Read Psalms 101 side by side with translations · The Final Bible
1 ⲡⲉϣⲗⲏⲗ ⲙⲡϩⲏⲕⲉ ⲉϥϣⲁⲛⲙⲕⲁϩ ⲛϩⲏⲧ ⲛϥⲡⲱϩⲧ ⲙⲡⲉϥⲥⲟⲡⲥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ
2 ⲡϫⲟⲉⲓⲥ ⲥⲱⲧⲙ ⲉⲡⲁϣⲗⲏⲗ ⲁⲩⲱ ⲙⲁⲣⲉⲡⲁⲁϣϣⲕⲁⲕ ⲉⲓ ϣⲁⲣⲟⲕ
3 ⲙⲡⲣⲕⲧⲉⲡⲉⲕϩⲟ ⲛⲥⲁⲃⲟⲗ ⲙⲙⲟⲓ ⲣⲉⲕⲧⲡⲉⲕⲙⲁⲁϫⲉ ⲉⲣⲟⲓ ⲙⲡⲉϩⲟⲟⲩ ⲉϯⲛⲁⲑⲗⲓⲃⲉ ϭⲉⲡⲏ ⲥⲱⲧⲙ ⲉⲣⲟⲓ ⲙⲡⲉϩⲟⲟⲩ ⲉϯⲛⲁⲱϣ ⲉϩⲣⲁⲓ ⲟⲩⲃⲏⲕ
4 ϫⲉⲁⲛⲁϩⲟⲟⲩ ⲱϫⲛ ⲛⲧϩⲉ ⲛⲟⲩⲕⲁⲡⲛⲟⲥ ⲁⲩⲱ ⲛⲁⲕⲉⲉⲥ ⲁⲩϭⲱϭ ⲛⲧϩⲉ ⲛⲟⲩⲱⲛⲉ
5 ⲁⲓⲱϭⲉ ⲛⲧϩⲉ ⲛⲟⲩⲭⲟⲣⲧⲟⲥ ⲁⲩⲱ ⲁⲡⲁϩⲏⲧ ϣⲟⲟⲩⲉ ϫⲉⲁⲓⲣⲡⲱⲃϣ ⲉⲟⲩⲱⲙ ⲙⲡⲁⲟⲉⲓⲕ
6 ⲉⲃⲟⲗ ⲙⲡⲉϩⲟⲟⲩ ⲙⲡⲁⲁϣⲁϩⲟⲙ ⲁⲡⲁⲕⲁⲥ ⲧⲱϭⲉ ⲉⲧⲁⲥⲁⲣⲝ
7 ⲁⲓⲣⲧϩⲉ ⲛⲟⲩϩⲣⲓⲙ ⲛⲧⲉⲡϫⲁⲓⲉ ⲁⲓϣⲱⲡⲉ ⲛⲧϩⲉ ⲛⲟⲩϥⲁⲓ ϩⲛⲟⲩⲏⲓ
8 ⲁⲓⲣⲟⲩϣⲏ ⲛⲣⲟⲉⲓⲥ ⲁⲓⲣⲧϩⲉ ⲛⲟⲩϫⲁϫ ϩⲓⲟⲩϫⲉⲛⲉⲡⲱⲣ ⲙⲁⲩⲁⲁϥ
9 ⲁⲛⲁϫⲓϫⲉⲉⲩⲉ ⲛⲉϭⲛⲟⲩϭⲧ ⲙⲡⲉϩⲟⲟⲩ ⲧⲏⲣϥ ⲁⲩⲱ ⲛⲉⲧⲧⲁⲉⲓⲟ ⲙⲙⲟⲓ ⲛⲉⲩⲱⲣⲕ ⲙⲙⲟⲓ
