Read Psalms 82 side by side with translations · The Final Bible
1 ⲧⲱⲇⲏ ⲡⲉⲯⲁⲗⲙⲟⲥ ⲛⲁⲥⲁⲫ
2 ⲡⲛⲟⲩⲧⲉ ⲡϫⲟⲉⲓⲥ ⲛⲓⲙ ⲡⲉⲧⲛⲁϣⲓⲛⲉ ⲙⲙⲟⲕ ⲙⲡⲣⲕⲁⲣⲱⲕ ⲡⲛⲟⲩⲧⲉ ⲟⲩⲇⲉ ⲙⲡⲣϭⲱ
3 ϫⲉⲉⲓⲥⲛⲉⲕϫⲓϫⲉⲉⲩⲉ ⲁⲩⲱϣ ⲉⲃⲟⲗ ⲁⲩⲱ ⲛⲉⲧⲙⲟⲥⲧⲉ ⲙⲙⲟⲕ ⲁⲩϫⲓⲥⲉ ⲛⲧⲉⲩⲁⲡⲉ
4 ⲁⲩϫⲓϣⲟϫⲛⲉ ⲉϥϩⲟⲟⲩ ⲉϩⲟⲩⲛ ⲉⲡⲉⲕⲗⲁⲟⲥ ⲁⲩⲱ ⲁⲩⲙⲉⲉⲩⲉ ⲉϩⲟⲩⲛ ⲉⲛⲉⲕⲡⲉⲧⲟⲩⲁⲁⲃ
5 ⲁⲩϫⲟⲟⲥ ϫⲉⲁⲙⲏⲓⲧⲛ ⲛⲧⲛϥⲟⲧⲟⲩ ⲉⲃⲟⲗ ϩⲛⲛϩⲉⲑⲛⲟⲥ ⲛϥⲧⲙϣⲱⲡⲉ ϭⲉ ⲛϭⲓⲡⲣⲁⲛ ⲙⲡⲓⲥⲣⲁⲏⲗ
6 ⲁⲩϫⲓ ⲛⲟⲩϣⲟϫⲛⲉ ⲛⲟⲩⲱⲧ ϩⲓⲟⲩⲥⲟⲡ ⲁⲩⲥⲙⲓⲛⲉ ⲛⲟⲩⲇⲓⲁⲑⲏⲕⲏ ⲉⲣⲟⲕ
7 ⲛϭⲓⲡⲙⲁ ⲛϣⲱⲡⲉ ⲛⲛⲓⲇⲟⲩⲙⲁⲓⲟⲥ ⲙⲛⲛⲓⲥⲙⲁⲏⲗⲓⲧⲏⲥ ⲙⲱⲁⲃ ⲙⲛⲛⲉⲃⲟⲗ ϩⲛⲁⲅⲁⲣ
8 ⲅⲉⲃⲉⲣ ⲙⲛⲁⲙⲙⲱⲛ ⲙⲛⲡⲁⲙⲁⲗⲏⲕ ⲙⲛⲛⲁⲗⲗⲟⲫⲩⲗⲟⲥ ⲁⲩⲱ ⲛⲉⲧⲟⲩⲏϩ ϩⲛⲧⲩⲣⲟⲥ
9 ⲕⲁⲓ ⲅⲁⲣ ⲁⲥⲥⲟⲩⲣ ⲁϥϥⲓ ⲛⲙⲙⲁⲩ ⲁⲩϯⲧⲟⲟⲧⲟⲩ ⲙⲛⲛϣⲏⲣⲉ ⲛⲗⲱⲧ ⲇⲓⲁⲯⲁⲗⲙⲁ
10 ⲁⲣⲓⲑⲉ ⲛⲁⲩ ⲉⲛⲧⲁⲕⲁⲁⲥ ⲙⲙⲁⲇⲓϩⲁⲙ ⲙⲛⲥⲓⲥⲁⲣⲁ ⲁⲩⲱ ⲛⲧϩⲉ ⲛⲓⲁⲃⲉⲓⲛ ϩⲙⲡⲉⲭⲉⲓⲙⲁⲣⲣⲟⲥ ⲛⲕⲉⲓⲥⲱⲛ
