲓ ⲛⲛⲣⲱⲙⲉ ⲉⲃⲟⲗ ϩⲙⲡⲧⲣⲉⲩⲛⲁⲩ ⲉⲣⲟⲟⲩ ⲁⲩⲱ ϣⲁⲩⲥⲟⲩⲛⲡⲥⲁⲃⲉ ϩⲙⲡⲧⲱⲙⲛⲧ ⲉⲣⲟϥ ⲙⲡⲉϥϩⲟ
30 ϣⲁⲣⲉⲧϭⲟⲟⲗⲉⲥ ⲙⲡⲣⲱⲙⲉ ⲙⲛⲡⲥⲱⲃⲉ ⲛⲛⲉϥⲛⲁϫϩⲉ ⲁⲩⲱ ⲧⲉϥϭⲓⲛⲙⲟⲟϣⲉ ⲧⲁⲙⲟⲕ ⲉⲣⲟϥ
Sirach 18 · Sirach 20 · Greek (Septuagint / SBLGNT) · Aramaic (Peshitta) · Latin (Vulgate)