10 ϫⲉⲁⲓⲟⲩⲉⲙⲕⲣⲙⲉⲥ ⲉⲡⲙⲁ ⲙⲡⲁⲟⲉⲓⲕ ⲁⲓⲕⲉⲣⲁ ⲙⲡⲉϯⲛⲁⲥⲟⲟϥ ϩⲓⲣⲙⲉⲓⲏ
11 ⲙⲡⲉⲕⲙⲧⲟ ⲉⲃⲟⲗ ⲛⲧⲉⲕⲟⲣⲅⲏ ⲙⲛⲡⲉⲕϭⲱⲛⲧ ϫⲉⲁⲕϥⲓⲧ ⲁⲕⲧⲁⲟⲩⲟⲓ ⲉϩⲣⲁⲓ
12 ⲁⲛⲁϩⲟⲟⲩ ⲣⲓⲕⲉ ⲛⲧϩⲉ ⲛⲟⲩϩⲁⲓⲃⲉⲥ ⲁⲩⲱ ⲁⲓϣⲟⲟⲩⲧⲉ ⲛⲧϩⲉ ⲛⲟⲩⲭⲟⲣⲧⲟⲥ
13 ⲛⲧⲟⲕ ⲇⲉ ⲡϫⲟⲉⲓⲥ ⲕϣⲟⲟⲡ ϣⲁⲉⲛⲉϩ ⲁⲩⲱ ⲡⲉⲕⲣⲡⲙⲉⲉⲩⲉ ϣⲁⲟⲩϫⲱⲙ ⲙⲛⲟⲩϫⲱⲙ
14 ⲧⲱⲟⲩⲛ ⲛⲧⲟⲕ ⲛⲅϣⲛϩⲧⲏⲕ ϩⲁⲥⲓⲱⲛ ϫⲉⲁⲡⲉⲟⲩⲟⲉⲓϣ ϣⲱⲡⲉ ⲛⲅϣⲛϩⲧⲏⲕ ϩⲁⲣⲟⲥ ϫⲉⲁⲡⲕⲁⲓⲣⲟⲥ ⲉⲓ
15 ϫⲉⲁⲛⲉⲕϩⲙϩⲁⲗ ⲟⲩⲉϣⲛⲉⲥⲱⲛⲉ ⲁⲩⲱ ⲥⲉⲛⲁϣⲛϩⲧⲏⲩ ϩⲁⲡⲉⲥⲕⲁϩ
16 ⲛⲧⲉⲛϩⲉⲑⲛⲟⲥ ⲣϩⲟⲧⲉ ϩⲏⲧϥ ⲙⲡⲣⲁⲛ ⲙⲡϫⲟⲉⲓⲥ ⲁⲩⲱ ⲛⲉⲣⲣⲱⲟⲩ ⲙⲡⲕⲁϩ ϩⲏⲧϥ ⲙⲡⲉⲕⲉⲟⲟⲩ
17 ϫⲉⲡϫⲟⲉⲓⲥ ⲛⲁⲕⲉⲧⲥⲓⲱⲛ ⲛϥⲟⲩⲱⲛϩ ⲉⲃⲟⲗ ⲙⲡⲉϥⲉⲟⲟⲩ
18 ⲁϥϭⲱϣⲧ ⲉϫⲙⲡⲉϣⲗⲏⲗ ⲛⲛⲉⲧⲑⲃⲃⲓⲏⲩ ⲁⲩⲱ ⲙⲡϥⲥⲉϣϥⲡⲉⲩⲥⲟⲡⲥ
19 ⲙⲁⲣⲟⲩⲥⲉϩⲡⲁⲓ ⲉⲕⲉϫⲱⲙ ⲁⲩⲱ ⲡⲗⲁⲟⲥ ⲉⲧⲟⲩⲛⲁⲥⲟⲛⲧϥ ⲛⲁⲥⲙⲟⲩ ⲉⲡϫⲟⲉⲓⲥ
20 ϫⲉⲁϥϭⲱϣⲧ ⲉⲃⲟⲗ ⲉϫⲙⲡⲉϥϫⲓⲥⲉ ⲉⲧⲟⲩⲁⲁⲃ ⲡϫⲟⲉⲓⲥ ⲁϥϭⲱϣⲧ ⲉⲃⲟⲗ ϩⲛⲧⲡⲉ ⲉϫⲙⲡⲕⲁϩ
