Sirach 10 — Coptic (Sahidic)

1 ⲟⲩⲕⲣⲓⲧⲏⲥ ⲛⲥⲁⲃⲉ ϣⲁϥϯⲥⲃⲱ ⲙⲡⲉϥⲗⲁⲟⲥ ⲁⲩⲱ ⲧϩⲏⲅⲉⲙⲟⲛⲓⲁ ⲛⲟⲩⲥⲁⲃⲉ ⲛⲁϣⲱⲡⲉ ⲉⲥⲧⲏϣ

2 ⲛⲧϩⲉ ⲙⲡⲉⲕⲣⲓⲧⲏⲥ ⲛⲟⲩⲗⲁⲟⲥ ⲧⲁⲓ ⲧⲉ ⲧϩⲉ ⲛⲛⲉⲧϣⲙϣⲉ ⲛⲁϥ ⲛⲧϩⲉ ⲙⲡⲛⲟϭ ⲛⲟⲩⲡⲟⲗⲓⲥ ⲧⲁⲓ ⲧⲉ ⲧϩⲉ ⲛⲟⲩⲟⲛ ⲛⲓⲙ ⲉⲧⲟⲩⲏϩ ⲛϩⲏⲧⲥ

3 ⲟⲩⲣⲣⲟ ⲛⲁⲧⲥⲃⲱ ϣⲁϥⲥⲱⲣⲙ ⲙⲡⲉϥⲗⲁⲟⲥ ⲁⲩⲱ ϣⲁⲣⲉⲟⲩⲡⲟⲗⲓⲥϭⲱⲣϭ ϩⲛⲧⲙⲛⲧⲣⲙⲛⲧϩⲏⲧ ⲛⲟⲩϫⲱⲱⲣⲉ

4 ⲉⲣⲉⲧⲉⲝⲟⲩⲥⲓⲁ ⲙⲡⲕⲁϩ ϩⲛⲧϭⲓϫ ⲙⲡϫⲟⲉⲓⲥ ⲁⲩⲱ ϣⲁϥⲧⲟⲩⲛⲉⲥⲡϣⲁⲩ ⲉϩⲣⲁⲓ ⲉϫⲱϥ ϩⲙⲡⲉⲟⲩⲟⲉⲓϣ

5 ⲉⲣⲉⲡⲥⲟⲟⲩⲧⲛ ⲙⲡⲣⲱⲙⲉ ϩⲛⲧϭⲓϫ ⲙⲡϫⲟⲉⲓⲥ ⲁⲩⲱ ϣⲁϥϯⲡⲉϥⲉⲟⲟⲩ ϩⲓⲡϩⲟ ⲛⲟⲩⲅⲣⲁⲙⲙⲁⲧⲉⲩⲥ

6 ⲙⲡⲣⲛⲟⲩϭⲥ ⲉⲡⲉⲧϩⲓⲧⲟⲩⲱⲕ ϩⲓϫⲓⲛϭⲟⲛⲥ ⲛⲓⲙ ⲁⲩⲱ ⲙⲡⲣⲣⲗⲁⲁⲩ ⲛϩⲱⲃ ⲉϥⲥⲏϣ

7 ⲧⲙⲛⲧϫⲁⲥⲓϩⲏⲧ ϣⲁⲩⲙⲉⲥⲧⲱⲥ ϩⲓⲧⲙⲡϫⲟⲉⲓⲥ ⲙⲛⲛⲣⲱⲙⲉ ⲁⲩⲱ ⲉⲃⲟⲗ ϩⲓⲧⲟⲟⲧⲟⲩ ϩⲓⲟⲩⲥⲟⲡ ϣⲁⲥⲉⲓⲣⲉ ⲛⲟⲩϫⲓⲛϭⲟⲛⲥ

