Read Psalms 102 side by side with translations · The Final Bible
1 ⲡⲁⲇⲁⲩⲉⲓⲇ ⲧⲁⲯⲩⲭⲏ ⲥⲙⲟⲩ ⲉⲡϫⲟⲉⲓⲥ ⲁⲩⲱ ⲛⲉⲧϩⲙⲡⲁⲥⲁ ⲛϩⲟⲩⲛ ⲧⲏⲣⲟⲩ ⲥⲙⲟⲩ ⲉⲡⲉϥⲣⲁⲛ ⲉⲧⲟⲩⲁⲁⲃ
2 ⲧⲁⲯⲩⲭⲏ ⲥⲙⲟⲩ ⲉⲡϫⲟⲉⲓⲥ ⲁⲩⲱ ⲙⲡⲣⲣⲡⲱⲃϣ ⲛⲛⲉϥⲧⲱⲱⲃⲉ ⲧⲏⲣⲟⲩ
3 ⲡⲉⲧⲕⲱ ⲛⲉ ⲉⲃⲟⲗ ⲛⲛⲟⲩⲁⲛⲟⲙⲓⲁ ⲧⲏⲣⲟⲩ ⲡⲉⲧⲧⲁⲗϭⲟ ⲛⲛⲟⲩϣⲱⲛⲉ ⲧⲏⲣⲟⲩ
4 ⲡⲉⲧⲥⲱⲧⲉ ⲙⲡⲟⲩⲱⲛϩ ⲉⲃⲟⲗ ϩⲙⲡⲧⲁⲕⲟ ⲡⲉⲧϯ ⲛⲟⲩⲕⲗⲟⲙ ⲉϫⲱ ⲛⲛⲁϩⲓⲙⲛⲧϣⲁⲛϩⲧⲏϥ
5 ⲡⲉⲧⲧⲥⲓⲟ ⲙⲡⲟⲩⲟⲩⲱϣ ⲛⲁⲅⲁⲑⲟⲛ ⲧⲟⲩⲙⲛⲧⲕⲟⲩⲓ ⲛⲁⲣⲃⲣⲣⲉ ⲛⲧϩⲉ ⲛⲧⲁⲟⲩⲁⲓⲧⲟⲥ
6 ⲡϫⲟⲉⲓⲥ ⲡⲉⲧⲉⲓⲣⲉ ⲛϩⲉⲛⲙⲛⲧⲛⲁ ⲁⲩⲱ ⲡϩⲁⲡ ⲡⲉ ⲛⲟⲩⲟⲛ ⲛⲓⲙ ⲉⲧϫⲏⲩ ⲛϭⲟⲛⲥ
7 ⲁϥⲟⲩⲉⲛϩⲛⲉϥϩⲓⲟⲟⲩⲉ ⲉⲙⲱⲩⲥⲏⲥ ⲛⲉϥⲟⲩⲱϣ ⲉⲛϣⲏⲣⲉ ⲙⲡⲓⲥⲣⲁⲏⲗ
8 ⲟⲩϣⲁⲛⲧϩⲧⲏϥ ⲛⲛⲁⲏⲧ ⲡⲉ ⲡϫⲟⲉⲓⲥ ⲟⲩϩⲁⲣϣϩⲏⲧ ⲡⲉ ⲉⲛⲁϣⲉⲡⲉϥⲛⲁ
9 ⲛϥⲛⲁⲛⲟⲩϭⲥ ⲁⲛ ϣⲁⲃⲟⲗ ⲟⲩⲇⲉ ⲛϥⲛⲁϭⲱⲛⲧ ⲁⲛ ϣⲁⲉⲛⲉϩ
10 ⲛⲧⲁϥⲉⲓⲣⲉ ⲛⲁⲛ ⲁⲛ ⲕⲁⲧⲁⲛⲉⲛⲛⲟⲃⲉ ⲟⲩⲇⲉ ⲛⲧⲁϥⲧⲱⲱⲃⲉ ⲛⲁⲛ ⲁⲛ ⲕⲁⲧⲁⲛⲉⲛⲁⲛⲟⲙⲓⲁ
11 ϫⲉⲕⲁⲧⲁⲡϫⲓⲥⲉ ⲛⲧⲡⲉ ⲉⲃⲟⲗ ϩⲙⲡⲕⲁϩ ⲁⲡϫⲟⲉⲓⲥ ⲧⲁϫⲣⲉⲡⲉϥⲛⲁ ⲉϫⲛⲛⲉⲧⲣϩⲟⲧⲉ ϩⲏⲧϥ
12 ⲕⲁⲧⲁⲧϩⲉ ⲉⲧⲉⲣⲉⲡⲉⲉⲓⲃⲧ ⲟⲩⲏⲩ ⲙⲡⲉⲙⲛⲧ ⲁϥⲧⲣⲉⲛⲉⲛⲁⲛⲟⲙⲓⲁ ⲟⲩⲉ ⲛⲥⲁⲃⲟⲗ ⲙⲙⲟⲛ