21 ⲉⲥⲱⲧⲙ ⲉⲡⲁϣⲁϩⲟⲙ ⲛⲛⲉⲧⲙⲏⲣ ⲉⲃⲱⲗ ⲉⲃⲟⲗ ⲛⲛϣⲏⲣⲉ ⲛⲛⲉⲛⲧⲁⲩⲙⲟⲟⲩⲧⲟⲩ
22 ⲉϫⲱ ⲙⲡⲣⲁⲛ ⲙⲡϫⲟⲉⲓⲥ ϩⲛⲥⲓⲱⲛ ⲁⲩⲱ ⲡⲉϥⲥⲙⲟⲩ ϩⲛⲧϩⲓⲉⲣⲟⲩⲥⲁⲗⲏⲙ
23 ϩⲙⲡⲧⲣⲉⲛⲗⲁⲟⲥ ⲥⲱⲟⲩϩ ⲉⲩⲙⲁ ⲛⲟⲩⲱⲧ ⲁⲩⲱ ⲛⲉⲣⲣⲱⲟⲩ ⲉⲣϩⲙϩⲁⲗ ⲙⲡϫⲟⲉⲓⲥ
24 ⲁϥⲟⲩⲱϣⲃ ⲛⲁϥϩⲛⲧϩⲓⲏ ⲛⲧⲉϥϭⲟⲙ ϫⲉϫⲱ ⲉⲣⲟⲓ ⲙⲡⲉⲥⲃⲟⲕ ⲛⲛⲁϩⲟⲟⲩ
25 ⲙⲡⲣⲛⲧ ⲉϩⲣⲁⲓ ϩⲛⲧⲡⲁϣⲉ ⲛⲛⲁϩⲟⲟⲩ ⲁⲩⲱ ⲛⲉⲕⲣⲟⲙⲡⲉ ϩⲛⲟⲩϫⲱⲙ ⲛⲛϫⲱⲙ
26 ϫⲓⲛⲧⲉϩⲟⲩⲉⲓⲧⲉ ⲛⲧⲟⲕ ⲡϫⲟⲉⲓⲥ ⲉⲛⲧⲁⲕⲥⲙⲛⲥⲛⲧⲉ ⲙⲡⲕⲁϩ ⲛⲉϩⲃⲏⲩⲉ ⲛⲛⲉⲕϭⲓϫ ⲛⲉ ⲙⲡⲏⲩⲉ
27 ⲛⲧⲟⲟⲩ ⲥⲉⲛⲁϩⲉ ⲉⲃⲟⲗ ⲛⲧⲟⲕ ⲇⲉ ⲕϣⲟⲟⲡ ⲥⲉⲛⲁⲣⲁⲥ ⲧⲏⲣⲟⲩ ⲛⲧϩⲉ ⲛⲟⲩϩⲟⲉⲓⲧⲉ ⲁⲩⲱ ⲕⲛⲁⲥⲉϩⲟⲩⲱⲟⲩ ⲛⲧϩⲉ ⲛⲟⲩⲣϣⲱⲛ ⲛⲥⲉϣⲓⲃⲉ
28 ⲛⲧⲟⲕ ⲇⲉ ⲛⲧⲟⲕ ⲟⲛ ⲡⲉ ⲁⲩⲱ ⲛⲉⲕⲣⲟⲙⲡⲉ ⲛⲁⲱϫⲛ ⲁⲛ
29 ⲛϣⲏⲣⲉ ⲛⲛⲉⲕϩⲙϩⲁⲗ ⲛⲁⲟⲩⲱϩ ϩⲓϫⲙⲡⲕⲁϩ ⲁⲩⲱ ⲡⲉⲩⲥⲡⲉⲣⲙⲁ ⲛⲁⲥⲟⲟⲩⲧⲛ ϣⲁⲉⲛⲉϩ
Psalms 100 · Psalms 102 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)