Read Psalms 113 side by side with translations · The Final Bible
1 ⲁⲗⲗⲏⲗⲟⲩⲓⲁ ⲧⲉⲭⲟⲣⲉⲓⲁ ϩⲙⲡⲉⲓⲉⲃⲟⲗ ⲙⲡⲓⲥⲣⲁⲏⲗ ϩⲛⲕⲏⲙⲉ ⲡⲏⲓ ⲛⲓⲁⲕⲱⲃ ⲉⲃⲟⲗ ϩⲙⲡⲗⲁⲟⲥ ⲛⲃⲁⲣⲃⲁⲣⲟⲥ
2 ⲁⲧⲓⲟⲩⲇⲁⲓⲁ ϣⲱⲡⲉ ⲛⲁϥ ⲛⲧⲃⲃⲟ ⲁⲡⲓⲥⲣⲁⲏⲗ ⲣϫⲟⲉⲓⲥ ⲉⲣⲟⲥ
3 ⲁⲑⲁⲗⲁⲥⲥⲁ ⲛⲁⲩ ⲁⲥⲡⲱⲧ ⲁⲡⲓⲟⲣⲇⲁⲛⲏⲥ ⲕⲟⲧϥ ⲉⲡⲁϩⲟⲩ
4 ⲁⲛⲧⲟⲟⲩ ⲥⲛⲁⲉⲓⲛ ⲛⲧϩⲉ ⲛⲛⲟⲉⲓⲗⲉ ⲁⲩⲱ ⲛⲥⲓⲃⲧ ⲛⲧϩⲉ ⲛϩⲉⲛϩⲓⲉⲓⲃ ⲛⲉⲥⲟⲟⲩ
5 ⲁϩⲣⲟ ⲑⲁⲗⲁⲥⲥⲁ ϫⲉⲁⲡⲱⲧ ⲁⲩⲱ ⲛⲧⲟⲕ ⲡⲓⲟⲣⲇⲁⲛⲏⲥ ϫⲉⲁⲕⲕⲟⲧⲕ ⲉⲡⲁϩⲟⲩ
6 ⲛⲧⲟⲟⲩ ϫⲉⲁⲧⲉⲧⲛⲥⲕⲓⲣⲧⲁ ⲛⲧϩⲉ ⲛⲛⲟⲉⲓⲗⲉ ⲁⲩⲱ ⲛⲥⲓⲃⲧ ⲛⲧϩⲉ ⲛϩⲉⲛϩⲓⲉⲓⲃ ⲛⲉⲥⲟⲟⲩ
7 ⲁⲡⲕⲁϩ ⲕⲓⲙ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲛⲓⲁⲕⲱⲃ
8 ⲡⲉⲛⲧⲁϥⲕⲧⲟ ⲛⲧⲡⲉⲧⲣⲁ ⲉϩⲉⲛⲛⲟⲩⲧⲉ ⲙⲙⲟⲟⲩ ⲁⲩⲱ ϯⲱⲛⲉ ⲉⲧⲛⲁϣⲧ ⲉϩⲉⲛⲡⲏⲅⲏ ⲙⲙⲟⲟⲩ
9 ⲙⲡⲱⲣ ⲉⲣⲟⲛ ⲡϫⲟⲉⲓⲥ ⲙⲡⲱⲣ ⲉⲣⲟⲛ ⲁⲗⲗⲁ ϯⲉⲟⲟⲩ ⲙⲡⲉⲕⲣⲁⲛ ⲉϩⲣⲁⲓ ⲉϫⲙⲡⲉⲕⲛⲁ ⲙⲛⲧⲉⲕⲙⲉ
10 ⲙⲏⲡⲟⲧⲉ ⲛⲧⲉⲛϩⲉⲑⲛⲟⲥ ϫⲟⲟⲥ ϫⲉⲉϥⲧⲱⲛ ⲡⲉⲩⲛⲟⲩⲧⲉ
11 ⲡⲉⲛⲛⲟⲩⲧⲉ ⲇⲉ ⲉϩⲣⲁⲓ ϩⲛⲙⲡⲏⲩⲉ ⲁⲩⲱ ϩⲓϫⲙⲡⲕⲁϩ ⲡⲉⲧϥⲟⲩⲁϣϥ ⲧⲏⲣϥ ⲁϥⲁⲁϥ
12 ⲁⲗⲗⲏⲗⲟⲩⲓⲁ ⲛⲉⲓⲇⲱⲗⲟⲛ ⲛⲛϩⲉⲑⲛⲟⲥ ϩⲉⲛϩⲁⲧ ⲛⲉ ϩⲓⲛⲟⲩⲃ ϩⲉⲛϩⲃⲏⲩⲉ ⲛⲉ ⲛϭⲓϫ ⲛⲣⲱⲙⲉ
13 ⲟⲩⲛⲃⲁⲗ ⲙⲙⲟⲟⲩ ⲛⲥⲉⲛⲁⲩ ⲉⲃⲟⲗ ⲁⲛ
14 ⲟⲩⲛⲙⲁⲁϫⲉ ⲙⲙⲟoⲩ ⲛⲥⲉⲥⲱⲧⲙ ⲁⲛ ⲟⲩⲛⲧⲁⲡⲣⲟ ⲙⲙⲟⲟⲩ ⲛⲛⲉⲩϣⲁϫⲉ ϣⲁⲁⲛⲧⲟⲩ ⲙⲙⲟⲟⲩ ⲛⲛⲉⲩϣⲱⲗⲙ