13 ⲛⲧϩⲉ ⲉϣⲁⲣⲉⲟⲩⲉⲓⲱⲧ ϣⲛϩⲧⲏϥ ϩⲁⲛⲉϥϣⲏⲣⲉ ⲁⲡϫⲟⲉⲓⲥ ϣⲛϩⲧⲏϥ ϩⲁⲛⲉⲧⲣϩⲟⲧⲉ ϩⲏⲧϥ
14 ϫⲉⲛⲧⲟϥ ⲁϥⲉⲓⲙⲉ ⲉⲡⲉⲛⲡⲗⲁⲥⲙⲁ ⲁⲣⲓⲡⲙⲉⲉⲩⲉ ⲡϫⲟⲉⲓⲥ ϫⲉⲁⲛⲟⲛ ⲟⲩⲕⲁϩ
15 ⲁⲩⲱ ⲛⲧϩⲉ ⲛⲟⲩⲭⲟⲣⲧⲟⲥ ⲛⲉ ⲛⲉϩⲟⲟⲩ ⲙⲡⲣⲱⲙⲉ ⲛⲧϩⲉ ⲛⲟⲩϩⲣⲏⲣⲉ ⲛⲧⲥⲱϣⲉ ⲧⲁⲓ ⲧⲉ ⲧϩⲉ ⲉⲧϥⲛⲁϣⲟⲟⲩⲉ
16 ϫⲉⲁⲡⲉϥⲡⲛⲉⲩⲙⲁ ⲉⲓ ⲉⲃⲟⲗ ⲛϩⲏⲧϥ ⲁⲩⲱ ⲙⲉϥϣⲱⲡⲉ ⲁⲩⲱ ⲙⲉϥⲧⲥⲧⲟϥ ⲉⲥⲟⲩⲉⲙⲡⲉϥⲙⲁ
17 ⲡⲛⲉⲩⲙⲁ ⲇⲉ ⲙⲡϫⲟⲉⲓⲥ ϫⲓⲛⲉⲛⲉϩ ϣⲁⲉⲛⲉϩ ⲡⲉ ⲉϫⲛⲛⲉⲧⲣϩⲟⲧⲉ ϩⲏⲧϥ
18 ⲁⲩⲱ ⲧⲉϥⲇⲓⲕⲁⲓⲟⲥⲩⲛⲏ ⲉϫⲛⲛϣⲏⲣⲉ ⲛⲛϣⲏⲣⲉ ⲛⲛⲉⲧϩⲁⲣⲉϩ ⲉⲧⲉϥⲇⲓⲁⲑⲏⲕⲏ ⲁⲩⲱ ⲉⲧⲉⲓⲣⲉ ⲙⲡⲙⲉⲉⲩⲉ ⲛⲛⲉϥⲉⲛⲧⲟⲗⲏ ⲉⲁⲁⲩ
19 ⲁⲡϫⲟⲉⲓⲥ ⲥⲃⲧⲉⲡⲉϥⲑⲣⲟⲛⲟⲥ ϩⲛⲧⲡⲉ ⲁⲩⲱ ⲧⲉϥⲙⲛⲧⲣⲣⲟ ⲟ ⲛϫⲟⲉⲓⲥ ⲉϫⲛⲟⲩⲟⲛ ⲛⲓⲙ
20 ⲥⲙⲟⲩ ⲉⲡϫⲟⲉⲓⲥ ⲛⲉϥⲁⲅⲅⲉⲗⲟⲥ ⲧⲏⲣⲟⲩ ⲛϫⲱⲱⲣⲉ ϩⲛⲧⲉⲩϭⲟⲙ ⲉⲧⲉⲓⲣⲉ ⲙⲡⲉϥϣⲁϫⲉ ⲉⲥⲱⲧⲙ ⲉⲡⲉϩⲣⲟⲟⲩ ⲛⲛⲉϥϣⲁϫⲉ
21 ⲥⲙⲟⲩ ⲉⲡϫⲟⲉⲓⲥ ⲛⲉϥϭⲟⲙ ⲧⲏⲣⲟⲩ ⲛⲉϥϣⲙϣⲓⲧ ⲉⲧⲉⲓⲣⲉ ⲙⲡⲉϥⲟⲩⲱϣ
22 ⲥⲙⲟⲩ ⲉⲡϫⲟⲉⲓⲥ ⲛⲉϥϩⲃⲏⲩⲉ ⲧⲏⲣⲟⲩ ϩⲙⲙⲁ ⲛⲓⲙ ⲛⲧⲉϥⲙⲛⲧϫⲟⲉⲓⲥ ⲧⲁⲯⲩⲭⲏ ⲥⲙⲟⲩ ⲉⲡϫⲟⲉⲓⲥ
Psalms 101 · Psalms 103 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)