8 ϣⲁⲩⲡⲉⲛⲉⲟⲩⲙⲛⲧⲣⲣⲟ ⲉⲃⲟⲗ ϩⲛⲟⲩϩⲉⲑⲛⲟⲥ ⲉⲩϩⲉⲑⲛⲟⲥ ⲉⲧⲃⲉϫⲓⲛϭⲟⲛⲥ ϩⲓⲥⲱϣ ϩⲓⲭⲣⲏⲙⲁ

9 ⲁϩⲣⲟϥ ⲡⲕⲁϩ ⲙⲛⲡⲕⲣⲙⲉⲥ ϣⲟⲩϣⲟⲩ ⲙⲙⲟϥ ϫⲉⲛⲧⲁⲓⲛⲟⲩϫⲉ ⲛⲛⲉⲧⲡⲉϥϩⲟⲩⲛ ⲉⲟⲩϫⲁⲓ

10 ϣⲁⲣⲉⲟⲩⲥⲁⲉⲓⲛϭⲱϣⲧ ⲉⲃⲟⲗ ϩⲏⲧϥ ⲛⲟⲩϣⲱⲛⲉ ⲉⲛⲁϣⲱϥ ⲁⲩⲱ ⲡⲉⲧⲟ ⲛⲣⲣⲟ ⲙⲡϩⲟⲟⲩ ϥⲛⲁⲙⲟⲩ ⲣⲣⲁⲥⲧⲉ

11 ϩⲙⲡⲧⲣⲉⲡⲣⲱⲙⲉ ⲅⲁⲣ ⲙⲟⲩ ⲉⲣⲉϩⲛϫⲁⲧϥⲉ ⲙⲛϩⲛⲑⲏⲣⲓⲟⲛ ⲙⲛϩⲛϥⲛⲧ ⲛⲁⲕⲗⲏⲣⲟⲛⲟⲙⲉⲓ ⲙⲙⲟϥ

12 ⲧⲁⲣⲭⲏ ⲛⲧⲙⲛⲧϫⲁⲥⲓϩⲏⲧ ⲡⲉ ⲡⲣⲱⲙⲉ ⲉⲁϥⲥⲁϩⲱϥ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲉⲁⲡⲉϥϩⲏⲧⲥⲁϩⲱϥ ⲉⲃⲟⲗ ⲙⲡⲉⲛⲧⲁϥⲧⲁⲙⲓⲟϥ

13 ϫⲉⲧⲁⲣⲭⲏ ⲛⲧⲙⲛⲧϫⲁⲥⲓϩⲏⲧ ⲡⲉ ⲡⲛⲟⲃⲉ ⲁⲩⲱ ⲡⲉⲧⲁⲙⲁϩⲧⲉ ⲙⲙⲟⲥ ⲛⲁⲃⲉⲉⲃⲉ ⲛⲧⲃⲟⲧⲉ ⲉⲧⲃⲉⲡⲁⲓ ⲁⲡϫⲟⲉⲓⲥⲧⲣⲉⲩⲣϣⲡⲏⲣⲉ ⲛⲛⲉϥⲙⲟⲕϩⲥ ⲁⲩⲱ ⲁϥϣⲣϣⲱⲣⲟⲩ ⲛϣⲁⲃⲟⲗ

14 ⲁⲡϫⲟⲉⲓⲥϣⲣϣⲣⲛⲉⲑⲣⲟⲛⲟⲥ ⲛⲛⲁⲣⲭⲱⲛ ⲁⲩⲱ ⲁϥⲑⲙⲥⲟ ⲛϩⲉⲛⲣⲙⲣⲁϣ ⲉⲡⲉⲩⲙⲁ

15 ⲁⲡϫⲟⲉⲓⲥⲡⲣⲕⲛⲛⲟⲩⲛⲉ ⲛⲛϩⲉⲑⲛⲟⲥ ⲁϥⲧⲱϭⲉ ⲛⲛⲉⲧⲑⲃⲃⲓⲏⲩ ⲉⲡⲉⲩⲙⲁ

16 ⲁⲡϫⲟⲉⲓⲥϣⲣϣⲣⲛⲉⲭⲱⲣⲁ ⲛⲛϩⲉⲑⲛⲟⲥ ⲁϥⲟϫⲛⲟⲩ ϣⲁⲛⲥⲛⲧⲉ ⲙⲡⲕⲁϩ

17 ⲁϥⲧⲣⲉϩⲟⲓⲛⲉ ⲛϩⲏⲧⲟⲩ ϣⲟⲟⲩⲉ ⲉⲁϥⲧⲁⲕⲟⲟⲩ ⲁϥϥⲓ ⲙⲡⲉⲩⲣⲡⲙⲉⲉⲩⲉ ϩⲓϫⲙⲡⲕⲁϩ

18 ⲙⲡⲟⲩⲥⲛⲧⲧⲙⲛⲧϫⲁⲥⲓϩⲏⲧ ⲛⲛⲣⲱⲙⲉ ⲟⲩⲇⲉ ⲧⲟⲣⲅⲏ ⲙⲡϭⲱⲛⲧ ⲛⲛϣⲏⲣⲉ ⲛⲛⲉϩⲓⲟⲙⲉ

19 ⲁϣ ⲡⲉ ⲡⲉⲥⲡⲉⲣⲙⲁ ⲉⲧⲧⲁⲓⲏⲩ ⲡⲉⲥⲡⲉⲣⲙⲁ ⲛⲛⲣⲱⲙⲉ ⲡⲉ ⲁϣ ⲡⲉ ⲡⲉⲥⲡⲉⲣⲙⲁ ⲉⲧⲧⲁⲓⲏⲩ ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲛⲉ ⲁϣ ⲡⲉ ⲡⲉⲥⲡⲉⲣⲙⲁ ⲉⲧⲥⲏϣ ⲡⲉⲥⲡⲉⲣⲙⲁ ⲛⲛⲣⲱⲙⲉ ⲡⲉ ⲡⲉⲥⲡⲉⲣⲙⲁ ⲉⲧⲥⲏϣ ⲡⲉ ⲛⲉⲧⲡⲁⲣⲁⲃⲁ ⲛⲛⲉⲛⲧⲟⲗⲏ