15 ⲛⲉⲩϭⲓϫ ⲙⲙⲟⲟⲩ ⲛⲛⲉⲩϭⲟⲙϭⲙ ⲛⲉⲩⲟⲩⲉⲣⲏⲧⲉ ⲙⲙⲟⲟⲩ ⲛⲛⲉⲩⲙⲟⲟϣⲉ ⲛⲛⲉⲩⲙⲟⲩⲧⲉ ϩⲛⲧⲉⲩϣⲟⲩⲱⲃⲉ ⲙⲛⲡⲛⲉⲩⲙⲁ ⲅⲁⲣ ϩⲛⲣⲱⲟⲩ
16 ⲉⲩⲉⲣⲧⲉⲩϩⲉ ⲛϭⲓⲛⲉⲛⲧⲁⲩⲧⲁⲙⲓⲟⲟⲩ ⲙⲛⲟⲩⲟⲛ ⲛⲓⲙ ⲉⲧⲛⲁϩⲧⲉ ⲉⲣⲟⲟⲩ
17 ⲡⲏⲓ ⲙⲡⲓⲥⲣⲁⲏⲗ ⲁϥϩⲉⲗⲡⲓⲍⲉ ⲉⲡϫⲟⲉⲓⲥ ⲡⲉⲩⲃⲟⲏⲑⲟⲥ ⲡⲉ ⲁⲩⲱ ⲧⲉⲩⲛⲁϣⲧⲉ ⲡⲉ
18 ⲡⲏⲓ ⲛⲁⲁⲣⲱⲛ ⲁϥϩⲉⲗⲡⲓⲍⲉ ⲉⲡϫⲟⲉⲓⲥ ⲡⲉⲩⲃⲟⲏⲑⲟⲥ ⲡⲉ ⲁⲩⲱ ⲧⲉⲩⲛⲁϣⲧⲉ ⲡⲉ
19 ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲁⲩϩⲉⲗⲡⲓⲍⲉ ⲉⲡϫⲟⲉⲓⲥ ⲡⲉⲩⲃⲟⲏⲑⲟⲥ ⲡⲉ ⲁⲩⲱ ⲧⲉⲩⲛⲁϣⲧⲉ ⲡⲉ
20 ⲁⲡϫⲟⲉⲓⲥ ⲣⲡⲉⲛⲙⲉⲉⲩⲉ ⲁϥⲥⲙⲟⲩ ⲉⲣⲟⲛ ⲉϥⲉⲥⲙⲟⲩ ⲉⲡⲏⲓ ⲙⲡⲓⲥⲣⲁⲏⲗ ⲉϥⲉⲥⲙⲟⲩ ⲉⲡⲏⲓ ⲛⲁⲁⲣⲱⲛ
21 ⲉϥⲉⲥⲙⲟⲩ ⲉⲟⲩⲟⲛ ⲛⲓⲙ ⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲛⲕⲟⲩⲓ ⲙⲛⲛⲛⲟϭ
22 ⲡϫⲟⲉⲓⲥ ⲉϥⲉⲟⲩⲱϩ ⲉⲣⲟⲛ ⲙⲛⲛⲉⲛϣⲏⲣⲉ
23 ⲧⲛⲥⲙⲁⲙⲁⲁⲧ ⲁⲛⲟⲛ ⲙⲡϫⲟⲉⲓⲥ ⲡⲉⲛⲧⲁϥⲧⲁⲙⲓⲉⲧⲡⲉ ⲙⲛⲡⲕⲁϩ
24 ⲧⲡⲉ ⲛⲧⲡⲉ ⲧⲁⲡϫⲟⲉⲓⲥ ⲧⲉ ⲁϥϯⲡⲕⲁϩ ⲇⲉ ⲛⲛϣⲏⲣⲉ ⲛⲛⲣⲱⲙⲉ
25 ⲛⲉⲧⲙⲟⲟⲩⲧ ⲁⲛ ⲛⲉⲧⲛⲁⲥⲙⲟⲩ ⲉⲣⲟⲕ ⲡϫⲟⲉⲓⲥ ⲟⲩⲇⲉ ⲟⲩⲟⲛ ⲛⲓⲙ ⲁⲛ ⲉⲧⲃⲏⲕ ⲉⲡⲉⲥⲏⲧ ⲉⲁⲙⲛⲧⲉ
26 ⲁⲗⲗⲁ ⲁⲛⲟⲛ ⲛⲉⲧⲟⲛϩ ⲛⲉⲧⲛⲁⲥⲙⲟⲩ ⲉⲡϫⲟⲉⲓⲥ ϫⲓⲛⲧⲉⲛⲟⲩ ϣⲁⲉⲛⲉϩ
Psalms 112 · Psalms 114 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)