Sirach 11 — Coptic (Sahidic)

1 ⲧⲥⲟⲫⲓⲁ ⲙⲡⲉⲧⲑⲃⲃⲓⲏⲩ ⲛⲁϫⲓⲥⲉ ⲛⲧⲉϥⲁⲡⲉ ⲁⲩⲱ ⲥⲛⲁⲑⲙⲥⲟϥ ϩⲛⲧⲙⲏⲧⲉ ⲛϩⲛⲛⲟϭ

2 ⲙⲡⲣⲧⲁⲓⲉⲟⲩⲣⲱⲙⲉ ⲉⲧⲃⲉⲡⲉϥⲥⲁ ⲁⲩⲱ ⲙⲡⲣⲃⲉⲧⲟⲩⲣⲱⲙⲉ ⲉⲧⲃⲉⲡⲉϥϭⲁ

3 ⲟⲩⲕⲟⲩⲓ ⲅⲁⲣ ⲡⲉ ⲡⲁϥⲛⲉⲃⲓⲱ ϩⲛⲛϩⲁⲗⲁⲧⲉ ⲁⲩⲱ ⲡⲉϥⲕⲁⲣⲡⲟⲥ ⲡⲉ ⲧⲁⲣⲭⲏ ⲛⲛⲉⲧϩⲟⲗϭ

4 ⲙⲡⲣϣⲟⲩϣⲟⲩ ⲙⲙⲟⲕ ϩⲛⲟⲩϩⲃⲥⲱ ⲛϩⲟⲉⲓⲧⲉ ⲁⲩⲱ ⲙⲡⲣϫⲓⲥⲉ ⲙⲙⲟⲕ ϩⲛⲟⲩϩⲟⲟⲩ ⲛⲉⲟⲟⲩ ϫⲉϩⲛϣⲡⲏⲣⲉ ⲛⲉ ⲛⲉϩⲃⲏⲩⲉ ⲙⲡϫⲟⲉⲓⲥ ⲁⲩⲱ ⲛⲉϥϩⲃⲏⲩⲉ ϩⲏⲡ ⲉⲛⲣⲱⲙⲉ

