Read Psalms 62 side by side with translations · The Final Bible
1 ⲡⲉⲯⲁⲗⲙⲟⲥ ⲛⲇⲁⲩⲉⲓⲇ ϩⲙⲡⲧⲣⲉϥϣⲱⲡⲉ ϩⲙⲡϫⲁⲓⲉ ⲛⲧⲓⲇⲟⲩⲙⲁⲓⲁ
2 ϯϣⲱⲣⲡ ⲙⲙⲟⲓ ⲉⲣⲟⲕ ⲡⲛⲟⲩⲧⲉ ⲡⲁⲛⲟⲩⲧⲉ ⲁⲧⲁⲯⲩⲭⲏ ⲉⲉⲓⲃ ⲙⲙⲟⲕ ⲁⲩⲱ ⲁⲧⲁⲥⲁⲣⲝ ⲃⲱⲗ ⲉⲃⲟⲗ ϩⲛⲟⲩⲕⲁϩ ⲛϫⲁⲓⲉ ⲛⲁⲧⲙⲟⲟϣⲉ ⲉⲙⲛⲙⲟⲟⲩ ⲛϩⲏⲧϥ
3 ⲧⲁⲓ ⲧⲉ ⲧϩⲉ ⲉⲛⲧⲁⲓⲟⲩⲱⲛϩ ⲛⲁⲕ ⲉⲃⲟⲗ ϩⲙⲡⲡⲉⲧⲟⲩⲁⲁⲃ ⲉⲛⲁⲩ ⲉⲧⲉⲕϭⲟⲙ ⲙⲛⲡⲉⲕⲉⲟⲟⲩ
4 ϫⲉⲡⲉⲕⲛⲁ ⲥⲟⲧⲡ ⲉϩⲟⲩⲉ ϩⲉⲛϭⲓⲛⲱⲛϩ ⲛⲁⲥⲡⲟⲧⲟⲩ ⲛⲁⲥⲙⲟⲩ ⲉⲣⲟⲕ
5 ⲧⲁⲓ ⲧⲉ ⲧϩⲉ ⲉϯⲛⲁⲥⲙⲟⲩ ⲉⲣⲟⲕ ϩⲙⲡⲁⲱⲛϩ ⲁⲩⲱ ϯⲛⲁϥⲓ ⲛⲛⲁϭⲓϫ ⲉϩⲣⲁⲓ ϩⲙⲡⲉⲕⲣⲁⲛ
6 ⲉⲣⲉⲧⲁⲯⲩⲭⲏ ⲥⲉⲓ ⲉⲃⲟⲗ ϩⲛⲟⲩⲟⲩⲱⲧ ⲙⲛⲟⲩⲕⲛⲛⲉ ϩⲉⲛⲥⲡⲟⲧⲟⲩ ⲛⲧⲉⲗⲏⲗ ⲛⲁⲥⲙⲟⲩ ⲉⲡⲉⲕⲣⲁⲛ
7 ⲉⲓϣⲁⲛⲣⲡⲉⲕⲙⲉⲉⲩⲉ ϩⲓϫⲙⲡⲁϭⲗⲟϭ ⲛⲉⲓⲙⲉⲗⲉⲧⲁ ⲉⲣⲟⲕ ⲙⲡⲛⲁⲩ ⲛϣⲱⲣⲡ
8 ϫⲉⲁⲕϣⲱⲡⲉ ⲛⲁⲓ ⲛⲃⲟⲏⲑⲟⲥ ⲁⲩⲱ ϯⲛⲁⲧⲉⲗⲏⲗ ϩⲁⲧϩⲁⲓⲃⲉⲥ ⲛⲛⲉⲕⲧⲛϩ
9 ⲁⲧⲁⲯⲩⲭⲏ ⲧⲟϭⲥ ⲉⲣⲟⲕ ⲧⲉⲕⲟⲩⲛⲁⲙ ⲧⲉⲛⲧⲁⲥϣⲟⲡⲧ ⲉⲣⲟⲥ
10 ⲛⲧⲟⲟⲩ ⲇⲉ ⲁⲩϣⲓⲛⲉ ⲛⲥⲁⲧⲁⲯⲩⲭⲏ ⲉⲡϫⲓⲛϫⲏ ⲥⲉⲛⲁⲃⲱⲕ ⲉϩⲟⲩⲛ ϩⲁⲡⲉⲥⲏⲧ ⲙⲡⲕⲁϩ
11 ⲥⲉⲛⲁⲧⲁⲁⲩ ⲉϩⲣⲁⲓ ⲉⲛϭⲓϫ ⲛⲧⲥⲏϥⲉ ⲥⲉⲛⲁϣⲱⲡⲉ ⲛⲧⲟ ⲛⲃⲁϣⲟⲣ
12 ⲡⲣⲣⲟ ⲇⲉ ⲛⲁⲉⲩⲫⲣⲁⲛⲉ ⲉϫⲙⲡⲛⲟⲩⲧⲉ ϥⲛⲁϫⲓⲧⲁⲉⲓⲟ ⲛϭⲓⲟⲩⲟⲛ ⲛⲓⲙ ⲉⲧⲱⲣⲕ ⲙⲙⲟϥ ϫⲉⲁⲥⲧⲱⲙ ⲛϭⲓⲧⲧⲁⲡⲣⲟ ⲛⲛⲉⲧϣⲁϫⲉ ϩⲛⲟⲩϫⲓⲛϭⲟⲛⲥ
Psalms 61 · Psalms 63 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)