Psalms 63 — Coptic (Sahidic)

1 ⲉⲡϫⲱⲕ ⲉⲃⲟⲗ ⲡⲉⲯⲁⲗⲙⲟⲥ ⲛⲇⲁⲩⲉⲓⲇ

2 ⲡⲁⲛⲟⲩⲧⲉ ⲥⲱⲧⲙ ⲉⲡⲁϩⲣⲟⲟⲩ ϩⲙⲡⲧⲣⲁⲥⲉⲡⲥⲱⲡⲕ ⲛⲉϩⲙⲧⲁⲯⲩⲭⲏ ⲉⲧϩⲟⲧⲉ ⲙⲡϫⲁϫⲉ

3 ⲁⲕⲣϩⲁⲓⲃⲉⲥ ⲉⲣⲟⲓ ⲉⲧⲥⲟⲟⲩϩⲥ ⲛⲛⲉⲧⲟ ⲙⲡⲟⲛⲏⲣⲟⲥ ⲉⲃⲟⲗ ϩⲙⲡⲙⲏⲏϣⲉ ⲉⲧⲣϩⲱⲃ ⲉⲧⲁⲛⲟⲙⲓⲁ

4 ⲛⲁⲓ ⲉⲛⲧⲁⲩⲧⲱⲙ ⲛⲛⲉⲩⲗⲁⲥ ⲛⲧϩⲉ ⲛⲛⲓⲥⲏϥⲉ ⲁⲩⲥⲱⲙⲛⲧ ⲛⲧⲉⲩⲡⲓⲧⲉ ⲉⲩϩⲱⲃ ⲉϥⲥⲁϣⲉ

5 ⲉⲧⲣⲉⲩⲛⲉϫ ⲥⲟⲧⲉ ϩⲛⲟⲩϩⲱⲡ ⲉⲡⲉⲧⲟⲩⲁⲁⲃ ⲥⲉⲛⲁⲛⲟⲩϫⲉ ⲉⲣⲟϥ ϩⲛⲟⲩϣⲥⲛⲉ ⲛⲥⲉⲧⲙⲣϩⲟⲧⲉ

6 ⲁⲩⲧⲁϫⲣⲟ ⲛⲁⲩ ⲛⲟⲩϣⲁϫⲉ ⲉϥϩⲟⲟⲩ ⲁⲩϫⲟⲟⲥ ⲉϩⲱⲡ ⲛϩⲉⲛⲡⲁϣ ⲁⲩϫⲟⲟⲥ ϫⲉⲛⲓⲙ ⲡⲉⲧⲛⲁⲛⲁⲩ ⲉⲣⲟⲛ

7 ⲁⲩϩⲟⲧϩⲧ ⲛϩⲉⲛⲁⲛⲟⲙⲓⲁ ⲁⲩⲱϫⲛ ⲉⲩϩⲟⲧϩⲧ ⲡⲛⲟⲩⲧⲉ ⲛⲁⲙⲟϣⲧⲟⲩ ⲡⲣⲱⲙⲉ ⲛⲁϯⲡⲉϥⲟⲩⲟⲓ ϩⲛⲟⲩϩⲏⲧ ⲉϥϩⲏⲡ

8 ⲁⲩⲱ ϥⲛⲁⲥⲟⲩⲱⲛϥ ⲛϥϫⲓⲥⲉ ⲛϭⲓⲡϫⲟⲉⲓⲥ ⲡⲁⲛⲟⲩⲧⲉ ⲁⲛⲉⲩⲡⲗⲏⲅⲏ ϣⲱⲡⲉ ⲛⲥⲟⲧⲉ ⲛϣⲏⲣⲉ ϣⲏⲙ

9 ⲁⲩⲱ ⲁⲛⲉⲩⲗⲁⲥ ⲣϭⲱⲃ ⲛϩⲏⲧⲟⲩ ⲁⲩϣⲧⲟⲣⲧⲣ ⲧⲏⲣⲟⲩ ⲛϭⲓⲛⲉⲧⲛⲁⲩ ⲉⲣⲟⲟⲩ

10 ⲁⲩⲱ ⲁⲣⲱⲙⲉ ⲛⲓⲙ ⲣϩⲟⲧⲉ ⲁⲩϫⲱ ⲛⲛⲉϩⲃⲏⲩⲉ ⲙⲡⲛⲟⲩⲧⲉ ⲁⲩⲉⲓⲙⲉ ⲉⲛϥⲧⲁⲙⲓⲟ

11 ϥⲛⲁⲉⲩⲫⲣⲁⲛⲉ ⲛϭⲓⲡⲇⲓⲕⲁⲓⲟⲥ ⲉϫⲙⲡϫⲟⲉⲓⲥ ⲛϥⲛⲁϩⲧⲉ ⲉⲣⲟϥ ⲁⲩⲱ ⲥⲉⲛⲁϫⲓⲧⲁⲉⲓⲟ ⲛϭⲓⲟⲩⲟⲛ ⲛⲓⲙ ⲉⲧⲥⲟⲩⲧⲱⲛ ϩⲙⲡⲉⲩϩⲏⲧ