Read Psalms 51 side by side with translations · The Final Bible
3 ܪܚܡ ܥܠܝ ܐܠܗܐ ܐܝܟ ܛܝܒܘܬܟ ܘܐܝܟ ܣܘܓܐܐ ܕܪ̈ܚܡܝܟ ܥܛܝ ܚ̈ܛܗܝ
4 ܐܣܓܐ ܐܫܝܓܝܢܝ ܡܢ ܥܘܠܝ ܘܡܢ ܚ̈ܛܗܝ ܕܟܢܝ
5 ܡܛܠ ܕܣܟ̈ܠܘܬܝ ܝܕܥ ܐܢܐ ܘܚ̈ܛܗܝ ܠܘܩܒܠܝ ܐܢܘܢ ܒܟܠܙܒܢ
6 ܠܟ ܒܠܚܘܕܝܟ ܚܛܝܬ ܘܒܝܫܬ̈ܐ ܩܕܡܝܟ ܥܒܕܬ ܡܛܠ ܕܬܙܕܕܩ ܒܡܠܬܟ ܘܬܙܟܐ ܒܕܝܢܝ̈ܟ
7 ܡܛܠ ܕܒܥܘܠܐ ܐܬܒܛܢܬ ܘܒܚ̈ܛܗܐ ܒܛܢܬܢܝ ܐܡܝ
8 ܐܢܬ ܕܝܢ ܒܩܘܫܬܐ ܨܒܝܬ ܘܟܣ̈ܝܬܐ ܕܚܟܡܬܟ ܐܘܕܥܬܢܝ
9 ܪܘܣ ܥܠܝ ܒܙܘܦܐ ܘܐܬܕܟܐ ܚܠܠܝܢܝ ܒܗ ܘܡܢ ܬܠܓܐ ܐܚܘܪ
10 ܐܣܒܥܝܢܝ ܒܘܣܡܟ ܘܚܕܘܬܟ ܘܢܚܕܘܢ ܓܪ̈ܡܝ ܡܟܝ̈ܟܐ
11 ܐܗܦܟ ܐ̈ܦܝܟ ܡܢ ܚ̈ܛܗܝ ܘܟܠܗܝܢ ܣܟ̈ܠܘܬܝ ܥܛܝ
12 ܠܒܐ ܕܟܝܐ ܒܪܝ ܒܝ ܐܠܗܐ ܘܪܘܚܟ ܬܩܢܬܐ ܚܕܬ ܒܓܘܝ
13 ܠܐ ܬܫܕܝܢܝ ܡܢ ܩܕܡܝܟ ܘܪܘܚܟ ܩܕܝܫܐ ܠܐ ܬܣܒ ܡܢܝ
14 ܐܠܐ ܐܗܦܟ ܠܝ ܒܘܣܡܟ ܘܦܘܪܩܢܟ ܘܪܘܚܟ ܡܫܒܚܬܐ ܬܣܡܟܢܝ
15 ܕܐܠܦ ܠܥܘ̈ܠܐ ܐܘܪܚܟ ܘܚ̈ܛܝܐ ܠܘܬܟ ܢܬܦܢܘܢ
16 ܦܨܢܝ ܡܢ ܕܡܐ ܐܠܗܝ ܐܠܗܐ ܕܙܕܝܩܘܬܝ ܘܢܫܒܚ ܠܫܢܝ ܙܕܝܩܘܬܟ
17 ܡܪܝܐ ܦܬܚ ܠܝ ܣܦܘ̈ܬܝ ܘܦܘܡܝ ܢܦܩ ܬܫܒܚ̈ܬܟ
18 ܡܛܠ ܕܠܐ ܨܒܝܬ ܒܕܒܚ̈ܐ ܐܦܠܐ ܒܝܩ̈ܕܐ ܫܠܡ̈ܐ ܐܬܪܥܝܬ
19 ܕܒܚ̈ܘܗܝ ܕܐܠܗܐ ܪܘܚܐ ܗܝ ܡܟܝܟܬܐ ܠܒܐ ܫܚܝܩܐ ܐܠܗܐ ܠܐ ܡܣܠܐ
20 ܐܛܐܒ ܒܨܒܝܢܟ ܠܨܗܝܘܢ ܘܒܢܝ ܫܘܪ̈ܝܗ̇ ܕܐܘܪܫܠܡ
21 ܗܝ ܕܝܢ ܬܨܛܒܐ ܒܕܒܚ̈ܐ ܕܩܘܫܬܐ ܘܒܝ̈ܩܕܐ ܫ̈ܠܡܐ ܗܝ ܕܝܢ ܢܣܩܘܢ ܬܘܪ̈ܐ ܥܠ ܡܕܒܚܟ
Psalms 50 · Psalms 52 · Hebrew (Masoretic) · Greek (Septuagint / SBLGNT) · Latin (Vulgate) · Coptic (Sahidic)