20 ⲡⲉⲧⲧⲁⲓⲏⲩ ϩⲛⲧⲙⲏⲏⲧⲉ ⲛϩⲉⲛⲥⲛⲏⲩ ⲡⲉ ⲡⲉⲩⲛⲟϭ ⲁⲩⲱ ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲛⲉⲧϣⲟⲟⲡ ⲛⲛⲁϩⲣⲁϥ

22 ⲟⲩⲡⲣⲟⲥⲏⲗⲩⲧⲟⲥ ⲙⲛⲟⲩⲣⲙⲙⲁⲟ ⲙⲛⲟⲩϣⲙⲙⲟ ⲁⲩⲱ ⲡⲉⲧⲧⲁⲓⲏⲩ ⲙⲛⲡϩⲏⲕⲉ ⲡⲉⲩϣⲟⲩϣⲟⲩ ⲡⲉ ⲧϩⲟⲧⲉ ⲙⲡϫⲟⲉⲓⲥ

23 ⲛϣϣⲉ ⲁⲛ ⲉⲥⲉϣⲟⲩϩⲏⲕⲉ ⲛⲥⲁⲃⲉ ⲁⲩⲱ ⲛϣϣⲉ ⲁⲛ ⲉϯⲉⲟⲟⲩ ⲛⲟⲩⲣⲱⲙⲉ ⲛⲣⲉϥⲣⲛⲟⲃⲉ

24 ⲟⲩⲛⲟϭ ⲙⲛⲟⲩⲣⲉϥϯϩⲁⲡ ⲙⲛⲟⲩϫⲱⲱⲣⲉ ⲛⲉ ⲉϣⲁⲩϫⲓⲉⲟⲟⲩ ⲙⲛⲡⲉⲧⲟ ⲛⲛⲟϭ ⲛϩⲏⲧⲟⲩ ⲉⲡⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ

25 ⲛⲣⲙϩⲉ ⲛⲁϣⲙϣⲉ ⲛⲛϩⲙϩⲁⲗ ⲛⲥⲁⲃⲉ ⲁⲩⲱ ⲟⲩⲣⲱⲙⲉ ⲛⲣⲙⲛϩⲏⲧ ⲙⲉϥⲕⲣⲙⲣⲙ

26 ⲙⲡⲣϯⲥⲁⲕ ⲙⲙⲟⲕ ⲉⲣⲡⲉⲕϩⲱⲃ ⲁⲩⲱ ⲙⲡⲣϯⲉⲟⲟⲩ ⲛⲁⲕ ϩⲙⲡⲉⲟⲩⲟⲉⲓϣ ⲙⲡⲉⲕϩⲟϫϩϫ

27 ⲛⲁⲛⲟⲩⲥ ⲅⲁⲣ ⲉⲕⲣϩⲱⲃ ⲉⲕⲣϩⲟⲩⲟ ⲛⲛⲕⲁ ⲛⲓⲙ ⲉϩⲟⲩⲟ ⲉⲕϯⲉⲟⲟⲩ ⲛⲁⲕ ⲉⲕⲣϭⲣⲱϩ ⲙⲡⲟⲉⲓⲕ

28 ⲡⲁϣⲏⲣⲉ ⲙⲁⲧⲥⲁⲃⲉⲧⲉⲕⲯⲩⲭⲏ ⲉⲩⲙⲛⲧⲣⲙⲣⲁϣ ⲛⲅϯ ⲛⲁⲥ ⲛⲟⲩⲧⲁⲉⲓⲟ ⲕⲁⲧⲁⲡⲉⲥⲙⲡϣⲁ

29 ⲛⲓⲙ ⲡⲉⲧⲛⲁⲧⲙⲁⲓⲉⲡⲉⲧⲣⲛⲟⲃⲉ ⲉⲧⲉϥⲯⲩⲭⲏ ⲁⲩⲱ ⲛⲓⲙ ⲡⲉⲧⲛⲁⲧⲙⲁⲓⲉⲡⲉⲧϣⲱⲥ ⲙⲡⲉϥⲱⲛϩ

31 ⲡⲉⲧⲧⲁⲓⲏⲩ ϩⲛⲧⲉϥⲙⲛⲧⲣⲙⲙⲁⲟ ϥϩⲛ ⲟⲩⲛⲟϭ ⲙⲙⲛⲧϩⲏⲕⲉ ⲁⲩⲱ ⲡⲉⲧⲥⲏϣ ϩⲛⲧⲉϥⲙⲛⲧϩⲏⲕⲉ ϥϩⲛ ⲟⲩⲛⲟϭ ⲙⲙⲛⲧⲣⲙⲙⲁⲟ