5 ⲁϩⲁϩ ⲛⲧⲩⲣⲁⲛⲛⲟⲥ ϩⲙⲟⲟⲥ ϩⲓⲡⲉⲥⲏⲧ ⲡⲉⲧⲉⲙⲡⲟⲩⲧⲟϭⲥ ϩⲱⲱϥ ⲉⲣⲟϥ ⲁϥⲫⲟⲣⲉⲓ ⲛⲧⲉϭⲣⲏⲡⲉ

6 ⲁϩⲁϩ ⲛϫⲱⲱⲣⲉ ϫⲓⲥⲱϣ ⲉⲙⲁⲧⲉ ⲁⲩⲱ ⲁⲩϯ ⲛⲛⲉⲧⲧⲁⲉⲓⲏⲩ ⲉϩⲣⲁⲓ ⲉⲛϭⲓϫ ⲛϩⲉⲛⲕⲟⲟⲩⲉ

7 ⲉⲙⲡⲁⲧⲕϣⲓⲛⲉ ⲙⲡⲣϭⲛⲁⲣⲓⲕⲉ ⲉⲓⲙⲉ ⲛϣⲟⲣⲡ ⲙⲛⲛⲥⲱⲥ ⲛⲅⲉⲡⲓⲧⲓⲙⲁ

8 ⲙⲡⲣϣⲁϫⲉ ⲙⲡⲁⲧⲕⲥⲱⲧⲙ ⲁⲩⲱ ⲙⲡⲣⲛⲟϫⲕ ⲉⲃⲟⲗ ϩⲛⲧⲙⲏⲧⲉ ⲛϩⲉⲛϣⲁϫⲉ

9 ⲙⲡⲣϯⲧⲱⲛ ϩⲓϩⲱⲃ ⲉⲙⲡⲱⲕ ⲁⲛ ⲡⲉ ⲁⲩⲱ ⲙⲡⲣⲥⲱⲟⲩϩ ⲉϩⲟⲩⲛ ⲉⲡϩⲁⲡ ⲛⲛⲣⲉϥⲣⲛⲟⲃⲉ

10 ⲡⲁϣⲏⲣⲉ ⲙⲡⲣⲧⲣⲉⲛⲉⲕϩⲃⲏⲩⲉⲁϣⲁⲓ ⲉⲩϣⲁⲛⲁϣⲁⲓ ⲅⲁⲣ ⲛⲅⲛⲁⲣⲃⲟⲗ ⲁⲛ ⲉⲛⲟⲃⲉ ⲉϣⲱⲡⲉ ⲟⲛ ⲉⲕϣⲁⲛⲡⲱⲧ ⲛⲅⲛⲁⲧⲁϩⲟ ⲁⲛ ⲁⲩⲱ ⲛⲛⲉⲕⲣⲃⲟⲗ ⲉⲕϣⲁⲛⲡⲱⲧ

11 ⲟⲩⲛ ⲡⲉⲧϩⲟⲥⲉ ⲉϥⲙⲟⲩⲕϩ ⲙⲙⲟϥ ⲉϥϭⲉⲡⲏ ⲁⲩⲱ ⲉϥⲣϭⲣⲱϩ ⲛⲁⲣⲟⲟⲩ ⲛϩⲟⲩⲟ

12 ⲟⲩⲛ ⲡⲉⲧϣⲱⲛⲉ ⲉϥⲣⲭⲣⲉⲓⲁ ⲙⲡⲉⲧⲛⲁϣⲟⲡϥ ⲉⲣⲟϥ ⲉϥϣⲁⲁⲧ ⲛϭⲟⲙ ⲁⲩⲱ ⲉϥⲣϩⲟⲩⲟ ϩⲛⲧⲙⲛⲧϩⲏⲕⲉ ⲉⲁⲡⲃⲁⲗ ⲙⲡϫⲟⲉⲓⲥ ϭⲱϣⲧ ⲉϩⲣⲁⲓ ⲉϫⲱϥ ϩⲙⲡⲡⲉⲧⲛⲁⲛⲟⲩϥ ⲁⲩⲱ ⲁϥⲥⲁϩⲱϥ ⲉⲣⲁⲧϥ ϩⲙⲡⲉϥⲑⲃⲃⲓⲟ