11 ⲁⲩϥⲟⲧⲟⲩ ⲉⲃⲟⲗ ϩⲛⲟⲩⲙⲁ ⲉⲙⲛⲙⲟⲟⲩ ⲛϩⲏⲧϥ ⲁⲩϣⲱⲡⲉ ⲛⲧϩⲉ ⲛⲛⲉⲓⲧⲛ ⲙⲡⲕⲁϩ
12 ⲕⲁⲛⲉⲩⲁⲣⲭⲱⲛ ⲛⲧϩⲉ ⲛⲱⲣⲏⲃ ⲙⲛⲍⲏⲃ ⲙⲛⲍⲉⲃⲉⲉ ⲙⲛⲥⲁⲗⲙⲁⲛⲁⲛ ⲉⲩⲁⲣⲭⲱⲛ ⲧⲏⲣⲟⲩ
13 ⲛⲁⲓ ⲉⲛⲧⲁⲩϫⲟⲟⲥ ϫⲉⲙⲁⲣⲛⲕⲗⲏⲣⲟⲛⲟⲙⲉⲓ ⲛⲁⲛ ⲙⲡⲙⲁ ⲉⲧⲟⲩⲁⲁⲃ ⲙⲡⲛⲟⲩⲧⲉ
14 ⲡⲁⲛⲟⲩⲧⲉ ⲕⲁⲁⲩ ⲛⲧϩⲉ ⲛⲟⲩⲧⲣⲟⲭⲟⲥ ⲛⲧϩⲉ ⲛⲟⲩⲣⲟⲟⲩⲉ ⲙⲡⲉⲙⲧⲟ ⲉⲃⲟⲗ ⲙⲡⲧⲏⲩ
15 ⲛⲧϩⲉ ⲛⲟⲩⲕⲱϩⲧ ⲉϣⲁϥⲣⲱⲕϩ ⲛⲟⲩⲙⲁ ⲛϣⲏⲛ ⲁⲩⲱ ⲛⲧϩⲉ ⲛⲟⲩϣⲁϩ ⲉϥⲣⲱⲕϩ ⲛϩⲉⲛⲧⲟⲟⲩ
16 ⲉⲕⲉⲡⲱⲧ ⲛⲥⲱⲟⲩ ⲛⲧⲉⲓϩⲉ ϩⲛⲧⲉⲕϩⲁⲧⲏⲩ ⲁⲩⲱ ⲉⲕⲉϣⲧⲣⲧⲱⲣⲟⲩ ϩⲛⲧⲉⲕⲟⲣⲅⲏ
17 ⲙⲉϩⲛⲉⲩϩⲟ ⲛⲥⲱϣ ⲁⲩⲱ ⲥⲉⲛⲁϣⲓⲛⲉ ⲛⲥⲁⲡⲉⲕⲣⲁⲛ ⲡϫⲟⲉⲓⲥ
18 ⲙⲁⲣⲟⲩϫⲓϣⲓⲡⲉ ⲛⲥⲉϣⲧⲟⲣⲧⲣ ϣⲁⲉⲛⲉϩ ⲛⲉⲛⲉϩ ⲛⲥⲉⲟⲩⲱⲗⲥ ⲛⲥⲉⲧⲁⲕⲟ
19 ⲁⲩⲱ ⲙⲁⲣⲟⲩⲉⲓⲙⲉ ϫⲉⲡⲉⲕⲣⲁⲛ ⲡⲉ ⲡϫⲟⲉⲓⲥ ϫⲉⲛⲧⲟⲕ ⲙⲁⲩⲁⲁⲕ ⲡⲉ ⲡⲉⲧϫⲟⲥⲉ ⲉϩⲣⲁⲓ ⲉϫⲙⲡⲕⲁϩ ⲧⲏⲣϥ
Psalms 81 · Psalms 83 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)