13 ⲁϥϫⲓⲥⲉ ⲛⲧⲉϥⲁⲡⲉ ⲁⲩⲱ ⲁⲩⲙⲏⲏϣⲉⲣϣⲡⲏⲣⲉ ⲙⲙⲟϥ

14 ⲛⲁⲅⲁⲑⲟⲛ ⲙⲛⲙⲡⲉⲧϩⲟⲟⲩ ⲡⲱⲛϩ ⲙⲛⲡⲙⲟⲩ ⲧⲙⲛⲧϩⲏⲕⲉ ⲙⲛⲧⲙⲛⲧⲣⲙⲙⲁⲟ ϩⲛⲉⲃⲟⲗ ϩⲓⲧⲟⲟⲧϥ ⲙⲡϫⲟⲉⲓⲥ ⲛⲉ

17 ⲡⲉⲧⲉⲣⲉⲡϫⲟⲉⲓⲥⲛⲁⲧⲁⲁϥ ⲡⲉⲧⲛⲁϭⲱ ϩⲛⲛⲣⲉϥϣⲙϣⲉⲛⲟⲩⲧⲉ ⲁⲩⲱ ⲡⲉϥⲟⲩⲱϣ ⲡⲉⲧⲛⲁⲥⲟⲟⲩⲧⲛ ⲛϣⲁⲉⲛⲉϩ

18 ⲟⲩⲛ ⲡⲉⲧⲟ ⲛⲣⲙⲙⲁⲟ ⲉⲧⲃⲉⲧⲉϥⲙⲛⲧ... ⲙⲛⲧϩⲉ ⲉⲧϥⲱⲛⲧ ⲙⲙⲟϥ ⲉⲧⲉⲧⲁⲓ ⲧⲉ ⲧⲉϥⲙⲉⲣⲓⲥ ϩⲙⲡⲉϥⲃⲉⲕⲉ

19 ϩⲙⲡⲧⲣⲉϥϫⲟⲟⲥ ϫⲉⲁⲓϩⲉⲟⲩⲙⲧⲟⲛ ϯⲛⲁⲟⲩⲱⲙ ⲧⲉⲛⲟⲩ ϩⲛⲛⲁⲁⲅⲁⲑⲟⲛ ⲛϥⲥⲟⲟⲩⲛ ⲁⲛ ϫⲉⲟⲩ ⲡⲉ ⲡⲉⲟⲩⲟⲉⲓϣ ⲉⲧⲛⲁⲉϫⲱϥ ϫⲉⲉϥⲛⲁⲕⲁⲁⲩ ⲛϩⲛⲕⲟⲟⲩⲉ ⲛϥⲙⲟⲩ

20 ⲁϩⲉⲣⲁⲧⲕ ϩⲛⲧⲉⲕⲇⲓⲁⲑⲏⲕⲏ ⲛϩⲏⲧⲥ ⲛⲅⲱⲥⲕ ϩⲙⲡⲉⲕϩⲱⲃ

21 ⲙⲡⲣⲣϣⲡⲏⲣⲉ ⲛⲛⲉϩⲃⲏⲩⲉ ⲙⲡⲣⲉϥⲣⲛⲟⲃⲉ ⲡⲓⲥⲧⲉⲩⲉ ⲛⲧⲟϥ ⲉⲡϫⲟⲉⲓⲥ ⲛⲅϭⲱ ϩⲛⲛⲉⲕϩⲓⲥⲉ ϫⲉⲟⲩⲗⲁⲁⲩ ⲡⲉ ⲛⲛⲁϩⲣⲛⲡϫⲟⲉⲓⲥ ⲛⲧⲉⲩⲛⲟⲩ ⲉⲣⲟⲩϩⲏⲕⲉ ⲛⲣⲙⲙⲁⲟ ϩⲛⲟⲩϣⲥⲛⲉ

22 ⲉⲣⲉⲡⲉⲥⲙⲟⲩ ⲙⲡϫⲟⲉⲓⲥ ϩⲙⲡⲃⲉⲕⲉ ⲙⲡⲉⲩⲥⲉⲃⲏⲥ ⲁⲩⲱ ϩⲛⲟⲩⲛⲟϭ ⲛϭⲉⲡⲏ ϣⲁϥⲧⲣⲉⲡⲉⲥⲙⲟⲩϯⲟⲩⲱ

23 ⲙⲡⲣϫⲟⲟⲥ ϫⲉⲉⲓⲣⲭⲣⲉⲓⲁ ⲛⲟⲩϫⲓⲛⲧⲉⲛⲟⲩ ⲁⲩⲱ ⲁϣ ⲛⲁⲅⲁⲑⲟⲛ ⲡⲉⲧⲛⲁϣⲱⲡⲉ ⲙⲙⲟⲓ ϫⲓⲛⲙⲡϩⲟⲟⲩ

24 ⲙⲡⲣϫⲟⲟⲥ ϫⲉⲥⲉⲣⲱϣⲉ ⲉⲣⲟⲓ ⲁⲩⲱ ⲁϣ ⲛⲙⲕⲁϩ ⲡⲉⲧⲛⲁⲧⲁϩⲟⲓ ϫⲓⲛⲧⲉⲛⲟⲩ

25 ϩⲙⲡⲉϩⲟⲟⲩ ⲅⲁⲣ ⲛⲛⲁⲅⲁⲑⲟⲛ ⲙⲁⲕⲣⲡⲙⲉⲉⲩⲉ ⲛⲙⲡⲉⲧϩⲟⲟⲩ ⲁⲩⲱ ϩⲙⲡⲉϩⲟⲟⲩ ⲛⲙⲡⲉⲧϩⲟⲟⲩ ⲙⲁⲕⲣⲡⲙⲉⲉⲩⲉ ⲛⲙⲡⲉⲧⲛⲁⲛⲟⲩϥ

26 ϫⲉⲟⲩⲗⲁⲁⲩ ⲡⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲙⲡⲉϩⲟⲟⲩ ⲙⲡⲙⲟⲩ ⲉⲧⲱⲱⲃⲉ ⲙⲡⲣⲱⲙⲉ ⲕⲁⲧⲁⲛⲉϥϩⲓⲟⲟⲩⲉ

27 ⲡⲉⲙⲕⲁϩ ⲛⲟⲩⲟⲩⲛⲟⲩ ⲛⲟⲩⲱⲧ ϣⲁϥⲧⲣⲉⲕⲣⲡⲱⲃϣ ⲛⲧⲉⲧⲣⲩⲫⲏ ⲁⲩⲱ ϣⲁⲩϭⲱⲗⲡ ⲉⲃⲟⲗ ⲛⲛⲉϩⲃⲏⲩⲉ ⲙⲡⲣⲱⲙⲉ ϩⲛⲧⲉϥϩⲁⲏ

28 ⲙⲡⲣⲙⲁⲕⲁⲣⲓⲍⲉ ⲛⲗⲁⲁⲩ ⲉⲙⲡⲁⲧϥⲙⲟⲩ ⲁⲩⲱ ϣⲁⲩⲥⲟⲩⲛⲡⲣⲱⲙⲉ ϩⲛⲛⲉϥϣⲏⲣⲉ

29 ⲙⲡⲣϫⲓⲣⲱⲙⲉ ⲛⲓⲙ ⲉϩⲟⲩⲛ ⲉⲡⲉⲕⲏⲓ ϩⲁϩ ⲅⲁⲣ ⲛⲉ ⲛϭⲟⲣϭⲥ ⲙⲡⲉⲕⲣⲟϥ

30 ⲡⲡⲉⲣⲇⲓⲝ ⲟⲩϭⲉⲣⲏϭ ⲡⲉ ϩⲙⲡⲉϥⲧⲁⲡ ⲧⲁⲓ ⲧⲉ ⲧϩⲉ ⲙⲡϩⲏⲧ ⲙⲡϫⲁⲥⲓϩⲏⲧ ⲁⲩⲱ ⲛⲧϩⲉ ⲙⲡⲉⲧϯϩⲧⲏϥ ϣⲁϥϭⲱϣⲧ ⲛⲥⲁⲡⲉⲕϩⲉ

31 ⲙⲡⲉⲧⲛⲁⲛⲟⲩϥ ⲅⲁⲣ ϣⲁϥⲕⲧⲟⲟⲩ ⲉϩⲛⲡⲉⲧϩⲟⲟⲩ ⲛϥϭⲱⲣϭ ⲉⲣⲟⲕ ⲁⲩⲱ ϣⲁϥⲧⲉϭⲧⲱⲗⲙ ⲉⲣⲟⲕ ϩⲛⲛⲉⲕⲟⲩⲱϣ

32 ϣⲁⲣⲉϩⲛϫⲃⲃⲉⲥⲁϣⲁⲓ ⲉⲃⲟⲗ ϩⲛⲟⲩϯⲕ ⲟⲩⲣⲱⲙⲉ ϩⲱⲱϥ ⲛⲣⲉϥⲣⲛⲟⲃⲉ ϣⲁϥϭⲱⲣϭ ⲉⲡⲉⲕⲥⲛⲟϥ

33 ϩⲁⲣⲉϩ ⲉⲣⲟⲕ ⲉⲩⲥⲁ ⲙⲡⲉⲧϩⲟⲟⲩ ϫⲉϣⲁϥⲙⲉⲉⲩⲉ ⲉϩⲛⲡⲉⲧϩⲟⲟⲩ ⲙⲏⲡⲟⲧⲉ ⲛϥⲧⲉϭⲟⲩⲧⲱⲗⲙ ⲉⲣⲟⲕ ⲛϣⲁⲉⲛⲉϩ

34 ϭⲁⲗⲉⲟⲩϣⲙⲙⲟ ⲉⲣⲟⲕ ⲧⲁⲣⲉϥⲣⲁϩⲧⲕ ϩⲛⲟⲩϣⲧⲟⲣⲧⲣ ⲁⲩⲱ